HADGE 46
SIŊ 49 Jéhovah, nous réjouirons ton cœur
Hẽẽrebe wo—Nday joŋ joŋge maa kol jar kay jar maa peel tayge wo là?
“Je maga hã fẽẽre ne jar de fruygi dedaŋ jar maga à hã fẽẽre ne hara hãge mono.”—JOŊRE 20:35.
FẼN MAA KLUU ƁIL HADGE SEN LA
Maa jor glog hẽẽrebe maaga wo go de joŋ batem maaga á mo hay wo de ɗiggi maa kol jar maa kay jar maa peel tayge wo ɓili.
1. Apotre Pol hay ɗig ti jar maa kay jar maa peel tayge wo na ɗiggi là?
JAR kay jar maa peel tayge bag wo jag joŋre po maa de woore wo go ti tayge wo debaŋ. Joŋre jar se de deelen hay wo de cõõre jag Pol debaŋ. Ko ba ɗa, de maaga á hay yer wo ne kretiyẽ maa Filip wo mono, á hee jag wo go ne jar kay jar maa peel tayge wo de jar maa peel tayge wo go sara.—Flp. 1:1.
2. Luis ɗig ti joŋre ɓe maa doo jee kay jar maa peel taygen wo na ɗiggi là?
2 Jar maaga wo go de joŋ batem wo ngaɓa, mo hay ba jõõ noga go de tããbe da’ wo fruygi de maaga saara joŋ joŋre doo jar maa kay jar maa peel tayge wo mono. Sen diŋ saɓlaŋ Devaŋ ga kol jee kay jar maa peel tayge wo de maaga kiŋgi ɓe hay 18 mono. Amaa, Luis maa ɓen kol jee kay jar maa peel tayge wo de maaga kiŋgi ɓe hay go 50 de ti mono. Luis hay ɗig na ɗiggi de maaga á kol jee maa kay jar maa peel tayge wo mo là? Á wãã ga : “Ndi go de fruygi debaŋ maa kay hẽẽrebe maa ti tayge wo de ɗeŋ maa se no. Á naa wo nen dage go see ɓi debaŋ, day matala ndi de kããge maa naa nen dage go see ɓaara lay. Jar maa kay jar maa peel tayge wo ngaɓa ɗig wo de maŋ sen lay!”
3. Naa ko yaŋ diŋ wiigi jag maa hõn wo là?
3 Hayga ndo yaŋ diŋ hẽnbe maaga go de joŋ batem, day ga ndo bay go diŋ jee kay jar maa peel tayge wo wa ɗa no, ndo kaŋn yaŋ peel ɓo maa bag jag go yawlà? Mayse kay mo maa joŋge ɓe là? Joŋre maa hõn wo ɓil Bible kay wo ndo maa bag jag ɓe go là? Ɓil hadge sen la, naa ndal yaŋ ti wiigi jag sen wo la no. Amaa taŋgu ɗa, naa wãã ti joŋre maaga jar kay jar maa peel tayge joŋ wo mo ɗa.
JAR KAY JAR MAA PEEL TAYGE JOŊ WO DIŊ JONRE MAYSE WO LÀ?
4. Joŋre jee kay jar maa peel tayge wo diŋ maylà? (Ko foton lay.)
4 Jar kay jar maa peel tayge wo diŋ hẽẽrebe maaga wo go de joŋ batem. À hoo ra diŋ de ẽgre nenterse maa bay ɗag no, á kay wo jar maa peel tayge wo ti joŋre maa do ɓaara ti tayge no. Jar kay jar maa peel tayge joŋ wo nen maaga kefder mo hay de kããge maa sii wããre. Maa po kay wo ti yogge tiŋ-Baa wo lan maa kne’ fẽẽre maa ɓil tiŋ-Baan wo no. Jar kay jar maa peel tayge yãã wo waare jar le ti taygeti, lan kaŋ wo videyo wo de jõõ ti taygeti wo pa. Joŋre sen wo mo ɗeŋ ɓuy diŋ joŋre maa kay hẽẽrebe wo. Taŋgu ɓuy mono, jar kay jar maa peel tayge wo diŋ jar maaga da wo Jeofa, lan hoo wo sug ti ɓe doo maaga á da nono. Á wo diŋ jar maaga da wo hẽẽre ɓaara wo debaŋ. (Mat. 22:37-39) Hẽnbe maaga go de joŋ batem joŋ joŋge maa kol jee kay jar maa peel tayge wo là?
Jar kay jar maa peel tayge maŋ wo saɓlaŋ Yeso de maaga á hã wo see ɓaara maa joŋ peele ne jar mono (Ko paragraf 4)
5. De ɗeŋ maa hõn ga hẽnbe joŋ joŋre maa kolge jee kay jar maa peel tayge wo là?
5 Bible ngaɓ joŋre maaga hẽẽrebe maaga wo go de wumgi nen bii joŋ wo maa kolge go diŋ jar maa kay jar maa peel tayge wo mono. (1 Tim. 3:8-10, 12, 13) Maaga ndo mo bag jag ɓe go mono, frug nen joŋre sen wo ɓil Bible, lan ni ndo joŋ joŋre de ɓaara. Taŋgu ɗa, wii jag see ɓo ga, wer mayse ga ndi de sãy kol jee kay jar maa peel tayge wo ti là?
WER MAYSE GA NDO DE SÃY KOL JEE KAY JAR MAA PEEL TAYGE WO TI LÀ?
6. De hay jor glog ɓo maa kay hẽẽre ɓo wo diŋ maylà? (Mat 20:28; Ko foto no.)
6 Yeso diŋ saɓlaŋ maa de woore ne naa—á hay joŋ fẽẽren ɓuy diŋ wer dage ɓe see Pan ɓe, lan see jare. Dage sen hay kayge ɓe maaga á mo joŋ joŋre debaŋ, lan maaga á mo joŋ joŋre ne jar de fer ti gesiŋ. (Jaŋ Matiye 20:28; Jaŋ 13:5, 14, 15) Hayga yaŋ jor glog ɓo diŋ dage no, Jeofa kaŋ bosa’ yaŋ mo ti, lan kay mo yaŋ maa kolge jee kay jar maa peel tayge wo.—1 Kor. 16:14; 1 Pi. 5:5.
Yeso had jar maa wer ɓen wo ga á mo joŋ wo peele ne jar de fer ti gesiŋ ti maaga á kiɗ wo diŋ raage ɗuu mono (Ko paragraf 6)
7. Wer mayse ga á bay de el maaga hẽnbe mo kiɗ maa kol jee kay jar maa peel tayge wo diŋ maa kiɗ raage ɗuu wa là?
7 Ti tamsir wara mono, à slag nen ti jar maaga joŋ wo ga ko ga saara mono. Ti tayge maa ni Jeofan, se bay doo sen ne wa. Hẽnbe maaga de dage ɓil doo Yeso no lay ko see ɓe dedaŋ jar ga, lan joŋ ga se mo wãã wããre jar lan wo ga. Hayga à baa jobo maaga ko see ɓe dedaŋ jar lan we doo jee kay jar maa peel tayge wo nono, á joŋ ge joŋren de fer ti gesiŋ ga noga joŋ nen maaga jar mo ko se doo jee koɗ hrog maa de woore no ga. Maapo á ɗig ga se mbe de joŋge na ti ngeel ɓe lay. (Jaŋ 10:12) Jeofa kaŋ bosa’ ne durgi jee maaga kiɗ diŋ maŋge ti ciŋ noga kiɗ diŋ raage ɗuu ti ga.—1 Kor. 10:24, 33; 13:4, 5.
8. Yaŋ maa hõn ga Yeso baa ne apotre ɓen wo là?
8 De ngar ngeel maa po, koh jar maaga hay wo diŋ bar Yeso maa maŋ hay wo de sãy ngeel kluu ti, amaa, hay bay jor glog ɓaara diŋ dage wa. Ɗig ba ti fẽn maaga apotre Jaŋ wo de Jag joŋ wo mo ɗa. Á wii wo Yeso ga á mo hã ngeel kluu ne saara ti twaywaŋ ɓe no. Ɗiggi ɓaara sen co jag Yeso ga. Yaw mono, á wãã ne apotre ɓe maa 12 wo ɓuy ga: “Ama sen mokay mo joŋ yoo ɓay wa, hayga jobo da we ga se mo hay je kluu ɓay no, á mo kol diŋ wejõõ ɓay.” (Mark 10:35-37, 43, 44) Hẽẽrebe maaga kol wo jar kay jar maa peel tayge diŋ werga saara de sãy kay jar ti, kay wo taygen de ɗeŋ sar sare.—1 Tes. 2:8.
MAYSE JOR GLOG ƁO MAA KAY HẼẼRE ƁON WO LÀ?
9. Mayse kay mo maa ya’ wer bag jag ɗiggi ɓo go là?
9 Sen go tinoo tu ga ndo da Jeofa, lan ndo de sãy kay jar ti. Maapo sãy joŋ joŋre doo maaga jar kay jar maa peel tayge joŋ wo bay ti ɓo wa. Mayse kay mo maa ya’ wer dage ɓo maa kay jar là? Ɗig ba ti fruygi maaga ndo da’ de maaga ndo yaŋ kay hẽẽre ɓo wo mo ɗa? Yeso wãã ga: “Je maga hã fẽẽre ne jar de fruygi dedaŋ jar maga à hã fẽẽre ne hara hãge mono.” (Joŋre 20:35) Yeso wããn bay de jag tawa wa, á joŋ joŋre de ɓe lay. Á da’ fruygi wer kayge jare, day ndo lay?
10. Yeso ngaɓ go na ngaɓge ga kayge jar hã fruygi ne se debaŋ là? (Mark 6:31-34)
10 Naa ko saɓlaŋ maaga Yeso hay ɓo’ nen go ga se de fruygi ti maaga se kay jar mo ɗa. (Jaŋ Mark 6:31-34.) Ti wur po, Yeso wo de jar maa wer ɓen hay wo go de gayri. Á raw wo wo go ti ngeel po maa de yoŋre maa ig see ɓaara. Amaa ngaɓa jar raw tayge le see ɓaara, de kaŋ ɗiggi ga Yeso had saara yaŋ. Yeso hay bay de kããge maa wããge ga baywa wa, werga á “hay bay wo da’ nen maa rege dra’ wa.” Noga Yeso de hay fer jar wo go blam maaga á had ra de wããre po wo mẽ’ mono. Day, werga hay jor glog ɓe diŋ dage so mono, “á raw had rage de wããre debaŋ.” Se ya’ wer had rage hãã de maaga “wur hay go de coŋge” mono. (Mark 6:35) Á joŋ sen bay do doole wa, amaa werga á “hay wo ko decoo nen ɓe debaŋ.” Á hay de sãy had rage ti werga á hay da rage. Kayge jar hay hã fruygi ne Yeso debaŋ.
11. Yeso joŋ joŋge maa kay jar de fẽẽre maaga á hay wo de sãy ɓaara ti mo là? (Ko foton lay.)
11 De maaga Yeso hay kay ngaɓa jar mono, á taw diŋ de had rage tawa ga. Á ɗig ti ti fẽẽre maaga á wo de sãy ɓaara ti ni lay. Á hã rege ne hara de joŋ fẽn mbuɗgi, blam se wii jar maa wer ɓen wo ga á mo ɓrewn wo go ne jare. (Mark 6:41) De joŋge doo sen nokay, se had jar maa wer ɓen wo ga á mo hay wo kay jare. Á ngaɓ ne hara pa ga hãge fẽẽre ne jare—doo joŋre maaga jar kay jar maa peel tayge joŋn wo—de woore ɓuy. Ɗig ba ti fruygi maaga jar peele Yeson hay wo de ɓe de maaga á ɓrew wo rege maaga Yeso joŋ de fẽn mbuɗgi, ga hãã “wosela ɓuy wúu go de hoole” mo ɗa! (Mark 6:42) Cwãy tu, Yeso hay kaŋ da’ge jar go peel maa ɓen bay diŋ wur sen tawa wa. Á hã naw ɓe maa ti tamsirn la go ɓuy maa kay jare. (Mat. 4:23; 8:16) Yeso hay go de fruygi debaŋ maa had jare, lan maa kaŋ ɗiggi ti fẽẽre maaga á hay wo de sãy ɓaara ti mono. Ndo lay, ndo da’ fruygi yaŋ debaŋ, hayga ndo yaŋ go de hã see ɓo maa kay jar no. Joŋre sen kay mo maa kol jee kay jar maa peel tayge wo.
De maaga ndo yaŋ da Jeofa, lan yaŋ de sãy joŋ peele ne jar lan ti no, ndo joŋ fẽn maaga ndo de kããge maa joŋge ɓe mo ɓuy maa joŋ peele ne hẽẽrebe wo (Ko paragraf 11) a
12. Wer mayse ga jobo yoo naa mo hay ɗig ga kayge se bay ti tayge wa na wa là?
12 Hayga ndo ko we ga ndo bay de kããge maa joŋ mopo go de woore ta’ wa no, woo do go wa. Sen go tinoo tu ga joŋre ɓo po yaŋ maaga kay ti tayge no. Ɗig ti fẽn maaga apotre Pol wãã ɓil 1 Korente wo 12:12-30 mono, lan ni ndo wii Jeofa ga á mo kay mo maa ko ɗeŋ maaga ndo joŋ joŋre de ɓe mono. Wããre Poln ngaɓ go de woore tu ga kayge ɓo yaŋ ti taygen, doo Sedeewa Jeofa lan wo no ɓuy lay. Hayga ndo yaŋ bay de kããge maa kol jee kay jar maa peel tayge wo wa ɗa, werga ndo bay de ko joŋre maa po wo wa ɗa no, men joŋge ɓe wa. Ba yaw mono, joŋ fẽn maaga ndo de kããge maa joŋge ɓe maa goŋ Jeofa, lan maa kay hẽẽrebe wo mono. Ndo mbo maa joŋge go de bawge jag jiili ɓo ga jar maa peel tayge ɗig gi wo yaŋ ti ɓo, lan hã wo joŋre maaga ndo de kããge maa joŋ rage yaŋ mo.—Rom. 12:4-8.
13. Jeofa gor mayse do Kretiyẽ wo, lan do jar maaga à de lag rage peel mo là?
13 Naa ko wer mayse ga á de el maaga jobo kol jee kay jar maa peel tayge wo la ɗa: Kretiyẽ wo ɓuy hay joŋ wo de joŋre maaga à gor do jar kay jar maa peel tayge wo mo lay. Kretiyẽ wo ɓuy mo hay ya’ wo see ɓaara see Jeofa, mo hay hã wo ne jar de fruygi, lan hay hã wo saɓlaŋ ti ɓaŋ seele Kretiyẽ wo. Hẽnbe joŋ diŋ mayse maaga se mo hay kol jee kay jar maa peel tayge wo là?
NDO JOŊ JOŊGE MAA KOL JEE KAY JAR MAA PEEL TAYGE WO LÀ
14. Jobo maaga “jar de horge sug ti [ɓe]” diŋ jobo maa elà? (1 Timote 3:8-10, 12)
14 Patala naa ko joŋre maaga jar kay jar maa peel tayge mo hay bag wo jag ɓe go, ga naa da ɓil 1 Timote 3:8-10, 12 mo ɗa. (Jaŋ ne.) Jar kay jar maa peel tayge wo diŋ “jar maga jar de horge sug ti ɓaara.” Maapo ga wããre sen da wããge mbe pa ga “jobo maaga à hoo sug ti ɓe,” “de deele,” noga de “cõõre jag jare.” Sen bay da wããge ga ndo feg ti boŋ ga na wa. (Ekl. 3:1, 4) Amaa, sen da wããge ga ndo hay dur go de ẽgre ɓo ɓuy maa bag jag joŋre maaga à hã ra mo do mo go. Hayga ndo yaŋ tum bag jag joŋre maaga à hã ra mo do go, lan yaŋ go joŋ rage de woore lay no, hẽẽrebe maa ti tayge kaŋ wo ɗiggi yaŋ ti ɓo, lan hoo wo sug yaŋ ti ɓo.
15. ‘Herge wããre kar kar ga’ wo de “daɗge fẽẽre de freŋ nen ga” da wããge ga hãylà?
15 Wããre maaga wãã ga “her wããre go kar kar wa” da wããge ga ndo wãã cway, bay caa gete’ wa, lan joŋ ga à mo kaŋ ɗiggi ti ɓo. Ndo bag jag fẽn maaga ndo wãã go mono, ndo caa gete’ ne jar ga. (Jõõ. 3:32) “Daɗge fẽẽre de freŋ nen [ga]” da wããge ga ndo de deele ti ɓaŋ treere, lan ti baŋ ɗawge suŋgu. Ndo baa barge ti tayge diŋ de jar maaga ndo da’ge suŋgu yaŋ do ɓaara tawa ga.
16. (a) Wããre maaga à wãã ga “hã see [ɓe] ne yii wa” da wããge ga hãylà? (b) “Ɗiggi ma de el no” da wããge ga hãylà?
16 Wããre maaga à wãã ga á mo “hã see [ɓe] ne yii wa” da wããge ga ndo mo hay jo yii debaŋ wa, noga jar mo hay go de ko ndo ga ndo da yii debaŋ wa. “Ɗiggi ma de el no” da wããge ga ndo hoo sug ti jag liŋgi maa ni Jeofa no. Koh de maaga ndo mbo diŋ jobo maa ti mnayse mo laybla no, ndo fruy ti maaga jam ɓon a le diŋ see barge ɓo maa de woore de Jeofa mono.
17. ‘Lamge jobo go taŋgu ɗa, da wããge ga hãylà? (1 Timote 3:10; Ko foton lay.)
17 “Daga à mo lam ra go taŋgu ɗa”. Wããre sen da wããge ga jar maa peel tayge wo go de ko ndo ti maaga ndo bag jag joŋre maaga à hã ra mo do go mono, lan ga saara kaŋ ɗiggi ti ɓo. Wersen, de maaga jar maa peel tayge hã wo joŋre we mo do no, hoo sug ti jag liŋgi maaga á hã wo mo wer ɓe, wo de maaga tayge maa ni Jeofan hã ra de woore. Laa wer go ne fẽn maaga ndo de sãy joŋge ɓe ti de woore, lan wur maaga ndo tawn go mono. De maaga ndo bag jag joŋre maa do ɓon go de woore mono, jar maa ti tayge ko wo ne, lan gẽẽge ɓo ciŋ ti wããre Baa de wooren co jag ɓaara. Jar maa peel taygen wo, kay wee hẽẽrebe maaga wo go de joŋ batem mono. (Jaŋ 1 Timote 3:10.) Maa jõõre yaŋ wo ti tayge ɓo, ga wo go de joŋ batem yawlà? Á mbaara de frug nen Wããre Baa maaga ndo joŋ boŋ ɓo, lan mbaara de bag jag see ɓaara go see taygeti wo de woore yawlà? Hayga yaŋ no, hã joŋre ne hara do diŋ see kiŋgi ɓaara, lan de ngar ɓaara. Doo sen nokay, saara joŋ yaŋ go de ‘lamge taŋgu’ ti ɓaŋ joŋre ɓaara wo. Blam sen, de maaga á day wo we go kluuri so no, saara joŋ yaŋ de kããge maa kol jar kay jar maa peel tayge wo.
De maaga jar maa peel tayge hã wo joŋre ne werpiiri maaga wo go de joŋ batem do mono, sen ɓo’ nen ga á “lam wo ra go taŋgu ɗa” (Ko paragraf 17)
18. Wããre maaga à wãã ga “à da’ re po we ti ɓaara ga so no” da wããge ga hãylà?
18 “À da’ re po we ti ɓaara ga so no”. Wããre sen da wããge ga jobo wãã ti ɓo ga ndo joŋ ɓlagge maa kwũy, day ga se diŋ cwãy lay ga. Cwãy tu, maapo à caa mbe re ne Kretiyẽ wo see. Yeso hay yiŋ de tee re sen lay, day se wãã go peel bol ga jar maa wer sen yiŋ gi wo yaŋ de ɓe lay. (Jaŋ 15:20) Amaa, hayga seele ɓo yaŋ tum de woore doo Yeso no lay no, ɗuu ɓo joŋ yaŋ go de fããge peel tayge no.—Mat. 11:19.
19. Maaga Bible wãã ga jee twar “mo hay de wãy boŋ” mono, á da wããge ga hãylà?
19 “Mo hay de wãy boŋ.” Hayga ndo yaŋ de wãy no, ndo hay hoo sug ti jag liŋgi maaga Baa hã ti ɓaŋ dage wãy le taŋgu mono—jee twar mo hay de wãy boŋ, wãy mo hay de war boŋ. (Mat. 19:3-9) Kretiyẽ de hay joŋ figliw ti boŋ ga. (Heb. 13:4) Amaa, joŋre maa tigriŋ wo do ɓaara ni debaŋ. Ndo de hay joŋ de deele see wãy ɓo, lan ndo slag nen ti wãy maa tigriŋ ga.—Job 31:1.
20. Jobo ko nen ti jar maa ti feele ɓe wo “de ele” na de ɗeŋ maa hõnlà?
20 “Mo hay koɗ weere ɓe wo de tiŋ ɓe de ele.” Hayga ndo yaŋ diŋ pan tiŋ no, ndo mo hay bag jag joŋre maa do ɓon go de woore. Joŋ hadge maa ɓi feele ɓon tum tum. Sii wããre Baa de jar maa liŋ ni ɓo wo boŋ boŋ ɓuy doo maaga ẽgre ɓo kãã nono. Kay weere ɓo wo maaga barge wosela ɓuy yoo ɓaara mo hay de Jeofa de woore. (Efe. 6:4) De maaga jobo yaŋ ko de el jar maa liŋ ni ɓe wo no, se ɓo’ nen ga á de kããge maa ko nen ti taygen lay.—Tab ne de 1 Timote 3:5.
21. Hayga nday yaŋ bay go diŋ jar kay jar maa peel tayge wo wa ɗa no, nday hay joŋ joŋge là?
21 Hẽẽrebe wo, hayga nday yaŋ bay go diŋ jar kay jar maa peel tayge wo wa ɗa no, jaŋ wee hadge sen la de woore, ni nday tos wee Jeofa ti re se no. Frug wee nen joŋre maaga à wii do jar kay jar maa peel tayge wo mono, ni nday joŋ joŋre debaŋ maa bag jag ɓaara go. Ɗig wee ti dage maaga nday da Jeofa wo de hẽẽrebe wo mono. Ya’ wee wer dage ɓay ciŋ see hẽẽrebe wo, lan ɗig wee wer mayse ga nday de sãy joŋ peele ne hara ti là. (1 Pi. 4:8, 10) Dur wee maa kol jar kay jar maa peel tayge wo, ni nday da’ fruygi yaŋ debaŋ, hayga nday yaŋ joŋ peele ne hẽẽrebe maa ti tayge wo no. Daga Jeofa mo ɓo’ bosa’ ne durgi ɓay maaga nday dur maa kol jar kay jar maa peel tayge wo mo ti!—Flp. 2:13.
SIŊ 17 « Je le veux »
a NAAGE WER FOTO MAA NEN : Ti ɓaŋ guri, Yeso de joŋ peele ne jar maa wer ɓen wo de fer ti gesiŋ; Ti ɓaŋ ware, jee kay jar maa peel tayge po de kay hẽnbe maaga go de garge ti tayge.
