Pagpanugal—Gikalingawan sa Tibuok Yuta

SI John, nga nagdako sa Scotland, nangandoy nga makadaog sa loteriya. “Mopalit ako ug tiket sa loteriya kada semana,” matod niya. “Gamay ra ang akong magasto, apan ang maong tiket naghatag nakog paglaom nga makabaton sa tanan nga gipangandoy nako sukad.”

Si Kazushige, nga nagpuyo sa Japan, gusto sa karera sa kabayo. “Ang pagpanugal diha sa mga karerahan sa kabayo uban sa akong mga higala makalingaw kaayo, ug usahay makadaog ko ug dakong kantidad sa salapi,” siya nahinumdom.

“Ang binggo maoy akong paboritong dula,” matod ni Linda, nga nagpuyo sa Australia. “Tungod niining maong bisyo mogasto ako ug mga $30 kada semana, apan ganahan ko sa bationg kahinam kon makadaog.”

Si John, Kazushige, ug Linda nag-isip sa pagpanugal ingong dili kaayo makadaot nga matang sa kalingawan. Gatosan ka milyong tawo sa tibuok yuta ang sama nianag panglantaw. Usa ka 1999 nga surbi sa Gallup nagpakita nga dos tersiya sa mga Amerikano ang miuyon sa pagpanugal. Sa 1998, ang Amerikanong mga sugarol migasto ug mga $50 bilyones diha sa legal nga sugal​—labaw pa kay sa ilang nagasto diha sa mga tiket sa sine, girekord nga mga musika, mga esport nga gidugok sa mga tawo, mga parke sa kalingawan, ug mga dula sa video, kon tiponon.

Sumala sa usa ka bag-ong pagtuon, sulod sa usa ka tuig, kapin sa 80 porsiyento sa mga tawo sa Australia ang nanugal labing menos kas-a, ug 40 porsiyento ang nanugal kada semana. Ang mga hamtong sa maong nasod, sa aberids, mogasto ug kapin sa $400 (U.S.) kada tuig sa pagpanugal, mga duha ka pilo sa magasto sa mga taga-Uropa ug mga Amerikano, nga tungod niini ang mga Australiano mao ang mga hilabihan ka sugarol sa kalibotan.

Daghang Hapon ang nagiyan sa pachinko, usa ka dula nga samag pinball, ug mogasto ug bilyonbilyon kada tuig sa  pagpusta sa maong dula. Sa Brazil, labing menos $4 bilyones ang magasto kada tuig sa pagpanugal, nga ang dakong bahin niana diha sa mga tiket sa loteriya. Apan dili mga Braziliano lamang ang ganahan sa mga loteriya. Ang magasing Public Gaming International di pa dugayng nagkalkulo nga dunay “306 ka loteriya diha sa 102 ka nasod.” Ang pagpanugal tinuod gayod nga gikalingawan sa tibuok yuta​—usa ka kalingawan nga, matod pa sa pipila, naghatag ug dagkong mga benepisyo.

Si Sharon Sharp, usa ka hawas sa Public Gaming Research Institute, nag-ingon nga sa Tinipong Bansa gikan sa 1964 hangtod sa 1999, ang kita gikan sa loteriya “maoy nagtagana sa gobyerno ug duolan sa $125 bilyones nga pondong dolyar, nga ang dakong bahin niining maong kita misulod sukad sa 1993.” Ang dakong bahin niining maong salapi gigahin alang sa edukasyonal nga mga programa sa publiko, mga parke sa estado, ug sa pagtukod ug mga pasilidad sa esport alang sa publiko. Ang industriya sa pagpanugal daghan usab kaayo ug mga trabahante, ug sa Australia lamang, kini adunay duolan sa 100,000 ka trabahante diha sa kapin sa 7,000 ka negosyo.

Busa ang mga tigpaluyo sa pagpanugal nangatarongan nga gawas pa sa pagtaganag kalingawan, ang legal nga mga sugal nagmugnag mga trabaho, nagtaganag buhis, ug nagpauswag sa nahapay nga lokal nga mga ekonomiya.

Busa, daghang tawo ang mangutana, ‘Unsa may daotan sa pagpanugal?’ Ang tubag niining pangutanaha, nga hisgotan sa sunod nga mga artikulo, mag-usab tingali sa imong panglantaw labot sa pagpanugal.

[Hulagway sa panid 3]

John

[Hulagway sa panid 3]

Kazushige

[Hulagway sa panid 3]

Linda