Ena, Ibaibolo lyayobile ngani ukuti abandu bingi amasiku agha bisakukindilila ukuya babibi. Kangi likuyoba ukuti abandu bisakukana ukubombela ifundo inunu isi sikubatula abandu ukwikala pampene mwalutengano. a (2 Timoti 3:1-5) Loli Ibaibolo likuyoba kangi ukuti abandu bamo batisakweghelelako utuyilo utubibi utu abandu bingi balinato amasiku agha. Nubutuli bwa Kyala, bikwisa pakwiyula ukumanyila ukwinong’ona nu kubomba ifindu munjila iyi yikunhobosya Kyala.—Yesaya 2:2, 3.

Mu nkhani iyi tukuya pakuyobeania ifindu ifi

•  Ngimba Ibaibolo lyobile ngani isyafiki isyakufwana na muno abandu bisakwinong’onelagha nu kubombela ifindu amasiku agha?

•  Ngimba isi abandu aba biyighanile bene bikubomba sikubapalamasya bulebule abangi?

•  Nongwa yafiki abandu bikukindilila ukuya babibi fiyo?

•  Ngimba tukulondiwa ukubomba bulebule ifindu na bandu aba bali nutuyilo utubibi?

•  Ngimba umundu aliwesa isakuya nu tuyilo utubibi?

•  Ngimba abandu bosa bisakuya nu tuyilo utubibi utu twisakupangisya ukuti mfighaba muno bikwikala mubombiweghe itolo ifyongo ni fyankaza?

 Ibaibolo likuyoba utuyilo utwakukindanakindana utubibi utu twisakubombiwagha fiyo, kangi twisakubombiwagha panongwa yakwighana kwa bandu. Likuyoba ukuti abandu “bisakwiyighanagha bene,” “basitakwighomola,” na ba ‘kufighana ifya kughuhobosya umbili ukukinda ukungana Kyala.’—2 Timoti 3:2-4.

 Ubusololi ubu bukufwanisiwa naloli, abandu amasiku agha biyighanile bene, bikulonda si syabo syene, bikubomba isi sikuya pakubapangisya ukuti bipilikeghe kanunu fiyo ni findu ifingi. Utuyilo utu tuli paliposa bo muno ubusololi bwayobile ngani, abandu bingi amasiku agha bikwiyighana bene kangi isi lino sifikile pabubibi fiyo. Abandu bingi amasiku agha “basitakusighana inunu,” kangi bakaya nindumbula yakutughana utuyilo utununu. Abandu bingi “batikundaghisya,” kangi batikulonda ukunangisya ukundaghisya pa isi abangi bikubabombela.—2 Timoti 3:2, 3.

 Ukwiyighana kukupangisya ukuti umundu aye nutuyilo utungi utu Ibaibolo lyayobile ngani ukuti twisakuya paliposa amasiku agha:

•   Ubupafu. Abandu bingi “basighanile indalama.” Abene bikusubila ukuti indalama pamo katundu uyu bali nawe ikunangisya ukuti ifindu fikubendela kanunu.—2 Timoti 3:2.

•   Ukwitufya. Abandu bingi “balwitufyo, bamatingo,” kangi “balwiyumbiko.” (2 Timoti 3:2, 4) Abandu bo aba bikwibona kangi bikwitufya panongwa ya maluso agha bali nagho pamo ikyuma iki bali nakyo.

•   Aba bikubayobela abangi imbibi. “Ukunyoza” kangi “ukubayobela abangi imbibi” kuli paliposa amasiku agha. (2 Timoti 3:2, 3) Amasyu agha ghabaghile ukuyoba isya bandu aba bikubanyoza abangi pamo Kyala pamo aba bikubatungulupila abangi.

•   Balukani. Abandu bingi “basitabwikemo,” “basitalwitikano,” “bapefyabinabo,” kangi “basitakwilingania.” (2 Timoti 3:2-4) Abandu bo aba linga yumo abonangile batikulonda ukuyobesania na bangi, batikulonda ukukolelana na banine kangi batikulonda ukufwanisya isi bafingile.

•   Bafyongo. Abandu bingi amasiku agha “bakali,” kangi batikukabila ukukalala, isi sikupangisya ukuti babombeghe ifindu ifyankhaza.—2 Timoti 3:3.

•   Ukuleka ukupilikila indaghilo. Yesu ayobile ngani isya “kubala ubwilangomelesyo” m’masiku agha. (Matai 24:12) Kangi Umwene ayobile ukuti kwisakuya “ubwite nu kutapukana.”—Luka 21:9.

•   Basitakuya nu lughano mumbumba. Bosa aba “batikubapilikila abapapi” kangi “basitabumanyani kumbumba yabo” bapangisye ukuti aba bali mbweghi baghaneghe ni ndamyo, kangi ukuti babombeghe ifindu fyankaza.—2 Timoti 3:2, 3.

•   Ukwiputa kwa butungulu. Abandu bingi “bikufwana bikuntila Kyala.” (2 Timoti 3:5) Loli m’malo mwa kubomba ubwighane bwa Kyala, abene bikubakonga abalongosi ba matchalichi aba bikuyoba isi abene bikulonda.—2 Timoti 4:3, 4.

 Panongwa yakuti abandu bingi biyighanile fiyo, abandu bingi bikutamiwa naminong’ono kangi bali nikitima. (Undumbilili 7:7) Mwakifwanikisyo, abandu bamo aba basighanile fiyo indalama, bikubasyoba abangi ukuti babalyele amasuku pa ntu. Abandu aba bakaya nulughano ku ba mumbumba yabo, babaghile ukubapangisya aba mumbumba yabo ukuwa amaka pamo ukwighogha. Kangi abandu aba bikubabika abangi mu ndamyo pamo batikuya basubiliwa, bikubapangisya abangi ukuti batamiweghe fiyo kangi babaghile ukutamiwa kwa kabalilo akatali.

 Ibaibolo likulingania inongwa iyi abandu bikukindilila ukuya babibi:

•   Ulughano lwa bandu bingi kwa Kyala na kubapalamani babo lukutalalila (Matai 24:12) Panongwa ya isi, ukwiyighana kukongelela.

•   Setano Umohesi asopiwe pa kisu kyapasi ukufuma kumwanya. (Ubusetuli 12:9, 12) Ukufuma itolo pakabalilo kala, ifyakubombiwa fyake ifibibi fikupangisya ukuti abandu pa kisu kyosa baye bakwiyighana fiyo.—1 Yohani 5:19.

 Amasyu gha Kyala ghikuyoba ukuti: ‘abandu bo bababa ubasindeghe inyuma.’ (2 Timoti 3:5). Isi sitikusanusya ukuti twipaghuleghe. M’malo mwake, tutikulondiwa ukuya pabumanyani na bandu aba biyighanile kangi aba bikukana ukukonga ifundo sya Kyala.—Yakobu 4:4.

 Hayi. Ibaibolo lyayobile ngani ukuti abandu bamo bisa “kulila panongwa ya mbela kinyanyasi syosa isi sikubombiwa mumo.” (Ezekieli 9:4) Abandu aba bisakukana ukuya bakwiyighana, abene bisakulongosiwa ni fundo sya Kyala pabumi bwabo. Isi bikuyoba na isi bikubomba sisakukindana fiyo na bandu abangi bosa. (Malaki 3:16, 18) Mwakifwanikisyo, abene bisakughelaghela ukuya palutengano na bandu bosa kangi bisakukana ukwingilila mfyabwite ni findu ifya fyongo.—Mika 4:3.

 Hayi. Bakaya bandu bosa aba bisakuya nu tuyilo utubibi fiyo. M’malo mwake, mwalululu Kyala ikuya pakubasosyapo abandu bosa aba batikumpilikila. (Salimo 37:38) Umwene ikuya pakutwala “ikisu ikipya” iki kikwimila abandu abalwiyisyo aba bisakwikala pa kisu apa mwalutengano kwa bwila na bwila. (2 Peteri 3:13; Salimo 37:11, 29) Ulusubilo ulu kakaya kapango itolo, sisakubombiwa naloli. Tukuyoba isi, panongwa yakuti lino Ibaibolo likubatula abandu ukuchenja ubumi bwabo ukuti bukolelane na isi Kyala ikulonda.—Baefesi 4:23, 24.