Basupi ba ga Jehofa ba thusa batho go ithuta Baebele. Thulaganyo ya rona ya go ithuta Baebele e ka go thusa go:

•   Itumelela botshelo

•   Nna tsala ya Modimo

•   Ithuta se Baebele e se buang ka bokamoso

Mo tsebeng eno:

•  Thuto ya Baebele e tshwarwa jang?

•  A thuto ya Baebele e a duelelwa?

•  Thuto eo e tsaya lobaka lo lo kae?

•  Ke simolola jang?

•  A nka e leka makgetlo a se kae fela go bona gore a ke tla e itumelela?

•  Fa ke amogela thuto ya Baebele, a ke patelesega go nna Mosupi wa ga Jehofa?

•  A nka dirisa Baebele ya me?

•  A nka laletsa ba bangwe go nna karolo ya thuto eo?

•  Fa e le gore nkile ka ithuta Baebele le Basupi ba ga Jehofa mo nakong e e fetileng, a nka boa gape ke ithuta le bone?

•  A nka kgona go ithuta Baebele ke le nosi?

 Mongwe o tla go thusa go ithuta Baebele kgato ka kgato. Buka ya Itumelele go Tshelela Ruri! e tla go thusa go itse se Baebele e se rutang le gore e ka go thusa jang. Go ithuta mo go oketsegileng lebelela bidio eno.

 Nnyaa. Basupi ba ga Jehofa ba reetsa kaelo e Jesu a e neileng barutwa ba gagwe: “Lo ne lwa amogela mahala, nayang mahala.” (Mathaio 10:8) Mo godimo ga moo ga o tlhoke go duelela kgatiso epe e o tla e dirisang, seo se akaretsa Baebele le buka ya Itumelele go Tshelela Ruri!

 Buka ya Itumelele go Tshelela Ruri! e na le dithuto di le 60. Go tswa mo go wena gore o batla go bala dikgaolo di le kae ka beke mme gone bangwe ba tlhopha go bala e le nngwe kgotsa go feta.

1.  1. Tlatsa foromo mo websaeteng. Re tla dirisa tshedimosetso ya gago e o re neileng yone go go golaganya le mongwe wa Basupi ba ga Jehofa mme ga re na go e dirisetsa sepe gape.

2.  2. Motho yo o tla ithutang Baebele le ene o tla ikgolaganya le wena. Motho yoo o tla go tlhalosetsa gore thuto ya Baebele e tshwarwa jang gape o tla araba dipotso tse o nang le tsone.

3.  3. Lo tla dira dithulaganyo tsa go ithutang mmogo. Motho yo o ithutang le ene a ka go etela kgotsa lo ka dirisa founu, video call makwalo kgotsa email. Gantsi thuto ya Baebele e tsaya ura fela, le fa go ntse jalo, go ikaegile ka wena gore o batla gore e tseye lobaka lo lo kae.

 Ee. Go dira jalo, tlatsa foromo e e mo websaeteng. Fa mongwe a ikgolaganya le wena, mmolelele gore pele lo ka tswelela ka thuto o ka rata go bala makgetlo a se kae fela go bona gore a o ka itumelela go ithuta Baebele. Motho yoo o tla dirisa boroutšhara jwa Itumelele go Tshelela Ruri! jo bo nang le dithuto di le tharo fela, go go thusa go bona gore a o ka itumelela go tswelela ka thuto.

 Nnyaa. Re rata go ithuta Baebele le batho mme ga re pateletse ope go nna Mosupi wa ga Jehofa. Go na le moo, re thusa batho go itse se Baebele e se rutang mme gone re tlotla tshwanelo ya mongwe le mongwe ya go itlhopela se a se dumelang.​—1 Petere 3:15.

 Ee, o ka dirisa thanolo nngwe le nngwe ya Baebele e o ka ratang go e dirisa. Le fa gone re itumelela go dirisa Baebele ya Thanolo ya Lefatshe le Lesha ya Dikwalo Tse di Boitshepo, e e nepagetseng e bile e tlhaloganyesega motlhofo, re a itse gore batho ba itumelela go dirisa thanolo e ba e tlwaetseng.

 Ee. O ka laletsa balelapa kgotsa ditsala.

 Ee. Tota e bile, o ka itumelela go ithuta buka e re e dirisang gone jaanong ka gonne e tokafaditswe go thusa batho go lebana le maemo a gompieno. Go farologana le dibuka tse re neng re di dirisa pele go ithuta Baebele le batho, buka eno e na le ditshwantsho le dibidio mme gape e tla go thusa go ntsha maikutlo a gago.

 Ee. Le fa gone go tswela mosola thata go ithuta le mongwe, bangwe ba itlhophela go ithuta ba le bosi kwa tshimologong. Go na le Didirisiwa Tsa go Ithuta Baebele mo websaeteng ya rona tse o ka di dirisang fa o ntse o ithuta Baebele. Dingwe tsa didirisiwa tse o ka di itumelelang:

•   Dibidio Tsa go Ithuta Baebele. Dibidio tseno tse dikhutshwane di tlhalosa dithuto tse di botlhokwa tsa Baebele.

•   Dikarabo Tsa Dipotso Tsa Baebele. Ditlhogo tseno di araba dipotso tse di farologaneng ka Baebele.

•   Ditemana Tsa Baebele di a Tlhalosiwa. Bona se makwalo a a itsegeng thata a Baebele a se kayang.