1. Ano ang ginbatyag ni apostol Pablo parte sa mga ministeryal nga alagad?

 IMPORTANTE gid ang mga hilikuton nga ginahimo sang mga ministeryal nga alagad sa kongregasyon. Gani, ginpabaloran gid ni apostol Pablo ining matutom nga mga lalaki. Halimbawa, sang ginsulatan niya ang mga Cristiano sa Filipos, ginsambit gid niya ang mga ministeryal nga alagad lakip sa mga gulang.​—Fil. 1:1.

2. Ano ang ginabatyag sang isa ka brother nga si Luis parte sa iya asaynment bilang isa ka ministeryal?

² Nalipay gid ang madamo nga bawtismado nga mga brother, pamatan-on man ukon tigulang, nga magbulig sa kongregasyon bilang mga ministeryal. Halimbawa, nangin ministeryal si Devan sang 18 anyos sia. Sa bahin naman ni Luis, sobra 50 ang iya edad sang nangin ministeryal sia. Ano ang ginabatyag niya parte sa iya asaynment bilang isa ka ministeryal? Nagsiling sia: “Nalipay gid ako mag-alagad sa akon mga kauturan bilang isa ka ministeryal. Palangga gid nila ako, kag gusto ko ipakita sa ila nga palangga ko man sila.” Madamo nga ministeryal ang amo man sini ang ginabatyag.

3. Ano nga mga pamangkot ang binagbinagon naton?

³ Kon isa ikaw ka bawtismado nga brother kag indi ka pa ministeryal, puede mo bala ini himuon nga goal ukon tulumuron? Ano ang puede magpalig-on sa imo nga panikasugan nga mangin isa ka ministeryal? Kag ano nga mga kinaiya ang ginasiling sang Biblia nga dapat mo ipakita para mangin isa ikaw ka ministeryal? Binagbinagon naton sa sini nga artikulo ang mga sabat sa sini nga mga pamangkot. Pero, binagbinagon anay naton kon ano ang ginahimo sang mga ministeryal.

 ANO ANG GINAHIMO SANG MGA MINISTERYAL?

4. Ano ang ginahimo sang mga ministeryal? (Tan-awa man ang piktyur.)

⁴ Ang ministeryal nga alagad isa ka bawtismado nga brother nga gintangdo sang balaan nga espiritu para buligan ang mga gulang sa paghimo sang madamo nga importante nga mga hilikuton sa kongregasyon. Ginasigurado sang pila ka ministeryal nga may ara teritoryo ang mga kauturan sa ila pagministeryo kag bastante ang ila publikasyon. Nagabulig naman ang iban sa pagpaninlo kag pagmentinar sang Kingdom Hall. Nagaalagad man ang mga ministeryal bilang mga atendant, kag naga-operate sila sang mga gamit para sa audio kag video sa miting sang kongregasyon. Importante gid ini tanan nga mga hilikuton. Pero ang pinakaimportante, espirituwal nga mga tawo ang mga ministeryal. Palangga gid nila si Jehova kag ginatuman nila ang iya matarong nga mga kasuguan. Kag palangga gid nila ang ila mga kauturan. (Mat. 22:​37-39) Paano mangin ministeryal ang isa ka bawtismado nga brother?

5. Ano ang dapat himuon sang isa ka brother para mangin isa sia ka ministeryal?

⁵ Mabasa sa Biblia ang mga kinaiya nga dapat ipakita sang isa ka brother para mangin isa sia ka ministeryal. (1 Tim. 3:​8-10, 12, 13) Kon gusto mo mangin isa ka ministeryal, tun-i sing maayo ini nga mga kinaiya kag panikasugi nga ipakita ini. Pero, dapat mo anay binagbinagon sing maayo ang imo motibo kon ngaa gusto mo mangin isa ka ministeryal.

NGAA GUSTO MO MANGIN ISA KA MINISTERYAL?

6. Ano dapat ang imo motibo kon ngaa gusto mo mag-alagad sa imo mga kauturan? (Mateo 20:28; tan-awa man ang piktyur.)

⁶ Hunahunaa ang aton pinakamaayo nga halimbawa nga si Jesucristo. Ang gugma niya sa iya Amay kag ang gugma niya sa mga tawo amo ang iya motibo sa tanan niya nga ginahimo. Ini nga gugma amo ang nagpalig-on sa iya nga magsakripisyo kag himuon ang mga hilikuton nga ginapakanubo sang iban. (Basaha ang Mateo 20:28; Juan 13:​5, 14, 15) Kon gugma ang imo motibo, pakamaayuhon ka ni Jehova kag buligan ka niya nga mangin isa ka ministeryal.​—1 Cor. 16:14; 1 Ped. 5:5.

7. Kon ginapanikasugan sang isa ka brother nga mangin ministeryal kay gusto lang niya nga dayawon sia sang iban, ngaa indi ini husto nga motibo?

⁷ Sa kalibutan, ginadayaw ang mga tawo nga nagapanikasog nga mangin pinakamaayo sa ila mga  ginahimo. Pero lain ang katawhan ni Jehova. Pareho kay Jesus, kon gugma man ang motibo sang isa ka brother sa iya mga ginahimo, indi niya paghandumon nga mangin mas mataas ukon mas importante sangsa iban. Handa man sia nga himuon ang mga hilikuton nga ginapakanubo sang iban para maatipan sing maayo ang hamili nga mga karnero ni Jehova. Pero, kon isa ka ambisyuso nga tawo ang hatagan sang pribilehiyo sa kongregasyon, posible gid nga indi niya paghimuon ini nga mga hilikuton. Kag posible hunahunaon niya nga indi sia ang dapat maghimo sini nga mga hilikuton kay isa sia ka importante nga tawo. (Juan 10:12) Indi pagpakamaayuhon ni Jehova ang mga pagpanikasog sang isa ka bugalon ukon ambisyuso nga tawo.​—1 Cor. 10:​24, 33; 13:​4, 5.

8. Ano ang ginlaygay ni Jesus sa iya mga apostoles?

⁸ May mga tion nga gusto sang suod nga mga abyan ni Jesus ang pila ka pribilehiyo, pero indi husto ang ila motibo. Binagbinaga ang ginhimo sang duha ka apostoles ni Jesus nga si Santiago kag si Juan. Ginpangabay nila si Jesus nga hatagan sila sang importante nga posisyon sa iya Ginharian. Gindayaw bala sila ni Jesus bangod ginpangabay nila ini? Wala. Sa baylo, ginsilingan niya ang tanan niya nga 12 ka apostoles: “Ang luyag mangin labaw sa inyo mangin alagad ninyo, kag ang luyag mangin una sa inyo mangin ulipon sang tanan.” (Mar. 10:​35-37, 43, 44) Pagpakamaayo gid sa kongregasyon ang mga brother nga may husto nga motibo, ukon gusto nila mangin ministeryal kay gusto nila mag-alagad sa ila mga kauturan.​—1 Tes. 2:8.

PAANO MO MAPABASKOG ANG IMO HANDUM NGA MAG-ALAGAD SA IBAN?

9. Paano mo mapabaskog ang imo handum nga mag-alagad sa imo mga kauturan?

⁹ Sigurado gid nga palangga mo si Jehova kag gusto mo mag-alagad sa iban. Pero, posible nga daw wala ka sing handum nga himuon ang mga hilikuton sang isa ka ministeryal. Paano mo mapabaskog ang imo handum nga mag-alagad sa iban? Hunahunaa ang kalipay nga imo mabatyagan kon mag-alagad ka sa imo mga kauturan. Nagsiling si Jesus: “Mas malipayon ang nagahatag sangsa nagabaton.” (Binu. 20:35) Ginhimo gid ni Jesus ining iya ginsiling, kag nalipay gid sia bangod nag-alagad sia sa iban. Kon himuon mo man ini, sigurado gid nga mangin malipayon ka man.

10. Paano ginpakita ni Jesus nga nalipay sia mag-alagad sa iban? (Marcos 6:​31-34)

¹⁰ Binagbinaga kon paano ginpakita ni Jesus nga nalipay sia mag-alagad sa iban. (Basaha ang Marcos 6:​31-34.) Isa ka bes, nakapoy si Jesus kag ang iya mga apostoles. Gani, nagkadto sila sa isa ka malinong nga lugar para magpahuway. Pero nag-una didto ang madamo nga tawo kay gusto nila nga tudluan sila ni Jesus. Puede kuntani sila silingan ni Jesus nga wala sia sing tion para tudluan sila. Kay man, ‘wala gani sing tion si Jesus kag ang iya mga kaupod bisan sa pagkaon.’ Puede man nga isa ukon duha lang ka kamatuoran ang itudlo ni Jesus para makapauli dayon ang mga tawo. Pero bangod sang iya gugma, “gintudluan niya sila sing madamo nga butang.” Kag gintudluan niya sila asta “sang hapon na gid.” (Mar. 6:35) Ginhimo niya ini, indi bangod obligado sia nga himuon ini, kundi bangod “naluoy sia sa ila.” Gusto niya nga tudluan sila bangod palangga niya sila. Ginpakita ni Jesus nga nalipay gid sia mag-alagad sa iban.

11. Paano ginbuligan ni Jesus ang mga tawo sa praktikal nga paagi? (Tan-awa man ang piktyur.)

¹¹ Magluwas nga ginbuligan ni Jesus ang mga tawo paagi sa pagtudlo sa ila parte sa Dios, ginbuligan man niya sila sa praktikal nga paagi. Paagi sa isa ka milagro, nag-aman sia sang pagkaon kag ginsugo niya ang iya mga disipulo nga ipanagtag ini sa mga tawo. (Mar. 6:41) Paagi sa paghimo sini, gintudluan niya ang iya mga disipulo kon paano mag-alagad sa iban. Ginpakita man niya sa ila nga importante ang pag-alagad sa iban sa praktikal nga paagi, nga amo sa masami ang ginahimo sang mga ministeryal. Imadyina ang kalipay nga nabatyagan sang mga apostoles bangod  nakabulig sila sa pagpanagtag sang pagkaon nga gin-aman ni Jesus asta nga ‘nakakaon sila tanan kag nabusog.’ (Mar. 6:42) Siempre, indi lang amo sini ang tion nga ginpakita ni Jesus nga gin-una niya ang kaayuhan sang iban. Ang matuod, gingamit niya ang bilog niya nga kabuhi sa duta para mag-alagad sa mga tawo. (Mat. 4:23; 8:16) Nalipay gid si Jesus sa pagtudlo kag pagbulig sa iban. Mabatyagan mo man ini nga kalipay kon mangin handa ka sa pag-alagad sa iban bilang isa ka ministeryal.

12. Ngaa indi naton dapat paghunahunaon nga wala kita sing mabulig sa kongregasyon?

¹² Kon pamatyag mo wala ka sing pinasahi nga ikasarang, indi ka dapat maluyahan sang buot. Sigurado gid nga may mga kinaiya ka nga puede mo gamiton sa pagbulig sa kongregasyon. Pamalandungi ang ginsiling ni Pablo sa 1 Corinto 12:​12-30, kag pangabaya si Jehova nga buligan ka nga makita ang imo ikasarang. Maathag sa ginsiling ni Pablo nga importante ang tanan nga alagad ni Jehova kag may mabulig gid ang kada isa. Gani, may puede ka gid himuon para sa kongregasyon. Kon indi ka pa kalipikado nga mangin isa ka ministeryal subong, indi ka dapat maluyahan sang buot. Sa baylo, himua ang imo bug-os nga masarangan sa pag-alagad kay Jehova kag sa pagbulig sa imo mga kauturan. Makasalig ka nga ginabinagbinag sang mga gulang ang imo mga ikasarang, kag hatagan ka nila sang mga asaynment nga masarangan mo.​—Roma 12:​4-8.

13. Kon parte sa mga kinaiya nga dapat ipakita sang gintangdo nga mga lalaki, sila lang bala ang dapat magpakita sang kalabanan sa sini? Ipaathag.

¹³ Binagbinaga ining isa pa ka rason kon ngaa dapat mo panikasugan nga mangin isa ka ministeryal: Dapat ipakita sang tanan nga Cristiano ang kalabanan sa mga kinaiya nga dapat ipakita sang mga ministeryal. Ang matuod, dapat panikasugan sang tanan nga Cristiano nga mangin suod kay Jehova, dapat mangin malipayon sila sa paghatag sa iban, kag dapat mangin maayo sila nga halimbawa sa ila pagkabuhi. Ti, paano mapakita sang isa ka brother nga ginapanikasugan niya nga mangin isa ka ministeryal?

PANIKASUGI NGA IPAKITA INI NGA MGA KINAIYA

14. Ano ang buot silingon sang ekspresyon nga “mangin serioso”? (1 Timoteo 3:​8-10, 12)

¹⁴ Binagbinagon naton ang pila sa mga kinaiya nga ginsambit sa 1 Timoteo 3:​8-10, 12. (Basaha.) Ang isa ka ministeryal dapat “mangin serioso.” Ini nga ekspresyon puede man i-translate nga “nagakadapat respetuhon,” “pormal,” ukon “dungganon.” Wala ini nagapahangop nga indi ka gid puede magkadlaw ukon maglahog.  (Man. 3:​1, 4) Pero, nagapahangop ini nga dapat mo seriosohon ang tanan mo nga responsibilidad. Kon ginatapos mo ang imo mga asaynment kag ginahimo mo ini sing maayo, makita sang mga kauturan nga masaligan ka kag respetuhon ka nila.

15. Ano ang buot silingon sang mga ekspresyon nga “indi duha sing hinambalan” kag sang “wala nagatinguha nga mamentaha sa makagod kag indi bunayag nga paagi”?

¹⁵ Ang ekspresyon nga “indi duha sing hinambalan” nagapahangop nga sinsero ka, honest, kag masaligan. Ginatuman mo gid kon ano ang imo ginsiling, kag wala ka nagapanglimbong. (Hulu. 3:32) Ang ekspresyon nga “wala nagatinguha nga mamentaha sa makagod kag indi bunayag nga paagi” nagakahulugan nga honest ka sa imo negosyo kag sa pag-uyat sang kuarta. Wala ka nagapamentaha sa imo mga abyan sa kongregasyon para lang makaginansia ka sing daku.

16. (a) Ano ang buot silingon sang ekspresyon nga “indi palainom sing alak”? (b) Ano ang buot silingon sang ekspresyon nga “matinlo nga konsiensia”?

¹⁶ Ang ekspresyon nga “indi palainom sing alak” nagakahulugan nga wala ka nagapatama inom sang makahulubog nga ilimnon ukon wala ka sang reputasyon nga grabe ka paimnon. Ang ekspresyon nga “matinlo nga konsiensia” nagakahulugan nga ginatuman mo ang matarong nga mga kasuguan ni Jehova. Bisan pa indi ka perpekto, malinong ang imo hunahuna bangod may maayo ka nga kaangtanan sa Dios.

17. Ano ang buot silingon sang ekspresyon nga “tilawan anay kon bala takus sila”? (1 Timoteo 3:10; tan-awa man ang piktyur.)

¹⁷ Ang ekspresyon nga “tilawan anay kon bala takus sila” nagakahulugan nga napakita mo na nga ginahimo mo sing maayo ang imo mga responsibilidad. Gani, kon hatagan ka sang mga gulang sang asaynment, sunda sing maayo ang ila mga instruksion kag ang mga guidelines halin sa organisasyon. Siguraduha nga nahangpan mo kon ano ang dapat mo himuon sa imo asaynment kag kon san-o mo ini tapuson. Kon ginahimo mo sing maayo ang imo mga asaynment, matalupangdan ini sang mga kauturan kag malipay sila sa imo pag-uswag. Mga gulang, hanasa ninyo ang bawtismado nga mga brother. (Basaha ang 1 Timoteo 3:10.) May bawtismado bala nga mga brother sa inyo kongregasyon nga nagaedad sing 14 anyos ukon mas bata pa? Maayo bala sila nga halimbawa sa ila personal nga pagtuon kag ginahandaan bala nila sing maayo ang mga miting? Regular bala sila nga nagakomento kag nagabantala? Kon huo, hatagi sila sang mga asaynment nga masarangan nila base sa ila edad kag kahimtangan. Paagi sa sini, ‘matilawan’ ining pamatan-on nga mga brother “kon bala takus sila.” Pagligad  sang tion, posible gid nga puede na sila mangin ministeryal bisan wala pa sila mag-20 anyos ukon bisan 17 anyos pa lang sila.

18. Ano ang buot silingon sang ekspresyon nga ‘hilway sa panumbungon’?

¹⁸ Ang ekspresyon nga ‘hilway sa panumbungon’ nagakahulugan nga wala ka sing may ginhimo nga malain nga puede iakusar sa imo. Siempre, posible akusahan sing indi matuod ang mga Cristiano. Indi matuod ang mga ginsumbong sang mga tawo kay Jesus, kag nagtagna sia nga maeksperiensiahan man ini sang iya mga disipulo. (Juan 15:20) Pero pareho kay Jesus, kon ginapanikasugan mo nga indi maghimo sing malain, mangin maayo ang imo reputasyon sa kongregasyon.​—Mat. 11:19.

19. Ano ang buot silingon sang ekspresyon nga “isa lang ang asawa”?

¹⁹ “Isa lang ang asawa.” Kon may asawa ka, dapat mo sundon ang ginsiling ni Jehova nga para lang sa isa ka lalaki kag isa ka babayi ang pag-asawahay. (Mat. 19:​3-9) Gani, indi gid dapat maghimo sang seksuwal nga imoralidad ang isa ka Cristiano nga lalaki. (Heb. 13:4) Ginapahangop man sini nga dapat ka mangin mainunungon sa imo asawa. Gani, indi mo gid dapat pagpakitaan sang indi nagakaigo nga atension ang iban nga babayi.​—Job 31:1.

20. Paano mapakita sang isa ka brother nga ‘ginadumalahan niya sing maayo’ ang iya panimalay?

²⁰ “Nagadumala sing maayo sa ila mga anak kag panimalay.” Kon isa ikaw ka ulo sang pamilya, dapat mo seriosohon ang imo mga responsibilidad. Himua sing regular ang inyo family worship. Updi sa pagbantala ang kada miembro sang imo pamilya sa bug-os mo nga masarangan. Buligi ang imo kabataan nga mangin suod pa gid kay Jehova. (Efe. 6:4) Kon ginadumalahan sing maayo sang isa ka lalaki ang iya pamilya, ginapakita sini nga masarangan niya nga atipanon sing maayo ang kongregasyon.​—Ipaanggid ang 1 Timoteo 3:5.

21. Kon indi ka pa ministeryal subong, ano ang puede mo himuon?

²¹ Kon isa ikaw ka brother kag indi ka pa ministeryal subong, palihug binagbinaga sing maayo ini nga artikulo kag mangamuyo kay Jehova. Tun-i ang mga kinaiya nga dapat ipakita sang mga ministeryal kag panikasugi nga ipakita ini. Pamalandungi kon daw ano mo ka palangga si Jehova. Palanggaa pa gid ang imo mga kauturan kag hunahunaa kon ngaa gusto mo mag-alagad sa ila. (1 Ped. 4:​8, 10) Panikasugi nga mangin isa ka ministeryal para mabatyagan mo ang kalipay sa pag-alagad sa imo mga kauturan. Kabay pa nga pakamaayuhon ni Jehova ang ginahimo mo nga mga pagpanikasog para mangin isa ikaw ka ministeryal.​—Fil. 2:13.