Slikeb loʼil ta sventa li Skʼop Diose
Li ta Vivliae oy lekil aʼyejetik yuʼun Dios ti jtunel kuʼuntik li avie. Chakʼ ta ilel kʼuxi xuʼ lek xbat li jkuxlejaltike xchiʼuk kʼuxi xuʼ lek xilutik li Diose. Jech xtok, tstakʼ li sjakʼobiltak liʼe:
KʼUXI TA SAʼEL LI TEKSTOETIK TA VIVLIAE
Li Vivliae yichʼoj 66 bikʼtal livroetik. Pasbil ta chaʼvokʼ: li jvokʼe jaʼ li Tsʼibetik ta Ebreo xchiʼuk Arameo kʼope («Pokoʼ Testamento»), li jvokʼ xtoke jaʼ li Tsʼibetik ta Griego Kʼope («Achʼ Testamento»). Li jujun livroetik ta Vivliae chʼakbil ta kapitulo xchiʼuk ta versikulo. Kʼalal chichʼ saʼel jun tekstoe, jaʼ baʼyel chtal li sbi livroe, li baʼyel numero ta xokone jaʼ li kapituloe, li yan numero chtale jaʼ li versikuloe. Jech kʼuchaʼal liʼe, Jenesis 1:1 jaʼ skʼoplal slivroal Jenesis, kapitulo 1, versikulo 1.