Dithanolo dingwe tsa Baebele tse di jaaka King James Version di dirisa lefoko “dihele” mo ditemaneng dingwe. (Pesalema 16:10; Ditiro 2:27 a) Fela jaaka setshwantsho sa bodumedi se o se bonang mo setlhogong seno, batho ba le bantsi ba dumela gore dihele ke lefelo lengwe le le nang le molelo o o tukelang ruri kwa batho ba ba bosula ba otlhaiwang gone. A mme seo ke se Baebele e se rutang?

Se se mo setlhogong seno:

•  A dihele ke lefelo lengwe le batho ba otlhaiwang kwa go lone ka bosakhutleng?

•  Setshwantsho sa ga Jesu sa monna wa mohumi le Lasaro se kaya eng?

•  A dihele di raya gore motho ga e sa tlhole e le tsala ya Modimo?

•  A go na le mongwe yo o kileng a gololwa kwa diheleng?

•  Ditemana tsa Baebele tse di buang ka dihele kgotsa Lebitla

•  Puo ya ntlha ya mafoko a Baebele

•  Thuto ya molelo wa dihele

 Nnyaa. Mafoko a ntlha a a ranotsweng go tswa mo dithanolong tsa Baebele tsa bogologolo e le “dihele” (Ka Sehebera, “Sheole”; Ka Segerika, “Hadese”) a raya “Lebitla.” Baebele e bontsha gore batho ba ba mo “Lebitleng” ga ba tshele.

•   Baswi ga ba utlwe sepe e bile ga ba utlwe botlhoko. “Ga go na tiro, kakanyo, botlhale, kgotsa kitso kwa diheleng.” (Moreri 9:10, Douay-Rheims Version) Ga go na batho ba ba goang ba le mo kutlobotlhokong kwa diheleng. Go na le moo Baebele e a re: “E kete batho ba ba bosula ba ka tlhabiwa ke ditlhong, e kete ba ka didimadiwa mo lebitleng [diheleng, Douay-Rheims].”​—Pesalema 31:17; (30:18, Douay-Rheims); Pesalema 115:17.

•   Modimo o atlholetse batho loso ka ntlha ya boleo, e seng go ba bogisa mo diheleng. Modimo o ile a bolelela monna wa ntlha e bong Adame gore fa a sa ikobele melao ya gagwe o tla swa. (Genesise 2:17) Ga a ka a bua sepe ka go fisiwa ga batho mo diheleng. Morago ga gore Adame a leofe, Modimo o ile a mo atlhola ka go re: “O tla boela mo loroleng ka gonne o lorole.” (Genesise 3:19) O ne a ka se tlhole a nna teng. Fa e le gore Modimo o ne a tla isa Adame kwa diheleng, A ka bo a ile a tlhalosa jalo. Modimo ga a fetola katlholo ya go sa ikobele melao ya gagwe. Morago ga lobaka lo loleele Adame a sena go leofa, Modimo o ile a tlhotlheletsa mokwadi wa Baebele go kwala jaana: “Dituelo tsa boleo ke loso.” (Baroma 6:23) Ga go tlhokege katlholo e nngwe mo godimo ga eo ka gonne, “yo o suleng o itshwaretswe boleo jwa gagwe.”​—Baroma 6:7.

•   Modimo o tlhoile thuto ya gore batho ba tlhokofadiwa kwa diheleng. (Jeremia 32:35) Kgang eno ga e dumalane le se Baebele e se rutang gore “Modimo ke lorato.” (1 Johane 4:8) Modimo o batla gore re mo obamele ka go bo re mo rata, e seng ka gonne re tshaba gore re tla bogisiwa kwa diheleng.​—Mathaio 22:36-38

•   Batho ba ba siameng ba ile diheleng. Dibaebele tse di dirisang lefoko “dihele” di bontsha gore banna ba ba ikanyegang ba ba jaaka Jakobe le Jobe, ba ne ba tla ya diheleng morago ga gore ba swe. (Genesise 37:35; Jobe 14:13) Go bontshiwa gore fa Jesu Keresete a ne a sule, le ene o ne a le kwa diheleng. (Ditiro 2:31, 32) Seno se raya gore fa lefoko “dihele” le dirisiwa mo Baebeleng le kaya Lebitla. b

 Setshwantsho seno se ile sa dirisiwa ke Jesu mme se kwadilwe mo go Luke 16:19-31. Setori ke ditshwantsho tse di rutang ka boitshwaro le kafa Modimo a lebang dilo ka gone. Setori sa monna wa mohumi le Lasaro ga se pego ya mmatota e e diragatseng. (Mathaio 13:34) Go ithuta mo go oketsegileng ka setshwantsho seno, bona setlhogo se se reng “Who Were the Rich Man and Lazarus?”

 Nnyaa. Thuto ya gore baswi ba a itse gore ga e sa tlhole e le ditsala tsa Modimo, ga e tsamaisane le thuto ya Baebele e e rutang ka tlhamalalo gore baswi ga ba itse sepe gotlhelele.​—Pesalema 146:3, 4; Moreri 9:5.

 Ee. Baebele e bua ka batho ba le 9 ba ba neng ba ya Lebitleng (le le ranotsweng e le “dihele” mo Dibaebeleng tse dingwe) mme ba ne ba tsosiwa mo baswing. c Fa e le gore ba ne ba itse se se diragalang ka nako ya fa ba ne ba le kwa diheleng, ba ka bo ba ile ba bua ka se ba se boneng. Ga go na ope o o ileng a bua ka go bogisiwa mo diheleng kana sepe fela. Lebaka? Jaaka Baebele e ruta, ba ne ba sa utlwe sepe, jaaka e kete ba ne ba “robetse” boroko jo bo tseneletseng.​—Johane 11:11-14; 1 Bakorintha 15:3-6.