Bala Saksi-Saksi Jehovah ditangkap lalu dijil ba menua Eritrea tang nadai dipechara ba kot tauka dipadah penyalah enggau chara formal. Saksi-Saksi Jehovah ke lelaki, indu, bala nembiak sereta sida ke tuai mega dijil ketegal pengarap sida tauka ketegal kebuah ti bukai ke enda dipadah. Lelaki ke biak dijil ketegal mengkang neutral lalu enggai nyadi soldadu.

Lebuh menua Eritrea bulih hak kena merintah menua sida empu kena taun 1993, Saksi-Saksi Jehovah ba menua nya nyau enda bibas. Presiden Afewerki ngena kuasa iya ba 25 Oktober 1994 meri siti atur ke ngerampas hak Saksi-Saksi Jehovah nyadi peranak Eritrea. Tu ketegal bala Saksi enggai ngundi kena nyukung pemutus menua nya ti deka merintah diri empu. Pia mega, sida mengkang neutral lalu enggai nyadi soldadu. Berengkah ari nya, Saksi-Saksi Jehovah ba menua Eritrea diperinsa, dijil sereta dikachau. Sida diansak madahka diri enggai agi nyadi seiku ari Saksi-Saksi Jehovah.

Empat iku Saksi-Saksi Jehovah udah mati lebuh dijil ba menua Eritrea. Dua iku ari sida mati pengudah sida dianjung ngagai Rumah Jil Mai Serwa. Habtemichael Tesfamariam mati ba 3 Januari 2018. Maya nya, iya berumur 76 taun. Lalu Habtemichael Mekonen ke berumur 77 taun mati ba 6 Mac 2018. Piak ti bekuasa ba menua Eritrea nangkap lalu ngasuh seduai iya dijil ba taun 2008 taja pan nadai kebuah.

Seiku ari sida ke dijil, Misghina Gebretinsae, ke beumur 62 taun, mati ba Julai 2011, ketegal endur ke dikena kurung iya kelalu angat. Endur nya dikumbai sida endur ngukum “baruh tanah” ba Kem Jil Meitir. Yohannes Haile, ke beumur 68 taun, mati ba 16 Ogos 2012, pengudah dijil sepengelama 4 taun ngena chara ti sama ba Kem Meitir nya. Tiga iku Saksi ke bukai mati pengudah dilepaska ari jil ketegal pemerinsa ke balat ditapi sida lebuh dijil.

Ketegal mengkang neutral lalu enggai nyadi soldadu, tiga iku lelaki, Paulos Eyasu, Isaac Mogos, enggau Negede Teklemariam, dijil berengkah ari 24 September 1994. Sepuluh iku lelaki ke bukai mega udah dijil sepengelama lebih ari 10 taun.

Sekeda bala Saksi ke dijil nya dikurung dalam kontena besi. Lalu sida ke bukai dikurung ba endur ti digaga ari besi tauka batu ke ditanam setengah dalam tanah.

Kena Julai 2017, semua Saksi-Saksi Jehovah ke ditan ba Kem Meitir dipindahka ngagai Rumah Jil Mai Serwa ke bisi ba luar menua Asmara. Ba 13 November 2017, 13 iku saksi ke ditan ba Kem Sawa, nyengkaum Paulos Eyasu, Isaac Mogos, enggau Negede Teklemariam dibai pindah ngagai Rumah Jil Mai Serwa.

Mayuh ari Saksi-Saksi Jehovah ke lelaki dalam jil diukum enggau ukum ti enda temu pengelama. Lalu sida nadai ulih dilepaska nyentuk ke sida mati tauka nyau deka mati. Ketegal nadai atur ba menua nya, ukum ke diberi ngagai sida nya deka sebaka enggau ukum jil seumur idup.

1. 15 Mac 2019

   Penyampau 53 iku Saksi udah dijil.

2. 6 Mac 2018

   Habtemichael Mekonen, ke beumur 77 taun, mati pengudah dipindahka ngagai Rumah Jil Mai Serwa.

3. 3 Januari 2018

   Habtemichael Tesfamariam, ke beumur 76 taun, mati pengudah dipindahka ngagai Rumah Jil Mai Serwa.

4. Julai 2017

   Semua Saksi-Saksi Jehovah ke benung ditan ba Kem Meitir dipindahka ngagai Rumah Jil Mai Serwa ba luar menua Asmara.

5. 25 Julai 2014

   Kemayuh ari sida ke ditangkap maya 14 April udah dilepaska, tang 20 iku ke ditangkap ba 27 April agi benung ditan.

6. 27 April 2014

   31 iku Saksi-Saksi Jehovah ditangkap lebuh enggau gempuru belajarka Bup Kudus.

7. 14 April 2014

   Lebih ari 90 iku Saksi-Saksi Jehovah ditangkap lebuh sida benung ngintu pengawa Ngingatka Pemati Jesus.

8. 16 Ogos 2012

   Yohannes Haile, ke beumur 68 taun mati lebuh dijil ngena chara ti chukup merinsa.

9. Julai 2011

   Misghina Gebretinsae, ke beumur 62 taun, mati lebuh dijil ngena chara ti chukup merinsa.

10. 28 Jun 2009

    Piak ti bekuasa enggau ngenyit nyerungkai rumah seiku Saksi ke benung bejalaika pengawa sembah lalu nangkap 23 iku Saksi ti bisi dia. Sida ke ditangkap beumur ari 2 taun nyentukka 80 taun.

11. 28 April 2009

    Piak ti bekuasa mindahka semua Saksi-Saksi Jehovah ke dijil ba balai polis ngagai Kem Jil Meitir. Semina seiku aja ari bala Saksi enda dibai kin.

12. 8 Julai 2008

    Piak ti bekuasa berengkah nyerungkai rumah sereta endur gawa enggau ngenyit kena nangkap 24 iku Saksi-Saksi Jehovah. Kemayuh ari sida ke ditangkap nya tuai bilik ke gawa kena nyediaka utai ti diguna diri sebilik.

13. Mei 2002

    Perintah menua nutup semua raban pengarap ti enda nitihka 4 bengkah pengarap ke dikemendarka perintah.

14. 25 Oktober 1994

    Siti atur presiden digaga kena ngerampas hak Saksi-Saksi Jehovah nyadi peranak menua sereta hak sida ba komuniti.

15. 24 September 1994

    Paulos Eyasu, Isaac Mogos, enggau Negede Teklemariam dijil tang nadai dipechara tauka dipadah penyalah sida. Sida agi dalam jil nyentukka diatu.

16. 1940-an

    Komuniti Saksi-Saksi Jehovah ti keterubah ditumbuhka ba menua Eritrea.