Gikan sa Among mga Magbabasa

Ekolohikanhong Dangpanan Salamat sa artikulong “Ang Pantanal​—Usa ka Makaiikag nga Dangpanan.” (Septiyembre 8, 1999) Sa akong handurawan akong gikuyogan ang magsusulat ngadto nianang makaiikag nga dapit, nga nagpahimulos sa pakigdait ug kamalinawon nga naglungtad didto. Ako maikagong naghulat sa panahon sa dihang ang Diyos mopalukop sa susamang mga kahimtang sa tibuok planeta.

M. A., Italya

Diabetes Mao pay pagkatapos nakog basa sa ikaduhang higayon sa artikulong “Ang Imong Anak nga Babaye Dunay Diabetes!” (Septiyembre 22, 1999) Napulo ka bulan ang miagi akong nahibaloan nga ako adunay Type 1 nga diabetes. Ako maoy himsog gayod nga tawo kanhi, nga nag-alagad ingong payunir, usa ka bug-os-panahong ebanghelisador, sukad sa edad 17. Kinahanglang mohimo akog daghang pagpasibo sa akong kinabuhi sulod sa milabayng pipila ka bulan. Kinahanglan akong mogamit ug himan nga mobomba ug insulin sa akong lawas, ug napugos ako sa paghunong sa pagpayunir tungod sa galastohan sa pag-atiman sa akong sakit. Apan ako nagpasalamat kaninyo tungod sa pagpatik ug mga artikulo nga magpahinumdom kanamo nga ang uban nakaagom sa susamang mga pagsulay.

B. F., Tinipong Bansa

Ang akong kuwatro-anyos nga anak lalaki nag-antos sa diabetes sukad nga siya dos-anyos. Ang pagbati nga gipahayag ni Sonya ug sa iyang pamilya diha sa artikulo pamilyar kaayo kanamo. Mapasalamaton kami tungod sa mahigugmaong Kristohanong panag-igsoonay nga nakatabang kanamo sa pagsagubang.

C. R., Moldova

Taudtaod na nga ako nagpaabot ug makapadasig nga basahon bahin niining ulohana. Ako 17 anyos ug nag-antos sa diabetes sukad nga ako 5 anyos. Usahay, malisod kaayo ang pagsagubang niining sakita. Apan ako nalipay sa pagkabaton ug usa ka yanong artikulo nga akong ikapakita sa akong pamilya ug sa tanan nakong mga higala nga motubag sa ilang mga pangutana ug mopalapad sa ilang kahibalo bahin sa diabetes.

K. W., Canada

Dili-Hilwas? Akong nabasa ang usa ka maayo kaayong artikulo nga nag-ulohang “Ang Kababayen-an May Dakong Bahin.” (Hunyo 22, 1999) Medyo natingala ako sa pagkakita nga ang mga babayeng mga trabahante sa konstruksiyon wala magsul-ob ug bisan unsang proteksiyon sa mata.

R. L., Tinipong Bansa

Ang among mga magbabasa makaseguro nga kining boluntaryong mga trabahante nagsul-ob ug proteksiyon sa mata sa dihang aktuwal nga naghimo sa ilang trabaho. Gihangyo sila sa pagpahiluna alang niini nga mga letrato​—nga walay proteksiyon sa mata​—aron ang ilang mapahiyomong mga dagway mas maaninag ug maayo.​—ED.

Inhustisya Buot kong magpasalamat kaninyo tungod sa artikulong “Mga Batan-on Nangutana . . . Sa Unsang Paagi Nako Masagubang ang Inhustisya?” (Septiyembre 22, 1999) Bisan kon ako batan-on, ako nag-antos ug daghang inhustisya ug kapintasan sa akong kinabuhi, hilabihan ka daghan nga ako nakabaton ug lalom nga emosyonal nga mga samad. Kini nagpalisod kanako sa pagtuman sa akong kalihokan ingong usa ka payunir, nga akong gipakig-ambitan sulod na sa milabayng walo ka tuig. Ako gipasaligan pag-usab sa tudling-pulong nga nag-ingon: “Himoa ang imong maarangan aron makasagubang.” Kining mga pulonga nagpasundayag ug gugma, ug ako kinasingkasing nga nagpasalamat kaninyo.

A. G., Italya

Musika Ako usa ka ansiyano sa Kristohanong kongregasyon sulod na sa katuigan ug kanunayng nagpakitag interes sa mga batan-on. Apan di pa dugay ako mibatig kahigawad, kay ang tambag nga akong gipaningkamotang ihatag bahin sa mga kapeligrohan sa pipila ka modernong musika wala panumbalinga. Bisan pa niana, ang seryeng “Musika​—Mas Puwersado kay sa Imo Tingaling Gihunahuna” (Oktubre 8, 1999) mao gayoy akong gikinahanglan. Ang mga pangutlo gikan sa mga tinubdan sa gawas bahin sa negatibong mga epekto sa pipila ka musika maoy ekselente. Akong ipaambit kining mga ideyaha sa among mga batan-on.

D. H., Bolivia

Ingong mang-aawit ug magtutudlo sa tunghaang-elementarya, akong nakaplagan nga makaiikag kaayo ang inyong di pa dugayng mga artikulo bahin sa musika. Salamat!

K. F., Tinipong Bansa