Gikan sa Among mga Magbabasa

Pagpangidnap Ako nagsulat aron ipaabot ang akong linaing mga pasalamat sa seryeng “Pagpangidnap​—Kon Nganong Usa ka Tibuok-Yutang Hulga.” (Disyembre 22, 1999) Sa miaging bulan dihay pagpanulis sa supermarket nga akong gitrabahoan. Duha ka nagmaskarang lalaki ang misulod, nga ang usa nagtion ug pusil. Tungod kay ang mga artikulo nagpakita nga ang mga biktima sa pagpangidnap kinahanglang mosunod segun sa isulti kanila, wala ako mosupak samtang ilang gigapos ang akong mga kamot ug mga tiil, ug gitaptapan ang akong mga mata ginamit ang teyp ug gipalingkod ako sa salog. Ilang gikawat ang 9,500,000 yen (duolan sa $90,000 T.B.). Apan ako nagpabiling kalmado ug wala masakiti. Ang artikulo miabot gayod sa hustong panahon!

S. H., Hapon

Nalingaw sa Pagmata! Ang pagkamembro sa Assembly of God nga iglesya wala magpugong kanako sa pagbasa sa Pagmata! Wala pa akoy nabasa nga bisan unsang ubang magasin nga aduna nianang taas nga kalidad ug uban nianang nagkadaiyang mga ulohan. Wala akoy telebisyon sa balay, apan subsob akong makahisgot sa kinaulahiang mga topiko uban sa akong mga higala tungod kay akong nabasa kini diha sa inyong magasin.

A.B.A., Brazil

Hamis nga Pagpamalbas Ang artikulong “Hamis nga Pagpamalbas” (Enero 22, 2000) miabot kanako sa husto gayod nga panahon. Ang akong bana nanginahanglan na karon sa kanunayng pag-atiman ug dili na makapamalbas sa iyang kaugalingon. Ang upat ka sugyot bahin sa pagpamalbas nakatabang ug dako. Karon buot niyang balbasan nako siya kada adlaw!

L. D., Alemanya

Pagbakak Akong nakaplagan ang artikulong “Ang Hunahuna sa Bibliya: Pagbakak​—May Panahon Bang Makataronganon Kini?” (Pebrero 8, 2000) nga makapatugaw sa hunahuna. Apan sa bisan unsang makataronganong kahubitan, dili ba gisaway sa Bibliya ang tanang panglimbong?

D. S., Tinipong Bansa

Sa Bibliya, ang pagpamakak sa kinatibuk-an naglangkit sa pagsulti sa usa ka butang nga bakak ngadto sa tawo nga angayng mahibalo sa kamatuoran ug nagbuhat niana nga may tuyo sa paglimbong o sa pagdaot kaniya o sa laing tawo. Busa ang mahinadlokon-sa-Diyos nga mga tawo sama ni Abraham, Isaac, Rahab, ug David nakigbahin sa mga matang sa panglimbong apan wala hukmi ingong mga bakakon. Siyempre, sila nagbuhat niana ilalom sa talagsaon nga mga kahimtang. Busa ang ilang mga lihok wala magpakamatarong sa dili angayng panglimbong. Pananglitan, kon ang usa ka Kristohanon nanumpa sa pagsulti sa kamatuoran diha sa korte, siya mahimong mosulti sa kamatuoran o kaha magpakahilom.​—ED.

Mga Pamilyang Walay Amahan Ang Pebrero 8, 2000 nga isyu naghisgot bahin sa siklo sa walay amahang mga anak. (“Mga Pamilyang Walay Amahan​—Pagpahunong sa Siklo”) Dili nako ikapahayag sa mga pulong kon unsa ka dako ang akong kahigawad ug kasuko human mabasa kini. Inyong gipaluyohan ang panggawi sa mga amahan nga mibiya sa balay pinaagi sa paghisgot sa lainlain nilang mga suliran sama sa mga katungod sa pagduaw ug sa ilang kahimtang sa panalapi. Asa na man ang pagbadlong? Asa na man ang pag-awhag sa mga lalaki sa pag-tul-id sa ilang mga sayop?

S. L., Tinipong Bansa

Masabtan pag-ayo namo kon unsa ka sakit gayod alang sa pipila ang pagkonsiderar nianang materyala, ilabina kon sila nahimong biniyaan. Apan ang artikulo wala tuyoa aron badlongon ang mga lalaki. Hinunoa, among gipaningkamotan ang pagpalambo sa pagsinabtanay sa duha ka kiliran bahin sa komplikadong mga isyu nga nalangkit. Among gihatag usab ang praktikal nga tambag ngadto sa mga biktima sa pagbiya. Makaiikag, ang paniklop nga artikulo, “Mga Pamilyang Walay Amahan​—Pagpahunong sa Siklo,” nagpahayag: “Ang pamilyahanong mga kiling karon mahunong lamang kon ang mga tawo andam mohimog dagkong mga kausaban diha sa ilang panghunahuna, ilang mga tinamdan, ilang panggawi, ilang mga pamatasan.”​—ED.

Sa dihang akong nakita ang hapin nga may hulagway sa usa ka batang babaye uban sa iyang amahan, nanglugmaw ang mga luha sa akong mga mata. Buot ko gayod nga makabaton ug relasyong sama niana uban sa akong amahan. Ang artikulo nagpaarang kanako sa pagsabot kon nganong nahitabo ang mga butang nga sama niini sa akong pamilya. Kadto maoy samag bidlisiw sa adlaw nga mituhop sa akong kagahapon ug nagtubag sa makapasubong mga pangutana nga atua didto sulod sa daghan kaayong tuig.

M. M., Tinipong Bansa