Cipanga cetu ca ku ambulula tue ku ci fuetela ku hitila mu milambu ya vuana i ve ku hana Vakaleho va Yehova. Ka tue ku hitisa vihele ku viuano vietu mu ku lomba vimbongo ku vantu ni ku fuetesa vakua vulombelo vuetu lisimu. Vunoni ku vihela vi tue ku likunguluila mue ku kala vikasa via ku haka vuana, kaha nga umo na zange ku hana vuana vueni citava a hake mu cikasa caco. Vuana vuose vu ve ku hana vue ku pua via vingi.

Vusunga vukuavo tue ku pangesa vuino vimbongo muomu ka tue ku fueta vantuamena. Cikuavo naua vakaleho va Yehova ka ve ku va fueta mu ku ya ku ndzivo na ndzivo, kaha vihela vietu via ku lemesa ka via puile via ndando ya kama.

Vuana vuose vu ve ku hana vamuanetu ve ku vu tuma ku vimbetele via Vakaleho va Yehova linga vu ka kuase vamuanetu ve ku hita mu viyovo via mavu, ku kuasa vamisonaliu, miluua, ku tungisa vindzivo vietu via ku lemesela, ku tuhula viMbimbiliya na mikanda ya longesa via Mbimbiliya.

Nkala muntu ikeye ivene ue ku hangula nga na zange ku hana vuana mu ku kuasa ku tuala ku lutue cipanga cetu ca ku ambulula mu mavu ose. Kaha cikungulukilo ku cikungulukilo ce ku hana mizimbu ya vimbongo vi ve ku lambuila vamuanetu.