Amo tepaleuia: Pampa tipinaua uelis amo tijchiuas se keski tlamantli, kej tikinpias mouampoyouaj uan amo tijchiuas tlen mitspaktia.

 Tepaleuia: Pampa uelis mitspaleuis kuali ximonejneuili kema tijnekis tikamanaltis, kuali titlajtlachias uan kuali titetlakakilis yeka amo kenijki tlaj kemantika tipinaua.

 Xikilnamikto: Maske tipinaua amo kiijtosneki nochipa kiampa tielis; uelis timonauatis. ¿Tijneki tijmatis kenijkatsa tijchiuas? Ni tlamachtili mitspaleuis.

•  ¿Tlake tijmakasi?

•  Tlen uelis tijchiuas

•  Tlen kiijtouaj sekinok telpokamej

 Kema tipinaua uelis tlauel timajmauis tikamanaltis iuaya se akajya. Uelis tijyolmatis tiitstok moselti uan timouejkatlalijtok, kejuak tiitstoskia ipan se cuarto kampa tlauel tsintlayoua. Nochi kimakasij kampa tlauel tsintlayoua. Pero tlaj tijmatis tlake tijmakasi mitspaleuis tikitas kenke timajmaui. Ximoiljui ipan ni eyi neskayotl.

•   1) Tlen kichiua ximajmaui: “Amo nijmati tlake nikijtos”.

   Tlen nelia pano: Kemantika maseualmej kiilnamikij tlen tijchiua uan amo tlen tikijtoua. Uelis amo timajmauis tlaj kuali tikintlakakilis uan tlaj mitstekipachos tlen mitsiljuiaj.

   Ximoiljui ni: ¿Iuaya ajkia tijneki timouampojchiuas: katli kuali tetlakakilia o katli nochipa kamanalti?

•   2) Tlen kichiua ximajmaui: “Maseualmej moiljuisej san nikinkuesiuiltia”.

   Tlen nelia pano: Maseualmej mitsixmatisej tlaj tipinaua o amo. Amo xijnexti timajmaui kiampa maseualmej kiijtosej kuajkuali tlamantli tlen ta uan tlauel mitspaleuis tlaj tijnextis kenijkatsa tieli.

   Ximoiljui ni: Timoiljuia maseualmej san mitstlaijiljuiaj, pero amo timoiljuijtok ¿uelis san ta tikintlaijiljuia?

•   3) Tlen kichiua ximajmaui: “Tlaj nikijtos se tlamantli tlen amo ijki nimopinaualtis”.

   Tlen nelia pano: Nochi techpano ni tlamantli. Maske kemantika timokuapolos nopa mitspaleuis tijnextis amo nochipa tijchiua tlen xitlauak.

   Ximoiljui ni: ¿Mitspaktia timouikas ininuaya katli kimatij kemantika mokuapolouaj?

 ¿Tijmajtoya ni? Miakej maseualmej moiljuiaj amo pinauaj pampa nochipa tetlajkuiljuiliaj ipan teléfono, kiampa moiljuiaj kinpiaj miakej ininuampoyouaj. Pero tijpantis se kuali mouampo kema tiitstos iuaya uan timonojnotsas. Nopa psicóloga Sherry Turkle katli kuali momachtijtok kitekiuis tecnología kiijtoua: “Kema timokamanaljuia iuaya se akajya uan tijtlachilia iixayak nopa kichiua nojua kuali ximoixmatikaj”. a

•   Amo xikita tlen sekinok kichiuaj ika tlen tijchiua. Amo kiijtosneki nochipa san tiixuetskatos. Kiijtosneki amo tlauel xipinaua. Kiampa uelis tikinpias kuali mouampoyouaj uan tiyolpakis.

   “Amo moneki tlauel uejkauas tikamanaltitos o san tijnekis ma mitstlachilikaj. San xitetlajpalo uan xitlatsintoka se keski tlamantli” (Alicia).

   Texto tlen mitspaleuis: “Sejse ma kitlachili tlen kichiua, uan kiampa uelis yolpakis ika tlen ya kichijtok uan amo san motekitlachilijtos ika sekinok” (Gálatas 6:4).

•   Xitlajtlachia uan xijyeko. Xikita tlake kichiua katli kipaktia mouikas ininuaya sekinok uan kenijkatsa kamanalti. ¿Tlake kinpaleuia? ¿Tlake amo kinpaleuia? Ika tlen kichijkej ¿ta tlake mitspaktiskia nojkia tijchiuas?

   “Miakej amo ouij kimatij mouampojchiuasej ininuaya sekinok. Xikita tlake kichiuaj uan tlake kiijtouaj kema kiixmatij se akajya. Xitlajtlachia uan xijyeko” (Aarón).

   Texto tlen mitspaleuis: “Moneki se tlamantli tepostli para kitentis seyok tepostli. Uan se tlakatl tlalnamiki kipaleuia iuampo más motlalnamiktis” (Proverbios 27:17).

•   Xijchiua tlajtlanili. Maseualmej kinpaktia kiijtosej tlen moiljuiaj. Tijchiuas tlajtlanili mitspaleuis timonojnotsas ininuaya sekinok uan amo san mosentlalisej ipan ta.

   “Tlaj ya tijmati tlake tikijtos amo tlauel timajmauis. Tlaj tias ipan se iljuitl, achtoui ximoiljui tlake tikamanaltis o tlake uelis titlatsintokas. Kiampa kema tikinixmatis sekinok amo tlauel timajmauis” (Alana).

   Texto tlen mitspaleuis: “Ximotekipachojtokaj ika sekinok uan amo san ximoiljuijtokaj ipan tlen inmojuantij inmechpaleuis” (Filipenses 2:4).