• Dirava ese ia abia hidi. “Lauegu King do lau atoa . . . Lau ese bese idauidau ibounai, be oi dekenai do lau henia. Tanobada ibounai oi dekenai do lau henia.”​—Salamo 2:6, 8.

• King Davida ena gabu ia abia. “Ita totona natuna ta ia vara, Dirava ese ita dekenai, natuna mero do ia henia . . . Iena King siahuna, be do ia bada daekau lao, bona iena basileia be nega ibounai, mai maino danu do ia noho. Ia ese Davida ena king siahuna do ia abia, bona ia ese Davida ena basileia, do ia haginia.”​—⁠Isaia 9:6, 7.

• Betelehema ai ia vara. ‘Betelehema . . .  oi dekena amo Lohia Badana ta do ia vara, . . . bese idauidau taudia ibounai ese iena Lohia ena siahu do idia diba.’​—Mika 5:2, 4.

• Taunimanima ese idia dadaraia bona idia hamasea. “Ita ura henia lasi, bona ita ese ia ita matauraia lasi. . . . Iseda kara dika dainai, idia haberoa, bona iseda kerere dainai, idia hisihisi henia.”​—Isaia 53:3, 5.

• Mase amo ia toreisi lou bona Dirava ese hairai ia henia. “Oi Lohiabada ese, lau oi rakatania lasi. Mase taudia edia gabu dekena amo, oi ese lau oi gimaia noho. Bona oi ese oiemu Helaga Tauna do oi naria, ia ese mase ena bodaga do ia davaria lasi. . . . Inai moale do ia noho ela bona hanaihanai.”​—Salamo 16:10, 11.

Taunimanima edia histori lalonai, tau tamona sibona be idia gwauraia Lohia Tauna hereadaena; unai be Iesu Keriso. Unai dainai, aneru ta ese iena sinana, Maria ia hamaoroa: “Dirava ese ia dekenai ena tamana Davida ena terona do ia henia, . . . bona ena Basileia be do ia doko lasi.”​—Luka 1:31-33.

Iesu be nega ta tanobada ai lohia tauna ai ia lao lasi. To, guba ai Dirava ena Basileia ena King ai ia lao bona guba amo taunimanima do ia lohiaia. Edena dala ai ia be Lohia Tauna hereadaena? Mani Iesu be tanobada ai ia noho neganai, ia karaia karadia ita herevalaia.

•   Iesu be taunimanima ia lalodia bada. Iesu ese tatau bona hahine, matamata bona buruka, ena be edia mauri dalana be idauidau eiava idia be taga eiava ogogami, to ia durudia. (Mataio 9:36; Mareko 10:16) Lepera tauna ta ia noinoi, ia gwau: “Bema oi ura, lau oi hanamoa diba,” Iesu ese mai hebogahisi ida ena gorere ia hanamoa.​—Mareko 1:40-42.

• Iesu ese ita dekenai Dirava hamoalea dalana ia hadibaia. Ia gwau: “Dirava bona Taga edia hesiai gaukara umui karaia diba lasi.” Danu, ia gwau ma haida ita kara henia hegeregerena, ita ura ita dekenai danu unai bamona do idia karaia​—unai be hakaua hereva namona ta. Danu, Iesu ia hahedinaraia Dirava ese ita karaia gaudia sibona ia laloa lasi to iseda laloa dalana bona hemami danu. So Dirava ita hamoalea totona, iseda hemami ita biagua be namo. (Mataio 5:28; 6:24; 7:12) Iesu ia hahedinaraia moale korikori ita davaria totona, Dirava ena ura ita dekenai be dahaka ita dibaia bona unai do ita karaia be namo.​—Luka 11:28.

• Iesu be haida lalokau henia karana ena anina ia hadibaia. Iesu ena hereva bona kara be mai ena siahu dainai, kamonai taudia edia kudouna ia hamarerea. “Hutuma be ena hadibaia dalana dekenai idia hoa bada, badina ia be edia taravatu hadibaia taudia bamona ia hadibaia lasi, to mai siahu ida ia hadibaia.” (Mataio 7:28, 29) Idia ia hadibadia: “Emui inai taudia do umui lalokau henia.” Danu ena mase dalana idia karaia taudia haida totona ia guriguri, ia gwau: “Tamagu e, edia dika oi gwauatao, badina idia diba lasi dahaka idia karaia noho.”​—Mataio 5:44; Luka 23:34.

Iesu be hegeregere momokani tanobada ia Lohiaia, badina ia be durua tauna namona bona hebogahisi tauna. To edena negai do ia lohia matamaia