Kyalo kya Eritrea kyakasa Bakamonyi ba kwa Yehoba ne baya mu machechi angi kwa kubula kwibatotolwesha nangwa kwibabuula mambo ene o bebakashila. Bakamonyi banabalume ne banabakazhi kuvwangakotu ne baana ne bakote bebakasa na mambo a kwingila mwingilo wa Lesa nangwa na mambo abula kuyukanyikwa. Bansongwalume bebakasa na mambo a kukana kutwela nkito ya bushilikale.

Kyalo kya Eritrea kufumatu kimye kyo kyatambwile bwana bwa bene mu 1993, Bakamonyi ba kwa Yehoba kechi bakasuluka ne. Ndamakyalo aye Afewerki wapaine Muzhilo pa 25 October mu 1994 wa kwibakana kwikala bangikazhi, amba mambo Bakamonyi kechi bevwangilemo mu bya bunsaji bwajingako mu 1993 ne, kabiji bakaine kutwela nkito ya bushilikale. Kufumatu kyokya kimye kufika ne lelo jino, bashilikale bena Eritrea bakasa, kumanyika ne kukatazha bingi Bakamonyi ba kwa Yehoba kuba’mba basankilepo lwitabilo lwabo.

Banabalume basatu, ba Paulos Eyassu, ba Isaac Mogos ne ba Negede Teklemariam bebakashile pa 24 September mu 1994 na mambo a kukana kutwela nkito ya bushilikale. Bakamonyi bamo bebakashila mu makontena a byela, kabiji bakwabo bebakashila mu bishimikwa bya mabwe nangwa bya byela byo bazhiika panshi. Mu July 2011, kaili umo Misghina Gebretinsae wajinga na myaka 62 wafwile na mambo a kyuya byo bamubikile mu kishimikwa kyo bamanyikilamo bantu kyo “bazhiika panshi” mu Kaleya ka Meitir. Ba Yohannes Haile bajinga na myaka 68 bafwile pa 16 August mu 2012 byo bebakashile myaka ina mu Kaleya ka Meitir mwatwa bingi kyuya. Bakamonyi bakubalatu bo bakashile bebafumishe mu Kaleya ka Meitir na mambo a kukolwakolwa.

Pa 14 April mu 2014, kafulumende wa kyalo kya Eritrea wakashile Bakamonyi ba kwa Yehoba kukila pa 90 byo bavulukilenga Kivuluko kya lufu lwa kwa Yesu Kilishitu. Pa boba bo bakashile pajinga banabalume ne banabakazhi kutendekela ku baana ba bañondo 16 kufika ku bakulumpe ba myaka 85. Pa 27 April mu 2014 kafulumende wa kyalo kya Eritrea wakashile Bakamonyi 31 kimye kyo bafunjilenga Baibolo. Ene mambo o bebakashila ne luno kechi ayukanyikwa ne.

1. Pa 23 January mu 2015

   Bakamonyi 58 bebakashile kwa kubula kwibatotolwesha nangwa kwibabula mambo o balenga

2. Pa 12 December mu 2014

   Bakamonyi 64 bebakashile kwa kubula kwibatotolwesha nangwa kwibabuula mambo ene o bebakashila.

3. Pa 25 July mu 2014

   Bavula bo bakashile pa 14 April bebakasulula, bino bakwabo 20 bo bakashile pa 27 April kechi bebakasulula ne; Bakamonyi bonse bo bakasa baji 73.

4. Pa 27 April mu 2014

   Bakamonyi 31 bebakashile kimye kyo bafunjilenga Baibolo.

5. Pa 14 April mu 2014

   Bakamonyi kukila pa 90 bebakashile byo bavulukilenga Kivuluko kya lufu lwa kwa Kilishitu.

6. Mu November mu 2013

   Bakamonyi 52 bebakashile ne kwibamanyika bingi.

7. Pa 16 August mu 2012

   Ba Yohannes Haile bajinga na myaka 68 bafwijile mambo mu kaleya mwatwile bingi kyuya.

8. Mu July mu 2011

   Ba Misghina Gebretinsae bajinga na myaka 62 bafwijile mambo mu kaleya mwatwile bingi kyuya.

9. Pa 28 June mu 2009

   Bakapokola balukukile mazubo a Bakamonyi kimye kyo bapwijilenga ne kukasa Bakamonyi 23 bonse bajingapo, kutendekela pa baana ba myaka ibiji kufika ku ba myaka 80. Bakamonyi bonse bo bakashile bafikile 69.

10. Pa 28 April mu2009

    Kafulumende wavilwile bonse, bino Kamonyi wa kwa Yehoba umo bamukashijile ku ofweshi wa bakapokola ne kumutwala ku Kaleya ka Meitir.

11. Pa 8 July mu 2008

    Bakapokola balukukile Bakamonyi mu mazubo ne ku makito, kabiji bakashilepo Bakamonyi 24, bavula pa bano bo bakinkilemo manungo ku bisemi byabo.

12. Mu May mu 2002

    Kafulumende wakainye mabumba a bupopweshi abujile kwikala pa bupopweshi buna bo baswishishe ku kafulumende.

13. Pa 25 October mu 1994

    Muzhilo wapaine ndamakyalo wakainye Bakamonyi ba kwa Yehoba kwikala bangikazhi ne kubula kukasuluka kuba bintu byo bakeba.

14. Pa 24 September mu 1994

    Ba Paulos Eyassu, ba Isaac Mogos ne ba Negede Teklemariam bebakashile kwa kubula kwibatotolwesha nangwa kwibabuula mambo ene o bebakashila, kabiji ne luno bakiji mu kaleya.

15. Mu ma 1940

    Bupopweshi bwa Bakamonyi ba kwa Yehoba popo batendekele kwikala mu Eritrea.