Bibilia ĩkoragwo na ndũmĩrĩri ya Ngai, kana kiugo gĩake kũrĩ ithuĩ ũmũthĩ. Ĩtuonagia ũrĩa tũngĩgaacĩra ũtũũro-inĩ na ũrĩa tũngĩĩtĩkĩrĩka nĩ Ngai. Ningĩ nĩ ĩcokagia ciũria ici:

Bibilia ĩkoragwo na mabuku manini manini 66. Ĩgayanĩtio icunjĩ igĩrĩ: Maandĩko ma Kĩhibirania na Kĩaramu (“Kĩrĩkanĩro Kĩrĩa Gĩkũrũ”) na Maandĩko ma Kĩngiriki (“Kĩrĩkanĩro Kĩrĩa Kĩerũ”). O ibuku thĩinĩ wa Bibilia rĩgayanĩtio na mĩrango na mĩhari. Rĩrĩa rĩandĩko rĩonanio, namba ya mbere thutha wa rĩĩtwa rĩa ibuku yonanagia mũrango, nayo namba ĩrĩa ĩrũmĩrĩire kana iria irũmĩrĩire ikonania mũhari kana mĩhari. Kwa ngerekano, Kĩambĩrĩria 1:1 nĩ Kĩambĩrĩria mũrango wa 1, mũhari wa 1.