OBHEASACHO LEKH 46
GIT 49 Jehovachem Kalliz Khuxal Korum-ia
Bhavamno—Tumi Sobheche Sevok Zaunk Vavr Kortat Kai?
“Gheunchea poros diunk chodd khuxalkai melltta.”—ITIHAS 20:35.
MUKHEL MUDʼDO
Sobheche sevok zaunk vavr korunk bautizm ghetlolea bhavank ho lekh modot kortolo.
1. Apostl Pauluk sobhechea sevokam vixim koxem distalem?
SOBHECHE sevok sobhent khub mhotvachim kamam kortat. Hea pasot, apostl Paulu hea visvaxi bhavancho khub valor kortalo. Udharonnak, tannem Filipint aslolea Kristanvank chitt boroili tednam, sobhechi dekhrekh kortoleam sangata tannem sobhechea sevokancho pasun ugddas kelo.—Filp. 1:1.
2. Sobhecho sevok mhunn seva korchea vixim Luis nanvacho ek bhav kitem sangta?
2 Bautizm ghetlole zaite bhav, te tornnatte zaum vo zanntte, tankam bhav-bhoinnanchi seva korunk khub khuxalkai bhogta. Udharonnak, Daniel a nanvachea eka bhavak, 18 vorsanche piraier sobhecho sevok mhunn nemlo. Ani Luis nanvachea eka bhavak, to 50-am poros chodd piraiecho aslo tednam sobhecho sevok mhunn nemlo. To sangta: “Sobhentlea bhav-bhoinnamnim mhaka khub mog dakhoilo. Tor atam sobhecho sevok zaun tanchi seva korop ek vhodd sueog mhunn hanv lekhtam!” Ani zaitea sobhechea sevokank bhav Luis-a bhaxenuch dista.
3. Hea lekhant ami kitem polloitolim?
3 Tum ek bautizm ghetlolo bhav zalear, sobhecho sevok zaunk tunvem vavr korunk zata kai? Oxem korunk tuka kitem fuddem kaddttolem? Ani hi zobabdari samballunk tuka kosle gunn asonk zai mhunn Bible sangta? Hea prosnanche zobab ami hea lekhant polloitolim. Punn poilim ami, sobhechea sevokank kosleo zobabdareo astat tem polloum-ia.
SOBHECHEA SEVOKANK KOSLEO ZOBABDAREO ASTAT?
4. Eka sobhechea sevokak kosleo zobabdareo astat? (Chitr pasun polloiat.)
4 Sobhecho sevok bautizm ghetlolo ek bhav asta, zaka povitr xokte vorvim nemtat. Ani to sobhechim zaitim mhotvachim kamam korunk vhoddilank tenko dita. Koslim kamam? Thoddea sobhechea sevokank porgottnne pasot vattaranchi, toxench prokaxonanchi manddavoll korchi zobabdari asta. Tea bhair thoddea zannank, Raj-ghor nitoll korunk ani samballunk zobabdari asta. Toxench, te attendant mhunn seva kortat ani mittinge vellar audio-video-chem kam kortat. Ani sogleam-von mhotvachem mhunnttlear, sobheche sevok Jehovacho khub mog kortat ani tachea dorjeam pormonnem jietat. Titlench nhoi, te bhav-bhoinnancho pasun khub mog kortat. (Mt. 22:37-39) Tor bautizm ghetlolea eka bhavan, sobhecho sevok zaunk koso vavr korunk zata?
Sobheche sevok ap-khuxen dusreanchi seva korun Jezuchi dekh ghetat (Peregraf 4 polloiat)
5. Sobhecho sevok zaunk eka bhavan kitem korunk zai?
5 Ek sobhecho sevok zaunk, bhavank koslea gunnanchi goroz asa tem amkam Bible-ant sanglam. (1 Tim. 3:8-10, 12, 13) Tor sobhecho sevok zaun tumi tumchea bhav-bhoinnanchi seva korunk sodhtat zalear, hea gunnam vixim zata titlem xikat ani te vaddounk vavr korat. Punn sobhecho sevok zaunk tumcho hetu kitem asa tem poilim zannam zaiat.
SOBHECHO SEVOK ZAUNK TUKA KITEM FUDDEM KADDTTOLEM?
6. Tunvem koslea karonnak lagon bhav-bhoinnanchi seva korunk fuddem soronk zai? (Matev 20:28; chitr pasun polloiat.)
6 Jezun amkam ek ekdom borem udharonn dovorlam. To jem kitem kortalo tachea udexim, to aplea Bapacho ani lokancho mog kortalo mhunn dison ietalem. Tea moga pasot to khub vavr kortalo ani dusreanche nodren kainch valor na toslim kamam korunk pasun to fuddem sortalo. (Matev 20:28 vachat; Ju. 13:5, 14, 15) Teach bhaxen, tum Jezuchi dekh gheun moga pasot soglem korta zalear, Jehova tujer besanv ghaltolo ani ek sobhecho sevok zaunk goroz te gunn vaddounk tuka modot kortolo.—1 Kor. 16:14; 1 Ped. 5:5.
Jezun ek borem udharonn dovrun, aplea apostlank podvi melloun gheunk nhoi, punn khaltikaien dusreanchi seva korunk xikoile (Peregraf 6 polloiat)
7. Eka bhavan podvi melloun gheunchea axen sobhecho sevok zaunk fuddem sorop kiteak chukichem zaun asa?
7 Aiz sonvsaracho lok oslea munxancho khub valor kortat, je svotak mhotvache mhunn lekhtat, vo apunnuch vhodd mhunn chintʼtat. Punn Jehovache lok toxem korinant. Jezu bhaxen, dusreancho mog korta toslo ek bhav, apunn dusreancher odhikar choloitolo vo dusreamnim taka mhotvacho mhunn lekhunk zai oxem kednanch chintina. Apnnak podvi melloun gheunk sodhta, toslea eka bhavak sobhecho sevok mhunn nemlo zalear, dusrim titlim valorachim nhoi mhunn chintʼtat toslim kamam korunk vo Jehovachea moladik menddranchi seva korunk to ghoddie fatti sortolo. Karonn tim kamam aplim nhoi oxem taka disot. (Ju. 10:12) Ani oslea gorvixtt munxachea vavracher Jehova kednanch besanv ghalchona!—1 Kor. 10:24, 33; 13:4, 5.
8. Jezun aplea apostlank koslo solʼlo dilo?
8 Thodde pavtti, Jezuche lagxilʼle ixtt zobabdareo melloun gheunk fuddem sorle tednam tancho hetu sarko naslo. Hea vixim, amkam apostl Jakob ani Juanvachem udharonn asa. Jezun tankam aplea Rajeant ek khas zago dilʼlo tankam zai aslem. Tanchea hea chintpak lagon Jezun tankam xabaski dili kai? Na. Tachea bodlek, tannem aplea soglea 12 apostlank oso solʼlo dilo: “Tumchea modlo zo konn vhoddlo zaunk sodhta tannem tumcho sevok zauncho, ani tumchea modlo zo konn poilo zaunk sodhta tannem sogleancho chakor zauncho.” (Mk. 10:35-37, 43, 44) Tor aiz pasun bhav sarke hetu dovrun, tem mhunnttlear te bhav-bhoinnanchi seva korunk sodhtat dekhun, sobheche sevok zaunk fuddem sortat tednam, sobhek khub faido zata.—1 Tes. 2:8.
BHAV-BHOINNANCHI SEVA KORUNK TUNVEM TUJI ITSA KOXI VADDOUNK ZATA?
9. Bhav-bhoinnanchi seva korunk tumi tumchi itsa koxi vaddounk zata?
9 Bhavamno, tumi Jehovacho mog kortat ani dusreanchi seva korunk sodhtat tem khorem, punn ek sobhecho sevok zaun vavr korunk tumkam mon na zait. Toxem zalear, tumi hi itsa koxi vaddounk zata? Bhav-bhoinnanchi seva kelʼlean tumkam kitli khuxalkai mellttoli tea vixim chintat. Jezun sanglolem: “Gheunchea poros diunk chodd khuxalkai melltta.” (D.I. 20:35) Ani tannem svota hem korun dakhoilem. Dusreanchi seva korun taka khub khuxalkai mellʼlli ani tumkam-i ti mellonk xokta.
10. Dusreanchi seva korun Jezuk khuxalkai mellttali mhunn tannem koxem dakhoilem? (Marku 6:31-34)
10 Dusreanchi seva korun Jezuk koxi khuxalkai mellʼlli tacher dhean diat. (Marku 6:31-34 vachat.) Eka vellar, Jezu ani tache apostl khub thoklole. Tor thoddo visov gheunk, konn na toslea eka zagear vochonk te bhair sorle. Punn te thoim pavchea poilinch ek vhoddlo zomo thoim pavlo. Karonn to lok Jezu koddlean xikonk sodhtalo. Tea vellar Jezu ani tachea xisank “jevunk pasun vell mellonk naslo” dekhun, tannem tea lokank magir ieiat mhunn sangonk zatalem. Vo tankam thoddim sotam xikoun tankam porot dhaddunk zatalim. Punn Jezu tancho mog kortalo dekhun to tankam “zaiteo vostu xikounk laglo.” Ani hem tannem thoddoch vell nhoi, punn “zaito vell” poriant kelem. (Mk. 6:35) Toxench, Jezuk hem korunk poddtta mhunn nhoi, punn “taka tanchem churchurem dislem” dekhun tannem oxem kelem. Tea bhair, to tancho mog kortalo dekhun to tankam xikounk sodhtalo. Khorench, dusreanchi seva kelolean Jezuk khub khuxalkai mellʼlli!
11. Jezun dusreanchea gorzanchi kallji koxi ghetli? (Chitr pasun polloiat.)
11 Jezun lokank fokot Deva vixim xikounkuch na, punn tankam her vattamnim pasun modot keli. Zoxem, ek pavtti tannem vizmit korun zaitea lokank jevonn dilem ani aplea xisank tem soglea lokank vanttunk sanglem. (Mk. 6:41) Oxem korun, tannem aplea xisank dusreanchi seva korunk xikoilem. Toxench, dusreanchi seva korop kitlem mhotvachem tem tannem tankam dakhoilem. Ani aiz sobheche sevok pasun oslinch kamam kortat. Jezu sangata dusreanchi seva korun ani “soglim pottbhor jevlim” tem polloun tachea apostlank kitli khuxalkai mellʼlli astoli tea vixim chintat! (Mk. 6:42) Jezun heach toren svotachea gorzam poros dusreanchea gorzank poilo zago dilo tachim anik zaitim udharonnam asat. Tannem jivitbhor dusreanchi seva keli. (Mt. 4:23; 8:16) Dusreank xikoun ani tanchea gorzanchi kallji gheun taka khub khuxalkai ani dhadosponn mellttalem. Tor bhavamno, tumi pasun sobheche sevok zaunk vavr kortat ani dusreank svarth naslolo mog dakhoitat tednam tumkam khub khuxalkai mellttoli.
Tumi Jehovacho mog kortat ani dusreanchi seva korunk tumkam itsa asa zalear, tumchea bhav-bhoinnam pasot koslem-i kam korunk tumi toiar astole (Peregraf 11 polloiat) b
12. Sobhek modot zaunk xokta tosle gunn amchea lagim nant oxem ami kiteak chintchem nhoi?
12 Tumchea lagim koslich khas kola na oxem tumkam dista zalear niraxi zainakat. Karonn, sobhentlea bhav-bhoinnank modot korunk tumkam goroz te gunn astolech. Tumi 1 Korintkarank 12:12-30-ant sanglolea Pauluchea utrancher niall korunk zata. Ani him versam tumkam koxim lagu zatat tem zannam zaunk Jehova lagim modot magonk zata. Jehovachea dor eka sevoka bhaxen, tumi pasun valorachim ani sobhent tumchi goroz asa mhunn Pauluchea utrantlean spoxttponnim tumkam kollon ietolem. Sobhecho sevok zaunk tumkam azunui thoddea gunnancher kam korunk zai, oxem tumkam dista zalear bejar zainakat. Tachea bodlek, Jehovachi ani bhav-bhoinnanchi seva korunk tumchean zata tem soglem korit ravat. Oxem kelear, tumi kortat to vavr vhoddilank dison ietolo ani tumi korunk xoktat teo zobabdareo te tumkam ditole mhunn tumi khatri dovrunk zata.—Rom. 12:4-8.
13. Tumi anik khoinchea karonnak lagon sobheche sevok zaunk vavrunk zai?
13 Toxench, tumi anik khoinchea karonnak lagon sobheche sevok zaunk vavrunk zai, tem zannam zaunk hea vixim chintat. Sobhechea sevokank je gunn asonk zai mhunn Bible-ant sanglam, tanchea modle choddxe gunn soglea Kristanvank asonk zai. Tem mhunnttlear, soglea Kristanvamnim Jehovak lagim soronk zai, dusreank diun khuxalkai melloun gheunk zai, ani Devak manvota tea toren aplem jivit jieunk zai. Tor sobhechea sevokank asonk zai te choddxe gunn tumi atam meren chodd korun vaddoileat zait. Punn tumi khas korun kosle gunn vaddounk zai?
SOBHECHO SEVOK ZAUNK TUNVEM KOSLE GUNN VADDOUNK ZAI?
14. Sobhecho sevok “apli zobabdari bore toren samballpi” asonk zai, hacho orth kitem? (1 Timotak 3:8-10, 12)
14 Atam ami, 1 Timotak 3:8-10, 12-nt sanglolea gunnancher dhean dium-ia. (Vachat.) Sobhecho sevok “apli zobabdari bore toren samballpi” asonk zai. Hacho orth, to patieupa sarko asonk zai, ani dusrim taka man ditolim toxi tachi vagnnuk asonk zai. Punn hacho orth oso nhoi, ki tannem hansonk zaina vo fokannam korunk zainant. (Up. 3:1, 4) Tannem apleak dilʼleo sogleo zobabdareo samballunk khub vavr korunk zai. Hea toren ek bhav taka dilʼlem kam nemlolea vella bhitor ani bore bhaxen korta tednam, bhav-bhoinnam tacher visvas dovrunk pavtolim ani taka man ditolim.
15. Sobheche sevok “don tonddache” ani “fottingponnan poixe zoddpachea axeche asonk favona” hacho orth kitem?
15 “Te don tonddache . . . asonk favona” hacho orth, te promannik asonk zai ani tannim sot ulounk zai. Toxench, apnnem dilʼlem utor tannim samballunk zai ani dusreank fottounchem nhoi. (Mho. 3:32) Tea bhair, te “fottingponnan poixe zoddpachea axeche asonk favona.” Hacho orth, veapar-dhondo kortana ani poixeanchea babtint te promannik asonk zai. Poixe zoddchea axen, tannim bhav-bhoinnancho faido kaddcho nhoi.
16. (a) Sobheche sevok “chodd soro pietat tosle” asche nhoi, hacho orth kitem? (b) Ek ‘nitoll ontoskornn’ samballop mhunnttlear kitem?
16 Te “chodd soro pietat tosle” asonk zaina. Hacho orth, tannim bebdikai korchi nhoi. Toxench, tankam ek ‘nitoll ontoskornn’ asonk zai. Tem mhunnttlear, tannim Jehovachea dorjeam pormonnem jieunk zai. Te opurnn asat tem khorem, tori astana Jehova sangata tanchi ixttagot ghott asonk zai, jea vorvim tankam monachi xanti mellttoli.
17. “Te purte asat vo na tem poilim topasunk zai,” hacho orth kitem? (1 Timotak 3:10; chitr pasun polloiat.)
17 “Te purte asat vo na tem poilim topasunk zai” hacho orth, tankam dilʼleo zobabdareo te bore bhaxen samballttat ani te patieupa sarke asat mhunn vhoddilank dison ieunk zai. Tor bhavamno, vhoddil tumkam koslem-i kam vo zobabdareo ditat tednam songottnne thaun mellttat teo suchounneo ani nirdexon bariksannen pallat. Tea kamant kitem mellon asa ani tumi tem kednam korun sompounk zai tem zannam zaun gheiat. Tumkam dilʼlem kam tumi urben ani bore toren kortat tednam, tumi patieupa sarke asat mhunn bhav-bhoinnam pollounk xoktolim ani tim tumcho anikui valor kortolim. Vhoddilamno, tumi kitem korunk zata? Bautizm ghetlolea bhavank tumi proxikxonn ditat mhunn khatri korun gheiat. (1 Timotak 3:10 vachat.) Tumchea sobhent 10 tem 14 vorsanche vo tachea poros lhan piraieche bautizm ghetlole bhav asat kai? Tankam svotacho obheas korchi ani mittinge pasot bori toiari korchi sonvoim asa kai? Te chukonastana mittingek zobab ditat ani porgottnnent bhag ghetat kai? Hoi zalear, tanchi pirai ani poristhiti pormonnem tumi tankam zobabdareo diunk zatat. Hea toren, te ‘purte asat vo na tem tumi poilim topasunk’ pavtole. Ani oxem kelʼlean, 17 tem 19 vorsanche piraier pasun te chodd korun sobheche sevok zaunk xoktat.
Vhoddilamnim bautizm ghetlolea bhavank zobabdareo diun te “purte asat vo na” tem poilim topasunk zai (Peregraf 17 polloiat)
18. “Te guneanva meklle” asonk zai hacho orth kitem?
18 “Te guneanva meklle” asonk zai hacho orth, tancher arop ghalunk konnakuch koslench karonn asonk zaina. Hem khorem ki dusrim, Kristanvancher boglanttam ghalit. Jezucher pasun lokamnim boglanttam ghatlolim. Ani aplea pattlavdarank toxench ghoddttolem mhunn tannem sanglolem. (Ju. 15:20) Punn Jezu bhaxen tumi tumchi vagnnuk nitoll dovrunk vavurtat zalear, sobhent tumkam ek borem nanv astolem.—Mt. 11:19.
19. “Sobhechea sevokak ekuch bail asonk zai” hacho orth kitem?
19 “Sobhechea sevokak ekuch bail asonk zai.” Jehovan kazar ghoddoun haddlem tednam tannem tem ekuch dadlea ani baile modem kelem. Ani hich manddavoll aiz soglea Kristanvamnim pallunk zai. (Mt. 19:3-9) Eka Kristanvan kednanch onoitik kuddicho sombond dovrunk zaina. (Heb. 13:4) Itlench nhoi, tannem aplea bailek visvaxi ravonk zai ani dusrea bailam sangata mirchem vo flirt korchem nhoi.—Job 31:1.
20. Ek bhav aplea familicho ‘bore bhaxen’ samball koso korunk xokta?
20 Sobheche sevok ‘aplea bhurgeank ani familik borea bhaxen samballttat tosle’ asonk zai. Tum ek familicho vhoddil zalear, tunvem tujeo zobabdareo bore bhaxen samballop ekdom gorjechem. Oxem korunk, tunvem chukonastana kuttumbik bhokti korunk zai, tujea familintlea dor eklea sangata zata title pavtti porgottnnent bhag gheunk zai ani Jehova sangata tujea bhurgeanchi ixttagot ghott korunk tankam modot korunk zai. (Ef. 6:4) Karonn aplea familichi bore bhaxen kallji gheta to munis, to sobhechi pasun kallji gheunk xokta mhunn dakhoun dita.—1 Timotak 3:5 sor korat.
21. Tumi azun poriant sobheche sevok mhunn seva korinant zalear tumi kitem korunk zata?
21 Bhavamno, tumi azun poriant sobheche sevok mhunn seva korinant zalear, upkar korun ho akʼkho lekh bariksannen vachat ani uprant tea vixim Jehova lagim magnnem korat. Sobheche sevok zaunk purte zaunk tumkam kosle gunn asonk zai tea vixim obheas korat ani uprant te vaddounk vavr korat. Toxench, Jehova ani bhav-bhoinnam pasot tumcho mog kitlo ghott asa tem chintat ani to anikui vaddounk vavrat. Tea bhair, hi zobabdari melloun gheunk tumcho hetu kitem asa tem zannam zaiat. (1 Ped. 4:8, 10) Tor sobheche sevok zaunk vavr korit ravat ani bhav-bhoinnanchi seva korun khuxalkai melloun gheiat. Tumi kortat tea vavracher Jehovan zaitim besanvam ghalum mhunn ami magtat!—Filp. 2:13.
GIT 17 ‘Modot Korunk, Mhaka Zai’
a Thoddim nanvam bodolʼleant.
b CHITRACHI MAHITI: Davea vatten, Jezu khaltikaien dusreank modot korta. Uzvea vatten, ek sobhecho sevok sobhentlea eka zannttea bhavak modot korta.
