TITIRAKI 6
Tera ae E Taetae ni Burabetinaki n te Baibara Ibukin te Mesia?
TAETAE NI BURABETI
“Ngkoe ae Betereem Eberata, . . . e na otinako mairoum te aomata ae e na riki bwa te tia tautaeka ibukiu i Iteraera.”
KAKOROANI BUKINA
“Imwini bungiakin Iesu i Betereem i Iutaia n ana bong te uea ae Erote, ao akea bwa a a roko i Ierutarem taani kaiwan itoi mai Mainiku.”
TAETAE NI BURABETI
“A tibwatibwai au kunnikai i marenaia, ao a karaoa te ananga ni katekeraoi ibukini kunnikaiu.”
KAKOROANI BUKINA
“Ao ngke a a tia tautia ni bobitiia Iesu i aon te kai, ao a anaa ana kauaatao ao a karaoi aua te tibwa mai iai . . . Ma akea te toma n ana kunnikai bwa e rarangaaki mai eta nako naano. Mangaia are a taku i marenaia: ‘Ti na aki raeuaia ma ti na karaoia n te ananga ni katekeraoi bwa antai ae e na bwainna.’”
TAETAE NI BURABETI
“E kawakin riina ni kabane, ao akea teuana mai buakoia ae mwaoto.”
KAKOROANI BUKINA
“N rokoia iroun Iesu, ao a noria bwa e a kamani mate, ngaia are a aki otei waena.”
TAETAE NI BURABETI
“E ewaraki ibukin ara bure.”
KAKOROANI BUKINA
“E ewara rarikina temanna te tautia n te kainiwai ao e a tiinako naba te raraa ao te ran.”
TAETAE NI BURABETI
“A kabwakaa boou ae 30 te mwakoro n tirewa.”
KAKOROANI BUKINA
“Ao e nako temanna mai buakoia naake Tengauni ma Uoman, ae arana Iuta Itekariota, ni kawariia mataniwi n ibonga, ao e taku: ‘Tera ae kam na anganai ngkana I kamwanea nakoimi?’ A kamatoaa nakoina taekan 30 te mwakoro n tirewa.”
