ຄຳຖາມ 6
ຄຳພີໄບເບິນບອກລ່ວງໜ້າແນວໃດກ່ຽວກັບເມຊີອາ?
ຄຳພະຍາກອນ
“ສຳລັບເຈົ້າ ເບັດເລເຮັມເອຟຣາທາ . . . ຈະມີຜູ້ປົກຄອງຄົນໜຶ່ງອອກມາຈາກເຈົ້າເພື່ອປົກຄອງອິດສະຣາເອນແທນເຮົາ.”
ເຫດການທີ່ເກີດຂຶ້ນແທ້
“ພະເຢຊູເກີດຢູ່ເມືອງເບັດເລເຮັມໃນແຂວງຢູດາຍຕອນທີ່ເຮໂຣດເປັນກະສັດ. ຕໍ່ມາ ພວກທີ່ທຳນາຍໂດຍເບິ່ງດວງດາວທີ່ຢູ່ທາງທິດຕາເວັນອອກໄດ້ມາເມືອງເຢຣູຊາເລັມ.”
ຄຳພະຍາກອນ
“ເຂົາເຈົ້າເອົາເຄື່ອງນຸ່ງຂອງລູກມາແບ່ງກັນ ແລະເອົາເສື້ອຜ້າຂອງລູກມາຈົກສະຫຼາກ.”
ເຫດການທີ່ເກີດຂຶ້ນແທ້
“ເມື່ອພວກທະຫານຄຶງພະເຢຊູໄວ້ເທິງເສົາແລ້ວ ເຂົາເຈົ້າກໍເອົາເສື້ອຄຸມຂອງເພິ່ນມາແບ່ງເປັນ 4 ສ່ວນ . . . ແຕ່ເມື່ອເຂົາເຈົ້າຈັບເອົາເສື້ອໂຕທາງໃນມາ ກໍເຫັນວ່າເສື້ອນັ້ນບໍ່ມີຮອຍຕໍ່ ຍ້ອນຕ່ຳເປັນຜືນດຽວໝົດໂຕ. ເຂົາເຈົ້າຈຶ່ງເວົ້າວ່າ ‘ຢ່າຈີກເສື້ອໂຕນີ້ ໃຫ້ຈົກສະຫຼາກເອົາວ່າໃຜຊິໄດ້.’”
ຄຳພະຍາກອນ
“ເພິ່ນປົກປ້ອງກະດູກຂອງລາວທັງໝົດ. ບໍ່ມີກະດູກທ່ອນໃດຫັກເລີຍ.”
ເຫດການທີ່ເກີດຂຶ້ນແທ້
“ເມື່ອມາຮອດພະເຢຊູ ເຂົາເຈົ້າເຫັນວ່າເພິ່ນຕາຍແລ້ວ ຈຶ່ງບໍ່ໄດ້ທຸບຂາຂອງເພິ່ນໃຫ້ຫັກ.”
ຄຳພະຍາກອນ
“ລາວຖືກແທງຍ້ອນພວກເຮົາເຮັດຜິດ.”
ເຫດການທີ່ເກີດຂຶ້ນແທ້
“ທະຫານຄົນໜຶ່ງເອົາຫອກມາແທງທາງຂ້າງພະເຢຊູ ເລືອດກັບນ້ຳກໍໄຫຼອອກມາທັນທີ.”
ຄຳພະຍາກອນ
“ເຂົາເຈົ້າກໍຈ່າຍເງິນ 30 ເຊເກນໃຫ້ຂ້ອຍເປັນຄ່າຈ້າງ.”
ເຫດການທີ່ເກີດຂຶ້ນແທ້
“ໃນອັກຄະສາວົກ 12 ຄົນ ຜູ້ທີ່ຊື່ຢູດາອິສະກາຣີອົດໄດ້ໄປຫາພວກຫົວໜ້າປະໂລຫິດ ແລະຖາມວ່າ ‘ຖ້າຂ້ອຍທໍລະຍົດເຢຊູເພື່ອພວກເຈົ້າຈະຈັບລາວໄດ້ ພວກເຈົ້າຊິເອົາຫຍັງໃຫ້ຂ້ອຍ?’ ພວກປະໂລຫິດໃຫຍ່ຕົກລົງວ່າຈະເອົາຫຼຽນເງິນໃຫ້ລາວ 30 ຫຼຽນ.”