Mo le tele o tausaga, na puʻea ma faafalepuipui ai e le malo o Eritrea Molimau a Ieova ona o a latou gaoioiga faalelotu, po o nisi foʻi māfuaaga e lē o faailoa mai. E aofia ai fafine ma ē ua loa le soifua iā i latou na. E lē o iai ni moliaga aloaʻia po o ni faamasinoga ua faia i na Molimau a Ieova. E ala i se tulafono a le peresitene na pasia iā Oketopa 25, 1994, na faalēaogāina ai e le peresitene o Eritrea o Afwerki le avea o Molimau a Ieova ma tagatānuu o lenā malo. O le māfuaaga ona e latou te leʻi auai i le palota a le atunuu atoa e faatatau i le tutoʻatasi, ma na latou teena foʻi le auai i vaegaʻau ona e lē taliaina e o latou lotofuatiaifo. Muamua atu a o leʻi faamalosia le auai i le vaegaʻau, na talia e le faigāmalo a Eritrea galuega e fai mo tagata lautele e suitulaga i galuega mo le vaegaʻau. E toʻatele Molimau a Ieova na faia na galuega i lalo o isi faigāmalo na muamua atu. Na tuuina mai e na faigāmalo ni tusi pasi e taʻua “Certificates of Completed National Service,” ma e masani ona latou viiviia ē na auai i na galuega. Peitaʻi ona o le tulafono a le peresitene, na latou faamalosia ai, faafalepuipui, sauāina ma faafefe Molimau a Ieova ina ia faafitia lo latou faatuatua.

I le taimi nei, e toʻa 40 Molimau a Ieova o loo faafalepuipuiina (28 alii ae 12 tamaʻitaʻi). Iā Tesema 4, 2020, na faasaʻoloto ai le 28 o Molimau a Ieova (26 alii ae 2 tamaʻitaʻi) na faafalepuipui ona o lo latou faatuatua. O nei Molimau na faafalepuipui i le vā o le 5 i le 26 tausaga. Na faasaʻoloto se tane Molimau na faafalepuipui i le silia ma le 12 tausaga iā Ianuari 29, 2021. Ae iā Fepuari 1, 2021, na faasaʻoloto ai foʻi nisi Molimau se toʻatolu (tasi le alii ma tamaʻitaʻi e toʻalua). Na faafalepuipuiina i latou i le vā o le fā i le iva tausaga.

E toʻafā Molimau na maliliu a o faafalepuipui i Eritrea, ma e toʻatolu ni Molimau matutua na maliliu ina ua faasaʻoloto mai, ona o faasalaga mamafa a o iai i le falepuipui.

I le 2018, e toʻalua ni Molimau na maliliu, ina ua ave i le falepuipui o Mai Serwa. Na maliu Habtemichael Tesfamariam iā Ianuari 3 i le 76 o ona tausaga, ma na maliu foʻi Habtemichael Mekonen iā Mati 6 i le 77 o ona tausaga. I le 2008, na faafalepuipui ai nei tane e le faigāmalo a Eritrea e aunoa ma ni moliaga.

I le 2011 ma le 2012, e toʻalua ni Molimau na maliliu ona o faiga leaga i le nofoaga o faasalaga i Meitir. Iā Iulai 2011, na maliu ai Misghina Gebretinsae i le 62 o ona tausaga ona o le matuā vevela o le nofoaga na faasala ai, e taʻua o “nofoaga i lalo o le palapala” (underground). Iā Aokuso 16, 2012, na maliu ai Yohannes Haile i le 68 o ona tausaga a o toetoe fā tausaga o iai i le falepuipui. O Kahsai Mekonnen, Goitom Gebrekristos, ma Tsehaye Tesfariam o isi Molimau matutua na maliliu ina ua faasaʻoloto, ona o tulaga leaga na latou fesagaʻia a o faafalepuipui i Meitir.

O loo faaauau pea ona lē amanaʻia e le malo Eritrea tapulaa faavaomalo e faatatau i aiā tatau a tagata. Ua faitioina e faalapotopotoga taualoa e puipuia aiā tatau a tagata le solia e le malo o Eritrea o aiā tatau a Molimau a Ieova i lenā atunuu, ma ua fautuaina le faaleleia o lea tulaga.

I le 2014, na iloiloina ai e le Fono Faatonu mo Aiā Tatau a Tagata (Human Rights Council-HRC) se lipoti faapitoa e faatatau i le tulaga o aiā tatau a tagata Eritrea. Na fautuaina e lenā lipoti le malo, ina ia amanaʻia aiā tatau a ē e teena le faia o ni galuega e lē taliaina e o latou lotofuatiaifo ina ia “ōgatusa ma tapulaa faavaomalo,” ma ia “faamautinoa le puipuia o soifua mālōlōina o pagota uma, ia faamautinoa foʻi e maua togafitiga faafomaʻi e i latou e manaʻomia . . . ma ia faaleleia nofoaga o faasalaga e tusa ai ma tapulaa faavaomalo.” I le iʻuga a le HRC i le 2015, na latou fautuaina ai le malo o Eritrea ina ia “saunia ni galuega e fai e i latou e lē taliaina e o latou lotofuatiaifo le faia o galuega faavaegaʻau.”

I le 2016, na faia ai le faaiʻuga a le Komisi Suʻesuʻe mo Aiā Tatau a Tagata Eritrea, ua faia e le malo o Eritrea se “solitulafono faasaga i tagata” ona ua latou sauāina Molimau a Ieova ma isi, ona “o a latou lotu ma ituaiga tagata e iai i latou.”

I le 2017, na faaalia ai e se Komiti i le Atu Aferika e taʻua o le African Committee of Experts on the Rights and Welfare of the Child (ACERWC), lo latou popole ona e lē o maua e “tamaiti Molimau a Ieova” le puipuiga faaletulafono o a latou aiā tatau ma ua faileagaina i latou, e ui i le iai o na puipuiga. Na fautuaina e le ACERWC le malo o Eritrea ina ia latou “amanaʻia ma puipuia atoatoa le saʻolotoga o se tamaitiiti e Faaali ai Ona Manatu, usitaʻi ai i lona Lotofuatiaifo ma faatāua lana Lotu, e aunoa ma le faailoga tagata.”

I le 2018 na fautuaina ai e le Komisi mo Aiā Tatau a Tagata Aferika le malo o Eritrea, ina “ia vave ona fai ni gaoioiga e foʻia ai le lē amanaʻia o aiā tatau a i latou uma o loo faafalepuipui e aofia ai . . . tagata Molimau a Ieova,” ma na latou fautuaina foʻi le faia o se suʻesuʻega i le maliliu ai o ni Molimau a Ieova na faafalepuipui. Na faamatilatila foʻi e lenei Komisi le tatau i le malo o Eritrea, ona faamautinoa e tumau pea ona avea Molimau a Ieova ma “tagatānuu o lenā atunuu auā o lo latou aiā tatau lenā.”

Iā Me 2019, na fautuaina ai e le Komiti mo Aiā Tatau a Malo Aufaatasi (CCPR) le malo o Eritrea ina ia faamautinoa e saʻoloto tagata e filifili a latou lotu ma mea e talitonu i ai. Ia faamautinoa foʻi ua “faasaʻoloto tagata uma na puʻea pe faafalepuipui e aofia ai ma Molimau a Ieova, ona o le faaaogāina o le saʻolotoga e filifili ai a latou lotu.” Na talosaga atu foʻi le CCPR i le malo o Eritrea, “ina ia faamautinoa le amanaʻia faaletulafono o i latou e teena galuega faavaegaʻau ona e lē taliaina e o latou lotofuatiaifo, ma ia saunia ni galuega mo tagata lautele e fai e na tagata.”

I se lipoti na faia iā Me 12, 2021, na faatonuina ai le malo o Eritrea e se tagata suʻesuʻe faapitoa tutoʻatasi e galue mo Malo Aufaatasi, ina ia “vave ona faasaʻoloto i latou uma o loo totoe na faafalepuipui ona o o latou talitonuga, e aunoa ma ni moliaga po o le faia o ni faamasinoga, ia e aofia ai Molimau a Ieova e toʻa 20.” Ia “toe iloilo le faaiʻuga na faia e aveesea ai le tulaga o Molimau a Ieova o ni tagatānuu o Eritrea ona o o latou talitonuga faalotu, ma ia faaaloalogia le fautuaga a le African Commission on Human and Peoples’ Rights, ina ia faamautinoa e toe maua e Molimau a Ieova a latou aiā tatau o ni tagatānuu. Ia faia foʻi se suʻesuʻega i Molimau a Ieova ia na lipotia mai na maliliu a o iai i le falepuipui.”

O le toʻatele o alii o loo faafalepuipui e lē iloa po o le ā le umi o a latou faasalaga. E leai se faamoemoe e faasaʻoloto i latou seʻi vaganā ai ua maliliu po ua lata foʻi ina maliliu. Talu ai e leai ni faiga faaletulafono aloaʻia po o ni fesoasoani e mafai ona maua e Molimau a Ieova, o lona uiga la e faafalepuipuiina i latou mo le olaga atoa.

1. Setema 16, 2024

   E toʻa 40 Molimau a Ieova na faafalepuipui.

2. Fepuari 1, 2021

   E toʻatolu Molimau a Ieova na faasaʻoloto mai i le falepuipui.

3. Ianuari 29, 2021

   E toʻatasi se Molimau na faasaʻoloto mai i le falepuipui.

4. Tesema 4, 2020

   E toʻa 28 Molimau a Ieova na faasaʻoloto mai i le falepuipui.

5. Mati 6, 2018

   Na maliu ai Habtemichael Mekonen i le 77 o ona tausaga, ina ua auina atu i le falepuipui o Mai Serwa.

6. Ianuari 3, 2018

   Na maliu ai Habtemichael Tesfamariam i le 76 o ona tausaga, ina ua auina atu i le falepuipui o Mai Serwa.

7. Iulai 2017

   Na auina uma atu Molimau na lokaina i le falepuipui i Meitir i le falepuipui o Serwa lea e tū i fafo atu o Asmara.

8. Iulai 25, 2014

   O le toʻatele o i latou na puʻea iā Aperila 14 ua toe faasaʻoloto, ae o le toʻa 20 o i latou na puʻea iā Aperila 27 ua faafalepuipuiina.

9. Aperila 27, 2014

   E toʻa 31 Molimau na puʻea a o faia le sauniga.

10. Aperila 14, 2014

    E silia ma le 90 Molimau na puʻea a o faia le Faamanatuga o le maliu o Keriso.

11. Aokuso 16, 2012

    Na maliu ai Yohannes Haile i le 68 o ona tausaga, a o faafalepuipui i lalo o tulaga e sili ona leaga.

12. Iulai 2011

    Na maliu ai Misghina Gebretinsae i le 62 o ona tausaga, a o faafalepuipui i lalo o tulaga e sili ona leaga.

13. Iuni 28, 2009

    Na osofaʻi ai e leoleo se fale o se Molimau a o fai se sauniga faalelotu ma na latou puʻea uma ai le toʻa 23 o Molimau a Ieova na auai, e 2 i le 80 tausaga le matutua.

14. Aperila 28, 2009

    Na ave ai e leoleo Molimau a Ieova uma na falepuipui i Meitir i se isi falepuipui, ae tuu ai na o le Molimau e toʻatasi.

15. Iulai 8, 2008

    Na osofaʻia e leoleo fale o aiga ma fale faigaluega ina ia puʻea le toʻa 24 o Molimau a Ieova, ma o le toʻatele o i latou e faalagolago i ai le tausiga o o latou aiga.

16. Me 2002

    Na tapunia uma ai e le malo lotu e lē o i lalo o le vaavaaiga a lotu e fā ua faamaonia e le malo.

17. Oketopa 25, 1994

    E ala i se tulafono a le peresitene na aveesea ai le avea o Molimau a Ieova ma tagatānuu o Eritrea ma a latou aiā tatau.

18. Setema 17, 1994

    Na faafalepuipui ai Paulos Eyasu, Isaac Mogos, ma Negede Teklemariam, e aunoa ma ni moliaga po o le faia o se faamasinoga.

19. I le vaitaimi o le 1940-1949

    Na faavaeina ai Molimau a Ieova i Eritrea mo le taimi muamua.