Iesu ia gwau: “Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona tano mareremarere badadia do idia vara, gabu idauidau ai daihanai goreredia, bona hitolo bada do idia vara.” (Luka 21:10, 11) Unai gau ibounai ese toa badana ta idia hahedinaraia. Unai gau ibounai be nega tamona ai idia vara neganai, do ita diba “Dirava ena Basileia be ia kahirakahira.” Tanobada hegegemadai, unai bamona gaudia be nega tamona ai idia vara noho, a? Inai hamomokania gaudia haida laloa.

1. TUARI

Lagani 1914 ai, ia vara tuari badana ta ese taunimanima bona gabu momo ia hadikaia, guna idia vara tuari bamona lasi! Histori torea taudia idia gwau, lagani 1914 be taunimanima edia mauri ia haidaua laganina, badina unai be nega ginigunana tanobada ibounai ai unai bamona tuari ia vara. Unai tuari ai, tuari tanika, peleini amo idia negea niuklia bomu, ipidi badadia, gesi dikadia, bona tuari kohudia ma haida idia gaukaralaia matamaia. Unai murinai, tuari iharuana ia vara bona atom amo idia karaia tuari kohudia idia gaukaralaia matamaia. Lagani 1914 amo, gabu idauidau ai taunimanima be idia tuari noho bona unai tuari idauidau dainai, taunimanima milioni momo idia mase.

2. TANO MAREREMARERE

Buka ta, Britannica Academic ia gwau, lagani ta ta ai tano mareremarere badadia 100 bamona idia vara, unai ese “dika bada” herea ia havaraia. Bona United States Geological Survey ena ripoti ia gwau, “rekodi gunadia (lagani 1900 amo ema bona hari) ese idia hahedinaraia, tano mareremarere badadia 16 bamona be idia gwauraia laganidia ai idia vara.” Haida idia laloa tano mareremarere momo idia vara dainai taunimanima be unai tano mareremarere idia davaria haraga diba ena masini idauidau idia abia be namo, to momokani tanobada ibounai ai idia vara tano mareremarere badadia ese hisihisi bona mase idia havaraia noho, guna bamona lasi.

 3. HITOLO BADA

Tanobada hegegemadai, hitolo bada idia vara ena badina be tuari, kara koikoi, moni ena hekwakwanai, uma bona animal naria namonamo lasi karana, eiava abata bona medu negadiai palani namona idia karaia lasi. The World Food Programme 2018 “Year in Review” ia gwau: “Tanobada hegegemadai, taunimanima 821 milioni be idia hitolo noho bona 124 milioni be hitolo dainai idia mase.” Lagani ta ta ai, aniani namonamo lasi karana dainai natudia 3.1 milioni bamona idia mase. Unai dainai, lagani 2011 ai, tanobada hegegemadai natudia 45 pesen bamona be idia mase.

4. GORERE IDAUIDAU BONA DAIHANAI GOREREDIA

World Health Organization ena buka ta ia gwau: “Hari inai negai, daihanai gorere badadia haida idia vara vadaeni. Guna idia vara gorere hegeregere, cholera, gorere dikadia bona yellow fever be hari idia hedinarai lou, bona gorere matamatadia hegeregere, SARS (Severe acute respiratory syndrome), pandemic influenza, MERS (Middle East respiratory syndrome), Ebola bona Zika idia hedinarai.” COVID-19 pendemik be gorere matamatana. Ena be saiens bona doketa taudia ese gorere idauidau idia diba namonamo, to hanamoa dalana be idia diba lasi.

5. TANOBADA HEGEGEMADAI HARORO GAUKARANA

Iesu ese toa ma ta ia gwauraia hedinarai, ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mataio 24:14) Ena be taunimanima be hekwakwanai idauidau idia davaria noho, to bese ibounai amo taunimanima 8 milioni mai kahana ese gado 1,000 mai kahana idia gaukaralaia, Dirava ena Basileia ena sivarai namona be tano 240 dekenai idia harorolaia noho. Taunimanima edia histori lalonai unai bamona ia vara lasi.

Iesu ia herevalaia toa be hari idia vara noho gaudia ese idia hamomokania. Dahaka dainai unai hamomokanina gauna ita laloa bada be namo? Badina Iesu ia gwau: “Umui danu be unai gaudia idia vara umui itaia neganai, umui diba Dirava ena Basileia be ia kahirakahira.”​—Luka 21:31.

Iesu ese ia gwauraia toa bona Baibel chronology ai ia hahedinaraia gaudia, ese ita ia durua ita laloparara lagani 1914 a ai, Dirava ese guba dekenai ena Basileia ia haginia. Unai negai, ena Natuna, Iesu Keriso be King ai ia halaoa. (Salamo 2:2, 4, 6-9) Kahirakahira, Dirava ena Basileia ese tanobada do ia lohiaia bona tanobada ena gavamani ibounai do ia kokia bona tanobada be paradaiso ai do ia halaoa bona taunimanima be do idia mauri hanaihanai.

Danu, Iesu ese ena hahediba taudia dekenai ia hadibaia guriguri do ia guguru: “Oiemu Basileia do ia mai. Oiemu ura gauna tanobada dekenai do ia vara, guba dekenai ia vara bamona.” (Mataio 6:10) Dirava ena Basileia be lagani 1914 amo ia lohia matamaia neganai, dahaka ia karaia noho? Bona Dirava ena Basileia ese taunimanima ia lohiaia neganai, dahaka hahenamo do ia moalelaia?