Guutip isiginnittaasia

Timersuutit ulorianartut – Sapiillisaassavit?

“ULLUTSINNI INUPPASSUIT ISIGINNAAR­TUUJUNNAARLUTIK NAMMINEQ KIGAALLAS­SAASERLUTIK TIMMISARTUKKUT PISSITTARPUT, INNAANNARSUAKKUT NINGITTARPUT, QORLORTORSUAKKUT QAJARIAMIK IMMINUT NAKKARTITTARPUT EQALUSSUIL­LUUNNIIT AKORNANNI AQQARTARLUTIK.” – TAAMA AVIISI THE WILLOW GLEN RESIDENT ALLAPPOQ.

Taamatut allaaserisaqarnerup ersersippaa timersornerit aalajangersimasut nuannarineqaleralut­tuinnartut. Kigaallas­saaserluni timmisartumit pissinneq, sermersuakkut innaannakkut majuarneq, aarsaarneq allallu nuannarineqaleriar­tortillugit erserpoq inuppassuit inuunertik navianar­torsior­tillugu killissarititartik tikillugu misileraarusulersimasut. Aamma inuit cykelit, sisoraatit, snowboardit, skateboardit sukuutsillu assakaassullit atorlugit imminnut navianar­torsior­tittarput. Atuagassiaq Time naapertorlugu inuppassuit killissartik misilerarusullugu timersuutit nuannarineqarluartut ulorianartut pissanganar­torsiorusullutik misilerar­talersimavaat.

Timersuutit ulorianartut nuannarineqaleralut­tuinnar­tillugit timersuutillu nalinginnaasut ulorianar­nerusumik atorneqar­talermata inuppassuit ajoquser­nerusalerput. USA-mi 1997-mi skateboarderlutik aqqunarsimasut 33 procentinik, snowboarderlutik 31 procentinik qaqqasiorlutillu 20 procentinik pinasuartumik nakorsiar­tarfimmut saaffigin­nissimasut amerleriarsimapput. Timersuutilli ilaat suli ajornerupput inuunermik naleqarsimagamik. Inuit tamakkuninnga timersuuteqartartut nalunngilaat ulorianartuusut. Arnaq imminut navianar­torsior­tilluni sisorartartoq ima oqarpoq: “Toqoriataarsin­naanera eqqarsaatigiuarpara.” Akissarsiaqarluni snowboardertartoq ima oqarpoq: “Aqqunarsiman­ngikkuit ilungersor­nerusariaqarputit.”

Tamakku eqqarsaatigalugit kristumiu tamakkuninnga sammisaqarsinnaava? Aalajangiiniar­nitsinni Biibili qanoq iluaqutigisin­naavarput? Tamakku akissutis­sarsisin­naavagut Guutip inuunerup illernas­susianik isiginnittaasia sammigutsigu.

Guutip inuunermik isiginnittaasia

Biibilimi allassimavoq Jehova tassaasoq “inuunerup puilaffia”. (Tussiaat 36:10) Inuunermik tunigamisigut alutornar­torpassuarnillu pinngor­titsigami erserpoq kissaatigigaa inuuneq nuannaarutigis­sagipput. (Tussiaat 139:14; Apustilit Suliaat 14:16, 17; 17:24-28) Taamaattumik tupinnan­ngitsumik kissaatigaa inuunerput paarilluas­sagipput. Israalikkunnut inatsisit najoqqutassiallu tunniun­neqartut ersersippaat Guutip inuuneq qanoq pingaar­titsigigaa.

Moorsisip inatsisaani allassimasoqarpoq inuup allap inuunera illersor­niarlugu isumannaal­lisaasoqar­tassasoq. Inatsisit taakkua maleruar­neqarsiman­nginnerat pissutigalugu toqusoqarpat akisussaasoq toqutsisutut pisuutin­neqassaaq. Illuutilik piumaffigineqarpoq illumi qaava toqqissoq ungalulersussagaa imaluunniit pukkitsumik qarmassagaa. Taamaaliorsiman­ngikkuni illullu qaavanit nakkarluni toqusoqarpat toqutsisutut pisuutin­neqassaaq. (Mosesimik 5. 22:8) Ussiup inuk toqullugu nassummeriataarpagu piginnittua pisuutin­neqassanngilaq. Ussilli ulorianartutut ilisimaneqarpat piginnit­tuatalu mianersoq­qunneqareerluni nakkutigisiman­ngikkuniuk toqutsisutut pisuutin­neqassaaq toqunneqarsin­naallunilu. (Mosesimik 2. 21:28, 29) Jehovap inuuneq erlinnartutut isigigamiuk Israalikkunnut inatsisit taakku tunniuppai kissaatigigamiullu inuit inuunertik paarissagaat.

Guutip kiffaasa aalajaatsut paasivaat najoqqutassiat taakku inuup nammineq inuunerminik navianar­torsior­titsineranut aamma tunngas­suteqartut. Biibilimi oqaluttuat ilaanni atuarparput Daavi oqamisaartoq imeq Betlehem­mimiittoq illigalugu. Betlehemmili filisterinit tiguarneqarsimavoq. Daavip sakkutuuisa pingasut oqaasii tusaramikkit filisterit tammaarfiatigoorlutik Betlehemmimi imiisiviliamit imermik qaluseriarlutik Daavimukaassipput. Daavili qanoq qisuariarpa? Imeq imerusunngilaa nunamullu kuillugu oqarluni: “Naalakkap taamaalior­tinngil­luinnarilinga! Angutit inuunertik navianar­torsior­tillugu aallersut aavat imerumas­sanerpara?” (Nalunaarsuutit 1. 11:17-19) Daavip kissaatigin­ngilluinnarpaa nuannar­tikkumalluni allat inuunertik navianar­torsior­tissagaat.

Jiisusi Diaavulumit takorruuisitaagunarluni guutisiorfiup qarmarsuata portunersaanut pisinneqarluni inngilit akussaneraat paasiniarlugu Diaavulup Jiisusi ammut pisseqqummani assingusumik qisuariarpoq. Jiisusip oqarfigaa: “Jehova Guutit misilis­sanngilat.” (Matiusi 4:5-7) Daavip Jiisusillu nalunngilaat pisariaqan­ngitsumik inuunermik navianar­torsior­titsineq Guutip isaani eqqunngitsuusoq.

Tamakku eqqarsaatigalugit imminut ima aperisin­naavugut: ‘Timersuutit suut ulorianar­tuuppat, suullu ulorianar­tuunngillat? Inuit ilaasa timersuutit nalinginnaasut ulorianar­tunngorlugit atortaramikkit ulorianan­ngitsumik qanoq atorsin­naavakka?’

Qanoq kinguneqarsinnaava?

Aalajangiiniar­nitsinni timersuutiginiagarput eqqarsaatigeq­qissaar­tariaqarparput. Assersuutigalugu imminut ima aperisin­naavugut: ‘Timersuummi tamatumani ajutoor­toqakulasarpa? Timersuut sungiul­luarsimavara, ajutuun­nginnis­sannullu illersuutinik peqarpunga? Orluguma pissinniarlungaluunniit naatsorsuinerlukkuma imaluunniit illersuutissakka aserorsimappata qanoq kinguneqassava? Ajoqusernera annikitsuin­naassava, imaluunniit ajoquserujus­suassaanga toqullungaluunniit?’

Kristumiu piaaraluni ulorianartumik timersortaruni Jehovamut attaveqarnini innarlersinnaavaa, ilagiin­niittunullu allanut maligas­saalluassanani. (Timuutiusimut 1. 3:2, 8-10; 4:12; Tittusi 2:6-8) Paasinarpoq allaat aliikkutanut tunngatillugu Pinngor­titsisitta inuunerup illernar­tuuneranik isiginnittaasia eqqarsaatigisariaqaripput.