Ano an Ginsisiring han Biblia Mahitungod ha Pag-live-in?

An baton han Biblia

An Biblia nasiring nga karuyag han Dios nga an mga tawo “maglikay ha seksuwal nga imoralidad.” (1 Tesalonica 4:3) Sugad han pagkagamit ha Biblia, an termino nga “seksuwal nga imoralidad” nag-uupod han pag-adulteryo, homoseksuwal nga mga buhat, ngan seksuwal nga relasyon han lalaki ngan babaye nga diri kasal.

Kay ano nga importante ha Dios an pagpakasal?

Okey la ba nga mag-live-in anay an lalaki ngan babaye basi matestingan kon magkakauyon gud ba hira?

Paonan-o mapaparig-on han mag-asawa an ira relasyon?

Kay ano nga importante ha Dios an pagpakasal?

● An kahikayan ha pag-asawa tikang ha Dios. Gintikangan niya ito han ginkasal niya an siyahan nga mag-asawa. (Genesis 2:22-24) Diri niya katuyoan nga an lalaki ngan babaye magtampo nga diri kasal.

● Maaram an Dios kon ano an pinakamaopay para ha mga tawo. Gindisenyo niya an pag-asawa sugad nga permanente nga pag-upod han lalaki ngan babaye kay maaram hiya nga makakaopay ngan makakaprotektar ito ha ngatanan nga membro han pamilya. Hunahunaa inin simple nga ilustrasyon. An usa nga manufacturer naghahatag hin instruksyon kon paonan-o iaasembol hin tama an usa nga kabinet. Ha pariho nga paagi, an Dios naghahatag hin instruksyon ha aton kon paonan-o magkakaada malipayon nga pamilya. Pirme gud nagpapahimulos an mga nasunod ha mga suruklan han Dios.—Isaias 48:17, 18.

● An pakig-sex antes han kasal may-ada magraot nga resulta. Pananglitan, puydi ito magresulta hin diri karuyag nga pagburod, pagkaada mga sakit nga nakukuha tungod ha pakig-sex, ngan kasakit ha emosyon.

● Gintagan han Dios an lalaki ngan babaye hin abilidad nga magkaada anak pinaagi han sex. Para ha Dios sagrado an kinabuhi, ngan an abilidad nga magkaada anak usa nga presyoso nga regalo. Karuyag han Dios nga respetuhon naton ito nga regalo pinaagi ha pagpasidungog ha iya kahikayan han pag-asawa.—Hebreo 13:4.

Okey la ba nga mag-live-in anay an lalaki ngan babaye basi matestingan kon magkakauyon gud ba hira?

Basi magin malipayon an pag-asawa, diri kinahanglan nga mag-live-in anay hin pipira ka panahon, diin may kagawasan an kada tagsa nga bumaya kon san-o nira karuyag. Lugod, magigin malampuson an pag-asawa kon hira nga duha determinado nga magin maunungon ha usa kag usa ngan magbibinuligay nga malamposan an mga problema. An kasal nagpaparig-on han ira saad ha usa kag usa.—Mateo 19:6.

Paonan-o mapaparig-on han mag-asawa an ira relasyon?

Waray perpekto nga pag-asawa. Pero mahimo magin malipayon an mag-asawa kon ig-aaplikar nira an mga sagdon han Biblia. Ini an pipira nga ehemplo:

• Unaha an panginahanglan han imo asawa kay han imo kalugaringon.—1 Corinto 7:3-5; Filipos 2:3, 4.

• Magkaada gugma ngan respeto ha usa kag usa.—Efeso 5:25, 33.

• Kontrola an imo panyakan.—Proberbios 12:18.

• Magin mapailubon ngan mapinasayloon.—Colosas 3:13, 14.

An manufacturer may instruksyon kon paonan-o iaasembol an usa nga kabinet. An Dios may instruksyon kon paonan-o magkakaada malipayon nga pamilya