1. Паԝлосе шанди сәр бәрдәстийед щьвате чаԝа дьньһерʹи?

 ЩЬВАТАДА бәрдәстийед щьвате гәләк шьхӧлед фәрз дькьн. Әʹйан ә кӧ Паԝлосе шанди ԝан бьред амьн ԛимәт дькьр. Мәсәлә нәʹмәкә хԝәда, әԝи сьлав да нә кӧ тʹәне рʹуспийа, ле бәрдәстийед щьвате жи (Филипи 1:1).

2. Бьре мә Лӧйис дәрһәԛа кʹьфшкьрьна хԝә ча бәрдәстийе щьвате, чь дьфькьрә?

² Фьрԛи тʹӧнә бьред ньхӧманди щаһьл ьн йан жи әʹмьрда мәзьн ьн, гәләк жь ԝана гәләк ша дьбьн кӧ дькарьн ча бәрдәстийед щьвате хьзмәт кьн. Мәсәлә, гава бьре мә Деван ча бәрдәстийе щьвате һатә кʹьфшкьрьне, әԝ 18 сали бу. Ле бьре мә Лӧйис 50 сали зедәтьр бу, гава һатә кʹьфшкьрьне ча бәрдәстийе щьвате. Әԝ дьбежә: «Сәва мьн ԛәдьрәки мәзьн ә, кӧ әз бәрдәстийе щьвате мә. Мьн һʹәзкьрьна щьвате дитийә у әз ша мә кӧ әз жи дькарьм тьштәки сәва щьвате бькьм!» Гәләк бьред мә мина Лӧйис дьфькьрьн.

3. Әме щабед кʹижан пьрса шеԝьр кьн?

³ Һәрге тӧ бьре ньхӧманди йи, ле һе нәбуйи бәрдәстийе щьвате, гәло тӧ дькари сәва ве йәке нете бьди пешийа хԝә? Ле чь дькарә хԝәстьна тә зедә кә, ԝәки тӧ сәр хԝә бьхәбьти кӧ бьгьһижи ве нете? Сәва кӧ тӧ бьби бәрдәстийе щьвате, гәло ль гора Кʹьтеба Пироз тәрʹа кʹижан хәйсәт-һʹӧнӧр лазьм ьн? Ве готареда әме щабед ван пьрса шеԝьр кьн. Ле пешийе ԝәрен әм бьвиньн, кӧ рола бәрдәстийед щьвате чь йә.

РОЛА БӘРДӘСТИЙЕД ЩЬВАТЕ ЧЬ ЙӘ?

4. Рола бәрдәстийед щьвате чь йә? (Бьньһерʹә ӧса жи шькьл.)

⁴ Бәрдәстийед щьвате бь рʹӧһʹе пироз тенә кʹьфшкьрьне.  Щьватеда әԝана гәләк тьштада али рʹуспийа дькьн. Мәсәлә, һьнә бәрдәстийед щьвате дина хԝә дьдьнә ве йәке, ԝәки епʹещә әʹдәбйәт у мьһалед бона хьзмәткьрьне һәбьн. Һьнәк жь бәрдәстийед щьвате, шьхӧле тʹәмьзкьрьн у хԝәйкьрьна Ода Щьвате дькьн. Бәрдәстийед щьвате аликʹарийе дьдьнә щьвате у сәр системед дәнг у видеойа дьхәбьтьн. Рʹаст ә гәләк шьхӧлед кӧ бәрдәстийед щьвате дькьн, йед текʹники нә, ле диса жи йа лапә фәрз әԝ ә, кӧ әԝана Йаһоԝа һʹәз дькьн у ль гора ԛанунед ԝи дьжин. У һьм жи әԝана хушк-бьра гәләк һʹәз дькьн (Мәтта 22:37-39). Сәва кӧ бьраки ньхӧманди бьбә бәрдәстийе щьвате, әԝ гәрәке чь бькә?

5. Сәва кӧ тӧ бьби бәрдәстийе щьвате, тӧ чь гәрәке бьки?

⁵ Кʹьтеба Пироз нишан дькә, кӧ бьра гәрәке йәки чаԝа бә, кӧ бькарьбә ча бәрдәстийе щьвате бе кʹьфшкьрьне (1 Тимотʹейо 3:8-10, 12, 13). Һәрге тӧ дьхԝази ча бәрдәстийе щьвате хьзмәт ки у аликʹарийе бьди йед дьн, ԝан хәйсәт-һʹӧнӧра лекʹолин кә, дәрһәԛа кʹижана Кʹьтеба Пирозда ньвисар ә, у паше сәр хԝә бьхәбьтә, кӧ ван һʹӧнӧра нав хԝәда пешда бини. Ле пешийе тӧ гәрәке рʹьнд бьзаньби, кӧ тӧ чьма дьхԝази бьби бәрдәстийе щьвате.

ТӦ ЧЬМА ДЬХԜАЗИ БЬБИ БӘРДӘСТИЙЕ ЩЬВАТЕ?

6. Тӧ чьма гәрәке һазьр би, кӧ щьватеда һʹәму щурʹә шьхӧла бьки? (Мәтта 20:28; ӧса жи бьньһерʹьн шькьл.)

⁶ Һʹәзкьрьн, хәйсәте Исайи сәрәкә бу. Әԝи һьм Хԝәде, һьм жи мәрьв һʹәз дькьрьн. Ләма жи әԝи һʹәму тьшт бь дьл у щан дькьр, у шьхӧлед ӧса жи дькьр, кʹижан кӧ һьнә мәрьва ньмьз һʹәсаб дькьрьн (Бьхунә Мәтта 20:28; Йуһʹәнна 13:5, 14, 15). Һәрге әв һʹәзкьрьн дьле тәда жи һәбә, Йаһоԝа ԝе тә кʹәрәм кә у али тә бькә, ԝәки тӧ бьгьһижи нета хԝә у бьби бәрдәстийе щьвате (1 Корьнтʹи 16:14; 1 Пәтрус 5:5).

7. Чьрʹа фәрз ә кӧ бьра наве хԝә нәгәрʹә?

⁷ Ве дьнйайеда гәләк мәрьв ԛәдьре ԝан мәрьва дьгьрьн, йед кӧ шьхӧлед фәрз дькьн. Ле тʹәшкиләта Йаһоԝада ӧса нинә. Бьре кӧ мина Иса Мәсиһ бь һʹәзкьрьне һәрәкʹәт дькә, сәрԝертийе сәр йед дьнрʹа накә, у һивийе нинә кӧ әԝана ԝи ча йәки бьльнд һʹәсаб кьн. Һәрге кәсәк кʹара хԝә  дьгәрʹә ве йәкеда кӧ бьбә бәрдәстийе щьвате, әԝ дьԛәԝьмә нахԝазә һьнә шьхӧлед ньмьз бькә, чь кӧ бона хԝәйкьрьна пәзед Йаһоԝайи дәлал лазьм ьн. Дьбәкә әԝ бьфькьрә кӧ шьхӧлед ӧса лайиԛи ԝи ниньн (Йуһʹәнна 10:12). Йаһоԝа щәфе кәсед бабах у хԝәһʹәз кʹәрәм накә (1 Корьнтʹи 10:24, 33; 13:4, 5).

8. Иса Мәсиһ чь ширәт да шандийед хԝә?

⁸ Щарна достед Исайи незик жи дьхԝәстьн һьнә щабдарийа бьстиньн, ле нета дьле ԝан нәрʹаст бу. Ԝәрә әм сәрһатийа дӧ шандийед Иса Мәсиһ, Аԛуб у Йуһʹәнна, биньн бира хԝә. Ԝана хԝәст ԝәки Иса, Пʹадшатийа Хԝәдеда щийед мәхсус бьдә ԝан. Ле әв йәк Иса хԝәш нәһат. Иса 12 Шандийарʹа ӧса гот: «Йе кӧ дьхԝазә нав ԝәда бьбә йе пешьн, гәрәке бьбә хӧламе һʹәмуйа» (Маркос 10:35-37, 43, 44). Бьред кӧ бь нета рʹаст дьхԝазьн бьбьнә бәрдәстийед щьвате, демәк сәва кӧ йед дьнрʹа хьзмәт бькьн, бона щьвате кʹәрәм ьн (1 Тʹесалоники 2:8).

ХԜӘСТЬНА ХԜӘ ЗЕДӘ КӘ, КӦ БЬБИ БӘРДӘСТИЙЕ ЩЬВАТЕ

9. Тӧ чаԝа дькари хԝәстьна хԝә зедә ки, кӧ бьби бәрдәстийе щьвате?

⁹ Һәмьки тӧ Йаһоԝа һʹәз дьки у дьхԝази аликʹарийе бьди хушк-бьра. Диса жи дьбәкә хԝәстьна тә тʹӧнә йә кӧ баре хԝә гьран ки у бьби бәрдәстийе щьвате. Гәло тӧ чаԝа дькари хԝәстьна хԝә зедә ки, кӧ бьби бәрдәстийе щьвате? Һәла бьдә бәр чʹәʹве хԝә, ԝәки тӧ жь хьзмәтийа хушк-бьрарʹа чьԛас шабуне дьстини. Иса ӧса готийә: «Хԝәзи ль дайийа, нә кӧ ль стандийа» (Кʹаред Шандийа 20:35). Иса хԝәха жи ль гора ве принсипе һәрәкʹәт дькьр. Әԝи жь хьзмәтийа кәсед дьнрʹа шабунәкә мәзьн дьстанд, у тӧ жи дькари жь хьзмәтийа ви щурʹәйи шабуне бьстини.

10. Әм жь кʹӧ заньн ԝәки Иса һазьр бу бь шабуне мәрьварʹа хьзмәт кә? (Маркос 6:31-34)

¹⁰ Жь дәрәщәке әм әшкәрә дьвиньн, ԝәки Иса бь дьл һазьр бу мәрьварʹа хьзмәт кә (Бьхунә Маркос 6:31-34). Щарәке Иса Мәсиһ у шандийед ԝи ԝәстийайи бун. Ләма жи әԝана чун щики хәԝлә, ԝәки рʹьһʹәт бьн. Ле гәләк мәрьв пешийа ԝан гьһиштьнә ԝи щийи, чьмки ԝана хԝәст кӧ Иса ԝан һин кә. Иса дькарьбу хԝәстьна мәрьва пьшт гӧһе хԝәва бавита, чьмки «ԝәʹде ԝан тʹӧнә бу хԝарьне жи бьхԝьн». Йан жи Иса дькарьбу мәрьварʹа чәнд гьли бьгота у әԝ бьшандана. Ле чьмки әԝи мәрьв һʹәз дькьрьн, әԝи «дәстпекьр гәләк тьшта ԝана һин кә» у һʹәта еваре бәрдәԝам дькьр әԝ һин дькьрьн (Маркос 6:35). Әԝ мәщбур нибу ве йәке бькә, ле чьмки «дьле ԝи сәр ԝан шәԝьти» у әԝи әԝана һʹәз дькьрьн, ләма жи хԝәст ԝана һин кә. Бәле, Иса жь хьзмәтийа мәрьварʹа шабунәкә мәзьн дьстанд.

11. Иса чаԝа али гӧһдаред хԝә дькьр? (Бьньһерʹә ӧса жи шькьл.)

¹¹ Хенщи һинкьрьна мәрьва, Иса ӧса жи бона һʹәԝщед ԝани физики хәм дькьр. Мәсәлә, әԝи бь кʹәрәмәти хԝарьн да шагьртед хԝә у гот, ԝәки ве хԝарьне нав мәрьвада бәла кьн (Маркос 6:41). Бь ви щурʹәйи, әԝи шагьртед хԝәрʹа нишан кьр, кӧ чаԝа гәрәке аликʹарийе бьдьнә мәрьва. Ӧса жи әԝи нишани ԝан кьр, кӧ кьред ӧса чьԛас фәрз ьн. Анәгори ве йәке, әԝ шьхӧле кӧ бәрдәстийед щьвате дькьн, фәрз ьн. Әве шабуне бьдә бәр чʹәʹве хԝә, гава шагьрта тʹәви Иса бь кʹәрәмәти хԝарьн бәла дькьрьн, һʹәта кӧ «һʹәмуйа хԝар у тʹер бун» (Маркос 6:42). Иса гәләк щар бона һʹалхԝәшийа мәрьва дьфькьри, нә кӧ дәрһәԛа һʹалхԝәшийа хԝә. Гава әԝ сәр әʹрде бу, әԝи тʹьме али  мәрьва дькьр (Мәтта 4:23; 8:16). Иса һʹәз дькьр мәрьва һин кә у әԝ һазьр бу бь мьлукти бона һʹәԝщед ԝан хәм кә. Һәрге тӧ бь дьле тʹәмьз хирәт бьки, кӧ бьби бәрдәстийе щьвате, тӧйе жи шабунәкә мәзьн бьстини.

12. Әм чьма гәрәке нәфькьрьн, ԝәки һʹӧнӧред мәйи ӧса тʹӧнә, кӧ али щьвате бькьн?

¹² Һәрге тӧ дьфькьри кӧ һʹӧнӧрәки тә кем ә, дьлтәнг нәбә. Һьнә хәйсәтед тә бе шьк бона щьвате керһати нә. Һәла сәр 1 Корьнтʹи 12:12-30 бьфькьрә у дӧа бькә. Гьлийед Паԝлосе шанди нишан дькьн, ԝәки чаԝа кӧ щьватеда рола һәр кәси фәрз ә, рола тә жи фәрз ә. Һәрге һәла һе лазьм ә, ԝәки тӧ һьнә хәйсәтед хԝә дьһа баш ки, ԝәки бьби бәрдәстийе щьвате, бәр хԝә нәкʹәвә. Чьԛас жь дәсте тә те, Йаһоԝарʹа хьзмәт кә у али хушк-бьра бькә. Баԝәр бә кӧ рʹуспи ԝе хирәта тә бьвиньн у ль гора фәрәсәтед тә щабдарикә ӧса бьдьнә тә, кӧ тӧ бькарьби бьки (Рʹомайи 12:4-8).

13. Чьрʹа чәтьн нинә ԝәки бьра бьбә бәрдәстийе щьвате?

¹³ Ԝәрен әм диса мәʹнике шеԝьр кьн, кӧ чьрʹа әм гәрәке бьгьһижьнә нета хԝә кӧ бьбьнә бәрдәстийед щьвате. Һʹәчʹи зәʹф жь ван хәйсәт-һʹӧнӧра, йед кӧ бәрдәстийед щьвате гәрәке нав хԝәда пешда биньн, бона һʹәму Мәсиһийа йә. Мәсәлә, һʹәму Мәсиһи гәрәке незики Йаһоԝа бьн, мәрʹд бьн у ль гора хԝәстьна Йаһоԝа бьжин. Ләма жи ча те кʹьфше гәләк һʹӧнӧред кӧ гәрәке бал бәрдәстийед щьвате һәбьн, щәм тә ида һәнә. Ле бьра илаһи чь дькарә бькә, ԝәки бьбә бәрдәстийе щьвате?

ХИРӘТ БЬКӘ КӦ БЬБИ БӘРДӘСТИЙЕ ЩЬВАТЕ

14. Чь те һʹәсабе «гьран бьн»? (1 Тимотʹейо 3:8-10, 12)

¹⁴ Ԝәрен әм дина хԝә бьдьнә һьнә хәйсәт-һʹӧнӧра, дәрһәԛа кʹижана 1 Тимотʹейо 3:8-10, 12-да ньвисар ә (Бьхунә). Бәрдәстийед щьвате гәрәке «гьран бьн». Әв гьли ӧса жи дькарә бе ԝәлгәрʹандьне ча «хԝәйиԛәдьр» у «маԛул». Һәмьки әв йәк найе һʹәсабе кӧ тӧ гәрәке тʹӧ щар нәкʹәни у һʹәнәка нәки (Ԝаиз 3:1, 4). Фәрз әв ә, кӧ тӧ һʹәму щабдарийед хԝә бини сери. Һәрге хушк-бьра тә нас дькьн ча мәрьвәки кӧ щабдарийед хԝә тинә сери, әԝе ԛәдьре тә бьгьрьн.

15. Чь те һʹәсабе «хәбәрданеда дӧрʹутийе нәкьн» у «пәй кʹәда һʹәрам нәкʹәвьн»?

 ¹⁵ Бәрдәстийед щьвате гәрәке «хәбәрданеда дӧрʹутийе нәкьн», демәк дьлсах, һʹәлал у бь итʹбар бьн. Әԝана ӧса жи хԝәйе созед хԝә нә у мәрьва нахапиньн (Мәтʹәлок 3:32). Әԝана гәрәке «пәй кʹәда һʹәрам нәкʹәвьн», демәк хәбата хԝәда у дәрәщед пʹәрава гьредайида һʹәлал бьн. Әԝана ӧса жи һәләԛәтийа хԝәйә баш тʹәви хушк-бьра, бона ԛазанщкьрьна пʹәра надьнә хәбате.

16. (а) Чь те һʹәсабе кӧ бәрдәстийед щьвате гәрәке «хԝә нәдьнә шәраве»? (б) Чь те һʹәсабе хԝәйе «исафа рʹьһʹәт» бьн?

¹⁶ «Хԝә нәдьнә шәраве», те һʹәсабе кӧ бәрдәстийе щьвате гәрәке бь зедәйи вәнәхԝә у ча ичкәхԝәр нәйе наскьрьне. Хенщи ве йәке, әԝ гәрәке хԝәйе «исафа рʹьһʹәт» бә, демәк ль гора нормед Йаһоԝа бьжи. Һәмьки әв йәк найе һʹәсабе кӧ әԝ беԛьсур ә, ле диса жи достийа ԝи тʹәви Хԝәде гәрәке ԛәԝи бә, у бь сайа ве йәке, әԝе рʹьһʹәтийа дьл бьстинә.

17. Чь те һʹәсабе «бенә щерʹьбандьне»? (1 Тимотʹейо 3:10; бьньһерʹә ӧса жи шькьл.)

¹⁷ Кʹьтеба Пироз дьбежә кӧ бьра гәрәке «бенә щерʹьбандьне», демәк пешийа кӧ әԝана ча бәрдәстийед щьвате бенә кʹьфшкьрьне, рʹуспи гәрәке избат бьн, кӧ әԝана дькарьн щабдарийед хԝә бь щурʹе баш биньн сери. Ләма жи гава рʹуспи щабдарийе дьдьнә тә, ве йәке ль гора тʹәмийед ԝан у рʹебәрийа тʹәшкиләте бькә. Избат бә кӧ тә фәʹм кьрийә, ԝәки щабдарийа тә чь йә у кʹәнге тӧ гәрәке ве йәке хьлаз ки. Һәрге тӧ һʹәму щабдарийед кӧ тәрʹа тенә дайине, ча лазьм ә бини сери, хушк у бьра ԝе пешдачуйина тә бьвиньн. Рʹуспино, гәләк фәрз ә ԝәки һун бьред ньхӧманди һин кьн (Бьхунә 1 Тимотʹейо 3:10). Гәло щьвата ԝәда бьред ньхӧманди, йед кӧ 10-14 сали нә, һәнә? Гәло әԝана лекʹолина шәхси дәрбаз дькьн у хԝә бона щьвата һазьр дькьн? Гәло әԝана тʹьме щабед хԝә сәр щьвата дьдьн у дәрдькʹәвьнә хьзмәтийе? Һәрге әре, щабдарийа ль гора әʹмьр у дәрәщед ԝан бьдьнә ԝан. Бь ви щурʹәйи, әв бьред щаһьл дькарьн «бенә щерʹьбандьне». Паше, гава әԝана бьбьнә 17-19 сали, әԝана дьбәкә һазьр бьн кӧ ча бәрдәстийед щьвате бенә кʹьфшкьрьне.

18. Чь те һʹәсабе мәʹни нәдьнә тʹӧ кәси, ԝәки тә нәһәԛ кьн?

¹⁸ «Тьштәк сәр ԝан тʹӧнәбә», әв йәк  те һʹәсабе кӧ мәʹнийа тʹӧ кәси гәрәке тʹӧнә бә, ԝәки тә гӧнәки гьранда нәһәԛ кьн. Ле диса жи Мәсиһи дькарьн рʹасти сущдаркьрьне бен. Иса жи дьһатә сущдаркьрьне, у әԝи пешда готьбу ԝәки шагьртед ԝи жи ԝе рʹасти ве йәке бен (Йуһʹәнна 15:20). Ле һәрге тӧ мина Иса рʹабун-рʹуньштьна хԝәда тʹәмьзайе хԝәй ки, тӧйе щьватеда навәки баш ԛазанщ ки (Мәтта 11:19).

19. Чь те һʹәсабе, кӧ бьра гәрәке «мере жьнәке бә»?

¹⁹ Бәрдәстийе щьвате гәрәке «мере жьнәке бә». Һәрге тӧ зәԝьщи йи, тӧ гәрәке ль гора ԛануна Йаһоԝа дәрһәԛа зәԝаще бьжийи, демәк зәԝащ гәрәке тʹәне ортʹа жьн у мерәкида бә (Мәтта 19:3-9). Мәсиһи тʹӧ щар гәрәке бенамусийе нәкә (Ибрани 13:4). Хенщи ве йәке, тӧ гәрәке жьна хԝәрʹа амьн би у бь чʹәʹве хьраб жьнед дьн нәньһерʹи (Ибо 31:1).

20. Бьра ча дькарә «ԛәнщ малхетийе ль зарʹ у мала хԝә бькә»?

²⁰ «Ԛәнщ малхетийе ль зарʹ у мала хԝә бькә». Һәрге малбәта тә һәйә, тӧ гәрәке ча сәре малбәте щабдарийед хԝә бини сери. Мәсәлә, ԛӧльхкьрьна тʹәви малбәте һәр һʹәфте дәрбаз кә. Чьԛас жь дәсте тә те, тʹәви һʹәму нәфәред мале дәркʹәвә хьзмәтийе. Али зарʹед хԝә бькә ԝәки әԝана бьбьнә достед Йаһоԝа (Әфәси 6:4). Бьре кӧ малбәта хԝә дьбә хԝәйи, дьдә кʹьфше ԝәки ԝе бона щьвате жи хәм бькә (Бәрамбәр кә 1 Тимотʹейо 3:5).

21. Һәрге тӧ һе нәбуйи бәрдәстийе щьвате, тӧ чь дькари бьки?

²¹ Бьрано, һәрге һун һе нәбунә бәрдәстийед щьвате, жь кʹәрәма хԝә әве готаре рʹьнд бьхуньн у Йаһоԝарʹа дӧа бькьн. Лекʹолин кьн ван һʹӧнӧра, кʹижан кӧ гәрәке бал бәрдәстийед щьвате һәбьн, у ԝан һʹӧнӧра бьдьнә кʹьфше. Бьфькьрьн дәрһәԛа ве йәке, кӧ һун Йаһоԝа у хушк-бьра чьԛас һʹәз дькьн. Һʹәзкьрьна хԝә һьндава хушк-бьра зедә кьн, у бьфькьрьн кӧ чьрʹа һун дьхԝазьн ԝанрʹа хьзмәт кьн (1 Пәтрус 4:8, 10). Һуне шабунәкә гәләк мәзьн бьвиньн гава щьватеда щурʹә-щурʹә тьштада али хушк-бьра бькьн. Ләма жи хирәт бькьн кӧ бьбьнә бәрдәстийед щьвате, у бьра Йаһоԝа хирәта ԝә кʹәрәм кә! (Филипи 2:13)