1-2. Mang e ba muun ko maruwel ni “ba th’abi fel’” ni ma rin’ reb e piilal?

 FAANRA ke n’uw nap’an ni ga be pigpig ni gur reb e ministerial servant, ma sana ga be guy rogon ni nge bung rogom ni ngam mang reb e piilal. Gur, rayog ni ngam nameg ni ngam un i rin’ e binem e maruwel ni “ba th’abi fel’,” fa?​—1 Tim. 3:1.

² Mang e ba muun ko maruwel ni ma rin’ reb e piilal? Ma dag e kanawo’ nrayog ni ngan folwok riy ni fan ko fare maruwel ni machib, ma ma ayuweg e pi walag ma be skulnagrad, maku ma pi’ gelngin e ulung u daken e thin nge ngongol rok. Aram fan ni be yog e Bible ni piin piilal nib gel e maruwel ni yad ma tay e yad boch e “pumoon ni tow’ath.”​—Efe. 4:​8, NW.

3. Uw rogon nrayog ni nge bung rogon reb e walag ni pumoon ni nge mang reb e piilal? (1 Timothy 3:​1-7; Titus 1:​5-9)

³ Uw rogon nrayog ni nge bung rogom ni ngam mang reb e piilal? Ba thil e re n’ey ko bin nge bung rogom ni ngam un nga reb e maruwel ni nge yag e salpiy riy ngom. Ba ga’ ni faanra nge yag reb e maruwel ngom ni yira pi’ puluwom riy, ma kemus nib t’uf ni nge yag boch e salap ngom ni be yaliy e en nib ga’ ko fare raba’ i maruwel. Machane faanra ga baadag ni ngam mang reb e piilal, ma de gaman ni kemus ni ngam salap ko machib nge rogon ni ga ma fil ban’en ku be’. Ya ba t’uf ni ngki yag fapi fel’ngin ngom ni be yog e 1 Timothy 3:​1-7 nge Titus 1:​5-9 nib t’uf ni nge yag ko piin piilal. (Mu beeg.) Ere gad ra weliy ko re article ney boch e pi fel’ngin nem ni bay murung’agen ko pi verse ney. Gad ra weliy rogon nrayog ni nge fel’ thin reb e walag ni pumoon, nge rogon nrayog ni nge mang reb i lolugen e tabinaw nib manigil, nge n’en nra ayuweg ni nge m’agan’ ngay ni nge un i ayuweg e ulung.

 NGE FEL’ THIM

4. Mang e be yip’ fan ni nge ‘yan i aw nib fel’ thim’?

⁴ Ra nge bung rogom ni ngam mang reb e piilal, ma thingari ‘yan i aw nib fel’ thim.’ Re n’ey e be yip’ fan nib fel’ thim u wan’ e girdi’ u lan e ulung ni bochan e ba fel’ e ngongol rom. Maku reb e susun e gur be’ ni ‘ma tay e girdi’ fam, ni girdi’ ni gathi yad girdien’ e ulung. Piin nde mich Got u wan’rad e sana rayog ni ngar gathibthibnaged e michan’ rom, machane susun e dariy tapgin ni nge maruwar u wan’rad ko gur be’ ni gab yul’yul’ mab fel’ e ngongol rom fa danga’. (Dan. 6:​4, 5) Ere mu fithem ni nge lungum, ‘Ba fel’ thig u lan e ulung ngu wuru’ e ulung, fa?’

5. Uw rogon nrayog ni ngam dag ni gur be’ ni ga “ba adag e tin nib fel’”?

⁵ Faanra gur be’ ni ga “ba adag e tin nib fel’,” ma aram e ga ma sap nga fel’ngin yugu boch e girdi’ ma ga ma yog ngorad. Ka gab felfelan’ ngay ni ngam rin’ boch ban’en nib fel’ ni fan ko girdi’ ni kub muun ngay boch ban’en ndanir lemnag nthingar mu rin’. (1 Thess. 2:8) Mang nib ga’ fan ni nge yag e re fel’ngin ney ko piin piilal? Ya boor e tayim ni yad ma ayuweg e pi walag u lan e ulung mar rin’ed e maruwel ni kan pi’ ngorad. (1 Pet. 5:​1-3) Yugu aram rogon ni boor e maruwel nthingar rin’ed, machane kab gel e felfelan’ ni yad ma tay ni ngar ayuweged e girdi’.​—Acts 20:35.

6. Mang boch e kanawo’ nrayog ni ngan “t’ufeg e milekag” riy? (Hebrews 13:​2, 16; kum guy e sasing.)

⁶ Nap’an ni ga ra rin’ boch ban’en nib manigil ni fan ko girdi’ ni kub muun ngay e piin gathi yad e fager rom nrib pach e thin romed, ma aram e ga be dag ni gur be’ ni ga ma “t’ufeg e milekag.” (1 Pet. 4:9) I yog reb e dictionary ko Bible ni be’ nib pumoon nib gol ko girdi’ ara ma t’ufeg e milekag e kub gol ko girdi’ nde nang, mab felfelan’ ngay ni nge piningrad nga tafen. Ere mu fithem ni nge lungum, ‘Gag be’ nug ma gol ko milekag ni kar bad ko ulung rog, fa?’ (Mu beeg e Hebrews 13:​2, 16.) Be’ nib pumoon nib gol e ma pi’ e tin bay rok ko pi milekag ni kar bad ni kub muun ngay e piin yad ba gafgow nge pi tapigpig nib gel e maruwel ni yad ma tay, ni bod e pi walag ni pumoon ni yad ma lekag e ulung nge boch e walag ni pumoon ni kar bad u bang ni ngar pied e welthin ko ulung.​—Gen. 18:​2-8; Prov. 3:27; Luke 14:​13, 14; Acts 16:15; Rom. 12:13.

7. Uw rogon ni ma dag reb e piilal nder “chogownag e salpiy”?

⁷ “Dabi chogownag e salpiy.” Re n’ey e be yip’ fan nde m’on e chugum u wan’um. Demtrug ko gab flaab ara gab gafgow, ma ga ma m’oneg Gil’ilungun Got u lan e yafos rom. (Matt. 6:33) Ga ma fanay e tayim rom, nge gelngim, nge chugum rom ni ngam liyor ngak Jehovah, mag ayuweg e tabinaw rom, nge ulung. (Matt. 6:24; 1 John 2:​15-17) Ere mu fithem ni nge lungum: ‘Uw rogon e salpiy u wan’ug? Ba fel’ u wan’ug e chuuw i n’en nib t’uf ko par rog? Fa gu be par nug be lemnag rogon ni nggu yognag e salpiy me yoor e chugum rog?’​—1 Tim. 6:​6, 17-19.

8. Mang boch e kanawo’ ni ngam dag riy ni ‘gab gonop’ ma ‘rayog ni ngam telem ko tin nde mat’aw’?

 ⁸ Faanra ‘gab gonop’ ma ‘rayog ni ngam telem ko tin nde mat’aw,’ ma aram e ga manang e gin ngam mus riy u gubin ban’en ni ga ma rin’ u lan e yafos rom. Re n’ey e ba muun ngay ni ga ma siyeg e abich, nge garbod nib pag rogon, mab yalen e munmad rom nge rogon ni ga ma fal’eg yaam, maku ga ma fal’eg i mel’eg e pi n’en ga ma rin’ ni ngam felfelan’ ngay. Damur folwok ko n’en ma rin’ e girdi’ ko re fayleng ney. (Luke 21:34; Jas. 4:4) Ga ma par ni gab gapas u nap’an nra rin’ e girdi’ e ngongol nib kireb ngom. Gathi gur be’ ni gab “tamuun rrum”; maku gathi yi manangem ni gur be’ ni ga ma unum nib pag rogon. Ere mu fithem ni nge lungum, ‘Ma m’ug u rogon e par rog ni gag be’ nda gur ma rin’ boch ban’en nib pag rogon ma rayog ni nggu teleg u boch ban’en, fa?’

9. Mang e be yip’ fan ni nge “tamilangan’um” ma “gab yaram”?

⁹ Faanra ‘rayog ni ngam t’ar lanin’um [“ba tamilangan’um,” NW],’ ma aram e ga ma fal’eg i yaliy rarogon boch ban’en nrogon nib puluw ko pi kenggin e motochiyel u Bible. Ga ma fal’eg i lemnag rogon nib puluw e pi kenggin e motochiyel nem nga ban’en ni ke buch, ma bochan e re n’ey ma ke yag ni nge tamilang boch ban’en u wan’um ma rayog ni ngam dugliy ban’en nib fel’ rogon. Damur gur ngam dugliy ban’en ndawor ri tamilangan’um riy nib fel’ rogon. Ya ga ma guy rogon ni ngam nang urngin ban’en u rarogon fare n’em nib t’uf ni ngam nang. (Prov. 18:13) Bochan e re n’ey, ma ga ma dugliy boch ban’en nib fel’ rogon ni be m’ug riy rogon e lem rok Jehovah. Faanra gur be’ nib ‘fel’ e ngongol rom [“gab yaram,” NW],’ ma aram e ba yaram e tin ga ma rin’ ma ga ma taw ko gin ngam man ngay nib tayim. Yi manangem ni gur be’ nrayog ni ngan taga’ ngom, maku ga ma fol ko n’en ka nog ngom ni ngam rin’. Pi fel’ngin ney e ra ayuwegem ni nge fel’ thim. Ere chiney e ngad weliyed e pi fel’ngin ni be yog e Bible nib t’uf ni nge yag ngak reb e piilal ya nge yag ni mang reb i lolugen e tabinaw nib manigil.

NGAM MANG REB I LOLUGEN E TABINAW NIB MANIGIL

10. Uw rogon ni ma gagiyegnag reb e pumoon “girdien e tabinaw rok nib fel’ rogon”?

¹⁰ Faanra gur reb i figirngiy ma ga baadag ni ngam mang reb e piilal, ma aram e kub t’uf ni nge fel’ thin e tabinaw rom. Ba t’uf ni ngam “gagiyegnag girdien e tabinaw [rom] nib fel’ rogon.” Ba t’uf ni ngan nangem ni gur be’ ni ga ma t’ufeg chon e tabinaw rom ma ga ma dugliy boch ban’en nib fel’ ni fan ngorad. Re n’ey e ba muun ngay ni ngaum guy rogon ni nge rin’ e tabinaw rom gubin ban’en nthingar mu rin’ed ni fan ko liyor romed. Mang nrib ga’ fan e re n’ey? Ya fith apostal Paul ni gaar: “Faanra de nang be’ rogon ni nge gagiyegnag girdien e tabinaw rok, me ere uw rogon me yog ni nge ayuweg e galesiya rok Got?”​—1 Tim. 3:5.

11-12. Mang nrib ga’ fan e ngongol ni ma dag pi fak reb e walag ni pumoon ni faanra baadag ni nge mang reb e piilal? (Kum guy e sasing.)

¹¹ Faanra gur reb e matam, ma pi fakam ndawori gaman 18 e duw rorad ni ka yad bay u tan paam e thingar ‘ur folgad rom mi yad ta’ fam.’ Ba t’uf ni ngam skulnagrad mag yal’uwegrad u fithik’ e t’ufeg. Riyul’ ni ga baadag ni ngar felfelan’gad, mu ur minmingad, mu ur fafelgad ni bod e tin ka bay e bitir. Machane kub t’uf ni ngam fil ngorad ni ngaur folgad, ma yad be tayfan e girdi’, mu kur rin’ed e ngongol nib fel’. Thingar kum rin’ e tin nrayog rom ni ngam ayuwegrad ni nge fel’ e tha’ u thilrad Jehovah, mu ur folgad ko pi kenggin e motochiyel u Bible, mar mon’oggad nge yag nra uned ko taufe.

¹² ‘Pi fakam e dabi siy nib mich Kristus u wun’rad ma de kireb thirad ko yanyan ni yad be tay ara reb e darir folgad.’ Faanra bay reb e bitir nib mich Got u wan’ ni ke rin’ reb e denen nib ubchiya’, ma mang wenegan nra yib ko chitamangin? Faanra da i tiyan’ e chitamangin nga i skulnag ma  be yal’uweg, ma rayog ndabkiyog ni nge pigpig fare matam ni ir reb e piilal.​—Mu guy Fare Wulyang Ntagil’ E Damit ko May 1, 1997 ko p. 28 ko par. 6-7.

MU AYUWEG E ULUNG

13. Uw rogon nrayog ni ngam dag ni gur be’ ni ‘gab munguy’ ma “de tolangan’um”?

¹³ Pi walag ni pumoon ni ma m’ug boch i fel’ngin e Kristiano rorad nib manigil e ba ga’ e ayuw nrayog ni ngar pied ko ulung. Be’ nib pumoon “nib munguy” e ma guy rogon ni nga i par nib aw e gapas u thiliy. Faanra ga baadag ni ngaun tem ni gur be’ ni gab munguy, me ere um motoyil ngak yugu boch e girdi’ mag guy rogon ni ngam nang rogon lanin’rad. Nap’an nra muulung e piin piilal, ma gur, ra m’agan’um ngay ni ngam fanay e n’en ke dugliy yooren e girdi’ ni faanra de togopuluw nga reb e motochiyel ara kenggin e motochiyel u Bible, fa? Faanra ‘dam ufanthin [“de tolangan’um,” NW],’ ma be yip’ fan ndamur lemnag ni gubin ban’en nthingar ni rin’ nrogon ni ga be lemnag. Ya ga baadag ni ngam fith laniyan’ yugu boch e girdi’. (Gen. 13:​8, 9; Prov. 15:22) Ga “ba adag e gapas” ma de “papey e damumuw” ngom. Gab sumunguy ma gab gonop ma damur darifannag yugu boch e girdi’ ara um luaged e thin. Bochan ni gur be’ ni gab gapas, ma aram e ga ma guy rogon ni ngam awnag e gapas u thilmed e girdi’ ni kub muun ngay e ngiyal’ ni ke sum e magawon u thilmed. (Jas. 3:​17, 18) Thin nib sumunguy ni ga ma yog e rayog ni nge munguynag laniyan’ yugu boch e girdi’ ni kub muun ngay e piin yad be togopuluw.​—Judg. 8:​1-3; Prov. 20:3; 25:15; Matt. 5:​23, 24.

14. Mang e be yip’ fan fare thin ni gathi “ka fini pig ke mang reb i girdien Kristus ndawori n’uw nap’an” mab “yul’yul’”?

¹⁴ Reb e walag ni pumoon nrayog ni nge mang reb e piilal e gathi “ir be’ ni ka fini pig ke mang reb i girdien Kristus ndawori n’uw nap’an.” Yugu aram rogon nde t’uf ni gur be’ ni ke yoor e duw ni kam un ko taufe, machane ba t’uf ni gur reb e Kristiano ni kam ilal ko tirok Got ban’en. U m’on ni ngan dugliyem ni ngam mang reb e piilal, ma thingari m’ug ni gur be’ ni ga bod Jesus ni gab sobut’an’ mab m’agan’um ngay ni ngam sonnag Jehovah ni nge pi’ reb e maruwel ngom u lan e ulung. (Matt. 20:23; Fil. 2:​5-8) Rayog ni ngam dag ni gab “yul’yul’” ni aram e ngaum fol rok Jehovah nge pi motochiyel rok nib mat’aw ma ka ga be fol ko yaram ni be yib ko ulung rok.​—1 Tim. 4:15.

15. Rib t’uf ni ngari salap reb e piilal ko welthin u fithik’ e girdi’ ni yoor, fa? Mu tamilangnag.

¹⁵ Be tamilangnag e Bible ni piin yad ma yog e  thin u lan e ulung e thingari ‘yog rorad ni ngar machibgad.’ Gur, re n’ey e be yip’ fan nthingar ra salapgad ko welthin u fithik’ e girdi’ ni yoor? Danga’. Gathi gubin e piilal nri yad ba salap ko welthin u fithik’ e girdi’ ni yoor. Machane nap’an ni yad ra machib, ara ranod ra guyed e pi walag ni ngar pied e athamgil nga lanin’rad, ma yad manang rogon ni ngar fanayed e Bible ni ngar filed ban’en ngak be’ nib fel’ rogon mar pied e athamgil nga laniyan’ e pi walag. (Mu taarebrogonnag ko 1 Korinth 12:​28, 29 nge Efesus 4:11.) Yugu aram rogon, ma gubin ngiyal’ nib t’uf ni ngam guy rogon ni ngam mon’ognag e salap rom u rogon ni ngaum fil ban’en ko girdi’. Ere uw rogon nrayog ni ngam rin’ e re n’ey?

16. Uw rogon nrayog ni ngam mang reb e sensey nib manigil? (Kum guy e sasing.)

¹⁶ “Thingari dabi pag e thin rok Got ni ir e nge pagan’uy ngay.” Ra ngam mang reb e sensey nib manigil, ma ngam guy rogon ni nge puluw e n’en ga be fil ko girdi’ ni yoor nge fonow ni ga be pi’ ngak be’ ko Thin rok Got. Um fal’eg i fil e Bible nge pi babyor rodad. (Prov. 15:28; 16:23) Nap’an ni ga be fol Bible, mag tay fanam i yan u rogon nib puluw ni ngan fanay reb e thin nu Bible nge reb. Ma nap’an ni ga be fil ban’en ku be’, mag guy rogon ni nge taw e n’en ga be yog nga gum’irchaen. Rayog ni ngam mon’og u rogon ni ngaum fil ban’en ko girdi’ ni faan ga ra ning e ayuw ngak boch e walag ni pumoon ni ke n’uw nap’an ni kar manged piilal mag fol ko fonow ni kar pied ngom. (1 Tim. 5:17) Piin piilal e thingari yag rorad ni ngar ‘pied e athamgil nga laniyan’’ pi walagrad; machane ku bay yu ngiyal’ nthingar kur ‘daged ngorad e oloboch’ ni kar rin’ed. Yugu aram rogon ma thingar rin’ed e gali n’ey u fithik’ e sumunguy. Faanra gab sumunguy, ma ga ma dag e t’ufeg, ma ga ma guy rogon ni nge puluw e n’en ga ma fil ko girdi’ ko Thin rok Got, ma aram e rayog ni ngam mang reb e sensey nib manigil ni bochan e ga be folwok rok Jesus ni ir e Bin Th’abi Fel’ e Sensey.​—Matt. 11:​28-30; 2 Tim. 2:24.

MU ULUL NI NGAM MON’OG

17. (a) Mang e rayog ni nge ayuweg e pi ministerial servant ni ngar ululgad ni ngar nameged ni ngar manged boch e piilal? (b) Mang e susun ndabi pag e piin piilal talin u nap’an ni yad be yaliy rarogon reb e walag ni pumoon ni yad be lemnag ni nge mang reb e piilal? (Mu guy fare kahol ni kenggin e “ Nge Puluw Rogon ni Ngam Yaliyed Rarogon Be’.”)

¹⁷ Tomuren nra beeg boch e ministerial servant murung’agen e pi fel’ngin nib t’uf ni nge yag ngak e piin yad baadag ni ngar manged piilal, ma  sana yad ra lemnag ndabiyog ni ngar manged boch e piilal. Machane dab mu pagtalin nder lemnag Jehovah ara ulung rok ni nge m’ug e pi fel’ngin ney rom nrib fel’ rogon. (1 Pet. 2:21) Maku reb e, gelngin Jehovah nib thothup ni aram fare gelngin nrib gel e ra ayuwegem ni nge yag e pi fel’ngin ney ngom. (Fil. 2:13) Ere bay reb e fel’ngin ni ga baadag ni ngam maruweliy, fa? Faanra bay mag yibilay murung’agen ngak Jehovah. Mu gay murung’agen e re fel’ngin nem, ma gog ngak reb e piilal ni nge ayuwegem ni ngam mon’og.

18. Mang e yibe pi’ e athamgil nga laniyan’ urngin e ministerial servant ni ngar rin’ed?

¹⁸ Manga yigi ulul gubin e walag ni pumoon nib muun e piin piilal ngay ni ngar maruweliyed fapi fel’ngin ni kan weliy ko re article ney. (Fil. 3:16) Gur reb e ministerial servant, fa? Faanra gur reb, mag ulul ni ngam mon’og i yan! Mog ngak Jehovah ni nge skulnagem ya nge yag nim rin’ boor ban’en ni fan ko pigpig rom ngak nge ulung. (Isa. 64:8) Manga yigi tow’athnagem Jehovah ko athamgil ni ga be tay ni nge bung rogom ni ngam mang reb e piilal.