Hóbennan Sa Puntra . . .

Con Mi Por Trata cu e Situacion Awor Cu Tata A Bandoná Nos?

“Crece sin mi tata tabata duru. E único cos cu mi tabata kier ta un tiki atencion.”—Henry. *

JOAN tabatin 13 aña ora su tata a bai for di cas. Siendo cu e tata tabata un alcohólico pisá, el a haci masha tiki intento pa tuma contacto cu su yunan despues cu el a bai. Lamentablemente, e caso di Joan no ta único; hopi hóben a ser bandoná dor di nan tata.

Si esaki a pasa cu bo, por ta masha bon cu bo ta haña ta difícil pa trata cu e situacion. De bes en cuando bo por sinti cu dolor i rabia ta manera hoga bo. Tin biaha kisas bo ta sinti bo tristu i deprimí. Kisas bo ta asta sinti e tentacion pa rebeldiá. Manera e escritor bíblico Sálomon a yega di bisa: “Simpel opresion por haci un hende sabí actua manera un hende loco.”—Eclesiástes 7:7.

‘Actuando Manera Hende Loco’

James a “actua manera hende loco” despues cu su tata a bai for di cas. James a bisa: “Mi no tabata scucha niun hende den autoridad, ni sikiera mi mama. Mi tabata cana bringa hopi. Semper mi tabata gaña i sluip sali anochi for di cas, pasobra no tabatin niun hende pa disipliná mi. Mama a purba stop mi, pero e no tabata por.” E comportacion rebelde ei a ègt yuda James su situacion den bida? No. James ta bisa cu no a tarda hopi cu el a cuminsá “purba droga, spijbel i haña mal punto na scol.” Pronto su mal comportacion a escalá. E ta confesá: “Mi tabata horta den pacus, i tambe mi a atracá hende. Polis a arestá mi dos bes i mi a ser encarcelá pa un tempu corticu, pero esei no a stop mi.”

Ora a puntra James ta kico a hacié asina rebelde, e di: “Pasobra mi tata a bai, i mi no tabatin disiplina. Realmente mi no a pensa cuantu mi tabata hùrt mi mama ni mi ruman homber i ruman muher chikitu, i mi mes tambe. Mi tabata kier e atencion i disiplina di mi tata.”

Pero dor di rebeldiá bo ta solamente haci un situacion cu ta malu caba, bira pió. (Job 36:18, 21) Por ehempel, James a causa problema no solamente pa e mes, sino tambe pa su mama i rumannan, kendenan a sufri di stres i tension innecesario. Asta mas serio ta e echo cu e comportacion rebelde ei por pone un persona na malu cu Dios mes. Al fin i al cabo, Jehova ta manda hóbennan pa ser obediente na nan mama.—Proverbionan 1:8; 30:17.

 Venciendo e Rabia

Con anto bo por trata cu e rabia i rencor cu kisas bo ta sinti pa bo tata? Na promé lugá, lo bo tin cu recordá bo mes cu e echo cu bo tata a bai no ta bo falta. Ni esei no kier men necesariamente cu e no ta stima bo mas ni ta interesá den bo. Ta cierto sí cu por ta doloroso ora un tata ta haci tiki esfuerso pa bel of pasa. Pero manera e artículo anterior den e seri aki a mustra, * hopi tata cu no ta na cas ta perde contacto cu nan yunan, no pasobra nan no stima nan, sino pasobra sintimentunan di culpa i bergwensa ta caba cu nan. Otro tatanan, manera e tata di Joan, ta drogadicto of alcohólico, i esaki ta stroba nan abilidad di funcioná normal.

Sea cual sea e situacion, purba corda cu bo mayornan ta imperfecto. Bijbel ta declará: “Tur a peca i no ta alcansá e gloria di Dios.” (Romanonan 3:23; 5:12) Ta berdad cu esaki no ta un excuus pa comportacion perhudicial of iresponsabel. Pero reconociendo e echo cu nos tur ta imperfecto di naturalesa, ta hacié mas fácil pa bo libra di rabia i rencor destructivo.

Loke ta ser bisá na Eclesiástes 7:10 por yuda bo trata cu e rabia i rencor cu podisé bo ta sinti pa bo mayornan. Tuma nota con e ta spierta pa no enfocá riba pasado: “No bisa: ‘Pakico a sosodé cu e dianan di ántes a resultá di ta mihó cu esakinan?’ pasobra no ta debí na sabiduria cu bo a puntra tocante esaki.” Pues, en bes di sigui pensa riba e manera cu cosnan tabata un tempu, ta mihó bo enfocá riba saca lo mihó di bo situacion actual.

Tumando e Iniciativa

Por ehempel, kisas bo por considerá pa tuma e iniciativa pa haci contacto cu bo tata. Ta berdad cu ta é ta esun cu a bai laga bo i tal bes bo tin rason di sinti cu ta su responsabilidad pa dal e promé paso. Pero si e no ta hacié i e falta di contacto cuné ta haci bo tristu i infelis, lo no ta bale la pena pa bo mes purba drecha e situacion? Considerá con Jesucristo a atendé e asuntu ora algun di su amigunan a hùrt e. E último anochi di su bida humano, su apostelnan a bandon’é. Pedro a broma cu e sí lo a keda cu Jesus sin importá kico pasa. Sin embargo, Pedro a nenga Jesus, i no un biaha, sino tres biaha!—Mateo 26:31-35; Lucas 22:54-62.

Asina mes, Jesus a sigui stima Pedro apesar di Pedro su faltanan. Despues di Jesus su resureccion, Jesus a dal e promé paso pa reestablecé nan relacion dor di haci un aparicion special na Pedro. (1 Corintionan 15:5) Ta interesante cu ora Jesus a haci Pedro e pregunta: “Bo ta stima mi?” Pedro su contesta tabata: “Sí, Señor, bo sa cu mi tin cariño pa bo.” Apesar  di Pedro su accion bergonsoso, ainda el a stima Jesus.—Juan 21:15.

Mescos cu tabata e caso di Pedro cu Jesus, e situacion cu bo tata kisas no ta dje sin speransa ei manera e ta parce. Podisé lo e reaccioná faborabel si bo tuma un poco iniciativa dor di por ehempel bel e, skirbié un carta of pasa bishit’é. Henry, mencioná na comienso, ta corda: “Un biaha mi a skirbi mi tata, i el a skirbí mi bek bisando cu e ta masha orguyoso di mi. Mi a pone e carta ei den leshi i pa hopi aña mi tabatiné cologá na muraya. Te awe mi tiné.”

Joan i su rumannan tambe a tuma e iniciativa pa bishitá nan tata alcohólico. Joan ta admití: “Su condicion no tabata mashá di gaba, pero tog tabata bon pa mir’é.” Kisas den bo caso tambe, si bo tuma e iniciativa lo bo tin resultado. Si na promé instante e no reaccioná, kisas bo por laga poco tempu pasa anto bolbe purba.

Tratando cu e Dolor di Rechaso

Sálomon ta recordá nos cu tin “un tempu pa busca i un tempu pa considerá como perdí.” (Eclesiástes 3:6) Tin biaha un hóben mester aceptá e echo doloroso cu su tata no kier tin un relacion cu su yunan. Si esaki ta e caso cu bo tata, kisas riba un dia lo e realisá cuantu el a perde dor di keda sin mantené un relacion cu bo.

Pero miéntras tantu, sea sigur cu e echo cu e ta rechasá bo no kier men cu bo no ta bal nada. E salmista bíblico David a bisa: “Den caso cu mi mes tata i mi mes mama bandoná mi, asta Jehova mes lo ricibí mi.” (Salmo 27:10) Sí, ainda bo ta di gran balor den bista di Dios.—Lucas 12:6, 7.

Pues si bo ta sinti bo down of deprimí, hala cerca Dios via oracion. (Salmo 62:8) Bis’é precis con bo ta sinti. Sea sigur cu lo e scucha bo i consolá bo. Un otro salmista bíblico a skirbi: “Ora mi pensamentunan inkietante a bira hopi den mi, bo mes consolacion a cuminsá cariciá mi alma.”—Salmo 94:19.

Asociacion caluroso cu compañeronan cristian tambe por yuda bo trata cu e rechaso ei. Proverbionan 17:17 ta bisa: “Un berdadero compañero ta stima na tur tempu, i ta un ruman cu a nace pa ora tin angustia.” Bo por haña tal berdadero compañero den e congregacion cristian di Testigonan di Jehova. Lo ta foral útil pa bo siña conocé algun dje superintendentenan di congregacion. Joan su ruman homber Peter ta duna e conseho aki: “Papia cu esnan di edad den e congregacion, i nan lo yuda bo hopi. Si bo tata a bandoná bo, laga nan sa con bo ta sinti.” Tambe superintendentenan di congregacion kisas por duna bo algun sugerencia práctico en cuanto con pa manehá algun dje responsabilidadnan cu ántes bo tata tabata soru p’e, manera por ehempel drecha cos na cas.

Bo mama tambe por ta un fuente di apoyo. Ta berdad cu kisas e mes tambe ta sufriendo di angustia emocional. Pero si bo expresá bo sintimentunan cu respet, sin duda lo e haci su best pa reaccioná bon.

Apoyá Bo Famia!

Podisé e ausencia di bo tata ta causa un impacto riba bo famia den vários manera. Por ta bo mama tin cu busca un trabou—podisé asta dos trabou—pa logra cubri necesidadnan básico. Por ta abo cu bo rumannan tin cu carga mas responsabilidad di cas. Pero bo por trata cu e cambionan ei si bo cultivá amor cristian inegoista. (Colosensenan 3:14) Esaki por yuda bo mantené un actitud positivo i dominá rencor. (1 Corintionan 13:4-7) Peter ta bisa: “Yuda mi famia ta e cos corecto pa haci, i mi ta sinti mi bon dor cu mi sa cu mi ta yuda mi mama i mi ruman muhernan.”

Sin duda, ora un tata bai for di cas esei ta un suceso trágico i doloroso. Pero bo por tin sigur cu, cu Dios su yudansa i cu yudansa di amigu i famianan cristian amoroso, abo i bo famia por trata cu e situacion cu éxito. *

[Nota]

[Plachinan na página 26]

Tin hóben cu a tuma e iniciativa pa haña contacto cu nan tata