Ẹjo, o vwo ọke vuọvuo ra cha vwọ ghwọrọ otọrakpọ na, vwẹ erhanre torhẹ yẹrẹ wene-e. Baibol na yonori nẹ Ọghẹnẹ ma otọrakpọ na rere ihwo vwọ dia bẹdẹ.

• “Ọvwata cha re ughwẹ rẹ otọ na, kọ dia enu rọye bẹdẹ.”​—Une Rẹ Ejiro 37:29.

• “[Ọghẹnẹ] vwẹ uchivwo rẹ otọ na vi, rere o vwo je kpogho bẹdẹ.”​—Une Rẹ Ejiro 104:5.

• “Akpọ na herọ bẹdẹ.”​—Aghwoghwo 1:4.

• “[Ọghẹnẹ] rọ mama otọ na rọ marọ (ọye muro vi), . . . o marọ ra vwọ dia.”​—Aizaya 45:18.

Ọghẹnẹ cha vwẹ uphẹn kẹ ihworakpọ nẹ ayen ghwọrọ otọrakpọ na kare kare vẹ inuhu, ofovwin yẹrẹ vwẹ idjerhe ọfa-a. Ukperẹ ọtiọyen, ọ cha “ghwọrọ ọghwọrọ rẹ akpọ na.” (Ẹvwọphia 11:18) Mavọ yen o che ruo wan?

Ọghẹnẹ cha vwẹ Uvie ọgbagba ro che sun nẹ odjuvwu rhe vwo wene usuon rẹ akpọ na, rọ sa vwẹrote otọrakpọ na-a. (Daniẹl 2:44; Matiu 6:9, 10) Jesu Kristi rọ dia Ọmọ rẹ Ọghẹnẹ yen che sun vwẹ Uvie yena. (Aizaya 9:6, 7) Ọke rẹ ọ vwọ hẹ otọrakpọ na, Jesu djerephia nẹ o vwo ẹgba vwẹ enu rẹ erọnvwọn rẹ Ọghẹnẹ mare. (Mak 4:35-41) Kerẹ Ovie rẹ Uvie rẹ Ọghẹnẹ, Jesu cha vwẹ ẹgba rọyen vwo sun akpọneje vẹ erọnvwọn rehẹ evun rọyen. Ọ cha rhoma rhuẹrẹ otọrakpọ na phiyọ re ọ dia kirobo rọhe pha vwẹ ogba rẹ Idẹn jovwo.​—Matiu 19:28; Luk 23:43.

Ẹjo, Baibol na ta ọtiọye-en. Ọke buebun, ihwo vwo iroro ọchọchọ yena kidie ayen vwo ẹruọ rẹ oborẹ 2 Pita 3:7 tare-e. Etiyin na tare nẹ, a “vwẹ odjuvwu vẹ akpọ rọ herọ vwẹ asakiephana vwọ kpahe enu kẹ erhanre.” Roro kpahen erọnvwọn ivẹ re vwẹ ukẹcha kẹ avwanre vwo vwo ẹruọ rẹ eta yena:

1. Vwevunrẹ Baibol na, oborẹ eta na “odjuvwu,” “akpọ,” vẹ “erhanre” mudiaphiyọ vrẹ ọvo. Kerẹ udje, Jẹnẹsis 11:1 tare: “Akpọ na ejobi kẹ ephẹrẹ ọvo.” Vwẹ etinẹ na, “akpọ” mudiaphiyọ ihworakpọ.

2. Obo ra tare tavwen e ki te 2 Pita 3:7 dje oborẹ odjuvwu, akpọ vẹ erharen re djunute vwẹ etinẹ na mudiaphiyọ. Awọ 5 vẹ 6 rionbọ kpo Oghwe rẹ ọke rẹ Noa. Vwẹ ọke yena, a ghwọrọ akpọ awanre, ẹkẹvuọvo otọrakpọ na ghwọrọre-e. Ukperẹ ọtiọyen, ihwo rẹ ozighi yẹrẹ “akpọ” yen Oghwe na ghwọre. (Jẹnẹsis 6:11) Ọ je ghwọrọ “odjuvwu”​—kọyen ihwo ri suẹn akpọ na. Ọtiọyena, ihwo umwemwu yen ghwọre, ọ dia otọrakpọ na-a. Noa vẹ orua rọyen sivwin rhọ wan oghwọrọ rẹ akpọ yena, ayen da dia otọrakpọ na rẹ Oghwe na vwo ku nu.​—Jẹnẹsis 8:15-18.

Kerẹ Oghwe na, oghwọrọ yẹrẹ “erhanre” re djunute vwẹ 2 Pita 3:7 cha ghwọrọ ihwo umwemwu, ọ dia otọrakpọ na-a. Ọghẹnẹ ve ive rẹ “idjuvwu ekpokpọ kugbe akpọ rẹ ọvwata cha dia.” (2 Pita 3:13) “Idjuvwu ekpokpọ” yẹrẹ isun kpokpọ, rọ dia Uvie rẹ Ọghẹnẹ, che sun “akpọ rẹ ọvwata” yẹrẹ ihwo kpokpọ. Vwẹ otọ rẹ Uvie na, akpọ na che hirhephiyọ iparadaisi.​—Ẹvwọphia 21:1-4.