Go Kgakgelwa Lenyalong le le Hlokago Lerato

“Lekokong leo le nago le palo ya godimo ya tlhalo, ga se feela gore manyalo a mantši ao a sa thabago mo gongwe a ka feleletša ka tlhalo, eupša go oketša moo, manyalo a mantši go bonala e tla ba a sa thabago.”—COUNCIL ON FAMILIES IN AMERICA.

GO BOLETŠWE gore bogolo bja lethabo la bophelo le bogolo bja manyami a bjona bo tšwa mothopong o tee—lenyalong la motho. Ruri ke dilo tše sego kae bophelong tšeo di ka tlišago lethabo le legolo—goba tlalelo e kgolo go etša lenyalo. Bjalo ka ge lepokisi leo le sepedišanago le sehlogo se le bontšha, banyalani ba bantši ba tlalelwa go feta tekanyo.

Eupša dipalo-palo tša tlhalo di bontšha feela karolo ya bothata. Go lenyalo le lengwe le le lengwe leo le nwelago, a mangwe a mantši-ntši a a phaphamala eupša a kgakgelwa ka meetseng ao a emego. Mosadi yo a nyetšwego lebaka la nywaga ya ka godimo ga e 30 o ipobotše ka gore: “Re kile ra ba lapa le thabilego, eupša nywaga e 12 e fetilego e bile e boifišago. Monna wa-ka ga a sa kgomega ka maikwelo a-ka. Ruri ke lenaba le lešoro la maikwelo a-ka.” Ka mo go swanago, monna yo a nyetšego ka nywaga e nyakilego go ba 25 o llile ka gore: “Mosadi wa-ka o mpoditše gore ga a sa hlwa a nthata. O bolela gore ge feela re ka no dudišana ka gae gomme yo mongwe le yo mongwe a ikela mo a ratago ge go tliwa nakong ya boitapološo, boemo bo ka kgotlelelega.”

Go ba gona, ba bangwe bao ba lego tlalelong e bjalo e boifišago, ba fediša lenyalo la bona. Lega go le bjalo, ba bantši ga ba nyake tlhalo. Ka baka la’ng? Go ya ka Dr. Karen Kayser, mabaka a bjalo ka bana, go goboga setšhabeng, ditšhelete, bagwera, meloko le ditumelo tša bodumedi di boloka banyalani ba le gotee gaešita le boemong bja go hloka lerato. O bolela gore: “Ka ge go bonala ba ka se hlale ka molao, balekane ba ba kgetha go dula le molekane yo ba mo hladilego maikwelong.”

Na banyalani bao tswalano ya bona e fodilego ba swanetše go itokolla bophelong bjo bo sa kgotsofatšego? Na kgetho e nnoši yeo e lego gona lenyalong leo le hlokago lerato ke tlhalo? Phihlelo e bontšha gore manyalo a mantši ao a nago le mathata a ka phološwa—e sego feela tlalelong ya go phumega eupša gape le manyaming a go hloka lerato.

[Lepokisi go letlakala 3]

TLHALO GO DIKOLOGA LEFASE

• Australia: Tekanyo ya tlhalo e nyaka e ipoeletša ka makga a mane ga e sa le go tloga mathomong a bo-1960.

• Brithania: Go ya ka dipolelelo-pele, manyalo a 4 go a 10 a tla feleletša ka tlhalo.

• Canada le Japane: Tlhalo e kgoma mo e ka bago karolo ya boraro ya manyalo.

• United States: Ga e sa le go tloga ka 1970, balekane bao ba nyalanago ba na le dibaka tše lekanago tša go dula gotee le tša go hlalana.

• Zimbabwe: Tlhalo e fediša mo e ka bago manyalo a 2 go a mangwe le a mangwe a 5.