Dzifakazi dza Jehovha dzi na ni longoloko nya gihevbulo nya Bhibhiliya gi hlamulago siwudziso nya singi, gupata ni esi:

•   Khu mani Nungungulu?

•   Ina Nungungulu a ngu khathala kheni kamo?

•   Nyi nga gira kharini gasi gu wugadzi wangu wu simama gu tsakisa?

•   Nyi nga li mana hayi litsako guvbanyani gwangu?

Vbavbatshi vbavba u na mana mihlamulo nya siwudziso si oloveyago gu girwa maningano ni longoloko wathu nya gihevbulo nya Bhibhiliya.

Gyo girwa kharini gihevbulo gegi? Ho hevbula khu “Nungungulu” mwendro silo si yelanago ni “wugadzi” hi bwe hi hevbula mavhesi nya Bhibhiliya nyo hambanehambane. Khu kotani nya olu hi fananisago mavhesi yoyo hi lerigo, hi ngu kodza gu wona esi Bhibhiliya yatshavbo yi si ganeyago khu gilo gyogyo, khu ndziya yoyo ho diga Bhibhiliya yi dzi tshamuseya yabune.

Ha gu thumisa libhuku Ginani hi hevbudzwago khu Bhibhiliya? gasi gu hi phasa gu hevbudza Bhibhiliya. Vbakari nya silo nya singi, libhuku leli li ngu ganeya khu Nungungulu, Jesu, ni esi si na giregago mindru wa tshigu.

Kharini nyi livbago gasi gu gimbidzisedwa gihevbulo nya Bhibhiliya? Gihevbulo gegi mahala, nigu khu livbiswi gilo gasi gu mana mabhuku hi hevbulago khayo.

Tepo muni gi vbedzago gihevbulo gegi? Vathu nya vangi va ngu dzi vegeya ora mweyo mwendro guvbindra gasi va hevbula Bhibhiliya ni ethu. Ganiolu khuwe u hathago gu khuwe wo vbweta gu hevbula kala hayi. Ethu hi na dzi pwananisa ni giemo gyago.

Ginani nyi na hlamudwago nyo lomba gihevbulo nya Bhibhiliya? Wo lomba gihevbulo nya Bhibhiliya, u na endredwa khu Fakazi ya Jehovha khu tepo ni wulanga u wu wonago na wuri wadi gwago. Yi na thumisa dzimeneti nya dzidugwana gasi gu gu yeyedza edzi hi girago khidzo gihevbulo nya Bhibhiliya. Wa gu gi tsakeya, u nga simama gu hevbula.

Nyo dzumeya gu hevbula Bhibhiliya so thula gu khiso gu vbwetega nyi khala Fakazi ya Jehovha? Ahihi. Dzifakazi dza Jehovha dzi ngu si gola gu hevbula Bhibhiliya ni vathu, ganiolu kha hi gurumedzi muthu gu khala Fakazi ya Jehovha. Ha gu tshamuseya esi Bhibhiliya yi si ganeyago na hi gu dundruga gu khethu muthu ni muthu tshulegide gu dzi hatheya esi a na si khodwago. — 1 Pedro 3:15.