1-2. Ino ma an̈isan’ny “asa tsara” ataon’ny anti-pan̈ahy?

 IZIKOA anao efa mpikarakara fiangonan̈a efa ela, anao mila mifen̈y mare baka hahafeno raha takin̈a, baka anao hanjary anti-pan̈ahy. Asa anao ma mba man̈iry han̈ano “asa tsara” io?​—1 Tim. 3:1.

² Ino aby ma an̈isan’ny asan’ny anti-pan̈ahy zen̈y? Izy mitariky amin’ny asa fitorian̈a, mifen̈y mare man̈ano asan’ny mpiambin̈y ôndrikôndriky ndreky mampianatra, baka iô mankahery fiangonan̈a amy raha volan̈iny ndreky raha ataony. Ke tsy mahagaga izikoa ‘lelahy natao kadô’ ivolan̈an’ny Baiboly irô anti-pan̈ahy miasa mare aby io.​—Efes. 4:8.

3. Akôry hahavy rahalahy araiky hahafeno raha takin̈a hanjary anti-pan̈ahy? (1 Timoty 3:1-7; Titosy 1:5-9)

³ Akôry hahavy anao hahafeno raha takin̈a amin’ny anti-pan̈ahy? Tsy miankin̈y amy fahaizan̈a anan̈an’olo araiky hahavy izy hanjary anti-pan̈ahy. Matetiky baka, izikoa anao tihahazo asa araiky, anao mila manan̈a fahaizan̈a tadiavin’olo handeha hampiasa anao io. Fa izikoa ndraiky anao man̈iry ho voatendry anti-pan̈ahy, misy raha hafa koa takin̈a aminao, ankoatran’ny mahay mitory ndreky mahay mampianatra. Anao koa mila mahafeno raha takin’ny Soratra Masin̈y momba anti-pan̈ahy, koran̈in’ny 1 Timoty 3:1-7 ndreky Titosy 1:5-9. (Vakia.) Ke amy lahatsoratra ty atsika hikoran̈a raha telo maventy takin’ny Soratra Masin̈y amin’ny anti-pan̈ahy: Irô mila manan̈a laza tsara an̈atin’ny fiangonan̈a ndreky ambelany, man̈amia modely tsara amy maha lohan’ny fianakavian̈a, aviô vôn̈ono hikarakara fiangonan̈a.

 MANÀN̈A LAZA TSARA

4. Ino ma dikan’ny “tsisy raha hivolan̈ana izy” zen̈y?

⁴ Izikoa anao tihanjary anti-pan̈ahy, ‘tsy tôkony hisy raha hivolan̈ana’ anao. Mifen̈a hanan̈a laza tsara an̈atin’ny fiangonan̈a, amy zen̈y olo tsisy raha hitarain̈ana momba fitondran-ten̈anao. Ankoatran’izen̈y koa, anao tôkony ho “tsara laza amin’olo ambelan̈a.” Irô olo tsy Vavolombelon̈o aby io mety hivolambolan̈a anao baka amy raha inoanao, fa ndray zen̈y, tsy tôkony ho baka amy tsy fan̈anaovanao ny marin̈y ndreky fitondran-ten̈a ratsy hivolan̈andrô anao. (Dan. 6:4, 5) Ke man̈ontania ten̈a: ‘Zaho ma tsara laza amin’olo an̈atiny ndreky ambelan̈an’ny fiangonan̈a?’

5. Akôry han̈aboahanao fa “anao tia ny tsara”?

⁵ Izikoa anao “tia ny tsara,” anao hifen̈y hizaha toetry tsaran’olo ndreky hidera irô amy zen̈y. Mamparavoravo anao koa man̈ano raha mahatsara olo, ndray raha zen̈y mandilatran’ny ampan̈anôvin̈y anao. (1 Tes. 2:8; Tit. 1:8) Nan̈ino ma ten̈a raha maventy amin’ny anti-pan̈ahy manan̈a toetry zen̈y? Fôtony irô mampiasa ankamarozan’ny fotoan̈andrô ikarakaran̈a olo an̈atin’ny fiangonan̈a ndreky han̈anaovan̈a andraikitrindrô. (1 Pet. 5:1-3) Fa ndray zen̈y, haravoan̈a azo baka amy fikarakaran̈a olo io, mbala beben’ny sôron̈o jiaby ataondrô.​—Asa. 20:35.

6. Ino ma dikan’ny “tia mandray vahiny” zen̈y? (Hebreo 13:2, 16; zahava koa sary.)

⁶ Aboakanao fa anao “tia mandray vahiny” izikoa anao mazoto man̈ano ny tsara amin’olo, an̈isan’izen̈y irô olo tsy namanao be. (1 Pet. 4:9) Misy boky araiky man̈azava fa olo tia mandray vahiny zen̈y tsara fan̈ahy nata amin’olo tsy hainy, aviô ravoravo izy mikaiky olo an-tran̈o. Ke man̈ontania ten̈a: ‘Zaho ma malaza ho olo tia mandray vahiny?’ (Vakia Hebreo 13:2, 16.) Olo tia mandray vahiny zen̈y tia mirasa raha amin’olo, an̈atin’izen̈y olo masikiny, irô mpanompo miasa mare, karaha mpiandraikitrin’ny faritry ndreky mpan̈ano kabaro mpitsidiky.​—Gen. 18:2-8; Ohab. 3:27; Lioka 14:13, 14; Asa. 16:15; Rom. 12:13.

7. Karakôry han̈aboahan’ny anti-pan̈ahy araiky fa izy “tsy tia vola”?

⁷ “Tsy tia vola.” Dikan’izen̈y, tsy vola ndreky fanan̈ana raha ten̈a maventy aminao. Ke ndray anao mpan̈arivo na masikiny, fanompoan̈a Jehovah ny raha ten̈a maventy amy fiain̈ananao. (Mat. 6:33) Anao mampiasa  fotoan̈anao, angôvonao, ndreky raha anan̈anao hanompoan̈a Jehovah, ikarakaran̈a fianakavian̈anao, aviô ikarakaran̈a fiangonan̈a. (Mat. 6:24; 1 Jaona 2:15-17) Ke man̈ontania ten̈a: ‘Karakôry ma toe-tsain̈inaka manoloan̈a vola? Zaho ma afa-pô amy raha ten̈a ilaiko amy fiain̈ana? Sa tady vola ndreky famorian̈a fanan̈ana raha ten̈a maventy aminaka?’​—1 Tim. 6:6, 17-19.

8. Akôry mety han̈aboahanao fa anao ‘mahay mandanjalanja amy raha fatao’ ndreky “mahafehy ten̈a”?

⁸ Izikoa anao “mahay mandanjalanja amy raha fataonao” ndreky “mahafehy ten̈a,” anao hahay handanjalanja amy fiain̈ananao jiaby. Ohatra, anao tsy tendan-kanin̈y, tsy mpigiaka dila loatra, sanjinao koa milamin̈y, aviô anao mahay mifidy tsara fangalan̈a diandian̈a. Anao koa tsy mangala tahaka fiain̈ana ratsin’olo tsy manompo Jehovah. (Lioka 21:34; Jak. 4:4) Anao koa tsy mora meloko, ndray misy olo man̈ano raha mampameloko anao. Anao “tsy mamolava” ndreky tsy malaza migiaka toaka be loatra. Ke man̈ontania ten̈a: ‘Hita amy fiain̈ananaka ma fa zaho mahay mandanjalanja amy raha fataoko, ndreky mahafehy ten̈a?’

9. Ino ma dikan’ny “misain̈y tsara” ndreky “tia filaminan̈a” zen̈y?

⁹ Anao “misain̈y tsara,” ke anao mandiniky tsara raha mandalo, mifan̈araka amy torolalan̈an’ny Baiboly. Iritriretinao tsarabe karakôry han̈arehan̈a torolalan̈an’ny Baiboly amy raha mandalo io, ke anao lôso lalin-tsain̈y ndreky mahay manapa-kevitry. Anao tsy malakilaky manapa-kevitry fa anao mangala antoko tsarabe antsendriky raha jiaby tafiditry amy raha mandalo io, zay anao vo manapa-kevitry. (Ohab. 18:13) Ke vokany, ho voalanjalanja tsara fanapahan-kevitry ataonao, ke mifan̈araka amy fomba fiheveran’i Jehovah raha. Izikoa ndraiky anao “tia filaminan̈a,” anao mahay mandamin̈y raha ndreky man̈aja lera. Ke anao malaza ho olo atokisan̈a ndreky man̈araka tsarabe tari-dalan̈a. Irô toetry aby zen̈y hahavy anao ho tsara laza. Fa atsika iziôty ndraiky handiniky irô toetry aby koran̈in’ny Baiboly fa tôkony hanan̈an’ny anti-pan̈ahy, baka izy ho modely tsara amy maha lohan’ny fianakavian̈a izy.

MIFEN̈A HO MODELY TSARA AMY FIANAKAVIAN̈ANAO

10. Akôry ataon’ny lelahy hahay ‘hitondra tsara vadiny ndreky iry zanany’?

¹⁰ Izikoa anao lelahy manambady ke man̈iry tihanjary anti-pan̈ahy, miankiny amy lazan’ny fianakavian̈anao koa hahavy anao hahafeno fepetra amy zen̈y. Dikan’izen̈y, anao mila ‘mahay mitondra tsara vadinao ndreky iry zanakanao.’ Anao mila malaza ho lohan’ny fianakavian̈a be fitiavan̈a ndreky mandray andraikitry. Tafiditry amy zen̈y koa, anao mila mitariky irô amy lafiny jiaby amy fanompoan̈a. Nan̈ino ma raha zen̈y ten̈a raha maventy? Apostoly Paoly nampisaintsain̈y: “Izikoa misy lelahy tsy mahay mitondra tsara vadiny ndreky iry zanany, ho hainy edy hikarakara fiangonan̈an’ny Zan̈ahary?”​—1 Tim. 3:5.

11-12. Izikoa rahalahy araiky manan-janaka, nan̈ino fitondran-ten̈an’iry zanany ten̈a raha maventy, izikoa izy tihanjary anti-pan̈ahy? (Zahava koa sary.)

¹¹ “Manan̈a zanaka man̈araka volan̈a ndreky man̈aja tsara izy.” Anao ma mbala manan̈a zanaka ambanin’ny 18 taon̈o? Dikan’izen̈y irô tôkony han̈araka volan̈anao ndreky han̈aja tsara anao. Anao mila ten̈a tia irô, ke mampianatra ndreky mampiofan̈a irô. Irô tianao ho sambatra, mitokitokiky ndreky misoma karaha tsaiky jiaby. Fa ndray zen̈y, irô mila ampiofan̈iny tsara han̈araka volan̈a, han̈aja olo, baka iô hahalala fomba. Aviô koa anao mila man̈ano erakan’ny vitanao man̈ampy irô hifandray tsarabe amy Jehovah, hiain̈y mifan̈araka amy torolalan̈an’ny Baiboly, baka iô handroso firak’amy batisa.

 ¹² “Manan̈a zanaka mpino, tsy malaza ho man̈eram-pô amy raha ratsy na mierin̈y olo.” Izikoa misy olo araiky efa vita batisa kanefa man̈ano fahotan̈a maventy, ino mety vokan’izen̈y amy babany? Izikoa babandrô tsy mijerijery andraikitrinany hampiofan̈a ndreky hamalavala irô, izy mety tsy hahafeno fepetra ho anti-pan̈ahy.​—Zahava Tilikambo Fiambesan̈a 15 Oktobra 1996, p. 21, feh. 6-7.

MIKARAKARA TSARA FIANGONAN̈A

13. Akôry han̈aboahanao fa anao olo “mpandefitry” ndreky ‘tsy mpiziriziry amin’ny hevitrinao’?

¹³ Lan̈iany rahalahy manan̈a toetry tsara, ten̈a man̈ampy mare fiangonan̈a. Olo “mpandefitry” zen̈y, man̈ano raha hisian’ny fihavan̈ana. Ke izikoa tianao anao hanjary olo mpandefitry, mifen̈a hitandren̈y olo ndreky hahatakatra raha tsapandrô. Baka iô izikoa anarô fa mivory, anao ma vôn̈ono han̈eky fanapahan-kevitry lanin’ny ankamarozan’ny anti-pan̈ahy, izikoa tsisy lalàn̈a na torolalan̈an’ny Baiboly voadika? Fa dikan’ny “tsy mpiziriziry amin’ny hevitrinany” zen̈y ndraiky, anao tsy mitaky han̈arahan̈a fomba tianao han̈anaovan̈a raha fo, fa anao vôn̈ono hitandren̈y hevitrin’olo. (Gen. 13:8, 9; Ohab. 15:22) Anao “tsy mpila ady amin’olo” na “tsy mora meloko.” Ke anao tsy mora masiaka na mora mimalo amin’olo, fa anao tsara fan̈ahy amindrô. Anao olo tia fihavan̈ana, ke man̈ano raha ihavan̈ana amin’olo, ndray an̈atin’ny raha sarotro mare. (Jak. 3:17, 18) Aviô anao mifen̈y ho tsara fan̈ahy fo izikoa fa mikoran̈a amin’olo, ke raha zen̈y hampakirikiry helokondrô, firak’amindrô olo mpanohitry aby io.​—Mpits. 8:1-3; Ohab. 20:3; 25:15; Mat. 5:23, 24.

14. Ino ma dikan’ny “tsy zazavao amy finoan̈a” ndreky “tsy mivadiky” zen̈y?

¹⁴ Rahalahy tihanjary anti-pan̈ahy zen̈y koa “tsy zazavao amy finoan̈a.” Marin̈y ndraiky fa tsy miambin̈y efa taon̈o maro afaran’ny batisanao, anao vo voatendry anti-pan̈ahy. Fa ndray zen̈y, anao mila manjary Kristianin̈y matotro antsendriky. Ke alohan’ny anao hitindren̈y anti-pan̈ahy, mila man̈aboaka fa anao manetry ten̈a, ndreky vôn̈ono hiambin̈y Jehovah, karaha nataon’i Jesosy, han̈amia andraikitry anao.  (Mat. 20:23; Fil. 2:5-8) Aboaha fa anao “tsy mivadiky”, ke mifen̈y tsy miala amy Jehovah, man̈araka fitsipikinany ndreky man̈araka tari-dalan̈a baka amy fandaminan̈anany.​—1 Tim. 4:15.

15. Anti-pan̈ahy ma mila faran’ny mahay man̈ano kabaro manoloan̈a olo maro? Hazavà.

¹⁵ Koran̈in’ny Soratra Masin̈y mazava tsarabe fa mpiandraikitry zen̈y mila “mahay mampianatra.” Zen̈y ma mivolan̈a fa anao mila ten̈a mahay man̈ano kabaro mare manoloan̈a olo jiaby? Ehe. Maro amindrô rahalahy voatendry aby io tsy faran’ny mahay man̈ano kabaro, fa irô mahay mampianatra tsara izikoa fa manompo, ndreky lera man̈ano fitsidihan̈a ôndrikôndriky. (1 Tim. 3:2; ampiràn̈a 1 Korintianina 12:28, 29 ndreky Efesianina 4:11.) Fa ndray zen̈y, anao mila mifen̈y fo mankatsara fahaizanao mampianatra. Akôry hahavy anao hahay hampianatra tsarabe?

16. Akôry hahavy anao hahay hampianatra tsarabe? (Zahava koa sary.)

¹⁶ “Man̈araka tsarabe volan̈a azo antoko.” Baka anao hanjary mpampianatra mahay, anao koa fa mampianatra ndreky man̈amia torohevitry irô rahalahy ndreky ranabavy aby io, ataova mifan̈araka amy Baiboly. Baka hahavitanao zen̈y, anao mila mazoto mianatra Baiboly ndreky irô boky ndreky gazetintsika aby io. (Ohab. 15:28; 16:23; Tit. 1:9.) Lera anao mianatra, aleva onon̈o tsarabe karakôry fomba han̈arehan̈a irô andinin-teny aby vakinao io. Baka iô, lera anao mampianatra, mifen̈a hanohin̈y fôn’olo mitandren̈y anao. Hanjary hahay hampianatra fo koa anao, izikoa anao mangataka soso-kevitry amin’ny anti-pan̈ahy efa za-draharaha ndreky man̈araka zen̈y. (1 Tim. 5:17) Anti-pan̈ahy ndray mila ‘mahay mankahery’ irô rahalahy ndreky ranabavy aby io, irô koa ndraikindraiky mila man̈amia torohevitry na “man̈anatra” foeky. Fa izikoa irô fa man̈ano zen̈y, irô mila tsara fan̈ahy fo. Ke anao koa tsara fan̈ahy ndreky be fitiavan̈a, aviô ataonao mifan̈araka amy Volan̈a Zan̈ahary fo raha ampianarinao, anao hahay hampianatra tsarabe, fôtony anao mangala tahaka Jesosy, Mpampianatra Miavaka.​—Mat. 11:28-30; 2 Tim. 2:24.

 MIFEN̈A FO HANAKATRA TANJON̈O

17. a) Ino raha han̈ampy mpikarakara fiangonan̈a hanohy fo hanakatra tanjon̈o? b) Ino raha mila alaindrô anti-pan̈ahy aby io onon̈o, irô koa fa mandiniky rahalahy araiky handeha hitindrendrô? (Zahava efajoro “ Mahaiza Mandanjalanja Izikoa fa Mandiniky irô Rahalahy aby Io.”)

¹⁷ Izikoa fa baka nandiniky raha takin̈a amindrô anti-pan̈ahy aby io, mpikarakara fiangonan̈a sasany mety hieritreritry fa tsy hahafeno zen̈y foeky. Kanefa aleva onon̈o fa na Jehovah na fandaminan̈anany, tsy man̈anten̈a anao ho lavorary amy fan̈aboahan̈a toetry jiaby io. (1 Pet. 2:21) Baka iô fan̈ahin’i Jehovah faran’ny mahery, han̈ampy anao hanan̈a irô toetry aby io. (Fil. 2:13) Ke misy amindrô toetry aby io ma hitanao mbala mila hifen̈anao mare? Mivavaha amy Jehovah momba zen̈y. Man̈anaova fikarohan̈a momba toetry io, baka iô mangataha soso-kevitry amin’ny araiky amindrô anti-pan̈ahy aby io, amy raha mbala mila hatsarainao.

18. Ino raha ampirisihin̈y ataon’ny mpikarakara fiangonan̈a jiaby?

¹⁸ Irarian̈a atsika jiaby, an̈isan’izen̈y irô efa anti-pan̈ahy aby io, hifen̈y fo hanan̈a irô toetry avoakoran̈a tamy lahatsoratra ty. (Fil. 3:16) Efa mpikarakara fiangonan̈a ma anao? Mifen̈a fo handroso! Angataha Jehovah hampiofan̈a anao, baka izy hahavita hampiasa anao amy raha maro amy fanompoan̈a izy, ndreky an̈atin’ny fiangonan̈a. (Isaia 64:8) Irarian̈a Jehovah hitahy mare ezaka ataonao, baka anao hahafeno raha takin̈a amin’ny anti-pan̈ahy.