Pe Iai se Māfuaaga mo se Faamoemoe?

“O se tasi o faafitauli i faaipoipoga o fetaiaʻi ma mafatiaga ogaoga, o le talitonuga malosi faapea e lē mafai ona toe faaleleia le tulaga o mea. O se talitonuga faapena e feteenaʻi ma le faia o ni suiga auā e aveesea ai lou naunautaʻiga ina ia taumafai e faia so o se mea e aogā.”—DR. AARON T. BECK.

SEʻI faapea o loo e logo tigā ma ua e alu atu e vaai se fomaʻi seʻi siaki oe. Ua e matuā lē manofo—ma o se uiga masani lava. Aemaise, o lou soifua mālōlōina—e oo lava i lou ola—atonu ua iai i se tulaga lamatia. Ae seʻi faapea la ina ua uma suʻesuʻega, ona taʻu mai loa lea ia te oe e le fomaʻi se tala lelei e faapea, e ui ina matuā lē masani aʻi lava le faafitauli ua e maua ai, ae peitaʻi e mafai ona togafitia. Ua taʻu mai e le fomaʻi ia te oe, pe afai e te pipiimau atu ma le faaeteete i se polokalame talafeagai o le fuafuaina o taumafa tatau ma faamalositino, e mafai ona e faatalitalia le toe faafoʻisia atoatoa o lou malosi. E mautinoa o le a e lagonaina se mapusaga tele ma o le a e fiafia ai e usitaia lana fautuaga!

Seʻi faatusatusa mai lenei vaaiga faafaatusa i le mataupu o loo talanoaina. Po o e faafesagaʻia ea ni tigā i lau faaipoipoga? O le mea moni, e oo uma lava i faaipoipoga taʻitasi ni faafitauli ma feeseeseaʻiga. E lē avea la le iai o taimi faigatā i le lua mafutaga, e faapea ai ua leai se alofa i le lua faaipoipoga. Ae faapefea pe afai ua faitau vaiaso, faitau masina, po ua faitau tausaga foʻi, o iai pea lea tulaga tigā? Pe afai o le tulaga lena, ua tatau ai la ona e popole, auā e lē o se mataupu lenei e masani aʻi. O le mea moni, o le tulaga lelei o lau faaipoipoga e mafai ona aafia atoa ai vala taʻitasi o lou olaga—ma olaga o lau fanau. Mo se faataʻitaʻiga, ua talitonuina faapea, o mafatiaga e puna mai i le faaipoipoga, e mafai ona avea o se māfuaaga tele i faafitauli e pei o faalogona mafatia, o le faaitiitia o le galue lelei a se tagata faigaluega, ma le lē pasi ai o suʻega a le fanau i le aʻoga. Ae ua lē na o le pau ai lena. Ua iloa lelei lava e Kerisiano, o a latou faiā ma a latou paaga e mafai ona aafia ai la latou lava faiā ma le Atua.—1 Peteru 3:7.

O le iai o faafitauli i le vā o oe ma lau paaga e lē uiga ai faapea ua leai se faamoemoe e toe faaleleia le tulaga ua iai. O le fesagaʻia o le tulaga moni o le faaipoipoga—faapea o le a iai luʻi—e mafai ona fesoasoani i se ulugalii e vaai ai i o la faafitauli o ni mea e mafai ona toe faaleleia, ma la galulue ai ina ia saʻilia ni vaifofō. Ua faapea mai se tane e igoa ia Isaako: “Sa leai ma soʻu iloa faapea o se mea masani mo ulugalii le lugā lalō o lo la tulaga fiafia a o faagasolo le la faaipoipoga. Na faapea lava aʻu ai o iai se faalētonu ia i maʻua!”

E tusa lava po ua matuā leagafaia le lua faaipoipoga ona o se tulaga ua leai se alofa, e mafai lava ona toe laveaʻiina. E mautinoa, e mafai ona matuā tugā manuʻa e maua mai i se mafutaga o loo fesagaʻi ma ni faafitauli, aemaise lava pe afai ua tausagā o iai pea faafitauli. Ae o loo iai pea se māfuaaga malosi mo se faamoemoe. O uunaʻiga o le loto o se tasi lea o vala e tāua tele. E oo lava i ni tagata se toʻalua o loo fesagaʻi ma ni faafitauli matuiā i le la faaipoipoga, e mafai ona  la faia ni faaleleiga pe afai e la te iloa o se mea e tāua tele ia i laʻua uma. *

Fesili ifo la ia te oe lava, ‘O le ā le malosi o loʻu faanaunauga ina ia maua se mafutaga faamalieina?’ Po o lua lotomalilie ea ma lau paaga e fai ni lua taumafaiga ina ia faaleleia ai le lua faaipoipoga? O Dr. Beck, lea sa taʻua i le amataga o le mataupu, ua faapea mai: “E masani ona ou maofa i nisi mafutaga sa matuā manino mai lava le leaga, ae na mafai ona toe faaleleia ona o le galulue faatasi o paaga e faasaʻo ni vala lē lelei ma toe faamalosia vala lelei o le la faaipoipoga.” Ae faapefea pe a musu lau paaga e te lua galulue faatasi i le faaleleia o le lua faaipoipoga? Ae faapefea pe afai e foliga e na te lē o iloa o loo iai se faafitauli? Po ua leai ea se aogā o lou toe taumafai o oe lava e faaleleia le faaipoipoga? E matuā leai lava! Ua faapea mai Dr. Beck: “Pe afai e te faia ni suiga, e mafai lava e lenei mea ona uunaʻia ai foʻi lau paaga e fai ni suiga—e masani lava ona tupu lena mea.”

Aua e te vave faia se faaiʻuga faapea e lē mafai ona tupu lenei mea ia te oe. O se ituaiga o mafaufauga toʻilalo faapena e mafai ona avea o se faamataʻuga sili i lau faaipoipoga! E iai se tasi o oulua e manaʻomia ona faia le uluaʻi laasaga. Pe mafai ona e faia? O le taimi lava e mautū mai ai le faia o lena gaoioiga, e ono iloa atu ai e lau paaga le aogā o le lua galulue faatasi i le atiina aʻe o se faaipoipoga e sili atu ona fiafia.

O lea la, o le ā se mea e mafai ona e faia—pe na o oe po o oulua uma—ina ia laveaʻiina ai le lua faaipoipoga? O le Tusi Paia lava o se fesoasoani malosi lea i le taliina o lenei fesili. Seʻi o tatou vaai pe faapefea.

[Faaopoopoga i lalo]