Irail me samanih Paipel kin pohnese me mesen nting kan me adaneki Tetragrammaton (יהוה) me kin wehwehkiong mwaren Koht, kin pwarada kereniong pak 7,000 ni ahnsou me Palien Paipel ni Lokaiahn Ipru tepin ntingdi. Ahpw, me tohto medewe me e sohte pwarada ni ahnsou me Palien Paipel ni Lokaiahn Krihk tepin ntingdi. Pwehki kahrepe wet, pali laud en kawehwehn Paipel en ahnsouwet sohte kin doadoahngki mwar wet Siohwa ni arail kin kawehwehdi palien Paipel me re kin kahdaneki Kadehde Kapw. Pil ni ahnsou me re kin kawehwe iren Paipel kan nan Kadehde Kapw, me kin pwurehng kapwurehda mahsen kan sang ni Palien Paipel ni lokaiahn Ipru me Tetragrammaton pwarada loale, pali laud en sounkawehwe kan kin doadoahngki “Kauno” ah kaidehn mwaren Koht.

New World Translation of the Holy Scriptures sohte idawehn koasoandi wet. E kin doadoahngki mwar wet Siohwa mpen pak 237 nan Palien Paipel ni Lokaiahn Krihk. Ni arail pilada en wia met, sounkawehwe kan pohnese ire mehlel riau pwukat: (1) Pelien nting en mahs akan en Palien Paipel ni Lokaiahn Krihk me mi rehtail rahnwet kaidehn uhdahn me tepin wiawihda. Pali laud en pelien nting kid kan me miehier rahnwet wiawihda kereniong sounpar riepwiki mwurin palien Paipel ni Lokaiahn Krihk eh tepin wiawihda. (2) Ahpw ni ahnsowo, irail kan me kin pwurehng ntingihda mahsen kan en Paipel kin wiliankihdi Tetragrammaton ong Kyʹri·os, lepin lokaiahn Krihk ehu me wehwehki “Kauno.” De re kin alasang pelien nting kan en Paipel me kin wiliankihdier Tetragrammaton ong Kyʹri·os.

Pwihn me wiahda New World Translation uhdahn kamehlele me mie mehn kadehde me Tetragrammaton pwarada nan tepin palien Paipel en mahs ni lokaiahn Krihk. Pilipil wet poahsoanda pohn mehn kadehde pwukat me mi pah:

• Palien Paipel ni Lokaiahn Ipru me kadoadoahk ni mwehin Sises oh sapwellime wahnpoaron ko kin audaudki Tetragrammaton nan neirail Paipelo pwon. Mahso pali laud en aramas sohte kin akupwungki soahng pwukat. Ahnsouwet pelien nting en Palien Paipel ni Lokaiahn Ipru sang ni mwehin tepin Kristian akan dierekdahr nan Qumran. Eri mehn kadehde pwukat uhdahn sansal kahrehda kitail sohte kak peikasalki met.

• Ni mwehin Sises oh sapwellime wahnpoaron ko, Tetragrammaton pil pwarada nan Palien Paipel ni Lokaiahn Ipru me re kawehwehdi  ong ni lokaiahn Krihk. Erein sounpar epwiki kei, me samanih Paipel kan kin medewe me Tetragrammaton sohte pwarada nan pwuhk me adaneki Septuagint me mi ni lokaiahn Krihk me kawehwehdi Palien Paipel en Lokaiahn Ipru. Nanpwungen pahr 1940 lel pahr 1950, kisin tehn doaropwe kei me kisehn Septuagint me mi ni mwehin Sises, sansaldahr ong irail kan me samanih Paipel. Kisin tehn doaropwe pwukat kin audaudki mwaren Koht ni mesen nting en Ipru. Eri ni mwehin Sises, mie mwaren Koht nan Paipel en lokaiahn Krihk. Ahpw, mpen sounpar 300 mwurin Krais, Septuagint ni lokaiahn Krihk me pali laud kin doadoahngki, me duwehte Codex Vaticanus oh Codex Sinaticus, sohte mie mwaren Koht nan pwuhk kan sang Senesis lel Malakai (nan wasa kan me mwaren Koht mi nan kisin tehn doaropwe kan en mahs). Ihme kahrehda e sohte kapwuriamwei me nan pwuhk kan me nekinekla ahnsowo, mwaren Koht sohte dierek nan Kadehde Kapw, de Palien Paipel ni Lokaiahn Krihk.

  Sises mahsanih ni sansal: “I kohkihdo ni mwaren Semei.” E pil ketin kasalehda me sapwellime doadoahk kin wiawi ni ‘mwaren Seme’

• Palien Paipel ni Lokaiahn Krihk kasalehda me Sises kin ketin doadoahngki oh kasansalehda mwaren Koht ong meteikan. (Sohn 17:6, 11, 12, 26) Sises ketin mahsanih: “I kohkihdo ni mwaren Semei.” E pil ketin kasalehda me sapwellime doadoahk kin wiawi ni ‘mwaren Seme.’​—Sohn 5:43, NW; 10:25, NW.

• Pwehki Koht me ketin kahrehiong Palien Paipel ni Lokaiahn Krihk en patehng Palien Paipel ni Lokaiahn Ipru, eri ira sohte pahn pahrekpene ma mwaren Siohwa pahn mwadangete salongasang nan Palien Paipel ni Lokaiahn Krihk. Nan mpen pahr 50 mwurin Krais, tohnpadahk Seims ndaiong me mah kan nan Serusalem: “Simion kawehwehda mwahu duwen Koht eh ehdin ketin sohpeiong mehn liki kan pwehn ketikihsang aramas kei ong mwareo.” (Wiewia 15:14; NW.) E sohte pahn pwung ong Seims en nda soahng pwukat ma sohte aramas emen me ese de kin doadoahngki mwaren Koht ni mwehin tepin Kristian ko.

• Kamwotepen mwaren Koht pwarada nan Palien Paipel ni Lokaiahn Krihk. Mwaren Koht mi nan lepin lokaia wet “Aleluia” nan Kaudiahl 19:1, 3, 4, 6 (NW). E kohsang ni lepin lokaiahn Ipru ehu me wehwehki “Kapinga Jah.” “Jah” iei kamwotepen mwaren Siohwa (Jehovah). Eden aramas tohto me pwarada nan Palien Paipel ni Lokaiahn Krihk kohsang ni mwaren Koht. Ni mehlel, pwuhk en roporop kan me pid ire wet kawehwehda me mwaren Sises kin wehwehki “Siohwa Iei Komour.”

•   Nting kan en mehn Suhs akan mahs kasalehda me Kristian en mehn Suhs kan kin doadoahngki mwaren Koht nan neirail pwuhken Paipel kan ni lokaiahn Krihk. Tosefta, ehu pwuhk en kosonned en mehn Suhs me rikirikpene oh kaimwisekala mpen pahr 300 mwurin Krais, koasoiahki imwintihti kan ar isikala nein Kristian ko pwuhk kan ni rahnen Sapad: “Pwuhken Sounkalohki Rongamwahu kan oh pwuhk kan en minim [mehn Suhs Kristian kan] isihsla. Re mweidohng pwuhk ko en isihsla, iangahki wasa kan me Mwaren Koht pwarada ie nan pwuhk pwukat.” Pwuhk wet pil doula koasoia duwen Sounpadahk men me ede Yosé mehn Kalili, me kin momour nan pahr 100 samwa mwurin Krais, koasoia me nan rahn teikan nan wihk ehu, “emen kin kihsang wasa kan me Mwaren Koht  mi ie nan pwuhk pwukat [me kin dokedoke pwuhken Paipel kan ni lokaiahn Krihk] oh nekidala soahng pwukat, ah luhwe ko isihsla.”

• Ekei me kin samanih Paipel pohnese me e mwomwen me mwaren Koht pwarada nan wasa kan me iren Paipel kan sang nan Palien Paipel ni Lokaiahn Ipru kin dierek nan Palien Paipel ni Lokaiahn Krihk. Pahnangin oaralapo “Tetragrammaton nan Kadehde Kapw,” ehu dikseneri (The Anchor Bible Dictionary) koasoia: “Mie ekei mehn kadehde me Tetragrammaton, Mwaren Koht, Yaweh, pwarada nan ekei de koaros iren Paipel kan en K[adehde] M[ering] me dierek nan K[adehde] K[apw] ni ahnsou me K[adehde] K[apw] tepin ntingdi.” George Howard, emen ohl me kin samanih Paipel koasoia: “Tetragrammaton ntingdi nan Paipel ni lokaiahn Krihk  [Septuagint] me wia kawehwehn Palien Paipel en Lokaiahn Ipru ong lokaiahn Krihk me tepin Kristian kan kin doadoahngki. Ire mehlel wet kasalehda me e konehng en nda me irail kan me ntingihada K[adehde] K[apw] kin doadoahngki Tetragrammaton ni arail kin pwurehng kapwurehda mahsen kan sang nan Palien Paipel ni Lokaiahn Ipru.”

• Sounkawehwe ndand kan kin doadoahngki mwaren Koht nan Palien Paipel ni Lokaiahn Krihk. Ekei sounkawehwehn Paipel pwukat doadoahngkihier mwaren Koht pil mwohn New World Translation eh wiawihda. Iet sounkawehwe pwukat oh arail kawehwehn Paipel kan: A Literal Translation of the New Testament . . . From the Text of the Vatican Manuscript, sang Herman Heinfetter (1863); The Emphatic Diaglott, sang Benjamin Wilson (1864); The Epistles of Paul in Modern English, sang George Barker Stevens (1898); St. Paul’s Epistle to the Romans, sang W. G. Rutherford (1900); The New Testament Letters, sang J.W.C. Wand, Pisop en London (Bishop of London) (1946). Pil kapatahiong met, nan ehu kawehwehn Paipel en lokaiahn Spein me wiawihda nan pahr 1919, sounkawehwe men me ede Pablo Besson kin doadoahngki “Jehová” nan Luk 2:15 oh Sud 14, oh kisin nting daulih 100 (footnote) nan ah kawehweo, e kasalehda me mie mwaren Koht nan wasa pwukat. Pil mwohn kawehwe pwukat, Palien Paipel ni Lokaiahn Krihk me kawehwehdi ni lokaiahn Ipru me wiawihda nan pahr 1500 samwa kin doadoahngki Tetragrammaton nan iren Paipel tohto. Ni lokaiahn Sehmen kelehpw, kawehwehn Paipel 11 de tohtohsang kin doadoahngki  “Siohwa” (de “Yahweh”) nan Palien Paipel ni Lokaiahn Krihk, oh sounkawehwe pahmen kin kapatahiong mwaro nan parentheses ( ) mwurin “Kauno.” Paipel en lokaiahn Sehmen me tohto sang kawehwe 70 doadoahngki mwaren Koht nan kisin nting kan (footnotes) de nan kawehwehn lepin lokaia kan.

• Kawehwehn Paipel ni soangsoangen lokaia me daulih epwiki kin audaudki mwaren Koht nan Palien Paipel ni Lokaiahn Krihk. Kawehwehn Paipel tohto ni lokaiahn Aperika, Amerika (Native American), Eisia, Iurop, oh dekehn Pacific kan kin doadoahngki mwaren Koht ni saledek. Sounkawehwehn Paipel ong kawehwe pwukat pilada en doadoahngki mwaren Koht ong kahrepe kei duwehte me kohda nan parakrap en mwoweo. Ekei kawehwehn Paipel pwukat ni Palien Paipel ni Lokaiahn Krihk, ahpwtehn wiawihda, me duwehte kawehwehn Paipel ni lokaiahn Rotuma (1999) me doadoahngki “Jihova” pahn pak 51 nan iretikitik kan meh 48 nan Paipel, oh Paipel ni lokaiahn Batak (Toba) (1989) sang Indonesia, me pil doadoahngki “Jahowa” pahn pak 110.

Ni soh peikasal, mie kahrepe mwahu oh sansal en kolokol mwaren Koht, Siohwa, nan Palien Paipel ni Lokaiahn Krihk. Ih met me sounkawehwehn New World Translation kan wia. Re uhdahn wauneki mwaren Koht oh uhdahn masak kihsang sohte lipilipil dahme mi nan Paipel ni ahnsou me e tepin wiawihda.​—Kaudiahl 22:18, 19.