Mbahemenev mba Shin Itine ka annongo u kpuaa u Mbakristu mba vian ken jijingi mba ve tesen Mbashiada mba Yehova sha tar cii akaa a vea er yô. Tom ve ne ngu ker avegher ahar:

• Mba nengen sha tom u ngeren akaawan a Bibilo a i henen ken ityakeda man mbamkombo kua ken imakeranta i Mbashiada mba Yehova la.​—⁠Luka 12:42.

• Mba nengen sha tom u Mbashiada mba Yehova ve eren sha tar cii la. Ka ve ve tesen se er se er tom wase u pasen kwagh la ye. Shi mba nengen sha uiyua mba ior ve ne a ishima ve la.

Mbahemenev mba Shin Itine mba dondon gbenda u “mbaapostoli man mbatamen mba sha Yerusalem” eren kwagh sha ayange a mbaapostoli la. Lu ve ve tsuan akaa a hange hange sha ci u tiônnongo u Kristu jimin cii ye. (Aerenakaa 15:⁠2) Er nomsombaiorov mba jighjigh mbara lu ityough sha tiônnongo u Kristu ga nahan, kape Mbahemenev mba Shin Itine mban kpa ve lu ityough sha nongo wase ga je la. Mba keren kwaghwan u Bibilo, sha ci u ve fa er Yehova Aôndo a ver Yesu Kristu a lu Ityough ki tiônnongo yô.​—⁠1 Mbakorinte 11:3; Mbaefese 5:⁠23.

Hii ken uwer u Janawari 2018 la, mba ve lu Mbahemenev mba Shin Itine yô, ka Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, kua David Splane. Ve cii mba eren tom hen afishi a ase a shin itine, hen geri u Warwick, kpentar u New York, ken tar u Amerika.

Mbahemenev mba Shin Itine ver ukômatii ataratar sha u ve nengen sha avegher kposo kposo a tom wase, man hanmô ve ka nan lu ken kômatii môm ken ukômatii mban, shin i hemba nahan.

• Kômatii u Hemen Ukômatii Cii: Nengen sha kwagh u ajir a ôron shi aahe ka una er mape, shin a tôvon ior asev a ican sha ci u atesen a Bibilo a ve ne jighjigh a mi la yô, ve nenge sha mi. Shi mba nengen sha akaa a Mbashiada mba Yehova agen, a ka i gba u a er kwagh sha mi fele fele yô.

• Kômatii u Nengen sha Tsombor u Betel: Nengen sha akaa a mba ve lu tsombor u Betel yô.

• Kômatii u Gberen Ityakeda: Nengen sha tom u gberen ityakeda i pasen Bibilo shi samber a i, kua tom u maan ajiir a eren mbamkombo man afishi a geman kwagh man iyaagh ki branci.

• Kômatii u Nengen sha Tomshiren: Nengen sha tom wase u pasen “loho u dedoo u Tartor” la.​—⁠Mateu 24:14.

• Kômatii u Tesen: Tesen gbenda u ngeren akaawan a ken jijingi a se zuan a mi ken mbamkombo man ken imakeranta yase kua sha icer i ungwan a ungwa man uvidio la.

• Kômatii u Ngeren Kwagh: Tesen gbenda u ngeren akaawan a ken jijingi ken ityakeda man sha ijiir yase i sha Intanet la, shi nengen sha tom u geman kwagh.

Mbahemenev mba Shin Itine mba eren tom ve sha ukômatii mban tseegh ga, mba eren mkombo ve hanma kasua sha u nengen sha mbamgbe mba nongo wase. Ka vea nyôr mbamkombo mban yô, ve lam sha akaa a Ruamabera a kaa la, shi ve de ér icighan jijingi u Aôndo a hemen ve, nahan ve nôngo ve gba zwa môm sha akaa a ve tsough u eren la.​—⁠Aerenakaa 15:⁠25.

Mban ka Mbakristu mba i ne ve jighjigh, mba ve wasen ukômatii mba Mbahemenev mba Shin Itine tom yô. (1 Mbakorinte 4:⁠2) Vande mban a mfe ken tom u kômatii ve a nengen sha mi la shi mba eren u tsembelee, shi mba nyer mkombo u kômatii ve a eren hanma kasua la. Mbawasen tom mban mba tsuan kwagh u kômatii una er ga, kpa ka ve due a mhen u injaa shi ve wase kômatii u fan yiase i ma kwagh, shi ve er kwagh u kômatii a tsough la, shi ve nengen kwagh u a lu duen ker la, man er kwagh shon a lu zan la. Shi ashighe agen Mbahemenev mba Shin Itine ka ve tindi ve ve za sôr anmgbianev asev sha ajiir kposo kposo sha tar, shin i tsua ve ve za lam hen mbamkombo asev mbagenev, er mkombo u i eren hanma inyom kwa môm la nahan, kua iniongo i mba been makeranta u Giliedi.