HADGE 47
SIŊ 103 Les bergers, des dons de Dieu
Hẽẽrebe wo—Nday joŋ joŋge maa kol jar maa peel tayge wo là?
“Jobo da we ga se mo kol diŋ je ma peel tayge jar ma wer Krisn wo no, á maŋ diŋ joŋre ma de woore.”—1 TIM. 3:1.
FẼN MAA KLUU ƁIL HADGE SEN LA
Hadge sen la wãã ge yaŋ diŋ ti joŋre maa de woore maaga Bible wãã ga hẽnbe po mo hay joŋ de ɓaara maa kol jee maa peel tayge mono.
1-2. “Joŋre ma de woore” maa hõn wo ga jee maa peel tayge joŋ ra là?
HAYGA ndo yaŋ diŋ jee kay jar maa peel tayge wo no, maapo ndo de joŋ joŋre kwũy maa had joŋre maa de woore po wo maa kol jee maa peel tayge. Ndo mbo de sãy bag jag “joŋre ma de woore” sen go ti yawlà?—1 Tim. 3:1.
2 Joŋre jee maa peel tayge diŋ maylà? Joŋre wo do ɓe ngaɓa debaŋ: doo siigi wããre Baa, koɗge jar maa ni Baan wo no, hadge wããre Baa ne jare, lan coɓge tayge no. Wersen ga Bible ɗe ra ga “kado maaga wo diŋ jar téebeere” mono.—Efe. 4:8 TMN.
3. Hẽnbe joŋ joŋge maa kol jee maa peel tayge là? (1 Timote 3:1-7; Tid 1:5-9)
3 Ndo joŋ diŋ mayse maa kol jee maa peel tayge là? Kolge jee maa peel tayge bay diŋ sen boŋ de maaga ndo kol jee joŋre maa tigriŋ hãy ɓuy koɗ wa. Seɓaa de maaga ndo kiɗ joŋre mono, ndo yaŋ de ko joŋre maaga à de kiɗ jee joŋge ɓen ɗa no, à hã joŋre sen mo tu. Kolge jee maa peel tayge sara. Maa kol jee maa peel tayge mono, á bay diŋ ga ndo mo hay de ko sii Wããre Baa, noga hadge ɓe de woore koɗ wa. Ndo hay had joŋre maaga 1 Timote 3:1-7 lan Tid 1:5-9 wãã ga jar maa peel tayge mo hay wo doo sen no mono. (Jaŋ ra.) Naa wãã yaŋ ti fẽẽre maaga wo de ngaɓge ɓil verse sen wo no. Naa wãã yaŋ ti ɗeŋ maaga hẽnbe po joŋ maaga ɗuu se mo hay de ɗarge wa; kol jee tiŋ maa ti ngeel ɓe, lan fẽn maaga kay ne maaga á mo joŋ peele ne taygen de dage ɓe mono.
ƊUU ƁO MO HAY DE ƊARGE WA
4. Maaga à wãã ga á mo hay diŋ “je ma de re ti wa” da wããge ga hãylà?
4 Maaga ndo mo hay diŋ jee maa peel tayge mono, ndo mo hay joŋ diŋ “je ma de re ti wa”. Sen da wããge ga jar maa ti tayge mo hay wo ko ndo diŋ jee maa de deele wer seele ɓo maa de woore no, lan ga jobo mo hay wãã mopo ti ɓo de ɓlagge, ga se diŋ cwãy lay wa. Ni pa mono, “jar maga bay wo ti jag Baa wa mo hay wo de horge sug ti [ɓo].” Cwãy tu, jar maaga bay wo goŋ Jeofa wa wãã mbaara ɓlagge ti naa. Amaa, daga á mo hay joŋ wo de mbrawge ti de deele ɓo, noga ti seele ɓo maa de wooren wa. (Dan. 6:4, 5) Wii jag see ɓo ga: ‘Hẽẽrebe wo de jar maaga bay wo Sedeewa Jeofa wa, mbaara na de ko ndi doo jobo maaga ɗuu ɓi bay de ɗarge ti mopo wa yawlà?’
5. Ndo joŋ joŋge maa ɓo’ nen go ga ndo diŋ jee “da fẽẽre ma de el wo” là?
5 Hayga ndo yaŋ diŋ jobo maa “da fẽẽre ma de el wo” no, ni ndo ko ge yaŋ see jar diŋ joŋre ɓaara maa de el, lan joŋ suse’ ne hara ti joŋre ɓaara se no. Ndo joŋ ge yaŋ de fruygi maa joŋ fẽẽre maa de el see jare, koh de maaga jobo bay mbe gor sen do ɓo wa mono. (1 Tes. 2:8.) Wer mayse ga á de el maaga jee maa peel tayge mo hay diŋ jee da fẽẽre maa de el wo là? Werga yãã wur maa do ɓen debaŋ diŋ kayge tayge no, lan joŋge joŋre maa ti taygen wo no. (1 Pi. 5:1-3) Koh sen mo hay ba da wããge ga joŋre do ɓaara debaŋ laybla no, á da’ wo fruygi debaŋ ti kayge jare.—Joŋre 20:35.
6. Joŋre maa hõn ngaɓ wo go ga ndo diŋ jee yãã waare jar là? (Hebre wo 13:2, 16; Ko foton lay.)
6 Ndo ɓo’ nen go ga ndo diŋ jee “yãɗ waare jare” de maaga ndo joŋ fẽẽre maa de el see jare, koh de jar maaga bay wo diŋ bar ɓo maa mbaŋ wa mono. (1 Pi. 4:9) Kefder maa naa wer wããre maa ɓil Bible po, wãã ti jobo maaga yãɗ waare jar ga: “á joŋ de el see jar ɓuy, koh jar maaga á bay de ko rage wa mono, lan se joŋ go de fruygi maa yãã jar liŋ ni ɓe.” Wii jag see ɓo ga, ‘Jar mbe de ko ndi doo jobo maaga naa nen de el go see jar maaga a wo le ti tayge mo yawlà?’ (Jaŋ Hebre wo 13:2, 16.) Jobo maaga yãã waare jar joŋ de el see jar maaga a wo le waare ɓuy. Á joŋ de el see jar coocoo wo, jar raŋ tayge wo, lan jar maaga joŋ wo joŋre debaŋ maa jor glog hẽẽrebe wo, doo jar raŋ tayge wo mono.—Tĩĩ. 18:2-8; Jõõ. 3:27; Lug 14:13, 14; Joŋre 16:15; Rom. 12:13.
Jee tiŋ po wo de wãy ɓe ɗe wo jee raŋ tayge po wo de wãy ɓe le liŋ ni ɓaara (Ko paragraf 6)
7. Jee maa peel tayge ngaɓ go na ngaɓge ga se bay “diŋ je ma da solay wa” là?
7 “Á mo hay diŋ je ma da solay wa”. Sen da wããge ga ndo mo hay kaŋ ɗiggi ɓo go debaŋ diŋ ti horog wa. Ndo mo hay ba de ẽgre noga de coo yaw, kaŋ twaywaŋ maa ni Baan go peel fẽẽren ɓuy nen naw ɓo. (Mat. 6:33) Joŋ joŋre de wur maa do ɓo no, ẽgre ɓo, lan fẽẽre maa do ɓon wo maa goŋ Jeofa, maa ko de el jar maa ɓi feele ɓo wo, lan maa joŋ peele ne tayge no. (Mat. 6:24; 1 Jaŋ 2:15-17) Wii jag see ɓo ga: ‘Ndi ko suŋgu na koge là? Ndi mbi go de fruygi ti fẽẽre maa do ɓin wo yawlà? Noga ndi tum de sãy da’ suŋgu ti de peel ni debaŋ, lan de sãy da’ fẽẽre de peel ni debaŋ yawlà?’—1 Tim. 6:6, 17-19.
8. Joŋre maa hõn ngaɓ wo go ga naa de ‘ko ngar see naa’, lan ‘ɗaw see naa’ là?
8 Hayga ndo yaŋ ‘ko ngar see ɓo’ lan yaŋ ‘ɗaw see ɓo’ no, ndo hay koɗ see ɓo jag fẽẽren ɓuy nen naw ɓo. Sen da wããge ga ndo mo hay rege de raw ɓil ɓo wa, jo yii debaŋ wa, hay her õõbe ti ngeel ɓe, caa ti de woore; lan joŋ hrag de fẽẽre maa debaywoore wo wa. Ndo hay joŋ gebee fẽẽre maaga jar maa ti tamsir joŋ wo wa. (Lug 21:34; Jag 4:4) Ndo hay mbo eŋ, koh de maaga jar lan mo joŋ ba wo ndo de woore wa. Ndo “mo hay diŋ je hã see [ɓo] ne yii . . . wa”; lan à mo ko ndo doo jee jo yii debaŋ wa lay. Wii jag see ɓo ga: “Joŋre ɓi mbe go na de ngaɓge ga ndi ko ngar see ɓi, lan ga ndi ɗaw see ɓi yaw noga baywa yawlà?”
9. Ndo joŋ joŋge maaga ndo mo hay “ɗiggi de woore de ele”, lan bay “hãy hãy wa” là”?
9 Hayga ndo yaŋ “ɗiggi de woore de ele” no, ndo ko fẽẽren de tab rage de wããre maa ɓil Bible no. Ndo ɗig debaŋ ti ɗeŋ maaga wããre Baa kay ti ɓaŋ se no, lan sen kay mo maa da’ koge re maa maŋ ɗiggi maa de woore. Ndo tem maŋ ɗiggi ti wããre maaga ndo bay go de laa wer ɓe de woore wa ga. Amaa ndo laa wer go ne wããren wo de woore ɗa, taŋgu maaga ndo maŋ ɗiggi ti re se no. (Jõõ. 18:13) Doo sen nokay, ɗiggi maaga ndo far ra joŋ wo de maŋ ɗiggi maa ni Jeofa no. Hayga ndo bay we diŋ jee maa de “hãy hãy wa” no, sen da wããge ga ndo joŋ fẽẽren ɓuy ti ngeel ɓaara lan ti wur ɓaara. À kaŋ ɗiggi ti ɓo wer maaga ndo hoo sug ti jag liŋgi wo mono. Hayga ndo had joŋre maa de woore ga à ngaɓ ra ti hadge sen la we no, sen kay mo yaŋ maaga à mo hay ɗar ɗuu ɓo wa. Naa ko patala diŋ joŋre maaga ndo mo hay had ra maa hã saɓlaŋ maa de woore, hayga ndo yaŋ diŋ pan tiŋ no.
HAY DIŊ JEE TIŊ MAA TI NGEEL ƁE
10. Jee tiŋ “koɗ jar ni ɓe wo de ele” diŋ de ɗeŋ maa hõnlà?
10 Hayga ndo yaŋ diŋ jee tiŋ, day ga ndo de sãy kol jee maa peel tayge ti no, nen daga jar maa liŋ ni ɓo mo hã wo saɓlaŋ maa de woore ne jare. Diŋ wersen so ga ndo mo hay “koɗ jar ni [ɓo] wo de ele.” Sen da wããge ga ndo mo hay ko de el jar ni ɓo wo de woore, lan ndo mo hay far ɗiggi maaga kay ra yaŋ mono. Ndo bag jag joŋre sen go diŋ de joŋge hadge wããre Baa maa ɓi feele tum; kay ra maa woge ti taygeti tum; lan kay ra maa sii Wããre Baa de ngar ẽgre ɓaara. Wer mayse ga sen diŋ mopo maa de el là? Apotre Pol wãã ga: “werga jobo ko koɗ jar ni ɓe wo we gà no, day á koɗ tayge jar ma wer Krisn wo koɗge an ne?”—1 Tim. 3:5.
11-12. Wer mayse ga joŋre jar maa liŋ ni jee maa peel tayge mo hay wo de woore là? (Ko foton lay.)
11 Hayga ndo yaŋ diŋ pããbe lan ga weere ɓon yaŋ bay wo go kiŋgi 18 wa ɗa no, ndo mo hay “liŋ weere [ɓo] wo yãã jag ti ngel ɓe de el horge sugi”. Ndo mo hay had ra lan kay ra de dage. Cwãy tu, ndo da ga á mo hay wo de fruygi, lan mo joŋ wo hrag doo weere maa lan wo no lay. Amaa ndo mo hay had ra maaga á mo yãã wo jag ɓo, mo hoo wo sug ti jare, lan ga joŋre ɓaara mo hay de woore. Ni pa, ndo mo kay ra maaga barge ɓaara mo hay de Jeofa de woore; maaga á mo hoo wo sug ti wããre maa ɓil Bible no; lan maaga á mo hã wo see ɓaara ti joŋre maaga kay ra maa joŋ batem go mono.
12 “Weere ɓen mo hay wo de deele lay, bay wo diŋ jar maga à wãɗ ti ɓaara ga á wo diŋ jar figliw noga jar maga yãã wo jag gà wa lay.” Hayga mbarga po yaŋ gẽẽge ciŋ maa joŋ batem, noga go de joŋ batem, day joŋ ɓlagge maa kwũy no, re mayse da’ pan ɓe maaga diŋ jee maa peel tayge là? Hayga pan ɓe hay had ne we, lan liŋn we de woore ga no, maapo ga pan ɓe joŋ ge diŋ jee maa peel tayge ga so.—Ko Ngeel Gor ti Jare maa nen 15 Few Kage, 1996, p. 21, paragraf 6-7.
Pããrebe wo de had weere ɓaara wo de joŋ fẽẽre ne Jeofa, lan ne tayge no (Ko paragraf 11)
HAY KAY TAYGE NO
13. Ndo ngaɓ go ga ndo bay “ooge go graŋ wa,” lan ga “à mo hay riŋgi ga [ndo] wa” na ngaɓge là?
13 Hẽẽrebe maaga naa wo nen joŋre maa de woore maa ti’ wo glog la kay wo tayge debaŋ. Jobo maaga bay “ooge go graŋ wa” dur maaga jam mo hay ti holaŋ ɓe de jare, lan maaga jar lan mo hay wo jam ti holaŋ ɓaara. Jobo maaga bay ooge go graŋ wa co’ sug jar lan no, lan kiɗ maaga se mo laa wer ne ɗiggi ɓaara. Ko ba ɗa, hayga daŋge jar maa peel tayge lan maŋ wo ɗiggi po maaga Bible bay go de maŋ jag ɓe wa no, ndo ɓo’ mbo yaŋ go wer ɓaara, koh ɗiggi ɓo mo hay ba sar de maa ɓaaran yawlà? “Á mo hay riŋgi ga se wa”: sen da wããge ga ndo mo hay ɗig ga jar lan mo hay joŋ wo fẽẽren ɓuy tum doo ga ndo da ne wa. Ndo de koge ga á de woore maaga ndo mo co’ sug jar lan wo no. (Tĩĩ. 13:8, 9; Jõõ. 15:22) Ndo mo hay ‘wãɗ ɓlagge ti jar wa’ noga hay “joŋ fẽẽre de waŋ gir gir wa.” Sen da wããge ga ndo mo hay hoo sug ti jare, lan ndo mo hay ngar jag de ɓaara wa. Amaa, hay de el see ɓaara yaw. Werga ndo diŋ jobo maa da jam so mono, ndo dur yaŋ maaga jam mo hay ti holaŋ jar lan wo, koh nen re maa de gayri. (Jag 3:17, 18) Wãã wããre ne jar lan wo de ele, se kay ra maaga á mo hay wo desãy.—Kii. 8:1-3; Jõõ. 20:3; 25:15; Mat. 5:23, 24.
14. De maaga à wãã ga jee maa peel tayge “mo hay diŋ je ma de yãã wããre Baa defay wa” lan “de deele” mono, á da wo wããge ga hãylà?
14 Hẽnbe maaga kol jee maa peel tayge “mo hay diŋ je ma de yãã wããre Baa defay wa.” Á mbe cwãy ga á bay naŋ ga ndo mo hay go de joŋ batem kiŋgi pur wa; amaa, á wii wur do ɓo debaŋ maaga ndo mo kol go jee maa de ruggi ti wããre Baa. Taŋgu maaga ndo kol jee maa peel tayge mono, doo Yeso no lay, ndo mo hay fer ti see ɓo gesiŋ, de fruygi ti joŋre maaga Jeofa hã ne ndo mo ɓuy. Ndo mo hay gorge desãy, lan hay gorge maaga Jeofa mo hã joŋre mo do ti tayge de peel ni. (Mat. 20:23; Flp. 2:5-8) Ndo ngaɓ go ga ndo “de deele” de maaga ndo oo peel Jeofa de deele, de joŋ naw ɓon doo maaga á da nono, lan de hoo sug ti jag liŋgi maaga tayge maa ɓen hã ne naa mono.—1 Tim. 4:15.
15. Á naŋ ga jee maa peel tayge mo hay sii wããre go peel de woore debaŋ yawlà?
15 Wããre Baa ngaɓ go de woore tu ga jar raŋ tayge mo hay wo “de kããge ma had jare.” Sen da wããge ga ndo mo hay diŋ jobo maa sii wããre de woore go peel ngaɓa naŋ yawlà? Baywa. Jar maa peel tayge wo ngaɓa bay wo de ko sii wããre go peel ngaɓa de woore debaŋ wa. Amaa, á sii wo wããre Baa de woore, lan jor wo glog hẽẽrebe wo de woore lay. (Ko note d’étude “qualified to teach” ɓil 1 Timote 3:2; tab ne de 1 Korente wo 12:28, 29 lan Efes wo 4:11, NWT, study edition.) Koh ndo mo hay ba de ko sii wããre go peel de woore debaŋ wa laybla mono, ndo mo hay dur maa gẽẽge ciŋ ti ɓaŋ se no. Ndo joŋ joŋge maa gẽẽge ciŋ là?
16. Ndo joŋ joŋge maaga ndo kol jee hadge maa de woore là? (Ko foton lay.)
16 “Á mo hay de saʼ see ɓe de wããre ma cwãyn de egre.” Maaga ndo mo hay sii wããre de woore mono, joŋ joŋre de Wããre Baa de maaga ndo yaŋ sii wããre peel jar no, lan de maaga ndo baa yaŋ ne hẽẽrebe wo mono. Hay diŋ jee frug nen Bible de kefder naa wo de woore. (Jõõ. 15:28; 16:23; ko note d’étude “holding firmly to the faithful word” ɓil Tid 1:9, NWT Study edition.) De maaga ndo frug nen Bible mono, kaŋ ɗiggi ɓo ti ɗeŋ maaga kefder naa, naa wo wer verse wo de woore. Day de maaga ndo le’ sii wããre Baa we go peel no, dur maa du’ jiili jar maaga ndo wãã wããre ne hara mono. Ndo gẽẽ ciŋ diŋ de maaga ndo yaŋ wii kayge do jar maaga ko wo sii wããre Baa de woore mono. Ndo mo hay joŋ joŋre de yaŋ ɓaaran lay. (1 Tim. 5:17) Jar maa peel tayge mo hay wo “de kããge ma coɓ nen jar de hadge ma cwãy no”; amaa, de ngar ngeel maa po, á mo hay “kaŋ nen” hẽẽrebe wo ti faage no. Amaa, koh á mo hay ba jor glog jare, noga liŋ rage, á mo hay joŋge ɓe de dage. Hayga ndo yaŋ desãy lan de dage, lan hayga ndo yaŋ joŋ joŋre de Bible de maaga ndo had jar no, ndo kol ge diŋ jee sii wããre Baa maa de woore, werga ndo de maŋge diŋ saɓlaŋ Yeso, Jee hadge maa kluu no.—Mat. 11:28-30; 2 Tim. 2:24.
Jee kay jar maa peel tayge po de had ɗeŋ maa sii wããre ti jeŋ jee maa peel tayge po ga de ko sii wããre Baa debaŋ. Jee kay jar maa peel tayge sen de had ɗeŋ siigi wããre maaga se sii go peel bole ti fẽn ko nene (Ko paragraf 16)
HAY TUM HAD JOŊRE MAA DE WOORE MAA KOL JEE MAA PEEL TAYGE
17. (a) Mayse kay jar maa kay jar maa peel tayge wo maa kol jar maa peel tayge wo là? (b) Jar maa peel tayge mo hay ko wo mayse de maaga á yaŋ wo ndalge maa baa jobo jee maa peel tayge là? (“ Oo go graŋ wa de maaga nday yaŋ ndalge ti joŋre jobo maa kolge ɓe jee maa peel tayge no.”)
17 Blam maaga á ko wo joŋre maaga à mo hay joŋ maa kol jee maa peel tayge mono, jar kay jar maa peel tayge po ɗig wo ga saara kol jar maa peel tayge ti boŋ ga. Amaa, ɗig ndo ga Jeofa, noga tayge maa ɓen bay wo gorge ga ndo mo bag jag ɓaara go ti ngeel ɓe keɗed ɓuy wa. (1 Pi. 2:21) Kay mo maa joŋ joŋre sen diŋ ẽgre nenterse maa ni Baa no. (Flp. 2:13) Joŋre maa de woore po yaŋ ga ndo de sãy had sen ti yawlà? Tos Jeofa ti ɓe. Kiɗ wer ne joŋre se no, lan wii kayge do jee maa peel tayge po maaga ndo mo gẽẽ ciŋ ti joŋre se no.
18. Jar kay jar maa peel tayge wo ɓuy de jor glog maa joŋ maylà?
18 Da ga wosela ɓuy yoo naa, koh jar maa peel tayge wo, mo ya’ wo wer naa nen joŋre maaga à ngaɓ ra ti hadge sen la mo go. (Flp. 3:16) Ndo diŋ jee kay jar maa peel tayge wo yawlà? Ya’ wer gẽẽge ciŋ lan kay hẽẽrebe wo tum! Wii Jeofa ga á mo kay mo, maaga ndo mo hay kayge nen ɓe, lan nen hẽẽrebe wo. (Esa. 64:8) Da ga Jeofa mo ɓo’ bosa’ ti joŋre ɓo no, lan ti durgi ɓo maaga ndo dur maa kol jee maa peel tayge mono.
SIŊ 101 Naa joŋ wee joŋre do kããra, de tay jag boŋ
