Jaote Paulo nondiko kama: “Ka adwaro timo gima kare, to gima rach e ma ni koda.” (Jo-Rumi 7:21) Be gima kamano osegatimoreni? Ka en kamano, to sulani biro konyi ng’eyo gima inyalo timo mondo kik idonj e tem.

•  Gima onego ing’e

•  Gima inyalo timo

•  Gima mbeseni wacho

 Tembe kod aola mag mbese otudore. Mano e momiyo Muma wacho niya: “Osiepe maricho ketho timbe mabeyo.” (1 Jo-Korintho 15:33) Gige fwambo gi keyo kata mbeseni nyalo thung’i mondo itim gik maricho, kendo ginyalo miyo ichak timo gik ma ok owinjore mana nikech ‘ji mang’eny timogi.’​—Wuok 23:2.

 “Gombo ni jomamoko oheri kendo oyie kodi nyalo miyo itim gimoro amora ma gitimo.”​—Jeremy.

 Wach monego ipar: Ang’o momiyo inyalo donjo e tem mayot ka iketo pachi ahinya kuom yo ma jomamoko nenigo?​—Ngeche 29:25.

 Wach maduong’ en ma: Kik iwe aola ma wuok kuom mbeseni omi iwe luwo timbe makare.

 Bed gadier gi puonj miyiego. Ka ok in gadier gi puonj miyiego, jomoko nyalo chako chiki kaka gidwaro. En gima ber ka waluwo kaka Muma jiwowa niya: “Beduru gadier kuom weche duto; makreuru motegno gi gik mabeyo.” (1 Jo-Thesalonika 5:21) Kibedo gadier gi puonj miyiego, biro bedoni mayot makori kodgi kendo kwedo tem moro amora ma nyalo miyo kik iluw puonjgo.

 Wach monego ipar: Ang’o momiyo in gadier ni puonj makare mag Nyasaye nyalo keloni ber?

 “Asefwenyo ni sama amakora gi puonj ma ayiego, kendo temo matek mondo kik adonj e tem, mano miyo ji miya luor.”​—Kimberly.

 Ranyisi ma yudore e Muma: Daniel. E kinde ma Daniel ne en rawera, “ne ong’ado e chunye” ni obiro luwo chike Nyasaye.​—Daniel 1:8.

 Ng’e nyawo magi. Muma wuoyo e wi “gombo mag rowere” ma bedoga motegno ahinya sama rowere dongo. (2 Timotheo 2:22) Gombogo ok gin mana mag nindruok kende, to giriwo gombo mar dwaro ni ji oyie kodgi kendo gichik ngimagi kendgi giwegi.

 Wach monego ipar: Muma wacho ni “ng’ato ka ng’ato itemo ka iywaye kendo ka iyondhe gi gombone owuon.” (Jakobo 1:14) En tem mane ma nyalo miyo ilwar mayot?

 “Nonri iwuon mondo ing’e ni gin tembe mage minyalo donjoe mayot. Tim nonro mondo ing’e kaka inyalo nyagori gi tembego kendo indik piny paro minyalo tiyogo. Kitimo kamano, to biro bedoni mayot loyo tembego kiromo kodgi kendo.”​—Sylvia.

 Ranyisi ma yudore e Muma: Daudi. Kinde moko Daudi noyie mondo jomamoko orwake e timbe maricho, kendo noyie bende luwo gomboge maricho. Kata kamano, nopuonjore kuom richoge kendo notemo matek mondo orie yorene. Nolemo ka okwayo Jehova kama: “Chue chunya obed maler, kendo miya chuny manyien, kendo motegno.”​—Zaburi 51:10.

 Chik gomboni. Muma wacho kama: “Kik iyie mondo gima rach oloyi.” (Jo-Rumi 12:21) Mano nyiso ni ok ochuno ni nyaka idonj e tembe, inyalo yiero timo gima ber.

 Wach monego ipar: Ere kaka inyalo chiko ngimani kendo timo yiero maber sama ithung’i mondo itim gimoro marach?

 “Atemoga paro kaka abiro winjo e chunya ka adonjo e tem moro. Be abiro bedo mamor? Nyalo bedo kamano, to samoro mana kuom kinde machuok. Bang’ ka kinde moko osekalo, be abiro siko ka amor? Ooyo, abiro mana winjo marach moloyo. Be mano e gima adwaro adier? Ooyo!”​—Sophia.

 Ranyisi ma yudore e Muma: Paulo. Kata obedo ni nong’eyo ni en ng’at morem, Paulo ne kawoga okenge mowinjore mondo kik odonj e tem. Ne ondiko kama: “Asiko ka agoyo ringra kendo chike kaka misumba.”​—1 Jo-Korintho 9:27.

 Wach maduong’ en ma: In e mibiro yiero okang’ mibiro kawo sama iromo gi tembe.

 Ng’e ni tembe gin mana gik ma rumo. Melissa ma jahigni 20 wacho kama: “Gik mang’eny ma naneno ka tembe madongo ka ne an e skul, tinde gin gik matindo ahinya. Ka aparo wachno, abedoga gadier ni tembe ma aromogo sani biro kalo, kendo chieng’ moro ka ang’iyo chien abiro neno ni natimo maber ka ne akwedogi.”