1-2. Рʹуспи кʹижан «шьхӧләки ԛәнщ» дькьн?

 ҺӘРГЕ тӧ ида ԝәхтәки ча бәрдәстийе щьвате хьзмәт дьки, дьбәкә тӧ ван хәйсәт-һʹӧнӧра дьди кʹьфше, йед кӧ лазьм ьн ԝәки бьби рʹуспи. Гәло тӧ дьхԝази «шьхӧләки ԛәнщ» бьки, демәк бьби рʹуспи? (1 Тимотʹейо 3:1)

² Гәло рʹуспи чь шьхӧли дькьн? Әԝана рʹебәрийа шьхӧле бәлакьрьна мьзгинийе дькьн, бь дьл у щан шьхӧле шьвантийе у һинкьрьне дькьн, у бь готьн у кьред хԝә хушк-бьра ԛәԝи дькьн. Ләма жи Кʹьтеба Пироз дьбежә, кӧ рʹуспийед хирәт «пʹешкʹеш» ьн (Әфәси 4:8).

3. Чь лазьм ә, ԝәки бьра бьбә рʹуспи? (1 Тимотʹейо 3:1-7; Тито 1:5-9)

³ Бьра чаԝа дькарә бьбә рʹуспи? Сәва кӧ бьрак бьбә рʹуспи, бәс нинә кӧ һьнә һʹӧнӧред ԝи һәбьн. Ве дьнеда, сәва кӧ кәсәк хԝәрʹа хәбате бьвинә, бәс ә кӧ һьнә фәрәсәтед ԝи һәбьн, йед кӧ сәрԝере хәбатарʹа дәст дьдьн. Ле сәва кӧ бьрак бьбә рʹуспи, бәс нинә кӧ әԝ бьбә мьзгинван у дәрсдарәки һостә. Рʹезед жь 1 Тимотʹейо 3:1-7 у Тито 1:5-9 (бьхунә), нишан дькьн ԝәки бьре кӧ дьхԝазә бьбә рʹуспи гәрәке йәки чаԝа бә. Ве готареда әме дина хԝә бьдьнә се тьшта, бәʹса кʹижана кӧ ван рʹезада те кьрьне: Кәсе кӧ дьхԝазә бьбә рʹуспи, гәрәке һьм щьватеда у һьм жи жь щьвате дәр хԝәйе навәки баш бә, әԝ гәрәке ча сәре малбәте мәсәләкә баш бә у һазьр бә щьватерʹа хьзмәт кә.

НАВӘКИ БАШ ԚАЗАНЩ КӘ

4. Рʹуспи гәрәке йәки ча бә?

⁴ «Беԛӧсур бә», демәк тӧ гәрәке бь рʹабун-рʹуньштьна хԝә навәки баш ԛазанщ ки. Хенщи ве йәке, ‹гәрәке  ԛәдьре тә щәм йед жь щьвине дәр жи һәбә›. Дьбәкә кәсед кӧ Шәʹдед Йаһоԝа ниньн ԛәрфе хԝә баԝәрийа тә бькьн, ле гәрәке тʹӧ мәʹни тʹӧнә бә, кӧ әԝана һʹәлали у рʹабун-рʹуньштьна тә бькьнә бьн шьке (Данийел 6:4, 5). Жь хԝә бьпьрсә: «Гәло әз һьм щьватеда һьм жи дәрва хԝәйе навәки баш ьм?»

5. Тӧ ча дькари нишан ки, кӧ тӧ йәки «херхԝаз» и?

⁵ Мәрьве «херхԝаз» ԛәнщийа кәсед дьн дьхԝазьн у бона һʹӧнӧред ԝанә баш пʹайе ԝан дьдьн. Гава әԝана мәщбур ниньн жи, әԝана һʹәз дькьн бона кәсед дьн ԛәнщийе бькьн (1 Тʹесалоники 2:8). Чьрʹа фәрз ә кӧ рʹуспи «херхԝаз» бьн? Чьмки әԝана гәрәке гәләк ԝәʹде хԝә бьдьнә хәбате бона шьвантийе у щабдарийед хԝәйи дьн (1 Пәтрус 5:1-3). Ле шабуна кӧ жь хьзмәтийа кәсед дьнрʹа пешда те, һежайи һәр ԛӧрбана йә (Кʹаред Шандийа 20:35).

6. Чь мәщал һәнә кӧ мәрьв «меванһʹәз» бә? (Ибрани 13:2, 16; бьньһерʹә ӧса жи шькьл.)

⁶ Бьред «меванһʹьз» нә тʹәне бона достед хԝә, ле бона кәсед дьн жи ԛәнщийе дькьн (1 Пәтрус 4:9). Каникеда дәрһәԛа мәрьвәки меванһʹәз ӧса те готьне: «Гәрәке дәре мала ԝи у дьле ԝи кәсед нәнасрʹа вәкьри бә». Жь хԝә бьпьрсә: «Гәло хушк у бьра мьн ча кәсәки меванһʹәз нас дькьн?» (Бьхунә Ибрани 13:2, 16). Кәсед меванһʹәз чь дәсте ԝанда һәйә, тʹәви меванед хԝә пʹарәвәдькьн. Әԝана кәсед дәсттәнг у хушк-бьред хирәт тʹәглифи мала хԝә дькьн, мәсәлә бәрпьрсийаред мьһале у готарванед кӧ тенә щьвата ԝан (Дәстпебун 18:2-8; Мәтʹәлок 3:27; Луԛа 14:13, 14; Кʹаред Шандийа 16:15; Рʹомайи 12:13).

7. Рʹуспи ча дькарә бьдә кʹьфше, кӧ әԝ «пʹәрәһʹьз» нинә?

⁷ Рʹуспи гәрәке «пʹәрәһʹьз» нибә, демәк әԝ гәрәке жийина хԝәда һʹәчʹи зәʹф дина хԝә нәдә мал у мьлкʹ. Һʹале ԝийә материали чь бә жи, әԝ гәрәке жь һәр тьшти зедәтьр дина хԝә бьдә Пʹадшатийа Хԝәде (Мәтта 6:33). Әԝ гәрәке ԝәʹдә, ԛәԝат у мәщалед хԝә бона һʹәбандьна Йаһоԝа, һʹәԝщед малбәте  у хьзмәтийа щьватерʹа бьдә хәбате (Мәтта 6:24; 1 Йуһʹәнна 2:15-17). Жь хԝә бьпьрсә: «Ньһерʹандьна мьн сәр пʹәра чь щурʹәйи йә? Гәло әз рʹази мә бона ван тьшта, чь кӧ бал мьн һәйә? Йан һʹьш-аԛьле мьн тʹьме сәр ԛазанщкьрьна пʹәра йә?» (1 Тимотʹейо 6:6, 17-19).

8. Рʹуспи ча дькарә бьдә кʹьфше, ԝәки әԝ йәки «хԝәгьрти» йә?

⁸ Рʹуспи гәрәке һәр алийава «хԝәгьрти» бә, демәк алийе хԝарьн-вәхԝарьн, кʹьнщ у ԝәʹдәдәрбазкьрьнеда. Әԝ гәрәке нәбә хӧламе ньһерʹандьн у модед ве дьнйайе (Луԛа 21:34; Аԛуб 4:4). Әԝ гәрәке рʹьһʹәтийе хԝәй кә, һәла һе ви чахи жи, гава мәрьв һьндава ԝида һʹәйф ниньн. Ӧса жи әԝ гәрәке «сәрхԝәш» нәбә. Жь хԝә бьпьрсә: «Гәло щурʹе жийина мьн нишан дькә, кӧ әз йәки «хԝәгьрти» мә?»

9. Чь те һʹәсабе, ԝәки кәсе кӧ дьхԝазә бьбә рʹуспи гәрәке «аԛьлда гьран» у «маԛул» бә?

⁹ Һәрге тӧ йәки «аԛьлда гьран» и, әв те һʹәсабе ԝәки тӧ тʹьме дина хԝә дьди принсипед Кʹьтеба Пироз. Тӧ сәр ԝан принсипа кʹур дьфькьри, у бь сайа ве йәке буйи йәки сәрԝахт у билан. Тӧ ләз у бәз сафикьрьна наки, ле дәԝсе тӧ һәр тьшти һьлдьди һʹәсаб (Мәтʹәлок 18:13). Әв йәк али тә дькә, кӧ сәр һʹиме ньһерʹандьна Йаһоԝа сафикьрьнед рʹаст бьки. Рʹуспи гәрәке «маԛул» бә у һәр тьшти ԝәʹдәда бькә. Әԝ гәрәке йәки бь итʹбар бә у ль гора рʹебәрийа кӧ те дайине, һәр тьшти бькә. Бь сайа ван һʹӧнӧра, рʹуспи дькарә навәки баш ԛазанщ кә. Ньһа ԝәрә әм дина хԝә бьдьне, кӧ ль гора Кʹьтеба Пироз сәре малбәте гәрәке йәки чаԝа бә.

ҺӘР АЛИЙАВА БОНА МАЛБӘТА ХԜӘ ХӘМ БЬКӘ

10. Бьра ча дькарә «малхетийе рʹьнд ль мала хԝә бькә»?

¹⁰ Һәрге тӧ зәԝьщи йи у дьхԝази бьби рʹуспи, малбәта тә жи гәрәке хԝәйе навәки баш бә. Кʹьтеба Пироз дьбежә кӧ һәрге бьра дьхԝазә бьбә рʹуспи, әԝ гәрәке «малхетийе рʹьнд ль мала хԝә бькә». Әв йәк те һʹәсабе, кӧ тӧ гәрәке малбәта хԝә бьби хԝәйи у бона кʹара малбәта хԝә сафикьрьнед баш бьки. Мәсәлә, тӧ гәрәке ԛӧльхкьрьна тʹәви малбәте дәрбаз ки у али нәфәред хԝә бьки кӧ әԝана һәрʹьнә щьвина у мьзгинийе бәла кьн. Гәло әв йәк чьрʹа фәрз ә? Паԝлосе шанди ӧса гот: «Һәгәр йәк ньзанә малхетийе ль мала хԝә бькә, ԝе чаԝа бькарьбә щьвина Хԝәде хԝәй кә?» (1 Тимотʹейо 3:5).

11-12. Ча рʹабун-рʹуньштьна нәфәред мале дькарә һʹӧкӧм кә сәр ве йәке, һәла малхе мале ԝе бьбә рʹуспи йан на? (Бьньһерʹә ӧса жи шькьл.)

¹¹ Һәрге тӧ бав и, «зарʹед хԝә гӧрʹа хԝәда һәр алийава маԛулийеда мәзьн кә», демәк зарʹед тәйә нәгьһишти, йед кӧ һе 18 сали ниньн, гәрәке гӧрʹа тәда бьн. Ләма жи тӧ гәрәке зарʹед хԝә бь дьловани һин ки. Һәмьки зарʹ һʹәз дькьн бьлизьн у ша бьн. Ле диса жи әԝана гәрәке гӧһдар у тʹәрбәт бьн. Ӧса жи тӧ гәрәке чь жь дәсте тә те бьки, кӧ әԝана бьбьнә достед Йаһоԝа, ль гора принсипед Кʹьтеба Пироз бьжин у бьхԝазьн бенә ньхӧмандьне.

¹² «Зарʹед ԝи баԝәрмәнд бьн, йед кӧ бона авитийе йан жи бона нәгӧһдарийе нәкʹәтьнә нава дәв-дьрана». Һәрге зарʹәкә баԝәрмәнд гӧнәки гьран бькә, әв йәк ԝе чаԝа сәр баве ԝи һʹӧкӧм кә? Һәрге бав зарʹа  хԝә ча лазьм ә ширәт нәкьрийә, әԝ дьбәкә нәбә рʹуспи (Бьньһерʹә Бьрща Ԛәрәԝьлийе, йа 15 Щотмәһе, сала 1996, рʹупʹ. 21, абз. 6-7).

БОНА ЩЬВАТЕ ХӘМ БЬКЬН

13. Тӧ ча дькари нишан ки, ԝәки тӧ йәки «бәрбьһер» и, нә кӧ «сәрһʹьшк»?

¹³ Бьред кӧ хԝәйе һʹӧнӧред баш ьн, бона щьвате кʹәрәмәкә мәзьн ьн. Мәрьве «бәрбьһер» әʹдьлайе пешда тинә. Һәрге тӧ дьхԝази, ԝәки тә ча мәрьвәки бәрбьһер нас кьн, гӧһ бьдә кәсед дьн у һазьр бә кӧ ньһерʹандьнед ԝан һьлди һʹәсаб. Мәсәлә, һәрге һʹәчʹи зәʹф рʹуспи пьштгьрийа сафикьрьнәкә ӧса бькьн, йа кӧ мьԛабьли принсипед Кʹьтеба Пироз нинә, ле нә ль гора дьле тә йә, гәло тӧйе пьштгьрийа ве сафикьрьне бьки? Ӧса жи кәсе кӧ дьхԝазә бьбә рʹуспи гәрәке «сәрһʹьшк» нибә, демәк әԝ гәрәке тʹьме сәр йа хԝә нәсәкьнә. Гәләк фәрз ә, ԝәки тӧ гӧһ бьди фькьр у ньһерʹандьнед кәсед дьн (Дәстпебун 13:8, 9; Мәтʹәлок 15:22). Хенщи ве йәке, рʹуспи гәрәке «шәрʹуд» у «һерс» нибә. Бәле тӧ гәрәке сәрт у сәрһʹьшк ниби, ле нәрм у бь мәʹрифәт би. Гава проблемәк пешда те, тӧ гәрәке һәр тьшти бьки, ԝәки әʹдьлайи бе хԝәйкьрьне (Аԛуб 3:17, 18). Һәрге тӧ бь нәрми тʹәви мәрьва хәбәр ди, әв йәк дькарә дьле ԝан нәрм кә, у һәла һе дьле мәрьвед мьԛабьл жи (Һʹакьмти 8:1-3; Мәтʹәлок 20:3; 25:15; Мәтта 5:23, 24).

14. Чь те һʹәсабе кӧ бьра гәрәке «баԝәрмәнде ну» нибә у «Хԝәдерʹа дайи» бә?

¹⁴ Сәва кӧ бьрак ча рʹуспи бе кʹьфшкьрьне, әԝ гәрәке «баԝәрмәнде ну» нибә. Һәмьки әʹсәйи нинә ԝәки тӧ гәләк сал ньхӧманди би, ле диса жи ԝәʹдә лазьм ә, ԝәки тӧ рʹӧһʹанида бьгьһижи. Пешийа кӧ тӧ ча рʹуспи бейи кʹьфшкьрьне, тӧ гәрәке избат ки ԝәки тӧ мина Иса мьлук и у һазьр и һивийе би, һʹәта Йаһоԝа һьнә щабдарийа бьдә тә (Мәтта 20:23; Филипи 2:5-8). Хенщи ве йәке, «Хԝәдерʹа дайи» бә, демәк амьн бә, хԝә ль Йаһоԝа у рʹийа ԝи  бьгьрә у ль гора рʹебәрийа тʹәшкиләта ԝи бьжи (1 Тимотʹейо 4:15).

15. Гәло әʹсәйи йә, ԝәки рʹуспи готарванәки беԛьсур бә?

¹⁵ Ль гора Ньвисаред Пироз сәрԝер гәрәке «һинкьрьнеда сәрхԝә бә». Гәло әв йәк те һʹәсабе, ԝәки тӧ гәрәке готарванәки беԛьсур би? На. Гәләк рʹуспийед хирәт готарванед һостә ниньн, ле әԝана хьзмәтийеда рʹьнд һин дькьн у ԝәʹде сәрледанед шьвантийе рʹьнд хушк-бьра ԛәԝи дькьн (Бәрамбәр кә 1 Корьнтʹи 12:28, 29 у Әфәси 4:11). Ле диса жи тӧ гәрәке бәрдәԝам ки сәр хԝә бьхәбьти, ԝәки бьби готарванәки баш. Гәло тӧ чаԝа дькари бьби дәрсдарәки дьһа баш?

16. Тӧ ча дькари бьби дәрсдарәки баш? (Бьньһерʹә ӧса жи шькьл.)

¹⁶ «Готьна амьн ԛәԝин бьгьрә». Сәва кӧ тӧ бьби дәрсдарәки баш, тӧ гәрәке сәр һʹиме Кʹьтеба Пироз һин ки у ширәта бьди. Сәва кӧ ве йәке бь һостәти бьки, Кʹьтеба Пироз у әʹдәбйәтед мә рʹьнд лекʹолин кә (Мәтʹәлок 15:28; 16:23). Гава тӧ лекʹолин дьки, рʹьнд дина хԝә бьде, кӧ әʹдәбйәтед мә чаԝа Ньвисаред Пироз зәлал дькьн. Ԝәʹде һинкьрьне, хирәт бькә кӧ тӧ бьгьһижи дьле гӧһдара. Сәва кӧ тӧ һинкьрьнеда пешдачуйи би, жь рʹуспийед щерʹьбанди ширәта бьхԝазә у ль гора ԝан һәрәкʹәт бькә (1 Тимотʹейо 5:17). Рʹуспи гәрәке бькарьбә «дьл бьдә» хушк-бьра у щарна жи гәрәке шашийед ԝан «бьдә рʹуйе ԝан». Рʹуспи гәрәке тʹьме ве йәке бь нәрми бькә. Һәрге тӧ мина Дәрсдаре Мәзьн Иса Мәсиһ нәрм у дьлован би у сәр һʹиме Кʹьтеба Пироз һин ки, тӧйе бьби дәрсдарәки баш (Мәтта 11:28-30; 2 Тимотʹейо 2:24).

ХИРӘТА ХԜӘ ӦНДА НӘКӘ

17. (а) Чь дькарә али бәрдәстийед щьвате бькә, кӧ пешда һәрʹьн? (б) Гава рʹуспи сафи дькьн, кӧ бьраки ча рʹуспи кʹьфш кьн, әԝана гәрәке чь һьлдьн һʹәсаб? (Бьньһерʹә чаргошә « Бьра Сафикьрьна Ԝә бь Мьлукти бә».)

¹⁷ Гава бәрдәстийед щьвате дьвиньн кӧ чь лазьм ә бькьн, ԝәки бьбьнә рʹуспи,  дьбәкә әԝана бьфькьрьн кӧ әв йәк гәләк чәтьн ә. Ле бир нәкә, кӧ Йаһоԝа у тʹәшкиләта ԝи һивийе нинә, ԝәки тӧ һʹәму хәйсәт-һʹӧнӧра бь щурʹе беԛьсур бьди кʹьфше (1 Пәтрус 2:21). Ӧса жи рʹӧһʹе пироз ԝе али тә бькә, ԝәки тӧ ван хәйсәт-һʹӧнӧра нав хԝәда пешда бини (Филипи 2:13). Һәрге тӧ дьхԝази һʹӧнӧрәки хԝә дьһа баш ки, Йаһоԝарʹа дӧа бькә, дәрһәԛа ве йәке лекʹолине бькә у жь рʹуспийа ширәта бьхԝазә, ԝәки ве йәкеда али тә бькьн.

18. Ԝе баш бә кӧ һʹәму бәрдәстийед щьвате чь бькьн?

¹⁸ Һәрге әм ида бунә рʹуспи, диса жи әм гәрәке бәрдәԝам кьн ван һәр алийава пешда һәрʹьн, чь кӧ ве готареда һатә шеԝьркьрьне (Филипи 3:16). Һәрге тӧ бәрдәстийе щьвате йи, хирәт бькә кӧ бьби рʹуспи! Жь Йаһоԝа рʹәща кә ԝәки тә һин кә, кӧ тӧ бькарьби дьһа баш ԝирʹа у щьватерʹа хьзмәт ки (Ишайа 64:8). Бьра Йаһоԝа хирәта тә кʹәрәм кә!