Dai nakikiiba sa giyera an mga Saksi ni Jehova huli sa minasunod na mga dahilan:

1.   Pagsunod sa Diyos. Sinasabi kan Bibliya na “pupulpugon [kan mga lingkod nin Diyos] an saindang mga espada tanganing magin mga tarom nin arado” saka dai na man sinda ‘maadal pa nin pakikigiyera.’—Isaias 2:4.

2.   Pagsunod ki Jesus. Sinabihan ni Jesus si apostol Pedro: “Ibalik mo sa sarungan an saimong espada, huli ta an gabos na naggagamit nin espada magagadan sa espada.” (Mateo 26:52) Kaya ipinahiling ni Jesus na an saiyang mga parasunod dai magamit nin mga armas na panggiyera.

    Sinusunod kan mga disipulo ni Jesus an pagbuot niya na ‘dai magin kabtang kan kinaban’ paagi sa marigon na paninindugan na magin neutral pag-abot sa mga isyu sa pulitika. (Juan 17:16) Dai sinda nagpoprotesta laban sa mga aktibidad sa militar o inuulang idtong mga nagdesisyon na maglaog sa serbisyo militar.

3.   Pagkamuot sa kapwa. Ipinagbuot ni Jesus sa saiyang mga disipulo na ‘kamutan an lambang saro.’ (Juan 13:34, 35) Sa paaging iyan, nagigin parte sinda nin sarong internasyonal na kasararuan nin magturugang na diyan mayo na lamang sa sainda an makikigiyera laban sa saiyang tugang.—1 Juan 3:10-12.

4.   Halimbawa kan inot na mga Kristiyano. An Encyclopedia of Religion and War nagsabi: “An inot na mga parasunod ni Jesus nagsayumang makiiba sa giyera asin sa serbisyo militar,” na para sainda an mga gibong iyan “dai kauyon kan tukdo ni Jesus na magkaminuruutan asin kan pagbuot na kamutan an mga kaiwal.” May arog man kaiyan na sinabi an teologong Aleman na si Peter Meinhold manungod sa inot na mga disipulong idto ni Jesus: “An pagigin Kristiyano saka pagigin suldados bako nanggad na magkauyon.”

 An mga Saksi ni Jehova kapaki-pakinabang na mga miyembro kan komunidad asin bako sindang peligro sa seguridad kan nasyon na iniistaran ninda. Iginagalang mi an awtoridad kan gobyerno, kauyon kan mga pagbuot na ini sa Bibliya:

•   “Magpasakop . . . sa haralangkaw na awtoridad.”—Roma 13:1.

•   “Kun siring, itao nindo ki Cesar an mga bagay na ki Cesar, pero sa Diyos an mga bagay na sa Diyos.”—Mateo 22:21.

 Kaya nagsusunod kami sa ley, nagbabayad nin buhis, asin nakikikooperar sa mga paghihinguwa kan gobyerno na maitao an pangangaipo kan mga tawo.