1-2. Unsang “maayong buhat” ang ginahimo sa mga ansiyano?

 KON taudtaod na kang nag-alagad ingong ministeryal, tingali nakaugmad na kag mga hiyas nga gikinahanglan aron mahimong ansiyano. Gitinguha ba nimo kini nga “maayong buhat”?—1 Tim. 3:1.

² Unsang “maayong buhat” ang ginahimo sa mga ansiyano? Manguna siya sa pagsangyaw, magkugi sa pag-shepherding ug pagpanudlo, ug magpalig-on sa kongregasyon pinaagi sa iyang sinultihan ug binuhatan. Busa haom lang gyod nga gitawag sa Bibliya kining kugihan nga mga ansiyano ingong “gasa nga mga lalaki.”—Efe. 4:8.

3. Sa unsang paagi mokuwalipikar ang usa ka brader sa pag-alagad ingong ansiyano? (1 Timoteo 3:​1-7; Tito 1:​5-9)

³ Sa unsang paagi mokuwalipikar ka sa pag-alagad ingong ansiyano? Ang pagkahimong ansiyano lahi sa pagpangaplay ug trabaho. Kon mangaplay kag trabaho, sagad madawat dayon ka kon naa nimo ang gikinahanglang mga skill. Pero kon gusto nimong matudlo ingong ansiyano, dili lang ang kahanas sa pagsangyaw ug pagpanudlo ang kinahanglan nimong ugmaron. Kinahanglan nimong makab-ot ang mga kuwalipikasyon para sa mga ansiyano nga gihisgotan sa 1 Timoteo 3:​1-7 ug Tito 1:​5-9. (Basaha.) Niining artikuloha, atong hisgotan ang mga kuwalipikasyon para sa mga ansiyano kon bahin sa pagbaton ug maayong reputasyon, pagpakitag maayong ehemplo ingong ulo sa pamilya, ug pagkaandam nga moalagad sa kongregasyon.

PAGBATON UG MAAYONG REPUTASYON

4. Unsay gipasabot sa pagkahimong “dili salawayon”?

⁴ Aron mahimong ansiyano, kinahanglang ‘dili ka salawayon.’ Nagpasabot ni nga naa kay maayong reputasyon sa kongregasyon  kay walay ikasaway sa imong binuhatan. Dugang pa, kinahanglang ‘maayo sab kag reputasyon sa mga tawo sa gawas.’ Kuwestiyonon tingali sa mga dili magtutuo ang imong tinuohan, pero kinahanglang wala silay balidong rason nga kuwestiyonon ang imong pagkamatinud-anon ug maayong binuhatan. (Dan. 6:​4, 5) Pangutan-a ang kaugalingon, ‘Maayo ba kog reputasyon sa mga igsoon ug bisan sa mga dili Saksi?’

5. Unsaon nimo pagpakita nga ikaw “mahigugmaon sa pagkamaayo”?

⁵ Kon ikaw “mahigugmaon sa pagkamaayo,” magpokus ka sa maayong mga hiyas sa uban ug sultihan sila nga imo silang naapresyar. Malipay pod kang mohimog maayo para sa uban, ug mohimo pa ganig mga butang nga labaw pa sa gikinahanglan. (1 Tes. 2:8; tan-awa ang study note nga “lover of goodness” sa Tito 1:8.) Nganong importante kaayo ni nga hiyas para sa mga ansiyano? Kay kon naa sila ani nga hiyas, malipay silang mogahin ug dakong panahon sa pag-atiman sa mga igsoon ug sa ilang mga asaynment. (1 Ped. 5:​1-3) Bisag daghan silag buluhaton, ang kalipay nga ilang bation mas labaw pa kay sa ilang gisakripisyo.—Buh. 20:35.

6. Unsa ang pipila ka paagi aron mahimo kang “maabiabihon”? (Hebreohanon 13:​2, 16; tan-awa sab ang hulagway.)

⁶ Mapakita nimo nga “maabiabihon” ka kon mohimo kag maayo sa uban, bisan niadtong dili nimo suod. (1 Ped. 4:9) Bahin sa tawong maabiabihon, ang usa ka reperensiya nag-ingon: “Ang iyang balay—ug ang iyang kasingkasing—kinahanglang bukas ngadto sa mga dili niya kaila.” Pangutan-a ang kaugalingon, ‘Nailhan ba ko nga maabiabihon?’ (Basaha ang Hebreohanon 13:​2, 16.) Ang tawong maabiabihon magpakitag kaayo sa tanang bisita, apil na sa mga pobre, sa dinapit nga mga mamumulong, ug sa kugihang mga alagad ni Jehova sama sa mga tigdumala sa sirkito.—Gen. 18:​2-8; Prov. 3:27; Luc. 14:​13, 14; Buh. 16:15; Roma 12:13.

7. Unsaon pagpakita sa ansiyano nga siya “dili mahigugmaon sa kuwarta”?

⁷ “Dili mahigugmaon sa kuwarta.” Nagpasabot ni nga dili nimo prayoridad ang materyal nga mga butang. Dato man ka o pobre, giuna nimo ang Gingharian sa tanang bahin sa imong kinabuhi. (Mat. 6:33) Gigamit nimo ang imong panahon, kusog, ug materyal nga  mga butang sa pagsimba kang Jehova, pag-atiman sa imong pamilya, ug sa pag-alagad sa kongregasyon. (Mat. 6:24; 1 Juan 2:​15-17) Pangutan-a ang kaugalingon: ‘Unsay panglantaw nako sa kuwarta? Kontento na ba ko sa akong pangunang mga panginahanglan? O nagpokus ba ko sa pagpanguwarta ug pagbaton ug mas daghang materyal nga mga butang?’—1 Tim. 6:​6, 17-19.

8. Unsay pipila ka paagi nga mapakita nimo nga naa kay “pagpugong sa kaugalingon”?

⁸ Kon naa kay “pagpugong sa kaugalingon,” balanse ka sa tanang bahin sa imong kinabuhi. Pananglitan, dili ka magpalabig kaon ug inom, haom kag sininaan ug pamostura, ug balanse ka sa pagpilig kalingawan. Dili ka magsunodsunod sa mga uso sa kalibotan. (Luc. 21:34; Sant. 4:4) Kalmado sab ka bisag himoan kag dili maayo sa uban. ‘Dili ka palahubog’ ug wala pod ka mailhi nga palainom. Pangutan-a ang kaugalingon, ‘Makita ba sa akong paagi sa pagkinabuhi nga naa koy pagpugong sa kaugalingon?’

9. Unsay gipasabot sa “maayog panghunahuna” ug “talahoron”?

⁹ Kon ikaw “maayog panghunahuna,” pamalandongon nimog maayo ang matag situwasyon base sa mga prinsipyo sa Bibliya. Hunahunaon nimo pag-ayo kini nga mga prinsipyo aron makabaton kag pagsabot ug makahimog maalamong desisyon. Dili ka magdalidali sa pagdesisyon. Hinuon, seguroon nimo nga nahibalo ka sa tanang impormasyon. (Prov. 18:13) Ingong resulta, makahimo kag maalamong mga desisyon nga gibase sa panghunahuna ni Jehova. Kon “talahoron” ka, nailhan ka nga organisado, dili langaylangayan, kasaligan, ug mosunod gyod sa mga direksiyon. Kini nga mga hiyas makatabang aron makabaton kag maayong reputasyon. Karon, atong konsiderahon ang mga kuwalipikasyon nga gihisgotan sa Bibliya bahin sa pagkahimong maayong ulo sa pamilya.

PAGPAKITAG MAAYONG EHEMPLO INGONG ULO SA PAMILYA

10. Sa unsang paagi ang usa ka brader ‘magdumala sa iyang panimalay sa maayong paagi’?

¹⁰ Kon minyo ka ug gusto nimong mokuwalipikar ingong ansiyano, ang reputasyon sa imong pamilya makaapektar sa imong kuwalipikasyon. Busa kinahanglan nimong ‘dumalahon ang imong panimalay sa maayong paagi.’ Kinahanglang nailhan ka ingong mahigugmaon ug responsable nga ulo sa pamilya. Apil ani ang pagpanguna sa tanang bahin sa atong pagsimba. Nganong importante kaayo ni? Si apostol Pablo miingon: “Kon ang lalaki dili makamaong modumala sa iyang panimalay, unsaon man niya pag-atiman sa kongregasyon sa Diyos?”—1 Tim. 3:5.

11-12. Sa unsang paagi ang panggawi sa pamilya sa brader makaapektar sa iyang kuwalipikasyon? (Tan-awa sab ang hulagway.)

¹¹ Kon amahan ka, kinahanglan nga ang imong menor de edad nga “mga anak mapinasakopon ug maayog panggawi.” Kinahanglang tudloan ug bansayon nimo sila sa mahigugmaong paagi. Siyempre, gusto nimo nga malingaw ang imong mga anak ug magduladula sama sa ubang mga bata. Pero tungod sa imong maayong pagbansay, mahimo silang masinugtanon, matinahoron, ug maayog pamatasan. Angay pod kang maningkamot nga tabangan ang imong mga anak nga makabaton ug maayong relasyon kang Jehova, magkinabuhi uyon sa mga prinsipyo sa Bibliya, ug magpabawtismo.

¹² “May mga anak nga magtutuo nga wala akusahig dili maayong pagkinabuhi o pagkarebelyoso.” Kon ang amahan naay anak nga bawtismado o nagauswag sa espirituwal ug ang maong anak nakahimog seryosong sala, unsay epekto niana sa amahan? Kon wala maningkamot ang amahan sa pagbansay ug pagdisiplina sa iyang anak, posibleng dili siya mokuwalipikar ingong ansiyano.—Tan-awa ang Oktubre 15, 1996 nga Bantayanang Torre, panid 21, parapo 6-7.

 PAG-ALAGAD SA KONGREGASYON

13. Unsaon nimo pagpakita nga “makataronganon” ka ug “dili mabuotbuoton”?

¹³ Ang mga brader nga nagpakitag Kristohanong mga hiyas panalangin gyod sa kongregasyon. Ang “makataronganon” nga brader maningkamot nga mamentinar ang kalinaw. Kon gusto kang mailhan nga makataronganon, paminaw sa uban ug paningkamot nga masabtan ang ilang opinyon. Sa mga miting, andam ba ka nga suportahan ang desisyon sa kadaghanan kon wala ray nalapas nga balaod o prinsipyo sa Bibliya? Ang “dili mabuotbuoton” nagpasabot nga dili nimo ipamugos ang imong paagi sa paghimo sa mga butang. Para nimo, importanteng maminaw sa opinyon sa uban. (Gen. 13:​8, 9; Prov. 15:22) Ikaw “dili palaaway” o “dili daling masuko.” Buotan ka ug nag-amping sa imong isulti imbes nga mosultig sakit o makiglalis. Kay makigdaiton ka, mangita kag mga paagi nga mamentinar ang kalinaw, bisan sa tensiyonadong mga situwasyon. (Sant. 3:​17, 18) Ang imong buotang sinultihan makapawala sa kalagot sa imong kaestorya ug bisan sa mga magsusupak.—Maghu. 8:​1-3; Prov. 20:3; 25:15; Mat. 5:​23, 24.

14. Unsay gipasabot sa “dili . . . bag-ong magtutuo” ug “maunongon”?

¹⁴ Ang brader nga mokuwalipikar ingong ansiyano kinahanglang “dili . . . bag-ong magtutuo.” Bisag dili kinahanglan nga daghang tuig na kang bawtismado, nagkinahanglag panahon aron mahimo kang hamtong nga Kristohanon. Sa dili pa ka itudlo ingong ansiyano, kinahanglan nimong ipakita nga sama kang Jesus, mapainubsanon ka ug andam maghulat kon kanus-a ka hatagan ni Jehova ug mga asaynment. (Mat. 20:23; Filip. 2:​5-8) Mapamatud-an nimo nga “maunongon” ka pinaagi sa pagpabiling matinumanon kang Jehova ug sa iyang matarong nga mga sukdanan ug pinaagi sa pagsunod sa direksiyon sa iyang organisasyon.—1 Tim. 4:15.

15. Kinahanglan ba nga maayo kaayong mopakigpulong ang usa ka ansiyano? Ipatin-aw.

¹⁵ Ang Bibliya klarong nag-ingon nga ang mga tigdumala kinahanglan nga “kuwalipikadong  manudlo.” Nagpasabot ba ni nga kinahanglang maayo kaayo kang mopakigpulong? Wala. Dili tanang ansiyano ang maayong mopakigpulong, pero daghan nila ang epektibo diha sa ministeryo ug sa pag-shepherding. (Tan-awa ang study note nga “qualified to teach” sa 1 Timoteo 3:2; itandi ang 1 Corinto 12:​28, 29 ug Efeso 4:11.) Bisan pa niana, kinahanglang padayon kang maningkamot nga pauswagon ang imong kahanas ingong magtutudlo. Unsaon nimo na paghimo?

16. Sa unsang paagi mahimo kang mas maayong magtutudlo? (Tan-awa sab ang hulagway.)

¹⁶ “Nangupot pag-ayo sa kasaligang mensahe.” Aron mahimong mas maayong magtutudlo, seguroa nga ang imong mga pakigpulong ug pribadong mga tambag gibase sa Pulong sa Diyos. Aron mahimo ni, kinahanglan nga maayo kang estudyante sa Bibliya ug sa atong mga publikasyon. (Prov. 15:28; 16:23; tan-awa ang study note nga “holding firmly to the faithful word” sa Tito 1:9.) Samtang magtuon ka, matikdi kon giunsa pagpatin-aw sa atong mga publikasyon ang mga teksto sa Bibliya aron kabalo ka kon unsay hustong kapadapatan niini. Ug dihang manudlo, paningkamoti nga matandog ang kasingkasing sa imong mamiminaw. Mouswag ang imong kahanas ingong magtutudlo kon mangayo kag sugyot sa eksperyensiyadong mga ansiyano ug kon imo ning ipadapat. (1 Tim. 5:17) Ang mga ansiyano kinahanglang “makapalig-on” sa mga igsoon, pero usahay kinahanglan tingali silang mohatag ug tambag o ‘mobadlong’ pa gani. Magpalig-on man sila o mobadlong, kinahanglan nga himoon nila ni sa buotan nga paagi. Kon buotan ug mahigugmaon ka ug kon imong ibase sa Pulong sa Diyos ang imong ginatudlo, mahimo kang epektibo kay imong gisundog ang Dakong Magtutudlo, si Jesus.—Mat. 11:​28-30; 2 Tim. 2:24.

PADAYON SA PAGPANGAB-OT

17. (a) Unsay makatabang sa ministeryal nga mga alagad nga padayong mangab-ot? (b) Unsay angayng hinumdoman sa mga ansiyano dihang ilang konsiderahon kon ang usa ka brader angay bang irekomendar ingong ansiyano? (Tan-awa ang kahong “ Magmabalanse Dihang Magrekomendar sa Uban.”)

¹⁷ Human mahisgoti ang mga kuwalipikasyon  para sa mga ansiyano, ang ubang ministeryal nga mga alagad mobati tingali nga dili gyod sila mokuwalipikar. Pero hinumdomi nga si Jehova ug ang iyang organisasyon wala magdahom nga perpekto nimong mapakita kini nga mga hiyas. (1 Ped. 2:21) Hinumdomi pod nga ang gamhanang espiritu ni Jehova makatabang nimo sa pagkab-ot niini nga mga kuwalipikasyon. (Filip. 2:13) Naa bay espesipikong hiyas nga gusto pa nimong pauswagon? Iampo na kang Jehova. Pag-research bahin sa maong hiyas ug pangayog sugyot sa usa sa mga ansiyano kon unsaon na pagpauswag.

18. Unsay gidasig nga himoon sa tanang ministeryal nga mga alagad?

¹⁸ Hinaot kitang tanan, apil kadtong nag-alagad na ingong ansiyano, magpadayon sa pag-ugmad sa mga hiyas nga gihisgotan niini nga artikulo. (Filip. 3:16) Nag-alagad ba ka ingong ministeryal? Padayon sa pagpangab-ot! Hangyoa si Jehova nga bansayon ka aron mas daghan pa kag mahimo sa pag-alagad kaniya ug sa kongregasyon. (Isa. 64:8) Hinaot dagayang panalanginan ni Jehova ang imong paningkamot nga mokuwalipikar sa pag-alagad ingong ansiyano.