• E vakacava na wasoma ni nomu cudru?

  • vakavudua

  • so ga na gauna

  • veisiga

• Dau vakacava na ivakarau ni nomu cudru?

  • vakarauta

  • katakata

  • katakata sara

• O cei o dau cudruva?

  • itubutubu

  • tacimu

  • itokani

Ena yaga na ulutaga qo mo lewa vinaka kina nomu cudru! Raica mada eso na vuna e bibi kina mo lewai iko vinaka ni o vakacudrui.

Nomu bula. E kaya na Vosa Vakaibalebale 14:30: “Na yalovinaka e bulabula kina na yago.” E vakamacalataka na ivola Journal of Medicine and Life ni “rawa ni vakaleqa na uto na cudru.”

Nomu itokani. E kaya na iVolatabu: “Mo kua ni veitokani kei na tamata cudrucudru se veimaliwai vata kei na dua e cudru katakata.” (Vosa Vakaibalebale 22:24) Ke o dau cudrucudru, kua ni kurabui nira sega ni taleitaki iko e levu. E kaya e dua na goneyalewa o Jasmine: “Ke o sega ni lewa vinaka nomu cudru, ena sega ni dua na nomu itokani vinaka.”

Kemu irogorogo. E kaya o Ethan sa yabaki 17: “Ke o sega ni lewa vinaka nomu cudru ena tukuni ni o dau cudrucudru.” Tarogi iko mada, ‘Na itovo cava au vinakata meu kilai kina, na yalomalua kei na veiyaloni, se yalototolo?’ E tukuna na iVolatabu: “O koya e berabera ni cudru e yalomatua vakalevu, ia o koya e yalototolo e vakaraitaka na nona lialia.”​—Vosa Vakaibalebale 14:⁠29.

Wilika na veitikinivolatabu kei na kena ivakamacala qai taroga na taro.

• Vosa Vakaibalebale 29:22: “O koya e dau cudru e vakatubuveiba, o koya e dau cudru katakata e levu na nona cala.”

  “Niu se itabagone, dau dredre meu lewa vinaka noqu cudru. Era va tale ga qori na wekai tamaqu. Keitou raica me ka ni kawa. Dau dredre me keitou lewa vinaka na neitou cudru!”​—Kerri.

  Au dau cudrucudru? Ke taleitaki na noqu itovo vinaka, e dodonu meu beitaka ni ka ni kawa na cudrucudru?

• Vosa Vakaibalebale 15:1: “Na vosa vakayalovinaka e vakaseavutaka na cudru, ia na vosa kaukaua e vakatubura na cudru.”

  “Na kena iwali mo lewa nomu cudru. Ke o bucina mo dau yalomalua qai donu nomu rai, o na lewa vinaka nomu cudru.”​—Daryl.

  Niu vakacudrui, cava e bibi kina na ka au tukuna?

• Vosa Vakaibalebale 26:20: “Ni sega na buka, e boko na yameyame.”

  “Niu vosa vakayalovinaka, e vakaseavutaka na nona cudru na noqu itokani qai rawa ni keirau veivosaki vinaka.”​—Jasmine.

  E rawa vakacava ni vakatubura na cudru na noqu vosa kei na noqu itovo?

• Vosa Vakaibalebale 22:3: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”

  “So na gauna au dau biubiu meu vakasamataka na ka e yaco, au na qai walia malua ni sa malumu noqu cudru.”​—Gary.

  Na gauna cava e vinaka mo biubiu kina ni drau veicudruvi kei na dua, ia me kua ni nanuma ni o lule?

• Jemesa 3:2: “Eda dau tarabe kece.”

  “E dodonu meda veivutunitaka noda cala da qai vuli kina. Ke da bale meda tucake tale da qai saga meda vakavinakataka tiko ga.”​—Kerri.

Vakatutu: Biuta nomu isausau. Saga mo kua sara ni cudru ena loma ni dua na gauna, rawa ni dua na vula. Vola qai raica nomu sasaga.