Sugal​—Sangalubongan a Pakakayawan

DIMMAKKEL ni John idiay Scotland. Ar-arapaapenna ti mangabak iti loteria. “Linawas a gumatangak idi iti tiket ti loteria,” kunana. “Bassit laeng ti magastok, ngem ti tiket ti nangipanamnama kaniak a magun-odakto ti amin a tarigagayak.”

Pagay-ayat ni Kazushige a taga Japan ti karera iti kabalio. “Pagragsakanmi unay nga aggagayyem ti agsugal iti pagkareraan ti kabalio, ket no dadduma, mangabakak iti dakkel a gatad ti kuarta,” malagipna.

“Paboritok nga ay-ayam ti bingo,” kuna ni Linda a taga Australia. “Daytoy a bisio ti paggastosak iti $30 iti kada lawas, ngem magagaranak a mangabak.”

Ti sugal ket minatmatan da John, Kazushige, ken Linda kas di makadangran a paglinglingayan. Kasta met ti panangmatmat ti ginasut a milion a tattao iti intero a lubong. Sigun iti nasurbey ti Gallup idi 1999, dua a kakatlo kadagiti Americano ti umanamong iti panagsugal. Idi 1998, ginasto dagiti mannugal nga Americano ti agarup $50 a bilion kadagiti legal a sugal​—ad-adu nga amang ngem iti dagup a ginastoda kadagiti tiket ti sine, nairekord a musika, panagbuya ti isports, paglinglingayan kadagiti parke, ken video game.

Sigun iti nabiit pay a panagadal, kabayatan ti intero a makatawen, nasurok a 80 a porsiento kadagiti umili ti Australia ti nagsugal iti naminsan, ket 40 a porsiento ti nagsugal iti kada lawas. Iti promedio, dagiti adulto iti dayta a pagilian gumastoda iti nasurok nga $400(E.U.) iti sugal iti kada tawen, agarup mamindua iti gastosen dagiti taga Europa ken America, a mamagbalin kadagiti Australiano a kangrunaan a sugador iti intero a lubong.

Adu a Hapones ti naadikto iti ay-ayam a pachinko, nga umasping iti ay-ayam a pinball, ket gumastoda iti $240 a bilion iti pusta iti kada tawen. Idiay Brazil, di kumurang nga  $4 a bilion ti magasto iti sugal iti kada tawen, a kaaduan kadagitoy ket iti tiket ti loteria. Ngem saan laeng a dagiti taga Brazil ti maay-ayatan iti loteria. Nabiit pay a pinattapatta ti magasin a Public Gaming International nga adda “306 a loteria iti 102 a pagilian.” Talaga a nakayawan ti intero a lubong iti sugal. Kuna ti dadduma a daytat’ pakakayawan a mangyeg iti adu a pagimbagan.

Kuna ti maysa a pannakabagi ti Public Gaming Research Institute a ni Sharon Sharp, nga idiay Estados Unidos, nanipud idi 1964 agingga iti 1999, ti birok ti loteria ket “nakaipaay iti gobierno iti pondo nga agarup $125 a bilion, a ti kadakkelan a paset daytoy a birok ket napastrek nanipud 1993.” Kaaduan iti daytoy a kuarta ket nailatang para kadagiti pangpubliko a programa ti edukasion, pangmantener kadagiti parke ti gobierno, ken pagaramid kadagiti pasilidad a pagay-ayaman. Makaipaay met ti industria ti sugal iti adu a panggedan, ket idiay Australia laengen, agarup 100,000 ti empleado ti nasurok a 7,000 a negosio a sugal.

Isu nga ikalintegan dagiti promotor iti sugal a malaksid iti pananglinglingayna, ti legal a sugal ket mangpataud pay kadagiti panggedan, birok manipud iti buis, ken papigsaenna dagiti nakapuyen nga ekonomia.

Adu ngarud a tattao ti mangyimtuod, ‘Ania ti pagdaksan ti sugal?’ Ti sungbat daytoy a saludsod, a maisalaysay kadagiti sumaganad nga artikulo, ket mabalin a balbaliwanna ti panangmatmatmo iti sugal.

[Ladawan iti panid 3]

John

[Ladawan iti panid 3]

Kazushige

[Ladawan iti panid 3]

Linda