Nda̱wa̱á rí tsiguʼ 4026 ts.g.

“A̱bu̱nʼ” naʼthí rí Jeobá rakáʼyoo maʼtáñajunʼ ga̱jma̱a̱ tseʼtañajunʼ májánʼ. Jeobá nakudaminaʼ rí mbá “tsígá” makujmbi̱i̱ a̱bu̱nʼ, Satanás (Génesis 3:1-5, 15; nota). Mú naniñuʼ nguáthá mbiʼi rí xa̱bu̱ numbaaʼ mutañajumijná náa majñuʼ Satanás.

Tsiguʼ 1943 ts.g.

Jeobá niʼthúu̱n Abrahán dí mbáa dí i̱jín xíñiiʼ ikhaa ma̱ʼkha̱ “tsígáʼ” bi̱ nijuiʼthá ma̱ʼkha̱ (Génesis 22:18).

Nda̱wa̱á rí tsiguʼ 1070 ts.g.

Jeobá naʼthúu̱n rey David, ga̱jma̱a̱ nda̱wa̱á a̱ʼdióo Salomón, rí bi̱ gáguwáʼ náa ikhiin ma̱ʼkha̱ “tsígáʼ” bi̱ nijuiʼthá ma̱ʼkha̱ (2 Samuel 7:12, 16; 1 Reyes 9:3-5; Isaías 9:6, 7).

Tsiguʼ 29 ts.n.

Jeobá naʼthí dí Jesús nindxu̱u̱ “tsígáʼ” bi̱ nijuiʼthá ma̱ʼkha̱ ga̱jma̱a̱ bi̱ magiʼi náa xíliúu David (Gálatas 3:16; Lucas 1:31-33; 3:21, 22).

 Tsiguʼ 33 ts.n.

Satanás, “a̱bu̱nʼ” naʼni rí muxiyáa Jesús, ga̱jma̱a̱ xúʼko̱ naʼnigawúnʼ mbéguʼ “tsígáʼ” bi nijuiʼthá ma̱ʼkha̱. Jeobá naʼnigabi̱i̱ Jesús, naʼni dí mata̱nga̱a̱ mekhuíí ga̱jma̱a̱ nagruigú mbá rí gíʼdoo wéñuʼ numuu dí Jesús nixnáximinaʼ xóo mbáa xa̱bu̱ bi̱ ragíʼdoo aʼkhá. Ga̱jma̱a̱ numuu rígi̱ nandoo naʼni mba̱a̱ a̱jkiu̱u̱n numuu aʼkhá ga̱jma̱a̱ dí e̱ji̱i̱n Adán ma̱ndoo makuwá kámuu mbiʼi (Génesis 3:15; Hechos 2:32-36; 1 Corintios 15:21, 22).

Mijngii tsiguʼ 1914 ts.n.

Jesús nidatiguíi “a̱bu̱nʼ náa tsu̱du̱u̱ Ku̱ba̱ʼ ga̱jma̱a̱ naʼni maxtáa ikhí mbá chíʼgíʼ mbiʼi (Revelación 12:7-9, 12).

Rí marigá nda̱wa̱á

Jesús naruguaraʼaa mbá míí tsiguʼ Satanás nda̱wa̱á naxíyáa. Xúʼko̱ makujmbi̱i̱ edxu̱u̱ xóo muʼthá. Ikhú nambánuu dí phú nindoo maʼni Jeobá gajmíi̱n xa̱bu̱ numbaaʼ ga̱jma̱a̱ Ku̱ba̱ʼ. Mbiʼyuu Dios naguma kaʼwi̱i̱ ga̱jma̱a̱ numuu xúgíʼ dí minduwaʼ, ma̱ngaa nakujmaa dí xóo eʼtáñajunʼ ikhaa nindxu̱u̱ májánʼ wéñuʼ (Revelación 20:1-3, 10; 21:3, 4).