Pono ya Beibele

“Dipapadi tše di Feteletšego”—Na o Swanetše go Lekela Hlogong?

“MATŠATŠING A, BA BANTŠI BA RENA RE TLOGETŠE MADULO A BABOGEDI BAKENG SA GO FOFA KA NOŠI GO TŠWA SEFOFANENG SE SE LEGO GODIMO KA PARATŠHUTE, GO THEOGA DITHABENG KA THAPO, GO SESA GODIMO GA DIPHORORO LE GO NWELELA LE DI-SHARK.”—KURANTA YA WILLOW GLEN RESIDENT.

MANTŠU a a hlalosa tshekamelo e golago go tša dipapadi. Go gola mo go lemogegago ga go tuma ga dipapadi tše bjalo ka go fofa sefofaneng se se lego godimo ka pharatšhute, go thelela lehlweng, paragliding le go fofa ga mohuta wa BASE, * go bonagatša go rata ga lefase go lekela hlogong. Dikepe tša lehlwa, dipaesekele tša go namela dithaba, mapolanka a maotwana ao go thelelwago ka ona (di-skateboard) le dieta tša maotwana a go lokologana tša go thelela (di-in-line skate) le tšona di dirišwa go katološa mellwane ya motho ka noši ka go katanela go fenya dithaba tše ditelele-telele, magaga a matelele le go fofa mo go telele. Bjalo ka ge makasine wa Time o bolela, go gola ga go tuma ga “dipapadi tše di feteletšego”—dipapadi tšeo go tšona batšea-karolo ba ipeago kotsing kudu—di gatelela go fišegela ga ba dimilione go tšea karolo “leribeng la tshwantšhišo, moo kotsi, bokgoni le poifo di kopanago bakeng sa go nea bafenyi ba mafelelong a beke le bo-ramabelo ba tumilego ka mo go swanago maikwelo a go feteletša mellwane ya motho ka noši.”

Lega go le bjalo, go tuma mo mo go oketšegago le gona go tla le ditshenyagalelo tše phagamego tša motho ka noši. Batho ba bantši kudu ba a gobala ge dipapadi tše di šireletšegilego ka tekanyo e itšego di feteletšwa. Ka 1997 kua United States, diketelo tša go etela phapošing ya balwetši ba tšhoganetšo ka baka la dikgobalo tšeo di tswalanago le go thelela ka mapolanka a maotwana di oketšegile ka mo e ka bago ka godimo ga 33 lekgolong, tše 31 lekgolong bakeng sa go namela sekepe sa lehlwa le tše 20 lekgolong bakeng sa go namela thaba. Bakeng sa dipapadi tše dingwe, ditla-morago e tloga e le tše šoro kudu, bjalo ka ge go ka bonwa palong e golago ya mahu ao a tswalanago le dipapadi tše di feteletšego. Baboleledi ba dipapadi tše ba lemoga dikotsi tša tšona. Mosadi yo mongwe yo a tšeago karolo go tša go thelela lehlweng ka mo go feteletšego o re: “Ka mehla ke nagana ka lehu.” Mosesiši yo a tumilego wa lehlweng o akaretša se ka gore ge e ba “o sa gobale, gona ga o katane ka matla ka mo go lekanego.”

Ka baka la ditherešo tše, Bakriste  ba swanetše go lebelela bjang go tšea karolo dipapading tše bjalo? Beibele e ka re thuša bjang go direng phetho ya ge e ba re swanetše go tsenela dipapadi tše di feteletšego? Go ela hloko kamoo Modimo a ikwago ka gona ka go kgethega ga bophelo go tla thuša go araba dipotšišo tše.

Pono ya Modimo ka Bophelo

Beibele e re botša gore Jehofa ke “mothôpô wa bophelô.” (Psalme 36:9) Go feta go bopa batho, gape o ile a hlokomela kudu ka go re nea seo re se nyakago bakeng sa gore re thabele bophelo. (Psalme 139:14; Ditiro 14:16, 17; 17:24-28) Ka gona, ke mo go kwalago go phetha ka gore o letetše gore re hlokomele seo a re filego sona ka botho. Melao le melao ya motheo yeo e bego e filwe setšhaba sa Isiraele e re thuša go lemoga therešo yeo.

Molao wa Moše o be o nyaka gore motho a gate megato bakeng sa go šireletša maphelo a ba bangwe. Ge e ba seo se be se ka se ke sa dirwa gomme bophelo bja loba, yo a bego a swanetše go thibela masetla-pelo o be a tla lebelelwa a e-na le molato wa madi. Ka mohlala, mong wa ntlo o be a laetšwe go aga leboto le lenyenyane goba legora, leo le bitšwago lefawana go dikologa tlhaka yeo e ikadilego ya ntlo ya gagwe e mpsha. Go sego bjalo, ntlo e be e tla baka molato wa madi ge e ba motho yo mongwe a be a ka wa a e-tšwa tlhakeng gomme a hwa. (Doiteronomio 22:8) Ge e ba kgomo e ile ya thula motho ka mo go sa letelwago gomme a hwa, mong wa kgomo o be a ka se ke a lebelelwa a ikarabela. Ka lehlakoreng le lengwe, ge e ba kgomo e be e tsebja e le kotsi gomme mong wa yona a lemošitšwe eupša a se ke a diša kgomo ka tshwanelo, ka gona ge e ba kgomo e thutše motho, mong wa kgomo o be a tla lebelelwa a e-na le molato wa madi gomme o be a ka bolawa. (Ekisodo 21:28, 29) Ka ge bophelo bo le bohlokwa go Jehofa, Molao wa gagwe o bonagatša tlhompho e kgolo bakeng sa go babalelwa le go šireletšwa ga bophelo.

Bahlanka ba botegago ba Modimo ba kwešišitše gore melao ye ya motheo e akaretša le go ipea ga motho kotsing ka mo go swanago. Pegong e nngwe ya Beibele, Dafida o ile a bolela kganyogo ya gagwe ya ge e ba a ka kgona go “nwa [meetse] a sediba sa kxorong ya Betlehêma.” Betlehema e be e le ka tlase ga taolo ya ba-Filisita ka nako yeo. Ge ba e-kwa kgopelo ya Dafida, ba bararo ba bahlabani ba gagwe ba ile ba šwahlela dikampeng tša ba-Filisita, ba kga meetse sedibeng sa Betlehema gomme ba a tliša go Dafida. Dafida o ile a arabela bjang? Ga se a nwa meetse ao, eupša go e na le moo o ile a a tšhollela fase. O itše: “A Modimo wa-ka a nthibêlê xo dira tše byalo! Afa nka nwa madi a banna bá ba ba ilexo bà [lahla] bophelô bya bôná? Ka xobane ba a tlišitše bà xafile bophelô bya bôná.” (1 Koronika 11:17-19) Go Dafida e be e le bošilo go bea bophelo kotsing bakeng sa kgotsofalo ya gagwe ya motho ka noši.

Jesu o ile a arabela ka mokgwa o swanago, mohlomongwe a le ponong, ge Diabolo a be a mo leka gore a ikwišetše fase go tloga sehlweng sa tempele, go bona ge e ba barongwa ba be ba tla mo šireletša gore a se gobale. Jesu o ile a fetola ka gore: “Morêna Modimo wa xaxo O se kê wa Mo leka!” (Mateo 4:5-7) Ee, bobedi Dafida le Jesu ba ile ba lemoga gore ke phošo mahlong a Modimo go ipea dikotsing tše di sa nyakegego tšeo di ka gobatšago bophelo bja motho.

Re sa dutše re gopola mehlala ye, re ka ipotšiša gore, ‘Re ka bontšha bjang phapano e lego molaleng mabapi le seo e lego papadi e feteletšego goba e kotsi? Ka ge gaešita le sebopego seo se tlwaetšwego sa boitapološo se se kotsi ka bosona, se ka fetišetšwa ditekanyetšong tše di feteletšego, re ka lemoga bjang gore ke bokgole bofe bjo re swanetšego go fihla go bjona?’

Na ke mo go Swanetšego go Lekela Hlogong?

Go lekodišiša ka potego papadi le ge e le efe yeo re ka e akanyago go tla re thuša go hwetša karabo. Ka mohlala, re ka ipotšiša, ‘Papadi ye e kotsi ka tekanyo e kaaka’ng? Na ke na le sedirišwa sa go itlwaetša goba seo se šireletšegilego seo se nyakegago bakeng sa go thibela dikgobalo? Go tla ba le ditla-morago dife ge nka wa goba ka fofela mo go fošagetšego goba ge e ba sedirišwa sa-ka sa boiphemelo se palelwa? Na e tla ba kotsi e nyenyane goba go tla ba le kgonagalo ya kgobalo e šoro kudu goba lehu?’

Go ipea dikotsing tše di sa nyakegego ka baka la boitapološo go ka kgoma tswalano e bohlokwa ya Mokriste wa therešo le Jehofa gotee le go kgethelwa ga gagwe ditokelo tše di kgethegilego ka phuthegong. (1 Timotheo 3:2, 8-10; 4:12; Tito 2:6-8) Ke mo go lego molaleng gore gaešita le ge ba tsenela dipapadi tša boitapološo, Bakriste ba dira gabotse go nagana ka pono ya Mmopi mabapi le kgethego ya bophelo.

[Mongwalo wa ka tlase]