1-2. Cosa el envuelto na trabajo del un anciano?

 SI TA sirvi tu como un siervo ministerial por cuanto tiempo ya, posible que ya puede ya tu alcanza con el cuanto cualificacion para puede sirvi como un anciano. Quierre ba tu sirvi pa mas con el maga hermano y hermana?—1 Tim. 3:1.

² Cosa el envuelto na trabajo del un anciano? Ta encabeza le na predicacion, ta hace esfuerzo para man shepherding, ta enseña y ta anima con el congregacion por medio na de suyu palabra y accion. Poreso justo lang que el Biblia ya habla que “maga regalo” el maga anciano.—Ef. 4:8, NWT.

3. Paquemodo el un hermano queda cualificao para sirvi como un anciano? (1 Timoteo 3:1-7; Tito 1:5-9)

³ Paquemodo tu puede sirvi como un anciano? Gendeh se igual como ta busca tu trabajo. Mas mucho, si na secular trabajo, necesita lang que tiene tu el abilidad que ta busca el compania. Pero gendeh ansina si quierre tu sirvi como un anciano. Gendeh bastante que tiene lang tu el abilidad para predica y enseña. Sino, necesita tu alcanza con el maga cualificacion que base na Escritura para na maga anciano. (Le con el 1 Timoteo 3:1-7, NWT y Tito 1:5-9, NWT.) Hay discuti kita na este articulo el cuanto na maga calidad que ya menciona na ese maga versiculo. Aprende kita si paquemodo el un hermano puede tene buen reputacion, puede queda un buen cabeza na familia y si cosa puede ayuda con ele para queda le preparao sirvi con otro na congregacion.

TENE UN BUEN REPUTACION

4. Paquemodo tu tene buen reputacion?

⁴ Para queda tu cualificao sirvi como un anciano, debe “gendeh [tu] un persona con quien tiene cosa puede habla malo.”  Entonces, debe tu tene buen conducta para puede tu tene buen reputacion na congregacion. Mas pa, debe “bueno tambien el [de tuyu] reputacion na maga gente apuera.” Siempre, posible sila cuestiona con el cosa tu ta creé pero debe nuay sila razon para pensa que gendeh tu honesto o nuay tu buen conducta. (Dan. 6:4, 5) Pregunta na de tuyu mismo cuerpo, ‘Tiene ba yo buen reputacion adentro y apuera del congregacion?’

5. Paquemodo tu dale mira que “ta ama [tu] con el cosas bueno”?

⁵ Si “ta ama [tu] con el cosas bueno,” ta mira tu con el cosas positivo con otro y ta comenda tu kanila por causa na diila maga buen calidad. Alegre tambien tu hace maga buen cosas para con otro maskin pa gendeh tu obligao que hace con ese. (1 Tes. 2:8; mira con el “lover of goodness” study note na Tito 1:8.) Porque importante que tiene ansina calidad el maga anciano? Cay ta dale sila grande tiempo para man shepherding con el maga hermano y hermana y para cumpli con el diila maga assignment. (1 Ped. 5:1-3) Maskin pa ta necesita se grande esfuerzo, mas grande siempre el alegria que ta sinti sila.—Act. 20:35.

6. Cosa el cuanto manera para queda “hospitable”? (Maga Hebreo 13:2, 16; mira tambien con el letrato.)

⁶ Ta dale tu mira que “hospitable” tu si ta hace tu buen cosas para con otro maskin con aquellos gendeh amigo o amiga de tuyu. (1 Ped. 4:9) Ansina el cosa ya habla el un referencia acerca na un gente hospitable: “Abierto el puerta del de suyu casa y del de suyu corazon maskin con aquellos no conoce le.” Pregunta na de tuyu mismo cuerpo, ‘Conoce ba conmigo que hospitable yo na maga visita?’ (Le con el Maga Hebreo 13:2, 16.) El un gente hospitable ta dale el cosa le tiene na de suyu maga visita. Por ejemplo, ta hace le se na maga pobre, con aquellos quien ya invita dale talk na congregacion y con el maga circuit overseer quien ta hace esfuerzo para anima con el maga hermano y hermana.—Gen. 18:2-8; Prov. 3:27; Luc. 14:13, 14; Act. 16:15; Roma 12:13.

7. Paquemodo el un anciano dale mira que ele “gendeh ta ama con el sen”?

⁷ “Gendeh ta ama con el sen.” Ese quierre decir que gendeh puro material cosas ya lang el laman del de tuyu pensamiento. Rico man tu o pobre, ta hace tu una con el Reino del Dios na todo aspeto del de tuyu vida. (Mat. 6:33) Ta  usa tu con el de tuyu tiempo, fuerza y material cosas para adora con Jehova, cuida con el de tuyu familia y ayuda con otro na congregacion. (Mat. 6:24; 1 Juan 2:15-17) Pregunta na de tuyu mismo cuerpo, ‘Cosa el de mio mirada na sen? Si tiene ya yo el cosas que necesita yo, contento ya ba yo? O ta usa lang ba yo con el de mio tiempo para tene sen y mas manada material cosas?’—1 Tim. 6:6, 17-19.

8. Cosa el cuanto manera que puede tu dale mira que “balance” tu y “tiene control na cuerpo”?

⁸ Ta dale tu mira que “balance” tu y “tiene control na cuerpo” si ta evita tu con el cosas por demas na todo aspeto del de tuyu vida. Incluido alli el comida, tomada, ichura y mudada, y recreacion. Gendeh tu basta ta sigui con el todo cosa uso na mundo. (Luc. 21:34; Sant. 4:4) Ta esta tu calma maskin pa ta manda contigo consumi el otro. “Gendeh [tu] burrachon” ni sobra ta toma. Pregunta na de tuyu mismo cuerpo, ‘Ta puede ba mira el otro que balance yo y tiene control na cuerpo?’

9. Paquemodo tu dale mira que “tiene [tu] buen pensamiento y “arreglao”?

⁹ Ta dale tu mira que “tiene [tu] buen pensamiento” si ta examina tu enbuenamente con el maga cosas asegun na maga principio na Biblia. Para tene tu sabeduria y entendimiento, ta considera tu enbuenamente con ese maga principio. Gendeh tu dayun-dayun ta hace conclusion sino ta asigura tu que sabe tu el todo detalle. (Prov. 18:13) Por medio con ese, puede tu hace justo decision que harmonia na pensamiento de Jehova. Puede tu dale mira que “arreglao” tu si organizao tu y pirmi na hora. Puede tambien contigo depende el otro y anad tu sigui direccion. Este maga calidad puede ayuda contigo para tene buen reputacion. Discuti kita ahora si paquemodo tu alcanza con el otro cualificacion na Escritura.

QUEDA UN BUEN EJEMPLO COMO CABEZA DE FAMILIA

10. Paquemodo el un hermano “ta mira con el de suyu mismo familia na buen manera”?

¹⁰ Si un marido tu y quierre sirvi como un anciano, importante el reputacion del de tuyu familia para queda tu cualificao. Entonces, necesita tu queda un marido quien “ta mira con el [de tuyu] mismo familia na buen manera.” Poreso, necesita que conocido contigo como un responsable y amable cabeza de familia. Puede tu se hace si ta conduci tu de familia adoranza, ta asigura que ta puede atende el de tuyu familia na maga miting, ta ayuda kanila para queda activo na ministerio y otro pa. Porque se bien importante? Cay asegun pa con apostol Pablo: “Si el un hombre no sabe mira con el de suyu mismo familia, paquemodo le cuida con el congregacion del Dios?”—1 Tim. 3:5, NWT.

11-12. Paquemodo el conducta del familia del un hermano puede afecta na de suyu cualificacion? (Mira tambien con el letrato.)

¹¹ Si un tata tu, debe el de tuyu maga menor de edad “anak ta somete y tiene buen custumbre.” Necesita tu enseña y man train kanila na amable manera. Siempre, normal lang na maga bata que quierre sila juga y man alegria. Pero debe tambien que obediente sila, respetoso y gendeh salawayun. Puede sila tene ansina conducta si enseña tu kanila enbuenamente. Mas pa, debe tambien tu hace esfuerzo para ayuda kanila tene buen relacion con Jehova, vivi harmonia na maga principio na Biblia y progresa na espiritual hasta bautiza sila.

¹² “Nuay acusa con el de suyu maga anak creyente que tiene sila gendeh buen manera de vida o rebelloso.” Si el un hermano tiene anak que ya comete serioso culpa quien bautizao ya o ta progresa para na bautismo y ta queda junto na casa, paquemodo se afecta con ele? Si el  tata nuay puede enseña y disciplina con el de suyu anak, grande el posibilidad que gendeh le puede sirvi como un anciano.—Mira con el Octubre 15, 1996, issue del The Watchtower, p. 21, par. 6-7.

SIRVI NA CONGREGACION

13. Paquemodo tu dale mira que “razonable” tu y “gendeh sabiondo”?

¹³ Grande ayuda na congregacion el maga hermano quien ta demonstra maga bonito calidad. El un gente “razonable” ta ayuda mentena paz. Puede tu queda ansina na mirada del otro si ta oi tu y ta pricura entende con el opinion diila. Por ejemplo, si talli ustedes na un miting y yan uyun el mayoria na un decision, conforme ba tu suporta kanila si nuay ley o principio na Biblia que ya viola? Puede tu se hace si gendeh tu insisti con el cosa tu quierre y ta acepta con el opinion del otro. Na ansina manera, ta dale tu mira que etu “gendeh sabiondo.” (Gen. 13:8, 9; Prov. 15:22) Mas pa, “gendeh [tu] peleador” o “gendeh pronto rabia.” En vez queda nuay respeto o purpia kanila, hay converza tu kanila na buen manera. Hay pricura tambien tu mentena paz maskin na maga situacion que donde tiene tension. (Sant. 3:17, 18) El de tuyu maga buen palabra puede ayuda para queda calmao el otro maskin aquellos quien tan contra con el diaton creencia.—Juez 8:1-3; Prov. 20:3; 25:15; Mat. 5:23, 24.

14. Cosa quierre decir que el un persona “gendeh . . . nuevo lang ya convirti” y “leal”?

¹⁴ El maga hermano quien ya queda cualificao para sirvi como un anciano “gendeh . . . nuevo lang ya convirti.” Deverasan, gendeh necesita que bautizao el un hermano por manada año antes ele queda cualificao. Pero necesita le bastante tiempo para queda mature na espiritual. Para queda tu un anciano, debe tu demonstra que igual con Jesus, humilde tu y conforme espera si cuando contigo dale privilegio si Jehova. (Mat. 20:23; Fil. 2:5-8) Puede tambien tu dale mira que “leal” tu si ta esta tu fiel con Jehova y ta sigui con el de suyu maga principio y maga direccion que ta dale le.—1 Tim. 4:15.

15. Debe ba bueno gayot dale talk el un anciano? Explica.

 ¹⁵ El Escritura claro ta dale mira que aquellos quien ta encabeza na congregacion debe “cualificao para enseña.” Este ba quierre decir que necesita bueno gayot tu dale talk? Gendeh. Manada na maga anciano el bueno enseña na ministerio y man shepherding maskin gendeh sila el de con todo bueno speaker. (Mira con el “qualified to teach” study note na 1 Timoteo 3:2; compara na 1 Corinto 12:28, 29 y Efeso 4:11.) Maskin pa ansina, necesita siempre tu pricura mejora con el de tuyu abilidad na enseñada. Paquemodo tu se puede hace?

16. Paquemodo tu queda mas efectivo na de tuyu enseñada? (Mira tambien con el letrato.)

¹⁶ “Ta esta pijo na mensaje que puede confia.” Para queda mas efectivo na de tuyu enseñada, debe tu usa con el Palabra del Dios si ta enseña na publico y si ta dale consejo na privado. Para puede se hace, necesita tu estudia enbuenamente con el Biblia y con el diaton maga publicacion. (Prov. 15:28; 16:23; mira con el “holding firmly to the faithful word” study note na Tito 1:9.) Mientras ta estudia tu, nota si cosa quierre decir del maga texto para puede tu usa con ese na justo manera. Si ta enseña tu, pricura alcanza el corazon de aquellos quien ta oi contigo. Grande tambien ayuda si pidi tu sugestion na maga experienciao anciano y aplica con ese. (1 Tim. 5:17) Necesita tambien que el maga anciano ta “puede . . . anima” con el maga hermano y hermana. Pero tiene tiempo, necesita tambien sila dale consejo o “corecta” pa gane con otro. Y ta hace sila se na amable manera. Si amable tu y ta usa con el Palabra del Dios, hay queda tu efectivo na de tuyu enseñada. Mas pa, ta imita tu con el Buen Maestro, si Jesus.—Mat. 11:28-30; 2 Tim. 2:24.

CONTINUA HACE ESFUERZO PARA QUEDA CUALIFICAO

17. (a) Cosa puede ayuda con el maga siervo ministerial para alcanza con el cualificacion para queda un anciano? (b) Cosa debe acorda el maga anciano si ta decidi si recomenda ba sila con el un hermano? (Mira con el cajon “ Queda Modesto si Tan Repaso con el Cualificacion del Otro.”)

¹⁷ Despues man repaso con el maga cualificacion para puede sirvi como un anciano, posible que sinti el cuanto siervo ministerial que  nunca sila queda cualificao. Pero acorda que gendeh ta expecta si Jehova ni el de suyu organizacion que puede tu demonstra este maga calidad na perfecto manera. (1 Ped. 2:21) Mas pa, puede lang tu alcanza con ese maga cualificacion por medio na ayuda del sagrao espiritu de Jehova. (Fil. 2:13) Tiene ba un particular calidad que quierre tu mas cultiva? Puede tu se inclui na de tuyu rezo con Jehova. Man research acerca con ese y pidi sugestion na uno del maga anciano si paquemodo tu puede hace con ese.

18. Cosa ta anima con el todo maga siervo ministerial que hace?

¹⁸ Maga hermano, ojala todo kita, incluido aquellos quien ta sirvi ya como anciano, continua cultiva con el maga calidad que ya discuti na este articulo. (Fil. 3:16) Un siervo ministerial ba tu? Hace esfuerzo para progresa y queda cualificao para sirvi como un anciano! Pidi con Jehova que man train contigo para puede tu hace pa mas na servicio con ele y na congregacion. (Isa. 64:8) Ojala na ayuda de Jehova queda tu cualificao para sirvi como un anciano.