Ik bün geboore in Calgary, ain stad in dai gëgend fon Alberta, Canadá. As ik klain wäir, häwe mijn papa un mama sich uutananersreewe låte. Fon dun an sin wij, ik un mijn mama wåne gåe t’hoop mit mijn groosfåter un groosmuter, sai däire oos sër lijbe, ik däir mij sër fröölig forneeme. Ik kan mij gaud denke oiwer dës tijd woo ik nog klain wäir.

 Åwer mij leewend is gans aners woore as ik bloos 7 jår har. Mijn mama hät sich werer frijgt mit mijn papa un wij sin nam Estados Unidos hentrekt in dai Saint Louis stad, Missouri. Ik häw glijk ruuterfuune dat mij papa sër slecht wäir. Air mål as ik dai airste dag na huus kåme bün fon dai nijg schaul, mij papa hät ruuterkreege dat’s bullying mit mij måkt hare un dat ik nischt måkt har dåroiwer. Hai is soo slim woore un hät mij nog düler slåe as dai kiner ine schaul! Dårweegen, häw ik ane strijren anfånge mit dai andrer kiner as ik bloos 7 jår har.

 Mijn mama däir ümer arglig un traurig leewe dat mij papa ümer soo slecht wäir. Sai däire sich mëst ümer strijre un schimpe. As ik 11 jår har, ik häw anfånge ane gedränk un drogas benutse. Ik bün ümer slechte woore un däir oft upe ruu strijre. As ik al uutlërt har, ik wäir al air sër slecht mësch woore.

 Mit 18 jåre häw ik mij insreewe låte ine grup soldåte fon Estados Unidos. Dat ik dår lërt häw, bün ik nog slechte woore, ik häw lërt dai lüür doodmåke. Fijw jåre nåheer häw ik dës grup besijdlåte un häw anfånge psicologia lëre weegen ik wul in dai FBI (Poliss fon Estados Unidos) arbëre. Ik häw anfånge in Estados Unidos lëre, denåste bün ik nam Canadá hentrekt un dår häw ik wijrer lërt.

 In dat groot schaul, ik har al kain hofnung mër an dai lüür, mij wäir dat al gans oiwer. Lait soo as dai lüür soo sër afgünig wäire, ales upe wild åne wërd wäir un al dai problems upe wild küüne ni mër int raich bröcht ware. Ik küün ni mër glööwe dat dai lüür dai wild nog as beeter måke küüne.

 Dat mij leewend nischt upsich har, ik wäir anbuune ane drinkerig, drogas benutse un däir andenke bloos an gild un seks måke. Ik däir bloos rümer fijre un jërer dag har ik ain anerd fruug. Dat ik air soldåt wääst bün, ik har koråsch un däir ümer tau strijre. Ik däir maine dat ik uutsuike küün wat richtig urer forkërd wäir taum måken un wäir sër streng mit irgends air mësch wat ik maine däir dat ungerecht wäir mit dai andrer. Åwer gans aners, ik wäir kair gerecht mësch, ik däir dai wuut mij oiwerhand neeme låte.

 Aine dag, ik un air woo mit ik ümgang har, hare drogas benutst, wij wäire t’huus in ain stuuw uuner dai huus, un dår däire wij feel maconha trecht måke taum forkööpen. Un dun hät hai mij frågt: “Däist duu an God glööwe? Ik häw sägt: Wen God schuld hät oiwer al dai slechtigkët upe wild, ik wil nischt waite for em!” Dai anerd dag, as ik in dai nijg arbëd anfånge häw, air Tüüge fon Jehovaa wat dår arbëre däir hät mij frågt: “Wat mainst duu, hät God schuld oiwer al dai slechtigkët upe wild?” Dat hät mij bewunret weegen hai hät mij dat frågt aine dag nå dat ik dat sägt har, dårweegen häw ik wut mër dåroiwer waite. Doir 6 månate lang häwe wij oft fortelt un hai hät mij ine Bijbel weese dai antwoord taum wek frågen oiwer dat leewend.

 In dai tijd däir ik mit mijn bruud wåne, sai wul nischt waite oiwer dat wat ik lëre däir. Aine sündag häw ik eer sägt dat ik Jehovaas Tüügen nöögt har dat sai na oose huus kåme schule taum dai Bijbel mit oos lëre. Un måndags, as ik na huus kåme bün fone arbëd, wäir sai al weggåe un har ales wat ine huus wäir mitnåme. Ik bün ruutergåe un häw anfånge ane hüüle un dun häw ik dai airst mål Jehovaa anraupt un em sijn hülp birt. (Salmo 83:18)

 Twai dåg nå dat dit passijrt is, 2 Jehovaas Tüügen sin kåme taum mit mij dai airst mål dai Bijbel studijre. Nå dat sai wijrer gåe sin, ik häw dat bauk, Poderá Viver Para Sempre no Paraíso na Terra, wijrer leest un häw dat gans bauk doirleest in dat neemlig nacht. a Wat ik lërt häw oiwer Jehovaa un Jësus hät mij härts sër anstöt. Ik häw forståe dat Jehovaa lijb is un wen wij swårhët doirsete blijwt hai unruig dårmit. (Isaías 63:9) Wat mij dülst anstöt hät is waite dat groot lijb wat God oiwer mij hät un dai prais wat Jësus for mij betålt hät. (1 João 4:10) Ik häw forståe dat Jehovaa geduldig wäst is mit mij “weegen hai wil ni dat air uutrot wart.” (2 Pedro 3:9) Ik däir forneeme dat Jehovaa mij nöög an em ranerbringe däir. (João 6:44)

 In dai neemlig week häw ik anfånge nam forsamlunge hengåe. Jehovaas Tüügen häwe mij gaud upnåme grår soo as air fründ wat sai al sër lang ni mër saie hare. Woo sai mij behanelt häwe, hät weese dat sai genau Jësus nåmåkt häwe, lijkerst dat dat mij ängstlig lait, mit lang hår un oore ring. Dat wäir grår soo as wen ik in mij groosfåter un groosmuter sij huus wäir, åwer nog beeter!

 Ik wul Jehovaa gefale, dårweegen wen ik lëre däir fone Bijbel dat ik air forkërd dail måke däir, däir ik dat glijk aners måke. Ik häw mijn hår afsneere, häw anhule huurig daile måke, häw anhule drinke un drogas benutse un ik häw mij uk anstrengt taum aners måke dai moor woo ik denke däir. (1 Coríntios 6:9, 10 un 11:14) Ik däir ni luure taum måke dat wat richtig is. Ik däir denke: ‘Ik kan ni mër dës forkërde daile måke’. Dårmit glijk häw ik saie woo gaud wäir leewe soo as Jehovaa wil. Un bloos 6 månate nå as ik anfånge har dai Bijbel lëre in 29 juli fon 1989, häw ik mij tauwt soo as Tüüge fon Jehovaa.

 Dai Bijbel hät mij hulpe gans un gåe aners ware! Airste wen air mij wüütre däir, däir ik dai wuut mij oiwerhand neeme låte un däir strijre, åwer nuu dau ik mij anstrenge taum ‘im freere mit ale blijwe.’ (Romanos 12:18) Nuu, bün ik air anerd mësch, åwer ik häw ni dit alaine måkt kreege, Jehovaa hät mij hulpe doir em sij Woord, dai Bijbel un doir em sijn hailig gaist. (Gálatas 5:22, 23 un Hebreus 4:12)

 Nuu låt ik ni mër dai drogas, dai wuut un dai huurig wünsch mij oiwerhand neeme, ik dau mij anstrenge taum Jehovaa gefale un geew mij best tau em, soo as andrer helpe em kenelëre. Wek jåre nå dat ik mij tauwe låte häw, bün ik hentrekt nam anerd land taum mithelpe in wek stele woo nöög wäir mër lüür taum in dat preegarbëd mithelpe. Air dail wat mij groot fruir geewt hät in dai jåre lang, is wäst dat ik häw küüt feel lüür inlëre un saie dat dai Bijbel eer leewend beeter måkt hät. Anerd dail wat mij uk sër fröölig låte hät, is dat mijn mama Tüüge fon Jehovaa woore is un air dail wat eer hulpe hät dat måke is saie dat mij leewend beeter woore is.

 In 1999, in El Salvador stad, häw ik lërt in dai schaul wat nuu hit, Schaul for dai wat God sij Regirung Preege. Dës schaul hät mij inlërt foirgåe in dat preegarbëd, dai gemaind inlëre un dai uppasse. Nåheer, in dai selwig jår häw ik mij frijgt mit mijn hübsch fruug Eugenia un t’hoop däire wij oos mëst tijd benutse taum preege in Guatemala land.

 Airste, däir ik ni waite wat dat leewend upsich har, åwer nuu bün ik sër sër fröölig. Leewe nå dat wat dai Bijbel mij inlërt hät, hät mij hulpe frai blijwe fon dai huurig daile un ni mër låte dat dai wuut mij oiwerhand neeme däir un hät mij uk hulpe ain leewend häwe ful mit lijb un freere.