Gipriso Tungod sa Ilang Relihiyon—Eritrea
Sulod sa daghang katuigan, ang gobyerno sa Eritrea nag-aresto ug nagpriso sa mga Saksi ni Jehova—apil ang mga babaye ug mga tigulang—bisag walay husay o pormal nga sumbong tungod sa relihiyosong kalihokan ug sa mga rason nga wala isulti. Niadtong Oktubre 25, 1994, si Presidente Afwerki nagpakanaog ug presidential decree nga ang mga Saksi tangtangan sa ilang pagkalungsoranon kay sila wala moapil sa 1993 independence referendum ug midumili sa pagsundalo tungod sa konsensiya. Sa wala pa nila estriktong ipatuman ang pagsundalo, ang mga awtoridad sa Eritrea naghatag ug probisyon alang sa alternatibong serbisyo para sa komunidad. Daghang Saksi ang nakigbahin niini nga serbisyo ubos sa lainlaing administrasyon. Ang mga awtoridad nag-isyu ug “Certificates of Completed National Service,” ug sagad dayegon nila ang miapil niini nga serbisyo. Pero tungod niini nga presidential decree, ang mga polis nagpriso, nag-torture, ug naghasi sa mga Saksi ni Jehova aron pugson sila sa pagsalikway sa ilang relihiyon.
Sa pagkakaron, dunay 40 ka Saksi ni Jehova nga naa pa gihapon sa prisohan (28 ka lalaki ug 12 ka babaye). Niadtong Disyembre 4, 2020, 28 ka Saksi ni Jehova (26 ka lalaki ug 2 ka babaye) ang gibuhian human prisoha tungod sa ilang relihiyon. Ang matag usa kanila napriso sulod sa 5 hangtod sa 26 ka tuig. Niadtong Enero 29, 2021, usa ka Saksi nga lalaki ang gibuhian human mapriso sa kapig 12 ka tuig, ug tulo pa ka Saksi ang gibuhian niadtong Pebrero 1, 2021 (usa ka lalaki ug duha ka babaye). Sila napriso sa upat ngadto sa siyam ka tuig.
Mga Saksi Nangamatay Tungod sa Lisod Kaayo nga Kahimtang sa Prisohan
Upat ka Saksi ang namatay samtang gipriso sa Eritrea. Tungod sa lisod kaayo nga kahimtang sa prisohan, tulo pa ka tigulang nga Saksi ang namatay human sila buhii.
Niadtong 2018, duha ka Saksi ang namatay human sila ibalhin ngadto sa Mai Serwa Prison. Si Habtemichael Tesfamariam namatay sa edad nga 76 niadtong Enero 3, ug si Habtemichael Mekonen namatay sa edad nga 77 niadtong Marso 6. Ang mga awtoridad sa Eritrea nagpriso niining duha ka lalaki niadtong 2008 bisag walay sumbong.
Niadtong 2011 ug 2012, duha ka Saksi ang namatay tungod sa pagmaltratar kanila didto sa Meitir Prison Camp. Si Misghina Gebretinsae, nga nag-edad ug 62, namatay niadtong Hulyo 2011 tungod sa grabeng kainit nga iyang nasinati diha sa dapit-silotanan nga gitawag ug “underground.” Si Yohannes Haile, nga nag-edad ug 68, namatay niadtong Agosto 16, 2012, human sa halos upat ka tuig nga pagkapriso ubos sa susamang mga kahimtang. Tungod sa kahimtang nga giantos didto sa Meitir Camp, tulo ka tigulang nga Saksi—si Kahsai Mekonnen, Goitom Gebrekristos, ug Tsehaye Tesfariam—ang namatay human sila buhii.
Wala Tagda ang Rekomendasyon sa mas Taas nga mga Organisasyon sa Tawhanong Katungod
Ang Eritrea wala gihapon magtagad sa internasyonal nga mga sukdanan sa tawhanong katungod. Ang dagkong organisasyon sa tawhanong katungod nagkondenar sa paglapas sa pangunang mga katungod ug padayong nag-awhag sa Eritrea sa pagtul-id sa maong kahimtang.
Niadtong 2014, nadawat sa Human Rights Council (HRC) ang report sa Special Rapporteur bahin sa kahimtang sa tawhanong katungod sa Eritrea, nga nag-awhag sa mga awtoridad sa pagtahod sa katungod nga modumili tungod sa konsensiya “sumala sa internasyonal nga mga sukdanan” ug “sa paggarantiya nga maayog panglawas ang tanang piniriso; pagseguro nga matambalan ang mga masakiton . . . ug pagpauswag sa kahimtang sa prisohan sumala sa internasyonal nga mga sukdanan.” Sa usa ka resolusyon niadtong 2015, gimandoan sa HRC ang gobyerno sa Eritrea sa “pagtagana ug alternatibong serbisyo para niadtong modumili sa pagsundalo tungod sa konsensiya.”
Niadtong 2016, gikompirmar sa Commission of Inquiry on Human Rights sa Eritrea nga ang mga awtoridad sa Eritrea nakahimog “krimen batok sa katawhan” kay ilang “gilutos [ang mga Saksi ni Jehova ug ang uban pa] base sa relihiyon ug rasa.”
Niadtong 2017, ang African Committee of Experts on the Rights and Welfare of the Child (ACERWC) nagpahayag sa kabalaka niini nga bisan pag dunay legal nga proteksiyon, ang “mga anak sa mga Saksi ni Jehova” wala makabenepisyo niini nga katungod ug gimaltratar hinuon. Ang ACERWC nagrekomendar nga “angayng ilhon ug bug-os nga iimplementar [sa Eritrea], nga walay diskriminasyon, ang Kagawasan sa Hunahuna, Konsensiya, ug Relihiyon sa usa ka bata.”
Niadtong 2018, girekomendar sa African Commission on Human and Peoples’ Rights nga ang Eritrea “mohimo dayog aksiyon aron sulbaron ang wala nila paghatag ug pangunang mga katungod sa tanang piniriso, apil . . . sa mga Saksi ni Jehova,” ug gipaimbestigahan niini ang gireport nga kamatayon sa pipila ka Saksi samtang naa sa prisohan. Gipasiugda sa komisyon nga kinahanglang “ibalik [sa Eritrea] ang katungod sa pagkalungsoranon” sa mga Saksi ni Jehova.
Niadtong Mayo 2019, ang UN Human Rights Committee (CCPR) nag-awhag sa Eritrea nga paneguroon nga ipatuman nila ang kagawasan sa relihiyon ug pagtuo ug “buhian ang tanang giaresto ug gidetener tungod sa paggamit sa ilang kagawasan sa relihiyon, apil na ang mga Saksi ni Jehova.” Gihangyo sab sa CCPR ang Eritrea nga “ilhon ang katungod niadtong modumili sa pagsundalo tungod sa konsensiya ug magtaganag probisyon sa alternatibong serbisyo para sa komunidad alang niadtong modumili tungod sa konsensiya.”
Sa usa ka report niadtong Mayo 12, 2021, gimandoan sa UN Special Rapporteur ang gobyerno sa Eritrea “nga buhian dayon nga walay bisan unsang kondisyones ang tanang gipriso nga wala kasohi o husaya tungod sa ilang pagtuo o tinuohan, lakip ang 20 ka Saksi ni Jehova,” ug nga “repasohon ang mga desisyon nga nagtangtang sa pagkalungsoranon sa mga Saksi ni Jehova tungod sa ilang relihiyon, tahoron ang rekomendasyon sa African Commission on Human and Peoples’ Rights aron maseguro nga mahuptan sa mga Saksi ni Jehova ang ilang katungod ingong mga lungsoranon, ug imbestigahan ang gireport nga kamatayon sa nadetener nga mga Saksi ni Jehova.”
Walay Eksaktong Gidugayon sa Sentensiya
Kadaghanan sa piniriso nga mga lalaking Saksi walay paglaom nga makagawas hangtod nga sila mamatay o himalatyon na. Kay wala silay mabatonan nga epektibong legal nga proseso o tabang, ang ilang pagkapriso sama rag life sentence.
Time Line
Septiyembre 16, 2024
Tanantanan, 40 ka Saksi ang gipriso.
Pebrero 1, 2021
Tulo ka Saksi ang gipagawas sa prisohan.
Enero 29, 2021
Usa ka Saksi ang gipagawas sa prisohan.
Disyembre 4, 2020
Gibuhian ang 28 ka Saksi.
Marso 6, 2018
Namatay si Habtemichael Mekonen, 77 anyos, human siya ibalhin sa Mai Serwa Prison.
Enero 3, 2018
Namatay si Habtemichael Tesfamariam, 76 anyos, human siya ibalhin sa Mai Serwa Prison.
Hulyo 2017
Ang tanang Saksi nga gidetener sa Meitir Camp gibalhin sa Mai Serwa Prison sa gawas sa Asmara.
Hulyo 25, 2014
Kadaghanan niadtong giaresto sa Abril 14 gibuhian, pero 20 niadtong giaresto sa Abril 27 ang gidetener gihapon.
Abril 27, 2014
Trayentay uno ka Saksi ang giaresto panahon sa tigom sa pagtuon sa Bibliya.
Abril 14, 2014
Kapig 90 ka Saksi ang giaresto panahon sa tinuig nga pagselebrar sa Memoryal sa kamatayon sa Kristo.
Agosto 16, 2012
Namatay si Yohannes Haile, 68 anyos, samtang gipriso ubos sa lisod kaayo nga mga kahimtang.
Hulyo 2011
Namatay si Misghina Gebretinsae, 62 anyos, samtang gipriso ubos sa lisod kaayo nga mga kahimtang.
Hunyo 28, 2009
Gi-raid sa mga awtoridad ang balay sa usa ka Saksi panahon sa relihiyosong serbisyo ug giaresto ang tanang 23 ka Saksi nga tua didto, gikan sa 2 ngadto sa 80 anyos.
Abril 28, 2009
Ang tanang Saksi ni Jehova, gawas sa usa, nga gipriso diha sa mga presinto sa polis gibalhin sa mga awtoridad ngadto sa Meitir Prison Camp.
Hulyo 8, 2008
Gisugdan sa mga awtoridad pag-raid ang mga balay ug trabahoan aron arestohon ang 24 ka Saksi, nga kadaghanan kanila maoy nagbuhi sa ilang pamilya.
Mayo 2002
Gipahunong sa gobyerno ang tanang relihiyosong grupo nga dili apil sa upat ka relihiyon nga giaprobahan sa gobyerno.
Oktubre 25, 1994
Tungod sa presidential decree, ang mga Saksi ni Jehova gitangtangan sa ilang pagkalungsoranon ug sa pangunang mga katungod.
Septiyembre 17, 1994
Si Paulos Eyasu, Isaac Mogos, ug Negede Teklemariam gipriso bisag walay sumbong o husay.
Katuigan sa 1950
Ang unang mga komunidad sa mga Saksi ni Jehova naestablisar sa Eritrea.
Basin Ganahan Pod Ka
MGA BALITA
Mga Saksi ni Jehova nga Gipriso Tungod sa Ilang Relihiyon—Matag Lugar
Mga lugar diin gipriso ang mga Saksi ni Jehova, usahay diha sa lisod kaayong mga kahimtang, tungod sa ilang relihiyon ug paglihok subay sa pangunang tawhanong katungod.