Awo Amɛ Tsuŋ Yɛ Amɛhemɔkɛyeli Hewɔ
Eritrea nɔyeli lɛ mɔmɔɔ Yehowa Odasefoi kɛ mɛi krokomɛi ni amɛwoɔ amɛtsuŋ be ni ayeko amɛsane loo be ni atsɔko amɛ nɔ tuuntu ni amɛfee. Awoɔ Odasefoi hii, yei, gbekɛbii kɛ mɛi ni egbɔlɔ fɛɛ tsuŋ yɛ jamɔ nifeemɔ loo yɛ yiŋtoo ni amɛleee hewɔ. Awoɔ oblahii ni amɛhenilee eŋmɛɛɛ amɛgbɛ ni amɛkɛ amɛhe awo asraafoi anitsumɔ mli lɛ tsuŋ.
Be ni Eritrea ná heyeli yɛ 1993 lɛ, amɛtsĩ Yehowa Odasefoi anitsumɔ lɛ naa. Maŋ hiɛnyiɛlɔ Afewerki kɛ enine wo wolo shishi yɛ October 25, 1994 kɛhe hegbɛ ni Odasefoi lɛ yɔɔ akɛ maŋbii lɛ yɛ amɛdɛŋ. Efee nakai akɛni Yehowa Odasefoi lɛ efɔ̃ɔɔ oshiki koni maŋ lɛ kɛná heyeli, ni agbɛnɛ hu amɛkɛ amɛhe wooo asraafoi anitsumɔ lɛ mli yɛ amɛhenilee ni eŋmɛɛɛ amɛ gbɛ lɛ hewɔ. Kɛjɛ nakai beiaŋ kɛbaa nɛɛ lɛ, Eritrea maŋ hebulɔi lɛ ewo Yehowa Odasefoi tsuŋ ni amɛfee amɛ niseniianii koni no ahã amɛŋmɛɛ amɛhemɔkɛyeli lɛ he.
Odasefoi Komɛi Gboi Yɛ Tsuŋwoohe Yɛ Shihilɛi Ni Naa Wala Ni Yɔɔ Jɛmɛ Lɛ Hewɔ
Odasefoi ejwɛ gboi yɛ tsuŋwoohe yɛ Eritrea. Yɛ afi 2018 lɛ, Odasefoi enyɔ gboi be ni ajie amɛ kɛtee tsuŋwoohe kroko ni atsɛɔ lɛ Mai Serwa Prison lɛ. Yɛ January 3, Habtemichael Tesfamariam gbo yɛ jɛmɛ be ni eye afii 76, ni yɛ March 6 Habtemichael Mekonen hu gbo be ni eye afii 77. Eritrea nɔyeli lɛ wo mɛi enyɔ nɛɛ tsuŋ yɛ afi 2008, atsɔɔɔ amɛ nɔ ni amɛfee.
Yɛ July afi 2011 lɛ, Misghina Gebretinsae gbo yɛ Meitir Prison Camp lɛ be ni eye afii 62. Akɛ lɛ yawo tsuŋwoohe lɛ he ko ni agbalaa mɛi atoi yɛ ní atsɛɔ lɛ underground lɛ, egbo yɛ bɔ ni jɛmɛ dɔɔ waa lɛ hewɔ. Yohannes Haile ni eye afii 68 lɛ gbo yɛ August 16, afi 2012, be ni awo lɛ tsuŋ aaafee afii ejwɛ yɛ tsuŋwoohe ko ni jɛmɛ shihilɛ lɛ tamɔ Meitir Camp lɛ mli shihilɛ lɛ nɔŋŋ lɛ. Odasefoi etɛ ni edara yɛ afiiaŋ gboi be ni ajie amɛ yɛ tsuŋwoohe lɛ sɛɛ akɛni shihilɛi ni yɔɔ he ni awo amɛ tsuŋ lɛ naa wa hewɔ.
Awo Mɛi Komɛi Tsuŋ Ni Aleee Be Ni Abaajie Amɛ
Kɛjɛ September 24, afi 1994 ni awo Odasefoi etɛ ni ji Paulos Eyasu, Isaac Mogos, kɛ Negede Teklemariam tsuŋ yɛ amɛhenilee ni eŋmɛɛɛ amɛ gbɛ ni amɛkɛ amɛhe awo asraafoi anitsumɔ mli lɛ hewɔ lɛ, ajieko amɛ. Awo hii nyɔŋma komɛi hu tsuŋ nɔ ni fe afii nyɔŋma nɛ.
Awo Odasefoi komɛi hu tsuŋ yɛ kɔŋteenai amli, ni akɛ mɛi komɛi hu wo tɛkploi loo tsũi ni akɛ dadei fee, ni fã hɔ shikpɔŋ lɛ amli.
Yɛ July afi 2017 lɛ, ajie Odasefoi fɛɛ ni awo amɛ tsuŋ yɛ Meitir Camp yɛ Asmara lɛ kɛtee Mai Serwa Prison lɛ. Yɛ November 30, 2017 lɛ, ajie Odasefoi 13 lɛ fɛɛ ni yɔɔ Sawa Camp lɛ mli, ni Paulos Eyasu, Isaac Mogos, kɛ Negede Teklemariam fata he lɛ kɛtee Mai Serwa Prison lɛ.
Hii ni yɔɔ Odasefoi ni awo amɛ tsuŋ nɛɛ ateŋ lɛ, hiɛnɔkamɔ ko bɛ akɛ abaajie amɛ, ja amɛgboi loo amɛmiihe amɛgboi. Akɛni mla loo gbɛjianɔtoo ko bɛ maŋ lɛ mli ni tsuɔ nii jogbaŋŋ ni abaanyɛ atsɔ nɔ aye abua amɛ hewɔ lɛ, amɛshihilɛ ebafee tamɔ mɛi ni awo amɛ tsuŋ amɛwala gbii abɔ fɛɛ.
Bei Liamɔ
February 14, 2019
Awo Odasefoi 53 tsuŋ.
March 6, 2018
Habtemichael Mekonen gbo be ni eye afii 77, be ni ajie lɛ kɛtee Mai Serwa Prison lɛ.
January 3, 2018
Habtemichael Tesfamariam, gbo be ni eye afii 76, be ni ajie lɛ kɛtee Mai Serwa Prison lɛ.
July 2017
Ajie Odasefoi fɛɛ ni awo amɛ tsuŋ yɛ Meitir Camp yɛ Asmara lɛ kɛtee Mai Serwa Prison lɛ.
July 25, 2014
Ajie mɛi ni amɔmɔ amɛ yɛ April 14 lɛ ateŋ mɛi babaoo, shi mɛi ni amɔmɔ amɛ yɛ April 27 lɛ ateŋ mɛi 20 yɛ tsuŋwoo mli lolo.
April 27, 2014
Amɔmɔ Odasefoi nyɔŋmai etɛ kɛ ekome be ni amɛkpe kɛmiikase Biblia lɛ.
April 14, 2014
Amɔmɔ Odasefoi ni fa fe 90 be ni aaye Kristo gbele lɛ Kaimɔ lɛ ni afeɔ lɛ daa afi lɛ.
August 16, 2012
Yohannes Haile gbo be ni eye afii 68, yɛ tsuŋwoohe ni mli shihilɛ ehiii kwraa lɛ mli.
July 2011
Misghina Gebretinsae gbo be ni eye afii 62, yɛ tsuŋwoohe ni mli shihilɛ ehiii kwraa lɛ mli.
June 28, 2009
Maŋ onukpai yabote Odasefonyo ko shĩa mli be ni amɛkpe kɛhã jamɔ, ni amɛmɔmɔ Odasefoi 23 ni yɔɔ jɛmɛ lɛ fɛɛ, kɛjɛ gbekɛbii ni eye afii 2 nɔ kɛyashi onukpai ni eye afii 80 nɔ.
April 28, 2009
Maŋ onukpai lɛ kɛ Odasefoi ni awo amɛ tsuŋ lɛ fɛɛ tee Meitir Prison Camp lɛ ni ashi mɔ kome pɛ.
July 8, 2008
Maŋ onukpai tee shĩai kɛ nitsumɔhei ni amɛyamɔmɔ Odasefoi 24, amɛteŋ mɛi babaoo ji mɛi ni kwɛɔ amɛwekui.
May 2002
Maŋ nɔyeli lɛ tsĩ jamɔ kui fɛɛ ni bɛ jamɔi ejwɛ ni nɔyeli lɛ ekpɛlɛ nɔ lɛ ashishi lɛ naa.
October 25, 1994
Maŋ hiɛnyiɛlɔ lɛ wo mla koni ahe hegbɛ ni Yehowa Odasefoi yɔɔ akɛ maŋbii lɛ kɛ hegbɛi krokomɛi kɛje amɛdɛŋ.
September 24, 1994
Awo Paulos Eyasu, Isaac Mogos, kɛ Negede Teklemariam tsuŋ be ni atsɔko nɔ ni amɛfee loo ayeko amɛsane, ni amɛyɛ tsuŋwoo mli lolo kɛbashi bianɛ.
1940 afii amli
Ato Yehowa Odasefoi akutsei ashishi klɛŋklɛŋ kwraa yɛ Eritrea.
Ekolɛ Obaasumɔ Enɛ Hu
AMANIƐBƆI NI EBA
Yehowa Odasefoi Ni Awo Amɛ Tsuŋ Yɛ Amɛhemɔkɛyeli Hewɔ—He Ni Eba Yɛ
Awoɔ Yehowa Odasefoi tsuŋ yɛ hei komɛi, bei komɛi lɛ yɛ shihilɛi ni naa wawai amli. Bei komɛi lɛ, awoɔ amɛ tsuŋ yɛ amɛhemɔkɛyeli lɛ kɛ hegbɛi ni amɛyɔɔ akɛ adesai ni amɛhiɔ shi yɛ naa lɛ hewɔ.