Apóstol Pabloqa kayta qhelqarqa: “Cheqan kajta ruwayta munashajtiy, sajra kajlla noqapi kashan”, nispa (Romanos 7:21). ¿Maykʼajllapis qan pay jina sientekorqankichu? Ajina chayqa kay yachaqana mayta yanapasonqa tentasqa kaspa mana juchaman urmanaykipaj.

•  Kayta yachanayki tiyan

•  ¿Imatá ruwawaj mana juchaman urmanaykipaj?

•  Wakin jóvenes jinata ninku

 Runasqa astawan juchaman urmayta yachanku wajkuna chayta ruwanankupaj tanqasqankurayku. Bibliapuni kayta nin: “Mana allin runaswan pureyqa, allin ruwayman yachasqa kasqanchejta chinkachin”, nispa (1 Corintios 15:33). Ichapis wajkuna imatachus niwasqanchej, chayri telepi, radiopi, celularpi imaschus llojsimusqanqa, sonqonchejpi sajra imasta munapayanapaj tanqawasunman, chayri ashkha runas sajra kajta ruwasqankurayku paykuna jina ruwanapaj tanqasqa kasunman (Éxodo 23:2).

 Jeremy nin: “Tukuypis wajkuna amigosninkuta jina qhawanawanchejta munanchej. Jinapis allinpaj qhawanawanchejraykulla paykuna jina ruwayta qallarisunman”, nispa.

 Kaypi tʼukuriy: Imatachus wajkuna qanmanta yuyanankumanta astawan llakikunki chay, ¿ima tentacionmantapis ayqeyta atillankichu? (Proverbios 29:25).

 Ama qonqaychu: Ama saqeychu compañerosniyki sajra imasta ruwanaykipaj tanqasunankuta.

 Bibliaj yachachiykunasninmanta ama iskayrayaychu. Imapichus creesqaykimanta iskayrayanki chayqa, muñeconkuta jina imatapis ruwachisonqanku. Aswan sumaj Bibliaman jina ruwanayki, Bibliaqa kayta yuyaychawanchej: “Tukuy imata allinta qhawaykuychej. Imachus allin kajmantataj chʼipakuychej”, nispa (1 Tesalonicenses 5:21). Bibliaj yuyaychaykunasninta sumajta entiendenki chayqa allin kajmanta chʼipakunki, nisunman aswan facilta Bibliaj yuyaychaykunasninta kasukunki, nitaj ima juchamanpis urmankichu.

 Kaypi tʼukuriy: ¿Imaraykutaj creenki Diospa kamachiykunasninta kasukuy allinniykipaj kasqanta?

 Kimberly nin: “Cuentata qokorqani tentawajtinku mana juchaman urmajtiy, Bibliaman jinataj ruwajtiy, wajkuna astawan respetawasqankuta”, nispa.

 Danielmanta yachakuna. Biblia nisqanman jina payqa ‘sonqonpi nikorqa’ Diospa leyesninta kasukunanta, chayta nishajtin jovencitollarajsina karqa (Daniel 1:8).

 Imapichus urmanaykipaj jina kasqaykita reparakuy. Bibliaqa parlan “imastachus jóvenes munapayanku chaykunamanta”, joven kashaspataj astawan chay imasta munapayanku (2 Timoteo 2:22). Chay imastaj mana qhariwarmi jina puñuykuyta munapayayllachu, manachayqa kallanmantaj wajkunawan allinpaj qhawachikuyta munay, manaraj wakichisqa kashaspa sapallanchejmantaña imatapis ruwayta munay ima.

 Kaypi tʼukuriy: Bibliaqa nin: “Sapa ujta munaynillantaj pruebaman churan sonqonta aysaspa, suwaspataj”, nispa (Santiago 1:14). ¿Imasta munapayasqaykitaj astawan sonqoykita suwan sajra imasta ruwanaykipaj?

 Sylvia nin: “Imaschus astawan juchaman urmanaykipaj jina tanqasusqanta sutʼita reparakuy. Mana chay juchaspi urmanaykipajtaj investigay, ima yuyaychaykunachus yanapasunkiman chaykunatataj anotakuy. Ajinamanta juchaman tanqasqa kajtiyki yachankiña imatachus ruwanaykita mana chaykunaspi urmanaykipaj”, nispa.

 Davidmanta yachakuna. Biblia nisqanman jina payqa wakin kutis sajra imasta ruwarqa wajkuna tanqasqankurayku chayri munayninwan atipachikusqanrayku. Jinapis Davidqa pantasqasninmanta yachakorqa, allin kajta ruwananpajtaj kallpachakorqa. Orakuspataj Jehovaman kayta nerqa: “Diosníy, llimphu sonqota qoway. Allin sonqota qoway, kasukoj sonqota”, nispa (Salmo 51:10).

 Ama munayniykiwan atipachikuychu. Bibliaqa nin: “Ama sajra kajwan atipachikuychejchu”, nispa (Romanos 12:21). Chaywanqa nishan juchaman tanqasqa kaspa ayqeyta atisqaykita. Qan ajllayta atinki allin kajta ruwayta.

 Kaypi tʼukuriy: ¿Imatataj ruwawaj juchaman tanqasqa kashaspa allin kajta ruwanaykipaj?

 Sophia nin: “Piensariyta yachani ima tentacionpipis urmajtiy imaynachus sientekunaypi. Juchapi urmayman chayqa ichá uj ratolla kusirikuyman, jinapis sonqoyqa mayta juchachawanman. Ajinata piensareyqa yanapawan mana juchapi urmanaypaj”, nispa.

 Pablomanta yachakuna. Biblia nisqanman jina pay nerqa sonqonqa sajra imasta ruwananpaj tanqasqanta. Jinapis mana chaywan atipachikorqachu. Pabloqa nillarqataj: “Cuerpoyta ni imarayku munayninta ruwajta saqenichu, uj esclavota jinataj kamachini”, nispa (1 Corintios 9:27).

 Ama qonqaychu: Tentasqa kaspa juchamanta ayqenaykeqa qanmanta kashan.

 Yuyarikuy, juchaman tanqasqa kayqa uj tiempollapaj kasqanta. Melissaqa 20 watasniyoj, nintaj: “Jovencitallaraj kashajtiy wakin tentacionesta mana atipanaypaj jina qhawarqani. Jinapis kunanqa chaykunata facilta atipayta atillani”, nispa. Chantapis nillantaj: “Chaypi tʼukureyqa reparachiwan kunan ima juchasmanchus tanqasqa kasqayqa uj tiempollapaj kasqanta. Aswan qhepamanqa mayta kusikusaj mana juchaman urmasqaymanta”, nispa.