Soʼu 1950 ojuʼitüsü tü palajatkat Biblia kanüliakat Namüinjatü na Wayuu Kepieenakana Suluʼu tü Mma Jeketükat. Tü pütchi Ashajuushikat suluʼu griego. Soʼu 1961 kottuitpa süpüshuaʼa tü Biblia kanüliakat Namüinjatü na Wayuu Kepieenakana Suluʼu tü Mma Jeketükat. Wainma na wayuu aashajeʼerakana tia Bibliakat, alatüsü suulia 250 anüikii süshajünaka aluʼu, pansaasü maʼin tü sümakat, jama suʼuniʼinnüin süchiirua tü anüikii ashajünatüjütkalü aluʼu shia.

Na wawalayuu aneekünakana süpüla nashajüinjatüin tü Bibliakat, nayaawata aaʼu sütanalüinjatüin tü Bibliakat naaʼin na wayuu aashajeʼerakana shia. Anuu tü naaʼinrakat süpüla nountajatüin tia:

• Nashajüin tü Bibliakat suluʼu sünüikipala wayuu jee mapüleesat ayaawataa saaʼu. Jamüsüjaʼa suluʼu tü wane Biblia wayuunaikiruʼukat, ashajünüsü tü pütchikat «atüjeena jia aʼatapajaa», eepejeʼe naatale tia shikiiruʼu wayuu. Eesüjaʼa jülüjale saaʼin niain wanee wayuu kamaʼakai sünain aʼatapajaa wanee kasa, nnojotpejeʼe shiain aküjüneein achiki tia. Suluʼu Bibliakat tüü, naataitpa süshajia tia pütchikat süpüla pansaainjatüin shia. «Nnojoishi kashapajaaralin» müsü suluʼu (Galacia 5:22). Suluʼu tü wane Biblia wayuunaikiruʼukat «chi Shipayakai Wayuu» mapuʼusü nüchiki Jesucristo, eekajasaʼa suluʼu Bibliakat tüü «chi Süchonkai wayuu» müitpa süpüla pansaʼaleein shia (Mateo 8:20).

  Tü pütchi «waüyee» makat suluʼu hebreo sümaiwajatü jee griego sümaiwajatü, shia saashajaaka achiki süʼü süchon wunuʼulia. Achuntunapuʼusü tia süpüla saashajaanüin achiki wayuu, süchiki süikeyuu jee süchiki süchonnii, nnojotpejeʼe achuntunuin tia pütchikat suluʼu wayuunaiki süpüla saashajaanüin achiki süchonnii wayuu, ashajünüsüjeseʼe tü pütchikat wanaapünaa sümaa tü aashajaanakalü achiki (Mateo 22:24; Juan 8:37). Ashajünüsü tü pütchikat «aikeyuu», shiiʼiree saashajaanüin achiki tü pütchi aküjünatüjütkalia achiki suluʼu tü yüüja kanüliakat Edén, suluʼujeejatü Génesis 3:15 (Galacia 3:29; Apocalipsis 22:16).

• Napansaajüin waneirua pütchi suluʼu tü Bibliakat. Eesü pütchi apansaajünaka suluʼu tü Bibliakat süpüla shiyaawatünüin aaʼu. Jamüsüjaʼa tü pütchikat Hades makat suluʼu griego  ashajünüsü suluʼu tü Bibliakat süpüla sütüjaanüin aaʼu shiyaawasein shia eere niʼitaanüin wanee wayuu. Eeshii na wayuu nnojoliikana atüjaain saaʼu jamaluʼulu tü pütchikat Hades, shiakalaka neʼe jülüjain naaʼin shiain saashajaain achiki tü kasa nanoujakalü anain na griegokana, shiapejeʼe süküjeein achiki tü Amuuyuukat maʼaka süshajünatüjülin suluʼu tü Bibliakat. Tü pütchikat Hades suluʼusü shia noota suluʼu Bibliakat tüü (Aluwataaushikana 2:27).

  Tü pütchikat griego psykhḗ «aaʼin» maluʼulu shia, oʼunusü shia süchiirua kasain aashajaanüin achiki. Eesüjaʼa saashajaale süchiki (1) wanee wayuu, (2) katüin noʼu wanee wayuu, (3) katüin soʼu mürüt jee wüchii, (4) tü suchuntaakat naaʼin wanee wayuu otta (5) eeshi niale saashajaain achiki wanee wayuu eekai outuin. Nnojotpejeʼe maʼin achuntunaajüin suluʼu wayuunaiki tü pütchikat alma, müsüjeseʼe süshajünüin wanaapünaa sümaa jamaluʼuluin shia maʼaka sukuwaʼipa suluʼu tü anüikii süshajünakalü aluʼu paala, eesü müle shia «jee shiale alma» (pünaʼla tü sümakat Mateo 6:25). Eepejeʼe süshajünüle tü pütchikat aaʼin sümaa wanee noota eere süküjünüin wamüin waashajeʼerüinjatüin sooʼomüin süchiki suluʼu tü kanüliakat «Jamaluʼulu pütchikat» jee süküjünüle wanee pütchi eekai müin aka saaʼin (Mateo 22:37).

  Ashajünüsü tü pütchikat achüʼü suluʼu tü Bibliakat süküjünüle achiki wanee kasa maʼaka süshajünüin suluʼu Apocalipsis 2:23, tü süküjeekalü achiki tia pütchikat shia tü kasa jülüjaka naaʼin wanee wayuu, eʼitaanüsü tia suluʼu tü Bibliakat, aküjünapejeʼe suluʼu wanee noota jamaluʼuluin shia suluʼu griego.

• Mapüleesat süshajia. Alijunaikiruʼusü waneirua pütchi süpüla mapüleeinjatüin shia saashajeʼennapa jee süpüla shiyaawatünüin aaʼu. Anuu tü sümakat tü wane Biblia wayuunaikiruʼukat: «uwon kachueera», eekajasaʼa suluʼu Bibliakat tüü «casco» müitpa (Éfeso 6:17). «Kalaira» mapuʼusü suluʼu tü wane Bibliakat, eekajasaʼa suluʼu Bibliakat tüü «león» müitpa (1 Pedro 5:8).

Paliʼirü noota suluʼu, anuu shia waneʼewai sukua:

• «Jee shiale, niale, nayale» Aküjünüsü suluʼu tü nootakat wanee pütchi eekai müin aka saaʼin tü pütchi griego ashajünatüjütkalia aluʼu tü Bibliakat. Suluʼu Mateo 8:14 «poloonaa, oushuwaa, aapuwaa» müsü tü nootakat. Akaʼaya suluʼu Mateo 3:11 «nüsapaatse» müsü tü nootakat.

•  «Eesüjaʼa sümünüle, eesüjaʼa maluʼurüle tia» Ashajünüsü suluʼu nootakat tüü, waneirua sukuwaʼipa süküjia tü pütchikat, wanaawapejeʼe tü süküjeekalü achiki. Suluʼu Mateo 10:29 «‹Suʼttule mmoluʼumüin› eesüjaʼa sümünüle», müsü tia nootakat. Akaʼaya neʼe suluʼu Hebreokana 10:1 «eesüjaʼa ‹wayuu› maluʼurüle tia» müsü tü nootakat.

• «Maluʼulu tia suluʼu griego» Ashajünüsü suluʼu nootakat tüü wanee pütchi eekai müin aka saaʼin tü aküjünakat suluʼu tü griego ashajünakalü aluʼu tü Bibliakat. Suluʼu Aluwataaushikana 7:60 «‹Atunkalaʼa müshi› maluʼulu tia suluʼu griego», müsü tü nootakat. Akaʼaya suluʼu Roma 10:15 «‹Nooʼui› maluʼulu tia suluʼu griego», müsü tü nootakat.

• Jamaluʼuluin wanee pütchi jee waneirua kasa Jamaluʼuluin wanee anüliee (Marcos 10:51 «Ekirajüikalee»; 2 Corinto 6:15 «Chi Yolujaakai»). Süchiki nneerü, saawain jee sajaʼapüin wanee kasa (Lucas 24:13 «Kilómetro»). Jaralin chi aashajaanakai achiki (Mateo 3:16 «Niirakaakalaka»). Anasü maʼin tü pütchi suluʼuka tü kanüliakat «Sooʼomüin pütchi» otta «Jamaluʼulu pütchikat» (Mateo 5:22 «Najaʼttinnüin», Mateo 1:22 «Jehová», Marcos 4:19 «Tü kasa eekat maaʼulu»).

«Tü shikirajakalü anain waya Nünüiki Maleiwa» müsü sünülia tü pütchi eekat suʼttiajee Bibliakat tüü otta aashajaasü shia süchiki waneirua kasa mapüleekat. Süchikijee tü karaloʼutakalü Apocalipsis eesü tü kanüliakat «Süchikimaajatü tü karaloʼuta suluʼukat tü Bibliakat» otta tü kanüliakat «Jamaluʼulu pütchikat». Aküjünüsü wamüin suluʼu tü kanüliakat «Jamaluʼulu pütchikat» jamaluʼuluin wanee pütchi suluʼu tü Bibliakat. Wainma pütchi eeka suluʼu tü kanüliakat «Sooʼomüin pütchi», maʼaka saaʼin tü kanüliakat «Tü jülüjainjatkat waaʼin süpüla pansaain süshajia tü Bibliakat», « Tü eekat suluʼu Bibliakat tüü», «Tü aaʼinnakat süpüla eeinjatüin tü Bibliakat maaʼulu yaa», «Nünülia chi Maleiwakai suluʼu tü Pütchi Ashajuushikat suluʼu griego», «Tü naaʼinrakat Jesús yaaiwaʼaya nia saaʼu tü mmakat», eesü maapa, ayaakuaa jee waneirua pütchi ayaawatünaka atuma tü sümakat tü Bibliakat.

Süpüla niyaawatajatüin saaʼu wanee wayuu kasain saashajaain achiki wanee karaloʼuta suluʼujeejatka tü Bibliakat, eesü wanee pütchi suʼttianainjee makalü anülia: «Tü ashajünakat suluʼu», aküjünüsü suluʼu tia kasain saashajaain achiki wanee kapiitulo otta jeʼtsüin tü wetsiikulo aashajaakat süchiki tia.