Liphetolelo tse ling tsa Bibele li sebelisa lentsoe “lihele” bakeng sa lentsoe la Seheberu “Sheole” le lentsoe la Segerike le tšoanang le lona, e leng “Hadese,” tseo ka bobeli li bolelang lebitla le tloaelehileng. (Pesaleme ea 16:10; Liketso 2:27) Batho ba bangata ba lumela mollong oa lihele, joalokaha ho bontšitsoe setšoantšong sa bolumeli se tsamaisanang le sehlooho sena. Leha ho le joalo, Bibele e ruta se fapaneng le seo.

1. Batho ba liheleng ha ba tsebe letho kahoo ha ba utloe bohloko. “Ha ho mosebetsi kapa morero kapa tsebo kapa bohlale Sheole.”​—Moeklesia 9:10.

2. Batho ba lokileng ba ea liheleng. Banna ba tšepahalang, e leng Jakobo le Jobo ba ne ba lebeletse ho ea moo.​—Genese 37:35; Jobo 14:13.

3. Kotlo ea sebe ke lefu eseng ho hlokofatsoa liheleng. “Ea shoeleng o hlakotsoe molato oa sebe sa hae.”​—Baroma 6:7.

4. Tlhokofatso ea ka ho sa feleng e ne e tla ba khahlanong le toka ea Molimo. (Deuteronoma 32:4) Ha motho oa pele, e leng Adama a etsa sebe, Molimo o ile a mo bolella hore kotlo ea hae e ne e tla ba lefu a re: “U lerōle ’me u tla khutlela lerōleng.” (Genese 3:​19) Molimo o ne a tla be a bua leshano ha a ne a ka isa Adama mollong oa lihele.

5. Molimo ha a e nahane le ho e nahana taba ea ho hlokofatsa batho liheleng ka ho sa feleng. Taba ea hore o tla hlokofatsa batho liheleng e hanana le thuto ea Bibele ea hore “Molimo ke lerato.”​—1 Johanne 4:8; Jeremia 7:31.