Na go na le Lebaka la go ba le Kholofelo?

“Bothata bjo bongwe manyalong a nago le dikgateletšo ke go dumela ka go tia gore dilo di ka se kaonefale. Tumelo e bjalo e thibela phetogo ka gobane e go amoga boikemišetšo bja go leka selo le ge e le sefe seo se ka tlišago kaonefatšo.”—Dr. Aaron T. Beck.

NAGANA o le bohlokong gomme wa ya ngakeng bakeng sa go hlahlobja. O tshwenyegile—gomme e le ka mo go kwagalago. Go feta moo, boemo bja gago bja tša maphelo—gaešita le bophelo bja gago ka bobjona—bo ka ba bo le kotsing. Eupša a re re ka morago ga tlhahlobo, ngaka e go nea ditaba tše dibotse tša gore gaešita le ge bothata bja gago e tloga e le bjo bogolo, fela bo ka alafega. Ge e le gabotse, ngaka e go botša gore ge e ba o ka kgomarela ka tlhokomelo lenaneong le le swanetšego la dijo le boitšhidullo, o ka lebelela go fola ka mo go feletšego. Ka ntle le pelaelo o tla ikwa o imologile kudu gomme o tla latela keletšo ya gagwe ka lethabo!

Bapiša boemo bjo le taba ye e ahla-ahlwago mo. Na o welwa ke mahloko lenyalong la gago? Ke therešo gore lenyalo le lengwe le le lengwe le tla ba le mathata a lona le diphapano tša lona. Ka gona, go fo ba le dinako tše itšego tše thata tswalanong ya lena ga go bolele gore le na le lenyalo leo le hlokago lerato. Eupša go thwe’ng ge e ba boemo bjo bohloko bo phegelela lebaka la dibeke, dikgwedi goba gaešita le nywaga? Ge e ba go le bjalo, o tshwenyegile ka tshwanelo, ka gobane ye ga se taba e nyenyane. Ka kgonthe, boemo bja lenyalo la gago bo ka kgoma mo e nyakilego go ba dibopego ka moka tša bophelo bja gago—gotee le bja bana ba gago. Ka mohlala, go dumelwa gore kgateletšego ya lenyalo e ka ba lebaka le legolo mathateng a bjalo ka kgateletšego, go ba le tšweletšo ya tlase ga mošomi le go palelwa ga bana sekolong. Eupša ga go felele moo. Bakriste ba lemoga gore tswalano yeo ba nago le yona le molekane wa bona e ka kgoma tswalano ya bona ka noši le Modimo.—1 Petro 3:7.

Therešo ya gore go na le mathata magareng ga gago le molekane wa gago ga e bolele gore boemo bo ka se ke bja lokišwa. Go lebana le therešo ya lenyalo—ya gore go tla ba le ditlhohlo—go ka thuša balekane go lebelela mathata a bona ka pono e nepagetšego le go šomela go hwetša ditharollo. Monna yo a bitšwago Isaac o re: “Ke be ke sa kwešiše gore ke mo go tlwaelegilego go balekane ba lenyalo gore ba be le dinako tša go phagama le go theoga ga tekanyo ya lethabo la bona lenyalong. Ke be ke nagana gore go be go e-na le selo seo se fošagetšego ka rena!”

Gaešita le ge lenyalo la lena le theogetše boemong bja go hloka lerato, le ka phološwa. Go ba gona, dintho tšeo di bakilwego ke tswalano yeo e nago le mathata e ka ba tšeo di tseneletšego, kudu-kudu ge e ba mathata a ile a phegelela ka lebaka la nywaga. Lega go le bjalo, go na le lebaka le le tiilego la go ba le  kholofelo. Boikemišetšo ke lebaka le legolo. Gaešita le batho ba babedi bao ba nago le mathata a magolo a lenyalo, ba ka dira dikaonefatšo ge e ba go le bohlokwa ka mo go lekanego go bona ka bobedi. *

Ka gona, ipotšiše, ‘Kganyogo ya-ka ya go fihlelela tswalano e kgotsofatšago, e matla gakaaka’ng?’ Na wena le molekane wa gago le ikemišeditše go dira boiteko bja go kaonefatša lenyalo la lena? Dr. Beck yo a tsopotšwego pejana o re: “Ke makaditšwe gantši ke kamoo tswalano yeo e bonalago e le e mpe e ka lokišwago ge balekane ba šomišana bakeng sa go phošolla diphošo le go tiiša dika tše dibotse tša lenyalo la bona.” Eupša go thwe’ng ge e ba molekane wa gago a dika-dika go šomišana le wena? Goba go thwe’ng ge e ba a bonala a sa tshwenyege ka taba ya gore go na le bothata? Na ke ga lefeela go wena go katanela go atlega ga lenyalo o nnoši? Le gatee! Dr. Beck o re: “Ge e ba o dira diphetogo tše itšego, se ka bosona se ka hlohleletša diphetogo go molekane wa gago—gantši se dira bjalo.”

O se ke wa akgofela go phetha ka gore seo se ka se direge tabeng gago. Kgopolo e bjalo ya go palelwa o se wa leka ka boyona e ka ba kotsi e kgolo kudu lenyalong la lena! Yo mongwe wa lena o swanetše go gata mogato wa pele. Na e ka ba wena? Ge feela o kgonne go thoma, molekane wa gago a ka bona mohola wa go šomišana le wena go ageng lenyalo le le thabilego.

Ka gona, ke eng seo o ka se dirago—o nnoši goba ka bobedi bja lena—bakeng sa go phološa lenyalo la lena? Beibele ke thušo e matla go arabeleng dipotšišo tše. Anke re boneng gore bjang.

[Mongwalo wa ka tlase]