Sa madamo nga tinuig, gin-aresto kag ginpriso sang gobierno sang Eritrea ang mga Saksi ni Jehova—pati na ang mga babayi kag mga tigulang—bisan wala mabista ukon pormal nga mapasakaan sing kaso, bangod sa paghimo sang mga hilikuton sang ila relihion ukon sa wala mahibaluan nga rason. Ginkanselar ni Presidente Afwerki ang pagkabanwahanon (citizenship) sang mga Saksi paagi sa presidential decree nga napetsahan Oktubre 25, 1994, bangod ang mga Saksi wala nagboto sa independence referendum sang 1993 kag nagapangindi sila nga magsoldado bangod sa konsiensia. Antes sini, ang mga awtoridad sang Eritrea naghatag sing alternatibo nga serbisyo para sa mga nagapangindi nga magsoldado. Madamo nga Saksi ang nakigbahin sa sini serbisyo sa idalom sang sarisari nga administrasyon. Nagahatag ang mga awtoridad sing “Certificate of Completed National Service” kag sa masami ginadayaw pa sini ang mga nagapakigbahin sa sini nga sahi sang pagserbisyo. Pero bangod sa ginsambit nga presidential decree, ang mga Saksi ni Jehova sa Eritrea ginbilanggo, gin-torture, kag gingamo sang mga pulis para piliton sila nga talikdan ang ila pagtuo.

Kuarenta pa ka Saksi ni Jehova ang ara sa prisuhan sini nga tion (28 ka lalaki kag 12 ka babayi). Beinte otso ka Saksi ni Jehova (26 ka lalaki kag 2 ka babayi) ang ginpagua sang Disiembre 4, 2020, pagkatapos mapriso sing halin sa 5 asta 26 ka tuig bangod sang ila pagtuo. Sang Enero 29, 2021, isa ka lalaki nga Saksi ang ginpagua pagkatapos sia mapriso sing sobra sa 12 ka tuig, kag tatlo pa ka Saksi (isa ka lalaki kag duha ka babayi) ang ginpagua man sang Pebrero 1, 2021. Napriso sila sing halin sa apat asta siam ka tuig.

Apat na ka Saksi ang napatay sa sulod sang prisuhan sa Eritrea kag tatlo ka tigulang nga Saksi ang napatay pagkatapos sila mapagua bangod sa grabe kabudlay nga sitwasyon nga gin-antos nila sa prisuhan.

Sang 2018, duha ka Saksi ang napatay sa tapos sila nga ginsaylo sa Mai Serwa Prison. Si Habtemichael Tesfamariam napatay sa edad nga 76 sang Enero 3, kag si Habtemichael Mekonen napatay sa edad nga 77 sang Marso 6. Ginpriso sila sang awtoridad sang Eritrea sang 2008 bisan pa wala sila mapasakaan sing kaso.

Sang 2011 kag 2012, duha ka Saksi ang napatay bangod sa sapatsapaton nga pagtratar sa ila sa Meitir Prison Camp. Ang 62 anyos nga si Misghina Gebretinsae napatay sang Hulyo 2011, bangod sa sobra gid nga init nga iya naeksperiensiahan sa lugar para sa mga ginasilutan nga ginatawag “underground.” Napatay man ang 68 anyos nga si Yohannes Haile sang Agosto 16, 2012, pagkatapos sang halos apat ka tuig nga pagkapriso sa pareho man nga sitwasyon. Tatlo ka tigulang nga Saksi, nga sanday Kahsai Mekonnen, Goitom Gebrekristos, kag Tsehaye Tesfariam, ang napatay sa tapos sila ginpagua sa prisuhan bangod sa mabudlay kaayo nga sitwasyon nga ila ginbatas samtang priso sila sa Meitir.

Padayon nga ginabalewala sang Eritrea ang internasyonal nga mga talaksan para sa tawhanon nga kinamatarong. Ginpakamalaut sang dalagku nga mga ahensia para sa tawhanon nga kinamatarong ang mga paglapas sa panguna nga mga kinamatarong kag padayon sila nga nagapanawagan sa Eritrea nga untaton na ini.

Sang 2014, ginbaton sang Human Rights Council (HRC) ang report sang Special Rapporteur parte sa sitwasyon sang tawhanon nga kinamatarong sa Eritrea, nga nagapangabay sa mga awtoridad nga respetuhon ang kinamatarong sang mga nagapangindi nga magsoldado bangod sa konsiensia “nahisuno sa internasyonal nga talaksan” kag “proteksionan ang panglawas sang mga priso; siguraduhon nga mapabulong ang mga nagakinahanglan sini . . . kag ipahisuno ang sitwasyon sang mga prisuhan sa internasyonal nga mga talaksan.” Sa isa ka desisyon sang 2015, ang HRC nagpanawagan sa gobierno sang Eritrea nga “tugutan nga maghimo sing alternatibo nga serbisyo ang mga nagapangindi nga magsoldado bangod sa konsiensia.”

Sang 2016, ang Commission of Inquiry on Human Rights in Eritrea nagsiling nga ang mga awtoridad sang Eritrea nakahimo sing “krimen batok sa katawhan” bangod sang ila “paghingabot bangod sa relihion kag rasa” sang mga Saksi ni Jehova kag iban pa.

Sang 2017, ginpahayag sang African Committee of Experts on the Rights and Welfare of the Child (ACERWC) ang kabalaka sini kay bisan may proteksion na nga ginahatag ang kasuguan, wala gihapon matigayon sang “mga bata sang mga Saksi ni Jehova” ini nga kinamatarong kag indi gihapon maayo ang pagtrato sa ila. Ang ACERWC nagrekomendar sa Eritrea nga “kilalahon kag bug-os nga ipatuman ang kinamatarong sang isa ka bata sa Kahilwayan sang Panghunahuna, Konsiensia kag Relihion nga wala sing diskriminasyon.”

Sang 2018, ginrekomendar sang African Commission on Human and Peoples’ Rights nga ang Eritrea “dapat maghulag gilayon para mabalik sa tanan nga priso ang ila panguna nga mga kinamatarong nga ginkuha sa ila pati na sa . . . miembro sang mga Saksi ni Jehova” kag nagpanawagan ini nga dapat maghimo sing imbestigasyon parte sa pagkapatay sang mga Saksi samtang ara sa prisuhan. Ginpadaku sini nga dapat pat-uron gid sang Eritrea nga “maproteksionan ang kinamatarong bilang banwahanon” sang mga Saksi ni Jehova.”

Sang Mayo 2019, ang UN Human Rights Committee (CCPR) nagpangabay sa Eritrea nga pat-uron nga maproteksionan ang kahilwayan sang relihion kag pagpati kag “hilwayon ang tanan nga gin-aresto kag ginpriso bangod sa relihioso nga mga hilikuton, pati ang mga Saksi ni Jehova.” Ang CCPR nagpangabay man sa Eritrea nga “pat-uron nga kilalahon sang kasuguan ang mga nagapangindi nga magsoldado bangod sa konsiensia kag maghatag sing alternatibo nga serbisyo nga wala sing labot sa militar para sa mga nagapangindi nga magsoldado bangod sa konsiensia.”

Sa isa ka report nga napetsahan Mayo 12, 2021, ginmanduan sang UN Special Rapporteur ang gobierno sang Eritrea nga “buy-an gilayon nga wala sing bisan ano nga kondisyon ang tanan nga ginpriso nga wala makasuhan ukon ma-hearing bangod sang ila pagtuo ukon pagpati, lakip ang 20 ka Saksi ni Jehova,” kag “rebyuhon ang mga desisyon nga dulaon ang citizenship sang mga Saksi ni Jehova bangod sang ila relihion, respetuhon ang rekomendasyon sang African Commission on Human and Peoples’ Rights para masiguro nga indi madulaan sing kinamatarong bilang citizen ang mga Saksi ni Jehova, kag imbestigahan ang ginreport nga kamatayon sang pila ka Saksi ni Jehova nga ginpriso.”

Ang kalabanan sa lalaki nga mga Saksi nga ginpriso wala makahibalo kon asta san-o sila sa prisuhan, kag basi makagua lang sila kon patay na sila ukon nagatagumatayon. Bangod wala sing nagakaigo nga layi ukon solusyon nga mahatag sa ila ang ila pungsod, daw pareho lang nga ginsentensiahan sila nga mapriso tubtob buhi.

1. Septiembre 16, 2024

   May 40 na ka Saksi ang ara sa prisuhan.

2. Pebrero 1, 2021

   May tatlo ka Saksi nga ginpagua sa prisuhan.

3. Enero 29, 2021

   May isa ka Saksi nga ginpagua sa prisuhan.

4. Disiembre 4, 2020

   May 28 ka Saksi nga ginpagua sa prisuhan.

5. Marso 6, 2018

   Si Habtemichael Mekonen napatay sa edad nga 77, sa tapos sia nga ginsaylo sa Mai Serwa Prison.

6. Enero 3, 2018

   Si Habtemichael Tesfamariam napatay sa edad nga 76, sa tapos sia ginsaylo sa Mai Serwa Prison.

7. Hulyo 2017

   Ang tanan nga Saksi nga napriso sa Meitir Camp ginsaylo sa Mai Serwa Prison sa gua sang Asmara.

8. Hulyo 25, 2014

   Kalabanan sang gindakop sang Abril 14 ginpagua, pero 20 sa mga gindakop sang Abril 27 ang ara gihapon sa prisuhan.

9. Abril 27, 2014

   Gindakop ang 31 ka Saksi samtang nagatipon sila para magtuon sing Biblia.

10. Abril 14, 2014

    Sobra 90 ka Saksi ang gindakop samtang nagatipon sila para sa tuigan nga pagsaulog sang Memoryal sang kamatayon sang Cristo.

11. Agosto 16, 2012

    Napatay si Yohannes Haile, 68 anyos, samtang ginapriso sa mabudlay kaayo nga sitwasyon.

12. Hulyo 2011

    Napatay si Misghina Gebretinsae, 62 anyos, samtang ginapriso sa mabudlay kaayo nga sitwasyon.

13. Hunyo 28, 2009

    Gin-raid sang mga awtoridad ang puluy-an sang isa ka Saksi samtang nagatipon sila para magsimba kag gindakop nila ang tanan nga 23 ka Saksi nga nagtambong, nga nagaedad sing 2 asta 80.

14. Abril 28, 2009

    Magluwas sa isa, ang tanan nga Saksi ni Jehova nga ginpriso sa mga presinto ginsaylo sa Meitir Prison Camp.

15. Hulyo 8, 2008

    Gin-raid sang mga awtoridad ang mga balay kag mga ulubrahan para dakpon ang 24 ka Saksi, nga ang kalabanan amo ang nagasagod sang ila mga pamilya.

16. Mayo 2002

    Gindilian sang gobierno ang tanan nga relihion nga wala malakip sa apat ka relihion nga may pahanugot sang gobierno.

17. Oktubre 25, 1994

    Sa isa ka presidential decree, ang mga Saksi ni Jehova ginkuhaan sing sibil nga kinamatarong kag sing kinamatarong bilang mga banwahanon.

18. Septiembre 17, 1994

    Sanday Paulos Eyasu, Isaac Mogos, kag Negede Teklemariam ginpriso bisan wala mapasakaan sing kaso ukon mabista.

19. Dekada 1950

    Sa una nga tion, gintukod ang organisasyon sang mga Saksi ni Jehova sa Eritrea.